འདྲི་གཅོད་བྱ་ཡུལ།

ཉེ་ཆར། གསར་འགོད་པས་ལྷ་རྩེ་རྫོང་མི་དམངས་ཁྲིམས་ཁང་ནས་ཤེས་རྟོགས་བྱས་པར་གཞིགས་ན། ལྷ་རྩེ་རྫོང་མི་དམངས་ཁྲིམས་ཁང་ཕྱོགས་བསྡུས་འདྲི་གཅོད་དིང་གིས་ཡོངས་བསྒྲགས་ཁྲིམས་ར་འཚོགས་ནས། གློག་འཕྲིན་ཁ་བསླུས་ལ་དངུལ་ཁང་གཱ་མཁོ་འདོན་བྱས་ནས་ཉེས་གསོག་ལ་འགེབས་སྲུང་དང་སྦ་གསང་བྱས་པའི་གྱོད་གཞི་ཞིག་གི་བཅད་ཁྲ་ཁྱབ་བསྒྲགས་བྱས་པ་རེད།

ཤེས་རྟོགས་བྱུང་བར་གཞིགས་ན། 2022ལོའི་ཟླ་7ཚེས་5དང་6ཉིན། ལིའུ་ཆེ་གེ་མོས(གྱོད་གཞི་གཞན་དུ་ཐག་གཅོད་བྱས་པ)དངུལ་ཁང་གཱ་སྤྱད་དེ་ཁྲིམས་འགལ་ཉེས་གསོག་གི་བྱེད་སྤྱོད་སྤེལ་བ་ཤེས་བཞིན་དུ་ཞུ་སྦྱོར་ཕྱི་མ་ཝུའེ་ཆེ་གེ་མོས་ཁྲིམས་འགལ་གྱི་ཁེ་བཟང་རག་ཐབས་བྱ་ཆེད། རང་ཉིད་མིང་ཐོག་གི་ཞིང་ལས་དངུལ་ཁང་གི་གཱ་གཉིས་ལིའུ་ཆེ་གེ་མོ“སི་ལིང”(སུ་ཡིན་མིན་གསལ་པོ་མེད་པ)ལ་སྤྲད་ནས་ཁེ་བཟང་སྒོར་1200རག་ཐབས་བྱས་པ་རེད། ཞུ་སྦྱོར་ཕྱི་མ་ཝུའེ་ཆེ་གོ་མོས་མཁོ་འདོན་བྱས་པའི་དངུལ་ཁང་གཱ་དེར་ཉིན་དེ་རང་ལ་དངུལ་སྒོར་30042འབྱོར་བ་དང་། དེའི་རིང་ཞུ་སྦྱོར་ཕྱི་མ་ཝུའེ་ཆེ་གེ་མོས“སི་ལིང”ལ་དངུལ་བཅོལ་རོགས་དང་ལེན་རོགས་ཐེངས་མང་བྱས་ནས་ཁེ་བཟང་སྒོར་2000རག་ཐབས་བྱས།

དེ་དང་ཆབས་ཅིག་2022ལོའི་ཟླ་7ཚེས་15ཉིན། ལིའུ་ཆེ་གེ་མོས་དངུལ་ཁང་གཱ་སྤྱད་དེ་ཁྲིམས་འགལ་ཉེས་གསོག་བྱེད་སྤྱོད་སྤེལ་བ་ཤེས་བཞིན་དུ་ཞུ་སྦྱོར་ཕྱི་མ་ཝུའེ་ཆེ་གེ་མོས་ཁྲིམས་འགལ་ངང་ཁེ་བཟང་རག་ཐབས་བྱ་ཆེད། རང་གི་གྲོགས་པོ་ཁྲེན་ཆེ་གེ་མོའི་ཀྲུང་གོ་དངུལ་ཁང་གི་གཱ་གཅིག་དང་ཁྲེན་ཆེ་གེ་མོའི་དགའ་རོགས་ལི་ཆེ་གེ་མོའི་ཞིང་ལས་དངུལ་ཁང་གི་གཱ་གཅིག་སླར་ཡང་ལིའུ་ཆེ་གེ་མོ“སི་ལིང”ལ་མཁོ་འདོན་བྱས་ཏེ་དེའི་ཁྲོད་ནས་ཁེ་བཟང་སྒོར་400རག་ཐབས་བྱས་པ་རེད། 2022ལོའི་ཟླ་7ཚེས་15ཉིན་གྱི་ཆུ་ཚོད་19ཡས་མས་སུ། ཞུ་སྦྱོར་ཕྱི་མ་ཝུའེ་ཆེ་གེ་མོས་མཁོ་འདོན་བྱས་པའི་ལི་ཆེ་གེ་མོའི་དངུལ་ཁང་གཱ་ནང་བསྒྱུར་བའི་གནོད་འཚེ་ཕོག་མཁན་བློ་ཆེ་གེ་མོར་ཁ་བསླུས་ཐེབས་པའི་དངུལ་སྒོར་11300དང་། གནོད་འཚེ་ཕོག་མཁན་ཧུའུ་ཆེ་གེ་མོར་ཁ་བསླུས་ཐེབས་པའི་དངུལ་སྒོར་10500དེ་དག་ཞུ་སྦྱོར་ཕྱི་མ་ཝུའེ་ཆེ་གེ་མོས་བླངས་པ་མ་ཟད། ATMའཕྲུལ་ཆས་བརྒྱུད་གཱ་མེད་པར་དངུལ་བཅོལ་བའི་ཐབས་ལ་བརྟེན་ནས་དམིགས་འཛུགས་རྩིས་ཁྲའི་ནང་དུ་བཅོལ་ནས་དེའི་ཁྲོད་ནས་ཁེ་བཟང་སྒོར་800རག་ཐབས་བྱས་པ་རེད། གཞན་ཡང་། ཞུ་སྦྱོར་ཕྱི་མ་ཝུའེ་ཆེ་གེ་མོས་སྐད་འཕྲིན་ནས་དངུལ་བསྒྱུར་ཏེ་གྱོད་གཞི་འདིའི་གནོད་འཚེ་ཕོག་མཁན་བློ་ཆེ་གེ་མོར་གྱོང་གུན་སྒོར་10000གསབ་པ་མ་ཟད། བློ་ཆེ་གེ་མོའི་བསམ་ཤེས་ཐོབ་ཐབས་བྱས་པ་རྩད་ཆོད་པ་རེད།

