2023ལོའི་ཟླ་12ཚེས་20ཉིན་རྒྱལ་ཡོངས་ཀྱི་ཞིབ་དཔྱོད་ལས་ཁུངས་ཀྱི་སྔོན་ཐོན་མཉམ་སྡེབ་དང་སྔོན་ཐོན་མི་སྒེར་ལ་གཟེངས་བསྟོད་བྱེད་པའི་ཚོགས་ཆེན་ཐེངས་བཅུ་པ་པེ་ཅིང་དུ་འཚོགས་ཤིང་། ཚོགས་འདུའི་ཐོག་ཆེས་མཐོའི་མི་དམངས་ཞིབ་དཔྱོད་ཁང་གིས་སྔོན་ཐོན་མཉམ་སྡེབ་105དང་སྔོན་ཐོན་མི་སྒེར་132ལ་བྱས་རྗེས་རིམ་པ་དང་པོ་སྤྲད་པ་དང་། དེའི་ནང་ལྷ་ས་གྲོང་ཁྱེར་ཞིབ་དཔྱོད་ཁང་གི་ཞིབ་དཔྱོད་པུའུ་བརྒྱད་པར(ན་སོ་དར་ལ་མ་བབས་པའི་མིའི་ཞིབ་དཔྱོད་པུའུ)མཉམ་སྡེབ་བྱས་རྗེས་རིམ་པ་དང་པོ་ཐོབ་པ་རེད།

ཁྲིམས་ལྟར་གྱོད་གཞི་བསྒྲུབས་ནས་ན་སོ་དར་ལ་མ་བབས་པའི་མིའི་ཁྲིམས་མཐུན་ཁེ་དབང་ལ་སྲུང་སྐྱོང་བྱས་པ།

“ཐར་པར་གཏན་ནས་མི་གཏོང་བའི”རྣམ་འགྱུར་ཐོག་ནས་ན་སོ་དར་ལ་མ་བབས་པའི་མིར་བཙན་གཡེམ་དང་གཏུམ་སྤྱོད་ཀྱིས་གནོད་འཚེ་བཏང་བ་སོགས་ཀྱི་གྱོད་གཞི་ཚབས་ཆེན་ལ་ཁྲིམས་ལྟར་རྡུང་རྡེག་ཚ་ནན་མགྱོགས་མྱུར་བཏང་སྟེ། ཚད་འབེབས་ཀྱི་གྲོས་འགོ་ནན་པོ་བཏོན་ནས་ན་སོ་དར་ལ་མ་བབས་པའི་མིའི་ཁྲིམས་མཐུན་ཁེ་དབང་ལ་སྲུང་སྐྱོང་བྱས་པ་རེད།

ངོ་སྤྲོད་བྱས་པར་གཞིགས་ན། ལོ་གཉིས་ནང་ན་སོ་དར་ལ་མ་བབས་པའི་མིར་གནོད་འཚེ་བཏང་བའི་ཉེས་གསོག་དོགས་ཅན་22ལ་ཞིབ་བཤེར་ཞུ་གཏུག་བརྒྱབ་པའི་ནང་། ན་སོ་དར་ལ་མ་བབས་པའི་མིར་བཙན་གཡེམ་བྱས་པའི་གྱོད་གཞི་ཚབས་ཆེན་ཞིག་ལ་ཉིན་1ནང་ཉེས་གསོག་དོགས་ཅན་འཛིན་བཟུང་གི་ཆོག་མཆན་བཀོད་པ་དང་ཉིན་3ནང་ཚུན་དུ་ཁྲིམས་ལ་སྦྱར་བ་མ་ཟད། ཉེས་བགྲང་ཞུ་གཏུག་གི་ཉེས་མིང་ཚང་མ་ཁྲིམས་ཁང་ནས་ཁས་བླངས་པས། གྱོད་གཞི་དང་འབྲེལ་བ་ཡོད་པའི་འགལ་བ་དང་། མངོན་མེད་རྐྱེན་ངན། བདེ་འཇགས་ཀྱི་ཉེན་ཁ་བཅས་ནུས་ལྡན་བསལ་ནས་བཅའ་ཁྲིམས་དང་སྤྱི་ཚོགས་ཀྱི་ཕན་འབྲས་གཅིག་གྱུར་ནུས་ལྡན་ཐོན་པ་རེད།

“སློབ་གསོ་དང་། གོ་བསྐོན་བློ་འགུག སྐྱོབ་ཐབས”བཅས་ཀྱི་བྱེད་ཕྱོགས་ཕྱོགས་ཡོངས་ནས་ལག་བསྟར་གྱིས་བསླབ་བྱ་ནན་འདོམས་དང་། བསམ་བློའི་སློབ་གསོ། བྱ་སྤྱོད་ཀྱི་ཁྲིད་སྟོན། ལྟ་སྐུལ་ལ་སྐུལ་འདེད། ཁྱིམ་ཚང་སློབ་གསོ་སོགས་ཀྱི་བྱེད་ཐབས་གང་ལེགས་སྤྱད་དེ་གྱོད་གཞི་དང་འབྲེལ་བ་ཡོད་པའི་ན་སོ་དར་ལ་མ་བབས་པའི་མི་སྤྱི་ཚོགས་སུ་ཕྱིར་ལོག་གིས་རྒྱུན་གཏན་ལྟར་འཚོ་བ་སྐྱེལ་ཐུབ་པར་བྱས་པ་རེད།

