ཉེ་ཆར་གསར་འགོད་པར་ལྷ་ས་གྲོང་ཁྱེར་སྨན་བཅོས་འགན་སྲུང་ཅུས་ནས་ཤེས་རྟོགས་བྱུང་བར། དུས་ཚིགས་གསུམ་པའི་བར་ལྷ་ས་གྲོང་ཁྱེར་དུ་གྲོང་ཁྱེར་དང་གྲོང་རྡལ་གྱི་ལས་བཟོའི་སྨན་བཅོས་འགན་བཅོལ་ནང་ཞུགས་མཁན་ཁྲི་14.58ཟིན་པ་དང་། གྲོང་ཁྱེར་དང་གྲོང་རྡལ་གྱི་ལས་བཟོའི་བུ་བཙའི་འགན་བཅོལ་ནང་ཞུགས་མཁན་ཁྲི་12.93ཟིན་པ། གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་ནང་ཞུགས་མཁན་ཁྲི་38.16ཟིན་ཏེ་འགན་བཅོལ་ནང་ཞུགས་ཚད་95%ཡན་བརྟན་པོ་བྱུང་ཡོད། གྲོང་ཁྱེར་དང་གྲོང་རྡལ་གྱི་ལས་བཟོའི་གཞི་རྩའི་སྨན་བཅོས་འགན་བཅོལ་གྱི་ཡོང་འབབ་སྒོར་ཁྲི་107419.03ཟིན་པ་དང་གཏོང་སྒོ་སྒོར་ཁྲི་50485.74(དེའི་ནང་སྤྱི་འདོམས་ཐེབས་རྩའི་གཏོང་སྒོ་སྒོར་ཁྲི་23862.06དང་མི་སྒེར་གྱི་རྩིས་ཁྲའི་གཏོང་སྒོ་སྒོར་ཁྲི་26623.68ཟིན་པ་ཚུད་ཡོད)དང་། གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་གྱི་ཡོང་འབབ་སྒོར་ཁྲི་28568.11ཟིན་པ་དང་གཏོང་སྒོ་སྒོར་ཁྲི་28241.3ཟིན་པ། སྨན་བཅོས་རོགས་སྐྱོབ་མ་དངུལ་གྱི་ཡོང་འབབ་སྒོར་ཁྲི་5627.17ཟིན་པ་དང་གཏོང་སྒོ་སྒོར་ཁྲི་904.72བཅས་ཟིན་པས་མང་ཚོགས་ཀྱི་སྨན་པ་བསྟེན་པ་དང་སྨན་བཅོས་བྱེད་པའི་སྨན་རིན་ལ་འགན་ལེན་ནུས་ལྡན་ཐུབ་པ་རེད།

ལྗོངས་ཡོངས་ཀྱི་སྨན་བཅོས་འགན་བཅོལ་ཐེབས་རྩའི་ལྟ་འདོམས་ཡིད་རྟོན་མ་ལག་འཛུགས་སྐྱོང་གི་ཚོད་ལྟའི་གྲོང་ཁྱེར་ཡིན་པའི་ལྷ་ས་གྲོང་ཁྱེར་སྨན་བཅོས་འགན་སྲུང་ཅུས་ཀྱིས་སྨན་བཅོས་འགན་བཅོལ་ཐེབས་རྩའི་ལྟ་འདོམས་ཀྱི“ལྷ་སའི་རྣམ་པ”ནུས་ཤུགས་ཡོད་རྒུས་བཏོད་དེ། ལམ་ལུགས་ཡིག་ཆ་དང་གདེང་འཇོག་མ་ལག་བསྐྲུན་པའི་རིམ་ངོས་ནས་ལྗོངས་ཡོངས་ཀྱི་སྔོན་དུ་གནས་གཏན་འཁེལ་གྱི་སྨན་བཅོས་སྒྲིག་གཞི་དང་། འགན་བཅོལ་ནང་ཞུགས་མཁན། འགན་བཅོལ་ནང་ཞུགས་མཁན་ཚན་པ་སོགས་སྨན་བཅོས་འགན་བཅོལ་གྱི་བྱེད་པོའི་ཡིད་རྟོན་དོ་དམ་གྱི་གནས་སྐབས་ལག་བསྟར་བྱེད་ཐབས་ཆེན་པོ་བརྒྱད་བཟོས་ཡོད། དུས་ཚིགས་གསུམ་པར་གནས་གཏན་འཁེལ་གྱི་སྨན་རྫས་སིལ་ཚོང་ཁང་དང་གནས་གཏན་འཁེལ་གྱི་སྨན་བཅོས་སྒྲིག་གཞིའི་བྱེད་པོ་