འདི་ནི་མི་དམངས་ཉེན་རྟོག་པས་ཉེན་ཁར་གྱར་བའི་རླངས་འཁོར་སྐྱོབ་བཞིན་པ།

ལ་རྒན་ལའི་ས་བབ་མཐོ་ཚད་སྨི་5190ཟིན་པ་དང་དེ་ནི་གནམ་མཚོར་སྐྱོད་སྐབས་བརྒྱུད་དགོས་ངེས་ཀྱི་ལམ་བུ་ཞིག་རེད། ཉེ་ཆར་མཁའ་རླུང་གྲང་མོའི་ཤུགས་རྐྱེན་ཐེབས་ནས་ལྷ་ས་གྲོང་ཁྱེར་འདམ་གཞུང་རྫོང་ཀོང་ཐང་ཤང་གི་ལ་རྒན་ལའི་ཁུལ་དུ་ཁ་བ་ཆེན་པོ་བསྟུད་མར་བབས་པའི་ཡུལ་ལྗོངས་ལས་གནམ་མཚོར་སྐྱོད་མཁན་ཡུལ་སྐོར་བ་འགའི་ཡིད་དབང་འཕྲོག ཁ་བའི་མཛེས་པར་ལྟ་ཆེད་ཡུལ་སྐོར་བ་རེ་ཟུང་གིས་རླངས་འཁོར་བཏང་ནས་གངས་ཀྱི་དཀྱིལ་དུ་བསྐྱོད་པས། འཁོར་རིགས་དིམ་པའམ་གཞོགས་ལོག་པ་སོགས་ཀྱི་རྐྱེན་པས་ལས་འཛོལ་ཐོན་ནས་དེ་གར་ལུས།

ཟླ་1ཚེས་22ཉིན་གྱི་ཆུ་ཚོད་11ཙམ་ལ་འདམ་གཞུང་རྫོང་སྤྱི་བདེ་ཅུས་ཀོང་ཐང་ཤང་མངགས་གཏོང་ཁང་ལ་བཀོད་འདོམས་ལྟེ་གནས་ཀྱི་བཀའ་འབྱོར་ནས་ཞིང་ཆེན་ལམ་206རྒྱུད་ཀྱི་ལ་རྒན་ལའི་ཁུལ་དུ་ཡུལ་སྐོར་བ་ཞིག་ཉེན་ཁའི་གནས་སུ་གྱར་འདུག་པས་རོགས་སྐྱོབ་བྱེད་པར་འགྲོ་དགོས་ཞེས་བཤད་པ་རེད། དེ་འཕྲལ་འདམ་གཞུང་རྫོང་སྤྱི་བདེ་ཅུས་ཀོང་ཐང་ཤང་མངགས་གཏོང་ཁང་གི་མི་དམངས་ཉེན་རྟོག་པས་རོགས་སྐྱོབ་སྒྲིག་ཆས་ཁྱེར་ནས་ས་གནས་ས་ཐོག་ཏུ་བསྐྱོད་དེ་རོགས་སྐྱོབ་ལས་དོན་སྤེལ་བ་རེད།

ས་གནས་ས་ཐོག་ཏུ་འབྱོར་རྗེས་མི་དམངས་ཉེན་རྟོག་པར་ཤེས་རྟོགས་བྱུང་གསལ། ཡུལ་སྐོར་བ་ཞུས་ལགས་རླངས་འཁོར་བཏང་ནས་གནམ་མཚོར་འགྲོ་བའི་ལམ་བར་ལ་རྒན་ལ་བརྒྱུད་སྐབས། ལམ་འགྲམ་གྱི་ཁ་བའི་ཡུལ་ལྗོངས་ཧ་ཅང་མཛེས་པོ་ཡོད་པ་མཐོང་སྟེ། རླངས་འཁོར་བཏང་ནས་གངས་ཁྲོད་དུ་སྐྱོད་པས་གློ་བུར་དུ་རླངས་འཁོར་གྱི་གློག་ཤི་ནས་མེ་འབར་མེད་པ་རེད། གནས་ཚུལ་དེ་ཤེས་རྗེས། མི་དམངས་ཉེན་རྟོག་པས་འཕྲལ་མར་ཉེན་རྟོག་རླངས་འཁོར་ནས་ལྕགས་ཁྱེམ་དང་འདྲེད་འགོག་ལྕགས་ཐག་སོགས་བཏོན་ཏེ། ཉེ་འཁོར་གྱི་གངས་གསོག་གཙང་མར་འཕྱག་རྗེས་ཉེན་གྱར་རླངས་འཁོར་དེར་འདྲེད་འགོག་ལྕགས་ཐག་བསྒར་བ་དང་འབྲེལ་མིས་རྒྱབ་ནས་འབུད་རྒྱག་བརྒྱབ་པ་དང་མདུན་ནས་ཉེན་རྟོག་རླངས་འཁོར་གྱིས་འཐེན་ཏེ་ཆུ་ཚོད་གསུམ་ཙམ་འབད་བརྩོན་བྱས་མཐར། ཉེན་ཁར་གྱར་བའི་རླངས་འཁོར་དེ་ཉེན་ཁ་ལས་སྒྲོལ་ཐུབ་པ་རེད།

