སུང་ཨན་གོ་ད་ལྟ་གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གི་ཉེན་དོན་དངོས་འཐབ་དམག་དཔོན་གྱི་འགན་འཁུར་བཞིན་ཡོད། 2013ལོར་སློབ་ཆེན་ཐོན་རྗེས་སུང་ཨན་གོ་དམག་སྒར་ལ་ཡིད་སྨོན་ཆེན་པོ་སྐྱེས་ཏེ་ཐེ་ཚོམ་སྤུ་ཙམ་ཡང་མེད་པར་གངས་ལྗོངས་མཐའ་མཚམས་ཀྱི་བོད་ལྗོངས་གནས་སྤོས་ཡུལ་མི་དོ་དམ་དཔུང་ཁག་ནང་ཞུགས།

ཁོང་གིས་སྔ་རྗེས་སུ་མི་སྒེར་གྱི་བྱས་རྗེས་རིམ་པ་གསུམ་པ་ཐེངས་གཉིས་བཞག་ཅིང་།“དམིགས་བསལ་དམག་འཐབ་དཔེ་དམག”དང་།“ཉེན་རྟོག་ཡོངས་ཀྱི་དངོས་འཐབ་སྦྱོང་བརྡར་ཆེ་མོའི་སྔོན་ཐོན་མི་སྒེར”“ཕུལ་བྱུང་རྩལ་ཁྲིད་པ”“ཕུལ་བྱུང་སློབ་མ”སོགས་ལ་བདམས་པ་རེད།

འབད་འབུངས་ཡར་བརྩོན།

“2014ལོར་ང་ཆེད་ལས་གསོ་སྦྱོང་ནང་ཞུགས་ཐེངས་དང་པོ་ཡིན། མི་གསར་ཞིག་ཡིན་པའི་རང་ཉིད་སྐབས་དེ་དུས་སྦྱོང་བརྡར་ཧ་ཅང་མང་པོ་བྱེད་དགོས་པ་དང་ཁོར་ཡུག་གསར་རྐྱང་ཞིག་ཏུ་སླེབས་དུས་རྩ་བ་ནས་གོམས་ཀྱི་མིན་འདུག འོན་ཀྱང་ངའི་བསམ་པར་གཞན་གྱིས་སྒྲུབ་ཐུབ་པ་རང་ཉིད་ཀྱིས་ཀྱང་སྒྲུབ་ཐུབ་ངེས་ཡིན་པ་མ་ཟད། ཡག་པོ་སྒྲུབ་ཐུབ་ཀྱི་རེད་བསམ་བྱུང”ཞེས་བཤད། དཀའ་སྤྱད་སྙིང་རུས་ཀྱི་སྙིང་སྟོབས་དང་ཉམས་སད་ཐེག་ཐུབ་པའི་བྱང་ཚད་ལ་བརྟེན་ནས་སུང་ཨན་གོ་གཟེངས་སུ་ཐོན་ཏེ་དམག་དོན་སྦྱོང་བརྡར་གྱི་རྐང་འཛིན་པར་གྱུར།

དམག་དོན་སྦྱོང་བརྡར་གྱི་རྐང་འཛིན་པར་གྱུར་རྗེས། ཁོང་གིས་མུ་མཐུད་འབད་བརྩོན་བྱས་ནས་ཉིན་མཚན་དབྱེར་མེད་ངང་ལས་སྒོའི་ཤེས་བྱ་དང་འབྲེལ་ཡོད་བཅའ་ཁྲིམས་དང་ཁྲིམས་སྲོལ་སློབ་སྦྱོང་བྱས་ནས་སློབ་ཁྲིད་ཀྱི་སྤུས་ཚད་ལེགས་སུ་གཏོང་བའི་བྱ་ཐབས་ལ་ཞིབ་འཇུག་ཧུར་ཐག་བྱས་པ་རེད།