ལྷ་རྩེ་རྫོང་མི་དམངས་ཁྲིམས་ཁང་གིས་ལིའུ་ཆེ་གེ་མོས་ད་བར་ཁྲིམས་འགལ་ཉེས་གསོག་གི་བྱེད་སྤྱོད་སྤེལ་བ་ཤེས་བཞིན་དུ་ཞུ་སྦྱོར་ཕྱི་མ་ཝུའེ་ཆེ་གེ་མོས་སྔར་བཞིན་ཁྲིམས་འགལ་གྱི་ཁེ་ཕན་རག་ཐབས་བྱ་ཆེད། རང་ཉིད་ཀྱི་མིང་ཐོག་དང་གྲོགས་པོའི་མིང་ཐོག་གི་དངུལ་ཁང་གཱ་4ལིའུ་ཆེ་གེ་མོར་མཁོ་འདོན་བྱས་ནས་དེའི་ཁྲོད་ནས་ཁེ་བཟང་སྒོར་4400རག་ཐབས་བྱས་པ་མ་ཟད། ATMའཕྲུལ་ཆས་བརྒྱུད་དངུལ་སྨར་ལེན་པའི་རྣམ་པར་བརྟེན་ནས་ཉེས་གསོག་གི་ཐོབ་ཆ་བསྒྱུར་བས། བྱེད་སྤྱོད་དེ་ནི་ཉེས་གསོག་ལ་འགེབས་སྲུང་དང་སྦ་གསང་བྱས་པའི་ནག་ཉེས་བསགས་པའི་ངོས་འཛིན་བྱས་པ་རེད། མཐར་ཁྲིམས་རས་ཞུ་སྦྱོར་ཕྱི་མ་ཝུའེ་ཆེ་གེ་མོ་དུས་བཀག་བཙོན་འཇུག་ཟླ་བདུན་དང་། ལོ་གཅིག་དུས་འགྱངས་བྱས་པ་མ་ཟད། ད་དུང་སྒོར་3000གི་དངུལ་ཆད་ཀྱང་བཅད་པ་དང་། ཁྲིམས་འགལ་ཐོབ་ཆ་སྒོར་4400ཁྲིམས་ལྟར་བདའ་འདེད་བཏང་རྗེས་རྒྱལ་མཛོད་ནང་གོང་འབུལ་ཞུས་པ་རེད།

གྱོད་གཞི་འདིའི་སྒྲུབ་འགན་འཁུར་མཁན་ཁྲིམས་དཔོན་བཀྲ་ཤིས་ཕུན་ཚོགས་ཀྱིས། མི་དམངས་མང་ཚོགས་ཀྱིས་རང་ཉིད་ཀྱི་དངུལ་ཁང་གཱ་དང་དངུལ་ཁང་གི་རྩིས་ཁྲ་ཡག་པོ་སྲུང་་་དགོས་ལ། གང་བྱུང་དུ་མི་གཞན་ལ་རང་ཉིད་ཀྱི་དངུལ་ཁང་རྩིས་ཁྲ་མཁོ་འདོན་བྱེད་མི་རུང་བ་དང་། མི་གཞན་ལ་ཁྲིམས་འགལ་དངུལ་དེ་དག་འགེབས་སྲུང་དང་། སྦ་གསང་། སྤོ་སྒྱུར་བཅས་བྱེད་རོགས་དེ་བས་ཀྱང་བྱེད་མི་རུང་། དེ་འདྲ་བྱས་ཚེ་བཅའ་ཁྲིམས་ཀྱི་ཆད་པ་ནན་པོ་ཕོག་ངེས་རེད་ཅེས་དྲན་སྐུལ་བྱས་པ་རེད།