ལྟ་སྐུལ་བྱེད་ཤུགས་ཆེ་རུ་བཏང་ནས་གཞོན་ནུ་ལོ་ཆུང་ལ་ཉེན་མེད་སྐྱོན་བྲལ་གྱི་འཚར་ལོངས་ཁོར་ཡུག་བསྐྲུན་པ།

ན་སོ་དར་ལ་མ་བབས་པའི་མི་དང་འབྲེལ་བ་ཡོད་པའི་ཁྱབ་ཁོངས་ཀྱི་སྤྱི་ཚོགས་བཅོས་སྐྱོང་གནད་དོན་དང་ཟུང་འབྲེལ་བྱས་ཏེ། ན་སོ་དར་ལ་མ་བབས་པའི་མི་དང་འབྲེལ་བ་ཡོད་པའི་སྤྱི་ཕན་གཏུག་བཤེར་བྱེད་སྒོ་གཏིང་ཟབ་སྤེལ་ཁར། ལྟ་སྐུལ་ལ་བརྟེན་ནས་སྲུང་སྐྱོང་ལ་སྐུལ་འདེད་དང་གྱོད་སྒྲུབ་ལ་བརྟེན་ནས་བཅོས་སྐྱོང་ལ་སྐུལ་འདེད་བཏང་ཡོད།

ངོ་སྤྲོད་བྱས་པར་གཞིགས་ན། ལོ་གཉིས་ལྷག་ཙམ་རིང་ན་སོ་དར་ལ་མ་བབས་པའི་མིའི་ཞིབ་དཔྱོད་པུའུ་ཡིས་གྱོད་གཞི་སྒྲུབ་གཉེར་བྱེད་རིང་ཤེས་རྟོགས་བྱུང་བའི་ན་སོ་དར་ལ་མ་བབས་པའི་མིས་རང་དགར་ཨར་ཁང་དང་རོལ་རྩེད་ཁང་དུ་སྐྱོད་པ་དང་ཉེན་ཁ་ཆེ་བའི་གྲི་ཆས་ཉོ་བ་སོགས་ཀྱི་གནད་དོན་གྱི་ཁུངས་སྣེར་དམིགས་ཏེ། ན་སོ་དར་ལ་མ་བབས་པའི་མི་དང་འབྲེལ་བ་ཡོད་པའི་སྤྱི་ཕན་གཏུག་བཤེར་གྱོད་གཞི་ཁག་3ཁྲིམས་ལྟར་ཐག་གཅོད་བྱས་ཤིང་། འབྲེལ་ཡོད་འགན་ནུས་སྡེ་ཚན་གདན་དྲངས་ཏེ་ཞུ་གཏུག་མ་བྱས་གོང་གི་གྲོས་མོལ་ཚོགས་འདུ་འཚོགས་ནས་ཐུན་མོང་ངོས་འཛིན་ཟབ་ཏུ་བཏང་བ་དང་སྲུང་སྐྱོང་གི་མཉམ་ཤུགས་གཅིག་ཏུ་བསྒྲིལ་ནས་ཞུ་གཏུག་ཡོང་ཁུངས་བཅོས་སྒྲིག་ལ་སྐུལ་འདེད་བཏང་བ་རེད།

ན་སོ་དར་ལ་མ་བབས་པའི་མིའི་ཞིབ་དཔྱོད་པུའུ་ཡིས2021ལོའི་ཟླ་7པར་ལྷ་ས་གྲོང་ཁྱེར་སྤྱི་བདེ་ཅུས་དང་སློབ་གསོ་ཅུས་དང་མཉམ་འབྲེལ་ཐོག“ལྷ་ས་གྲོང་ཁྱེར་གྱི་སློབ་གྲྭ་འབྲིང་ཆུང་དང་སློབ་ཕྱིའི་གསོ་སྦྱོང་སྒྲིག་གཞིའི་དགེ་རྒན་དང་ལས་བཟོ་ཁྲིམས་འགལ་ཉེས་གསོག་གི་ཆ་འཕྲིན་འཚོལ་བཤེར་ནང་ཞུཌ་འཐུས”ཀྱི་ཆེད་དོན་བྱེད་སྒོ་སྤེལ་ནས། གྲོང་ཁྱེར་ཡོངས་ཀྱི་སློབ་གྲྭ་འབྲིང་ཆུང་དང་བུ་བཅོལ་ཁང་276དང་སློབ་ཕྱིའི་གསོ་སྦྱོང་སྒྲིག་གཞི་64ཡི་མི་སྣའི་ཆ་འཕྲིན་གྲལ་བཤེར་ལས་དོན་ཕྱོཌ་ཡོངས་ནས་ལེགས་སྒྲུབ་བྱས་ཏེ“དོགས་ཡོད་མི་སྣ”སློབ་གྲྭའི་ཕྱི་རོལ་དུ་བཀག་ནས་ཕྲུ་གུ་སྔར་བས་བློ་བདེ་པོས་སློབ་གྲྭར་འགྲོ་ཐུབ་པར་བྱས་ཡོད།