“ད་ཐེངས་རླངས་འཁོར་བཏང་ནས་གནམ་མཚོར་ཡོང་སྐབས་ལམ་བར་གྱི་ལ་རྒན་ལའི་མཐའ་འཁོར་གྱི་ཡུལ་ལྗོངས་ལ་ལྟ་འདོད་ཆེན་པོ་བྱུང་བས་རླངས་འཁོར་བཏང་སྟེ་པར་རྒྱག་དགོས་སྙམ་མོད། འོན་ཀྱང་བསམ་ཡུལ་ལས་འདས་པར་དེ་གར་ལུས་བྱུང་། ལ་རྒན་ལའི་སྤྱི་བདེས་གྲང་ངར་ལ་མ་འཛེམས་པར་རོགས་སྐྱོབ་བྱེད་པར་སླེབས་བྱུང་བས་རང་ཉིད་ལ་སེམས་འགུལ་ཆེན་པོ་ཐེབས་བྱུང་ལ། དྲོ་སྐྱིད་ཀྱང་ཆེན་པོ་ཚོར་བྱུང”ཞེས་ཉེན་ཁ་ལས་ཐར་རྗེས་ཡུལ་སྐོར་བ་ཞུས་ལགས་ཀྱིས་སེམས་འགུལ་ཆེན་པོ་ཐེབས་བཞིན་མི་དམངས་ཉེན་རྟོག་པར་དེ་ལྟར་བཤད།

འདམ་གཞུང་རྫོང་སྤྱི་བདེ་ཅུས་ཀོང་ཐང་ཤང་མངགས་གཏོང་ཁང་གི་མི་དམངས་ཉེན་རྟོག་པས། ཉེ་དུས་ཀོང་ཐང་ཤང་མངགས་གཏོང་ཁང་ལ་ཉེན་དོན་དེ་རིགས་ཐེངས་20ལྷག་ཙམ་འབྱོར་བ་དང་། དུས་ཐོག་ཏུ་རོགས་སྐྱོབ་བྱས་མཐར་ཉེན་གྱར་འཁོར་རིགས་དང་མི་སྣ་ཚང་མ་ཉེན་ཁ་ལས་སྒྲོལ་ཐུབ་ཡོད་ཅེས་ངོ་སྤྲོད་བྱས་པ་དང་། “ལ་རྒན་ལའི་ཁུལ་གྱི་ས་བབ་མཐོ་བ་དང་དགུན་ཁ་ཧ་ལམ་གངས་འཁྱགས་ཀྱིས་བཏུམས་ཀྱི་ཡོད། དེར་བརྟེན། རྒྱ་ཆེའི་ཁ་ལོ་བ་དང་ཡུལ་སྐོར་བ་ཚོས་ཁ་བའི་ཁྲོད་གནམ་མཚོར་སྐྱོད་སྐབས། སྔ་སྣུར་ནས་གྲ་སྒྲིག་ཡག་པོ་བྱས་ཏེ་ནུས་པས་ལྕོགས་ཚོད་ཁུལ་དུ་སྐྱོད་དགོས་པ་དང་། ལ་རྒན་ལའི་ཉེ་འཁོར་དུ་སླེབས་སྐབས་བསམ་ཡུལ་ལས་འདས་པའི་གནས་ཚུལ་མི་ཐོན་པའི་ཆེད། ཆ་རྒྱུས་མེད་པའི་ས་ཁོངས་སུ་འགྲོ་མི་རུང”ཞེས་ཀོང་ཐང་ཤང་མངགས་གཏོང་ཁང་གི་མི་དམངས་ཉེན་རྟོག་པས་དྲན་སྐུལ་བྱས་པ་རེད།