འདི་ལོར། རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་དང་རང་སྐྱོང་ལྗོངས་མི་སྤྱི་ཐིང་གིས་མཉམ་ལས་ཤུགས་ཆེན་བྱས་ནས་ལག་བསྟར་མཉམ་འགུལ་རོགས་ལས་ལམ་སྲོལ་བཙུགས་པའི་རྨང་གཞིའི་ཐོག རོགས་ལས་སྔར་བས་ཤུགས་ཆེན་བྱས་ནས་དམངས་འཚོ་དང་འབྲེལ་བ་ཡོད་པའི་གྱོད་གཞི་སྔོན་ལ་ལག་ལེན་བསྟར་ཏེ་ཁྲིམས་ལུགས་ཀྱི་དབང་གྲགས་དང་སྤྱི་ཚོགས་འདྲ་མཉམ་དྲང་གཞག་སྲུང་སྐྱོང་བྱས་པ་མ་ཟད། སྤྱི་ཚོགས་བརྟན་ལྷིང་སྲུང་སྐྱོང་བྱས་ནས་མང་ཚོགས་ཀྱི་ཁྲིམས་མཐུན་ཁེ་དབང་འགན་ལེན་ཏན་ཏིག་བྱས་པ་རེད།

ཟླ་8པར། རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་དང་རང་སྐྱོང་ལྗོངས་མི་སྤྱི་ཐིང་གིས《ལག་བསྟར་མཉམ་འགུལ་རོགས་ལས་ལམ་སྲོལ་འཛུགས་རྒྱུའི་སྐོར་གྱི་བསམ་འཆར》མཉམ་དུ་བཀྲམ་པ་རེད། ཕྱོགས་གཉིས་པོས་ཁྲིམས་ཁང་གི་ལག་བསྟར་ལས་དོན་དེ་སྲིད་འཛིན་ཁྲིམས་སྒྱུར་དང་ངལ་རྩོལ་ཁྲུན་གཅོད་དང་ཕན་ཚུན་གཞོགས་འདེགས་དང་གོ་རིམ་ལྡན་པར་སྦྲེལ་མཐུད་བྱེད་པའི་ལག་བསྟར་མཉམ་འགུལ་གྱི་རོགས་ལས་ལམ་སྲོལ་བཙུགས་ནས། “ཁྲིམས་ཁང་གིས་ལག་བསྟར་དང་ངལ་རྩོལ་གྱི་ཁེ་དབང་སྲུང་བའི”ལག་བསྟར་ལས་དོན་ཁང་འཛུགས་པ་དང་། དམངས་འཚོ་དང་འབྲེལ་བ་ཡོད་པའི་གྱོད་གཞི་ལག་བསྟར་གྱི་ལམ་སྲོལ་འཐུས་ཚང་དུ་གཏོང་བ། དམངས་འཚོ་དང་འབྲེལ་བ་ཡོད་པའི་གྱོད་གཞི་སྔོན་ལ་གྱོད་ཐོ་འགོད་པ་དང་། སྔོན་ལ་ལག་ལེན་བསྟར་བ། སྔོན་ལ་དངུལ་སྤྲོད་པ་བཅས་ཕྱོགས་ཡོངས་ནས་དོན་འཁྱོལ་བྱས་པས་དམངས་འཚོ་དང་འབྲེལ་བ་ཡོད་པའི་གྱོད་གཞིར་བཅའ་ཁྲིམས་ཀྱི་མཛུབ་ཁྲིད་མཉམ་དུ་བྱེད་པ་དང་། ཆ་འཕྲིན་སྦྲེལ་མཐུད་ལ་མཉམ་དུ་སྐུལ་འདེད་གཏོང་བ། ངལ་རྩོལ་འབྲེལ་བའི་ཉེན་བརྡ་མཉམ་དུ་གཏོང་བ། ལག་བསྟར་བྱེད་ཤུགས་མཉམ་དུ་ཆེ་རུ་གཏོང་བ། ཁྲིམས་སྐྱོང་དྲིལ་བསྒྲཌ་མཉམ་དུ་བྱེད་པ་བཅས་མངོན་འགྱུར་བྱུང་ཡོད། མིག་སྔའི་བར། ལྗོངས་ཡོངས་ཀྱི་རིམ་གསུམ་ཁྲིམས་ཁང་གིས་ངལ་རྩོལ་གྱི་ཐོབ་ཆ་དང་། ཕ་མ་འཚོ་སྐྱོང་གི་དངུལ། བུ་ཕྲུག་གསོ་སྐྱོང་གི་དངུལ། བུ་ཕྲུག་སྙོར་སྐྱོང་གི་དངུལ། འཆི་གོད་གུན་གསབ། སྨན་བཅོས་་གུན་གསབ། འགྲིམ་འགྲུལ་ལས་འཛོལ་གྱི་མི་ལུས་གནོད་འཚེའི་གུན་གསབ། ལས་རྨས་འགན་བཅོལ་གྱི་ཐོབ་ཆ་སོགས་དམངས་འཚོ་དང་འབྲེལ་བ་ཡོད་པའི་གྱོད་གཞི་ཁག་850བདག་སྤྲོད་བྱས་པ་ལས་གྱོད་གཞི་ཁག་780ཐག་ཆོད་དེ་སྒོར་ཁྲི་11454.88ལག་བསྟར་དོན་འཁྱོལ་ཐུབ་པ་དང་རོགས་སྐྱོབ་དངུལ་སྒོར་ཁྲི་248.98ལག་བསྟར་ཐུབ་ནས་དམངས་འཚོ་དང་འབྲེལ་བ་ཡོད་པའི་གྱོད་གཞི་ལག་བསྟར་གྱི་ཕན་འབྲས་མངོན་གསལ་དོད་པོས་ཆེ་རུ་ཕྱིན་ཡོད།

གོམ་སྟབས་རྗེས་མར་རང་སྐྱོང་ལྗོངས་མི་དམངས་ཁྲིམས་ཁང་གིས་མུ་མཐུད་རང་སྐྱོང་ལྗོངས་མི་སྤྱི་ཐིང་དང་སྦྲེལ་མཐུད་བྱེད་ཤུགས་་ཆེ་རུ་གཏོང་བ་དང་། མཉམ་འགུལ་རོགས་ལས་ཟབ་ཏུ་གཏོང་བ། “ཁྲིམས་ཁང་གིས་ལག་བསྟར་དང་ངལ་རྩོལ་གྱི་ཁེ་དབང་སྲུང་བའི”ལག་བསྟར་ལས་དོན་ཁང་གི་ལེགས་ཆའི་ནུས་པ་འདོན་པ། ལག་བསྟར་མཉམ་འགུལ་རོགས་ལས་ལམ་སྲོལ་གྱི་བྱ་ཐབས་ཁག་དོན་འཁྱོལ་ལ་སྐུལ་འདེད་གཏོང་བ་བཅས་བྱས་ནས་དམངས་འཚོ་དང་འབྲེལ་བ་ཡོད་པའི་གྱོད་གཞི་ཐག་གཅོད་བདེ་བླག་ཡོང་བར་ནུས་ཤུགས་ཡོད་རྒུས་འགན་ལེན་བྱས་ནས་མང་ཚོགས་ལ་དེ་བས་ཟོལ་མེད་དང་དེ་བས་ཁྲིམས་འཛིན་ཐོབ་སྣང་དངོས་ཡོང་བ་བྱ་རྒྱུ་རེད།