འདི་ནི་ནགས་ཚལ་མེ་ཟོན་རུ་མིས་ཨ་ལོག་བརྒྱབ་པའི་རླངས་འཁོར་སློང་བཞིན་པ།

ཉེ་ཆར། ཆབ་མདོ་གྲོང་ཁྱེར་སྨར་ཁམས་རྫོང་ནགས་ཚལ་མེ་ཟོན་བཅའ་སྲུང་ཡན་ལག་རུ་ཁག་གིས་ཆུ་ཚན་ཁ་ཤང་དང་འཇང་མི་རིགས་ཤང་དུ་ལེ་དབར་སྟོང་གི་མེ་འགོག་དྲིལ་བསྒྲགས་དང་ནགས་སྲུང་བ་གསོ་སྦྱོང་བྱས་རྗེས་ཕྱིར་ལོག་པའི་ལམ་བར་དུ། སློང་ལ་སྤྲེའུ་སྤུ་སེར་རང་བྱུང་སྲུང་སྐྱོང་ཁུལ་ལ་སླེབས་སྐབས་དེ་གའི་ལམ་གུག་ཅིག་ཏུ་རླངས་འཁོར་གྱི་ལས་འཛོལ་ཐོན་པ་མཐོང་བ་རེད།

“མགྱོགས་པོ་རླངས་འཁོར་གྱི་ཁ་བཀག་ནས་མིར་རྨས་སྐྱོན་ཕོག་མིན་ལྟོས་དང”གནས་ཚུལ་ཛ་དྲག་ཆེ་བས་རུ་མི་ཚོས་མྱུར་དུ་རླངས་འཁོར་ལས་བབས་ཏེ་ལྟ་རུ་ཕྱིན་པར། རླངས་འཁོར་དེའི་ནང་གི་མི་བཞི་པོ་ཚང་མར་རྨས་སྐྱོན་ཕོག་མེད་པ་དང་། ཡང་བསྐྱར་ལས་འཛོལ་མི་ཐོན་ཆེད། རུ་མི་ཚོས་ཕྱོགས་གཅིག་ནས་ཁ་ལོ་བར་རོགས་བྱས་ཏེ་ལས་འཛོལ་ཐོན་ཡུལ་དུ་ཉེན་ཟོན་མཚོན་རྟགས་བཙུགས་པ་དང་། ཡུལ་དངོས་ཀྱི་སྒྲིག་ལམ་སྲུང་བ། འགྲིམ་འགྲུལ་འཁོར་རིགས་ཁ་བཀྲམ་ནས་བདེ་འཇགས་ཁུལ་ཡོད་པར་བྱས་པ་དང་། ཕྱོགས་གཞན་ཞིག་ནས་རླངས་འཁོར་ལ་སྐྱོན་ཤོར་ཚད་དང་སྐྱོབ་རོགས་བྱ་ཡུལ་ལ་དཔྱད་དཔོག་བྱས་ནས་སྐྱོབ་རོགས་བྱས་པ་རེད།

རླངས་འཁོར་ཨ་ལོག་རྒྱག་སའི་རི་ལྡེབས་དེར་གངས་གསོག་ཅུང་མཐུག་པོ་ཐེབས་ཡོད་རྐྱེན་ལག་ཆ་སོགས་ཅི་ཡང་མེད་པར་སྐྱོབ་རོགས་བྱེད་པར་དཀའ་ངལ་ངེས་ཅན་འཕྲད་ན་ཡང་སྐྱོབ་རོགས་རུ་མི་ཚོས་དང་ཐོག་ཐག་པ་བརྒྱབ་ནས་རླངས་འཁོར་བསླངས་པ་རེད།

ཕྱིས་སུ་ཤེས་རྟོགས་བྱུང་བ་ལྟར་ན། འཁོར་བདག་དེས་རླངས་འཁོར་བཏང་ནས་བསྐྱོད་ས་ནི་ལ་ཐག་རིང་ཞིང་གུག་ཆ་མང་བའི་ལམ་དུམ་ཞིག་ཡིན་པ་མ་ཟད་ད་དུང་གངས་འཁྱགས་ཀྱང་ཐེབས་ཡོད་པས་གཟབ་གཟབ་མ་བྱས་པར་རླངས་འཁོར་ཨ་ལོག་བརྒྱབ་པ་རེད། ནགས་ཚལ་མེ་ཟོན་གྱིས་དགུན་དུས་གནམ་གཤིས་གྲང་ཞིང་བགྲོད་ལམ་དུ་འཁྱགས་པ་ཐེབས་སླ་བས། ཕྱིར་མ་སྐྱོད་གོང་རླངས་འཁོར་ལ་ཞིབ་བཤེར་ཡག་པོ་བྱེད་དགོས། རི་ཁུལ་དུ་སྐྱོད་དགོས་ཚེ་རླངས་འཁོར་ག་ལེར་གཏོང་དགོས་པའི་དྲན་སྐུལ་ཞུས་འདུག