ལམ་སྲོལ་འཐུས་སྒོ་ཚང་དུ་བཏང་སྟེ་ན་སོ་དར་ལ་མ་བབས་པའི་མིར་སྲུང་སྐྱོང་བྱེད་པའི་ལས་དོན་གྱི་མཉམ་ཤུགས་གཅིག་ཏུ་བསྒྲིལ་བ།

2021ལོར་ལྷ་ས་གྲོང་ཁྱེར་གྱི་གནོད་འཚེ་ཕོག་པའི་ན་སོ་དར་ལ་མ་བབས་པའི་མིའི“གཅིག་འཐུས་རྣམ་པའི”གྱོད་གཞི་སྒྲུབ་གཉེར་རོགས་སྐྱོབ་ལྟེ་གནས་སྒོ་བྱང་བཀལ་ནས་བཙུགས་ཤིང་། ལྟེ་གནས་དེ་ནི་ལྗོངས་ཡོངས་ཀྱི་སྤྱོད་འགོ་ཚུགས་པའི“གཅིག་འཐུས་རྣམ་པའི”གྱོད་གཞི་སྒྲུབ་གཉེར་རོགས་སྐྱོབ་ལྟེ་གནས་ཐོག་མ་དེ་རེད།

སྤྱི་བདེ་དང་། ཁྲིམས་ཁང་། ཁྲིམས་འཛིན། གུང་གཞོན་སྡེ་ཚོགས་ཨུ་ལྷན། བུད་མེད་མཉམ་འབྲེལ་ལྷན་ཚོགས་སོགས་ཚན་པ་དང་མཐུན་སྦྱོར་བྱེད་པར་ཤུགས་སྣོན་བརྒྱབ་སྟེ་སྡེ་ཚན་ལས་བརྒལ་བའི་མཉམ་འགུལ་མཉམ་ལས་ལམ་སྲོལ་བཙུགས་ནས《ན་སོ་དར་ལ་མ་བབས་པའི་མིའི་ཞིབ་དཔྱོད་ལས་དོན་གྱི་སྤྱི་ཚོགས་རྒྱབ་སྐྱོར་མ་ལག་འཛུགས་སྐྱོང་གི་མཉམ་ལས་གྲོས་མཐུན》དང《ལྷ་ས་གྲོང་ཁྱེར་གྱི་ཉེས་དོན་གྱོད་གཞིའི་གནོད་འཚེ་ཕོག་པའི་ན་སོ་དར་ལ་མ་བབས་པའི་མིའི“གཅིག་འཐུས་རྣམ་པའི”འདྲི་རྩད་རོགས་སྐྱོབ་ལས་དོན་ལག་བསྟར་བྱེད་ཐབས(ཚོད་ལྟའི་ལག་བསྟར)》སོགས་ཀྱི་ལམ་སྲོལ་ལ་མིང་རྟགས་བཀོད་པས་ལས་དོན་འབྲེལ་མཐུད་ནུས་ལྡན་ཐུབ་ཡོད།

གྲོང་ཁྱེར་ཡོངས་ཀྱི་ན་སོ་དར་ལ་མ་བབས་པའི་མིའི་ཞིབ་དཔྱོད་ཁོངས་གཏོགས་ཀྱི་སྟོབས་ཤུགས་བསྡུ་སྒྲིལ་བྱས་ཏེ“དྲོ་སྐྱིད”ན་སོ་དར་ལ་མ་བབས་པའི་མིའི་ཞིབ་དཔྱོད་སྒྲོག་འགྲེལ་ཚོགས་པ་བཙུགས་ནས“སློབ་གྲྭ་དང་། སྡེ་ཁུལ། གྲོང་གསེབ་བཅས་སུ་ཁྲིམས་སྐྱོང་སྤེལ་བའི”བྱེད་སྒོར་ཕྱོགས་ཡོངས་ནས་སྐུལ་འདེད་བཏང་ཡོད། མིག་སྔའི་བར“སློབ་གྲྭ་བརྒྱ་ཡིས་བཅའ་ཁྲིམས་ཁྱབ་གདལ་བཏང་ནས་ན་སོ་དར་ལ་མ་བབས་པའི་མི་འཚར་ལོངས་ཡོང་བར་སྲུང་སྐྱོང་བྱེད”སོགས་བརྗོད་དོན་གཙོ་བོའི་ཁྲིམས་སྐྱོང་སྒྲོག་འགྲེལ་ཐེངས་80ལྷག་ཙམ་བྱས་པ་ལས་སློབ་མ་ཁྲི་8ལྷག་ཙམ་ལ་སློབ་གསོ་ཐོབ་ཡོད་པ་རེད།

འདི་ནི་བྱས་རྗེས་རིམ་པ་དང་པོའི་གཟེངས་རྟགས་ཡིན་པ།