སློབ་ཁྲིད་བྱེད་རིང་དངོས་འཐབ་སློབ་ཁྲིད་ཁྱོན་ཡོངས་ལ་ཁྱབ་པར་བྱས་ནས་གཞི་རིམ་གྱི་མི་དམངས་ཉེན་རྟོག་པའི་དངོས་འཐབ་འཇོན་ཐང་ཆེ་རུ་གཏོང་ཆེད། སུང་ཨན་གོ་ཡིས“ས་ཚིགས་གཅིག་ལ་སློབ་ཁྲིད་དམག་དཔོན་གཅིག”གི་སློབ་གསོ་སྦྱོང་བརྡར་བྱེད་སྟངས་གསར་གཏོད་བྱས་པ་དང་། ས་ཚིགས་རེ་ནས་ཆེད་ལས་འཇོན་ཐང་ཅན་རེ་བདམས་ཏེ་སློབ་ཁྲིད་དམག་དཔོན་བྱས་ནས་གཞི་རིམ་གྱི་ལས་སྒོའི་སློབ་སྦྱོང་དང་ཉེན་དོན་དངོས་འཐབ་སྦྱོང་བརྡར་ལམ་ལུགས་ཅན་དང་རྒྱུན་རྣམ་ཅན་ལ་སྐུལ་འདེད་བཏང་སྟེ་ཉིང་ལག་རུ་ཁག་གི“ཐག་རིང་དང་ཁ་ཐོར”གྱི་ཚན་པའི་དངོས་འཐབ་སློབ་ཁྲིད་དཀའ་བའི་གནད་དོན་ཞི་ལྷོད་དུ་བཏང་ཡོད་པ་རེད།

རྒྱལ་ཁ་བརྩོན་ལེན།

2021ལོར་སྤྱི་ཁྱབ་ས་ཚིགས་ཀྱི་ཉེན་དོན་དངོས་འཐབ་ཀྱི་དྲག་རྩལ་འགྲན་བསྡུར་ནང་སུང་ཨན་གོ་ཡིས་རང་འགུལ་ངང་འགྲན་བསྡུར་ལ་ཞུགས་རྒྱུའི་རེ་འདུན་ཞུས་ཤིང་། དྲག་རྩལ་འགྲན་བསྡུར་སྐབས་སུང་ཨན་གོས་གཟི་བརྗིད་བརྩོན་ལེན་བྱ་ཆེད་རྨས་སྐྱོན་ཕོག་ཀྱང་ན་ཟུག་བཟོད་བསྲན་བྱས་ནས་མུ་མཐུད་འགྲན་བསྡུར་བྱས། “ང་ཚོའི་སྦྱོང་བརྡར་གྱི་ལས་ཕྱོད་ཆེ་རུ་གཏོང་ཆེད། ཁོང་གིས་རུ་མི་སོ་སོའི་གནས་ཚུལ་དང་འགྲན་བསྡུར་ནང་ཞུགས་པའི་དོན་དངོས་དང་ཟུང་འབྲེལ་བྱས་ནས་ང་ཚོ་མི་རེ་ངོ་རེར་སྦྱོང་བརྡར་གྱི་ཇུས་གཞི་བཟོས་པ་དང་། དྲག་རྩལ་འགྲན་བསྡུར་བྱེད་རིང་ན་ཟུག་བཟོད་བསྲན་བྱས་ནས་འགྲན་བསྡུར་ལེགས་སྒྲུབ་བྱས་པ་རེད”མཐར་དཀའ་ལས་བརྒྱབ་ན་འབྲས་བུ་ཐོན་ངེས་ཡིན་ཞེས་པ་ལྟར་ཁོང་གིས་ཚོགས་པའི་སྣེ་ཁྲིད་དེ་སྤྱིའི་སྦྱངས་འབྲས་ཨང་དང་པོ་དང་ཚོགས་པ་བཞིའི་ཨང་དང་པོ་བླངས་ཡོད།

ལོ་དེ་དག་ནང་སུང་ཨན་གོ་ཡིས་ལྐོག་བྲོས་ལ་རྒོལ་བའི་ལས་འགན་ནང་ཐེངས་མང་ཞུགས་ནས་ས་བབ་མཐོ་ཚད་སྨི་4700ཡན་གྱི་ས་མཐོར་ལ་དུག་ཕོག་པ་དང་གྲང་ངར་ཆེན་པོར་མ་འཛེམས་པར་འཐབ་གྲོགས་དང་མཉམ་དུ་མཚན་མོ་སྐོར་གཡེང་བྱས་ནས་ལྐོག་ཏུ་བྲོས་མཁན་མང་པོ་ཞིག་གྲུབ་འབྲས་ཐོབ་པའི་ངང་འཛིན་བཟུང་བྱས་པ་རེད། ལོ་མང་ས་མཐོར་ལས་ཀ་བྱས་པར་བརྟེན་ལོ་30ཙམ་གྱི་ཕོ་གསར་དེ་ན་ཟླ་དང་བསྡུར་ན་རྒན་བཟོ་དོད་པ་ཡོད།

