སྣེ་གདོང་ཁྲོམ་གཞུང་མངགས་གཏོང་ཁང་གིས་བྱ་ཁྲ་གཉིས་བསྐྱབས་པ།
ཉེ་ཆར། ལྷོ་ཁ་གྲོང་ཁྱེར་སྣེ་གདོང་ཆུས་ཁྲོམ་གཞུང་མངགས་གཏོང་ཁང་ལ་ང་ཚོའི་སྡེ་ཁུལ་དུ་འུག་པ་འདྲ་བའི་རི་སྐྱེས་སྲོག་ཆགས་ཤིག་འདུག གྲོང་མི་རྣམས་ཐག་ཉེ་པོ་བྱེད་ཕོད་ཀྱི་མི་འདུག་པས་རོགས་རམ་གནང་རོགས་ཞེས་པའི་མང་ཚོགས་ཀྱི་རོགས་སྐྱོར་རེ་ཞུ་ཞིག་འབྱོར།
རོགས་སྐྱོར་རེ་ཞུ་འབྱོར་རྗེས། ལས་རེས་མི་དམངས་ཉེན་རྟོག་པ་འཕྲལ་མར་ས་གནས་ས་ཐོག་ཏུ་བསྐྱོད་དེ་མགྱོགས་མྱུར་ཁུལ་ཆུང་གི་སྔོ་འགྱུར་ཁུལ་ནས་མང་ཚོགས་ཀྱིས་བརྗོད་པའི“བྱ”དེ་རྙེད། ཚད་གཞི་མཐོ་ཤོས་ཀྱི་སྒོ་ནས་སྲུང་སྐྱོང་བྱ་ཆེད། མི་དམངས་ཉེན་རྟོག་པས་ཤོག་སྒམ་ཞིག་བཙལ་ནས་ག་ལེར་དེའི་འཁྲིས་སུ་བསྐྱོད་རྗེས་བྱ་ཁྲ་དེ་བདེ་འཇགས་ལྡན་པའི་སྒོ་ནས་ཤོག་སྒམ་ནང་བླུགས་པ་དང་འབྲེལ་མངགས་གཏོང་ཁང་དུ་འཁྱེར།
དེ་རྗེས་མི་དམངས་ཉེན་རྟོག་པས་སྣེ་གདོང་ཆུས་ནགས་ལས་དང་རྩྭ་ཐང་ཅུས་ཀྱི་ལས་དོན་མི་སྣ་དང་འབྲེལ་བ་བྱས་ཏེ་དབྱེ་འབྱེད་ངོས་འཛིན་བྱས་རྗེས་རོགས་སྐྱོབ་བྱས་པའི“བྱ”དེ་ནི་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོང་སྲོག་ཆགས་བྱ་ཁྲ་ཡིན་པ་མ་ཟད། དེ་བྱིའུ་ཕྲུག་ཡིན་པ་ཤེས་རྟོགས་བྱུང་བ་རེད།
ཆུ་ཚོད་6སོང་རྗེས་སྣེ་གདོང་ཁྲོམ་གཞུང་མངགས་གཏོང་ཁང་ལ་སླར་ཡང་ནང་དོན་གཅིག་མཚུངས་ཀྱི་རོགས་སྐྱོར་རེ་ཞུའི་ཁ་པར་ཞིག་འབྱོར་བ་དང་། ལས་རེས་མི་དམངས་ཉེན་རྟོག་པ་འཕྲལ་མར་བསྐྱོད་པས། ད་དུང་བྱ་ཁྲ་ཞིག་སྡེ་ཁུལ་གྱི་སྔོ་འགྱུར་ཁུལ་དུ་ཡོད་པ་ཤེས་རྟོགས་བྱུང་མ་ཐག་དེ་བདེ་འཇགས་ངང་མངགས་གཏོང་ཁང་དུ་འཁྱེར་ཡོད་པ་རེད།
མིག་སྔར་བྱ་ཁྲ་དེ་གཉིས་སྣེ་གདོང་ཆུས་ནགས་ལས་དང་རྩྭ་ཐང་ཅུས་ལ་ཆེད་ལས་རོགས་སྐྱོབ་བྱ་རྒྱུར་རྩིས་སྤྲད་པ་རེད།