རིགས་གཉིས་ཀྱི་ལད་ཟློས་གདེང་འཇོག་ལས་དོན་ལེགས་གྲུབ་ཟིན་ཏེ། གནས་གཏན་འཁེལ་གྱི་སྨན་བཅོས་སྒྲིག་གཞི་73དང་གནས་གཏན་འཁེལ་གྱི་སྨན་རྫས་སིལ་ཚོང་ཁང་155དཔྱད་ཞིབ་ནང་ཞུགས་པས་ཡིད་རྟོན་གདེང་འཇོག་བྱས་འབྲས་སྤྱི་ཡོངས་བརྟན་པོ་ཡོད་ལ། ཚུལ་མིན་གྱི་སྨན་བཅོས་སྒྲིག་གཞི་སྤྱིར་ན་ཐོན་མེད།

ལྷ་ས་གྲོང་ཁྱེར་སྨན་བཅོས་འགན་སྲུང་ཅུས་ཀྱིས་ཕྱི་རོལ་གྱི་ལྟ་འདོམས་བྱེད་ཤུགས་ཆེ་རུ་གཏོང་རྒྱུ་དེ་ནང་ངོས་ཀྱི་དོ་དམ་ལ་ཤུགས་སྣོན་རྒྱག་པ་དང་ཟུང་འབྲེལ་བྱས་ནས《སྨན་བཅོས་འགན་བཅོལ་གྱི་གྲངས་གཞི་སྒྲིག་འགལ་ངང་གཏོང་སྤྲོད་ཀྱི་དོགས་གཞི་ཡོད་པར་སྔར་བས་ཞིབ་དཔྱད་བྱེད་རྒྱུའི་སྐོར་གྱི་བརྡ་ཐོའི》བླང་བྱར་གཞིགས་ནས་སྨན་བཅོས་འགན་བཅོལ་སྒྲུབ་གཉེར་བྱེད་མཁན་གྱིས་རིམ་པ་བཞིན་ཞིབ་དཔྱད་བྱས་པ་བརྒྱུད། སྒྲིག་འགལ་ངང་གཏོང་སྤྲོད་བྱས་པའི་སྨན་བཅོས་འགན་བཅོལ་ཐེབས་རྩ་སྒོར་ཁྲི་10.14འདེད་ལེན་བྱས་ཡོད། དེ་དང་ཆབས་ཅིག ཆེད་དོན་བཅོས་སྐྱོང་གི་ཕན་འབྲས་ཟབ་ཏུ་གཏོང་ཆེད། 2022ལོའི་ཆེད་དོན་ཞིབ་བཤེར་བྱས་འབྲས་ལ་གཞིགས་ནས་སྒྲིག་འགལ་ངང་སྤྱད་པའི་སྨན་བཅོས་འགན་བཅོལ་ཐེབས་རྩ་སྒོར་ཁྲི་67.01འདེད་ལེན་བྱས་ཡོད། རང་སྐྱོང་ལྗོངས་ཀྱི་2023ལོའི་རྗེས་སྙེགས་ཞིབ་བཤེར་ལས་དོན་ལ་གཞོགས་འདེགས་བྱས་ཏེ་སྒྲིག་འགལ་ངང་སྤྱད་པའི་སྨན་བཅོས་འགན་བཅོལ་ཐེབས་རྩ་སྒོར་ཁྲི་359.03འདེད་ལེན་བྱས་ཡོད། 2023ལོའི་ལྷ་ས་གྲོང་ཁྱེར་གྱིས་སྨན་བཅོས་འགན་བཅོལ་ཐེབས་རྩ་ཁ་བསླུས་གཡོ་ལེན་ལ་རྡུང་རྡེག་གཏོང་བའི་ཆེད་དོན་ཞིབ་བཤེར་ལས་དོན་ནུས་ཤུགས་ཡོད་རྒུས་སྤེལ་ཏེ་སྨན་རྫས་བརྗེ་རེས་དང་། སྨན་རིན་ཁག་དབྱེ་ནས་རྩིས་རྒྱག་པ། ཞིབ་བཤེར་ཐལ་དྲགས་པ། སྨན་བཅོས་ཐལ་དྲགས་པ། སྨན་རིན་ཡང་སྐོར་བསྐྱར་སྐོར་བསྡུ་བ་སོགས་ཀྱི་གཙོ་གནད་ཁྱབ་ཁོངས་ལ་དམིགས་ནས། གནས་གཏན་འཁེལ་གྱི་སྨན་བཅོས་སྒྲིག་གཞིའི་གྲོས་མཐུན་དོ་དམ་དང་ལྟ་འདོམས་ཁྲིམས་སྒྱུར་བྱེད་ཤུགས་ཆེ་རུ་བཏང་སྟེ་སྨན་བཅོས་ཞབས་ཞུའི་བྱ་སྤྱོད་ཕྱོགས་ཡོངས་ནས་ཚད་ལྡན་དུ་བཏང་བ་དང་སྨན་བཅོས་འགན་བཅོལ་ཐེབས་རྩའི་ཕན་ནུས་ཆེ་རུ་བཏང་ཡོད།