ཕུལ་བྱུང་བརྩོན་ལེན།

“སློབ་གསོ་ནི་ཉེན་རྟོག་སྟོབས་ཤུགས་ཧྲག་གཏོང་གི་རྩ་བ་དང་སྦྱོང་བརྡར་ནི་དམག་འཐབ་ཀྱི་བླ་སྲོག་ལྟ་བུ་ཡིན་པས་ངས་དངོས་འཐབ་སློབ་ཚན་བརྒྱུད་སློབ་མར་སྦྱངས་འབྲས་ཐོབ་པ་དང་སྦྱངས་པར་ཕན་འབྲས་ཐོན་རྒྱུའི་རེ་བ་བྱེད་ཀྱི་ཡོད”ཅེས་སུང་ཨན་གོ་ཡིས་བཤད།

2020ལོ་ནས་2022ལོའི་བར་སུང་ཨན་གོ་ཡིས་དཔྱད་གཞིའི་དཔེ་དེབ་མང་པོ་ལྟ་ཀློག་དང་ཕྱོགས་མང་པོའི་ཐད་ནས་སློབ་སྦྱོང་དང་སློབ་ཁྲིད་བྱས་ཏེ་ཉིང་ལག་རུ་ཁག་གི་ཉེན་དོན་དངོས་འཐབ་ཀྱི་སློབ་ཁྲིད་དམག་དཔོན་ཚོགས་པ་དང་པོ་ཇུས་འགོད་བྱས་ནས་བཙུགས་པ་དང་། དུས་ཐེངས་མང་པོའི་ཉེན་དོན་དངོས་འཐབ་གསོ་སྦྱོང་འཛིན་གྲྭ་གཉེར་ནས་ཉེན་དོན་དངོས་འཐབ་ཆེད་ལས་ཤེས་ལྡན་མི་སྣ་མང་པོ་གསོ་སྐྱོང་བྱས་ཡོད། དེ་དང་ཆབས་ཅིག་ཁོང་གིས་དངོས་འཐབ་སློབ་ཁྲིད་དམག་དཔོན་ཚོགས་པ་སྒྲིག་འཛུགས་བྱས་ནས“གྲོང་གསེབ་ཏུ་སློབ་ཁྲིད་བྱེད་པའི”བྱེད་སྒོ་ཐེངས་མང་སྤེལ་བ་དང་ཉིང་ལག་རུ་ཁག་གི་ལས་ཁུངས་ནས་གཞི་རིམ་རུ་ཁག་ཚང་མར་ཁོང་གིས་གསོ་སྦྱོང་བྱེད་སྒོ་སྤེལ་བས་མི་1500ལྷག་ཙམ་ལ་ཕན་པ་ཐོབ་ཡོད་པ་རེད།

ཐོག་མར་གངས་ལྗོངས་ཀྱི་མཐའ་མཚམས་འགག་སྒོར་སླེབས་སྐབས་ཀྱི་ངོ་ཚ་སྨིན་པའི་དམག་གསར་ནས་སྦྱོང་བརྡར་བྱ་ཡུལ་གྱི་ཕུལ་བྱུང་སློབ་ཁྲིད་དམག་དཔོན་བར་ལོ་བཅུའི་རིང་ཁོང་གིས་འབད་བརྩོན་ལྷོད་མེད་བྱས་ནས་རང་ཉིད་ཀྱི་འགན་འཁྲི་དང་ལས་འགན་བློ་ལ་བརྟན་པོར་ངེས་ཡོད་པ་རེད།

ལོ་དེ་དག་ནང་ཁོང་གིས་གངས་ལྗོངས་ས་མཐོའི་ཉེན་དོན་དངོས་འཐབ་ཀྱི་སློབ་གསོ་གསོ་སྦྱོང་གི་ལས་གནས་ཐོག་སེམས་ཤུགས་ཡོད་རྒུ་བཏོན་པ་དང་ལང་ཚོའི་སྟོབས་ཤུགས་སྐྱེས་སུ་ཕུལ་ཡོད། སྦྱོང་བརྡར་བྱ་ཡུལ་གྱི་ཕུལ་བྱུང་མི་སྣ་དེའི་ངོས་ནས་བརྗོད་ན་ལོ་བཅུའི་ལང་ཚོ་ནི་མཇུག་རྫོགས་པ་མ་ཡིན་པར་འགོ་འཛུགས་ས་གཞན་ཞིག་རེད།