མི་དམངས་མང་ཚོགས་ཀྱི་བདེ་རྩར་ཐུག་པའི་ཁེ་ཕན་སྲུང་སྐྱོང་ཏན་ཏིག་བྱེད་པ་དང་། གློག་འཕྲིན་དྲ་རྒྱའི་ཁ་བསླུས་གྱོད་གཞི་འབྱུང་རྩ་ནས་ཚོད་འཛིན་དང་ཐོན་ཉུང་དུ་གཏོང་བ། མི་དམངས་མང་ཚོགས་ཀྱི་གློག་འཕྲིན་དྲ་རྒྱའི་ཁ་བསླུས་སྔོན་འགོག་གི་འདུ་ཤེས་ཟབ་ཏུ་གཏོང་བ་བཅས་བྱ་ཆེད། ཉིན་ཤས་གོང་ལྷོ་ཁ་གྲོང་ཁྱེར་མི་དམངས་ཞིབ་དཔྱོད་ཁང་གིས་ཟངས་རི་རྫོང་རོང་ཤང་ཁྲོམ་མདའ་གྲོང་ཚོར་བསྐྱོད་དེ“ཁ་བསླུས་ལ་འགོག་རྒོལ་བྱས་ནས་དུས་བདེ་ལྷིང་འཇགས་ཀྱི་འཚོ་བ་སྲུང་བའི”ཆེད་དོན་ཁྲིམས་ལུགས་འཆད་ཁྲིད་བྱས་པ་རེད།

འཆད་ཁྲིད་རིང་། ལྷོ་ཁ་གྲོང་ཁྱེར་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན་དགེ་ལེགས་ཀྱིས“གནམ་ནས་ཤ་བག་ལེབ་ཟགས་མི་སྲིད”ཅེས་པ་བརྗོད་དོན་གཙོ་བོར་བྱས་ཏེ། གོ་བདེ་ཤེས་སླའི་སྐད་ཆ་དང་རང་ཉིད་ཀྱིས་བསྒྲུབས་པའི་གྱོད་གཞི་དང་ཉེ་འགྲམ་དུ་ཐོན་པའི་གྱོད་དཔེ་འཇུག་གཞིར་བྱས་ནས་མང་ཚོགས་ལ་གློག་འཕྲིན་དྲ་རྒྱའི་ཁ་བསླུས་རྒྱག་སྐབས་སྤྱོད་མང་བའི་ཐབས་དང་ཁ་བསླུས་རྒྱག་སྟངས་སྒྲོག་འགྲེལ་བྱས་པ་རེད། ད་དུང་རྒྱ་ཆེའི་མང་ཚོགས་ལ་ཁ་བསླུས་སྔོན་འགོག་གི་བདེ་འཇགས་ཤེས་བྱ་འཆད་ཁྲིད་བྱས་པ་མ་ཟད། ཚང་མར་ཆ་རྒྱུས་མེད་པའི་ཁ་པར་དང་ཆ་འཕྲིན་ལ་གང་བྱུང་དུ་ཡིད་ཆེས་མི་བྱེད་པ་དང་། ཆ་རྒྱུས་མེད་པར་རང་ཉིད་དང་ནང་མིའི་ཐོབ་ཐང་ཆ་འཕྲིན་དང་། གསོག་དངུལ། དངུལ་ཁང་གི་རྩིས་ཁྲ་སོགས་ཤོད་རྒྱུ་མེད་པ། གཞན་གྱི་མགོ་སྐོར་འོག་མི་ཚུད་པའི་ཆེད་དུ“རང་དགར་གཞན་ལ་ཡིད་ཆེས་མི་བྱེད་པ་དང་། སྒེར་གྱི་ཆ་འཕྲིན་མི་ཤོད་པ། དྲ་ཚིགས་གང་བྱུང་ནང་མི་འཛུལ་བ། དངུལ་མི་སྒྱུར་བ”བཅས་མཐའ་གཅིག་ཏུ་བྱེད་དགོས་པའི་དྲན་སྐུལ་བྱས་ཡོད། ནམ་ཞག་རྒྱུན་དུ་ནས་རྒྱུ་ནོར་ལ་མི་རྔམ་པར“བྱ་དགའ་ཆེན་པོ་ཐོབ་བཞག”ཟེར་བ་སོགས་ཀྱི་ཁ་པར་དང་ཆ་འཕྲིན་འབྱོར་སྐབས་ངེས་པར་དུ་བསམ་བློ་མང་ཙམ་གཏོང་བ་དང་། གཞན་ལ་སྐད་ཆ་མང་ཙམ་འདྲི་བ། “གནམ་ནས་ཤ་བག་ལེབ་ཟགས་མི་སྲིད་པ”དུས་ནམ་ཡང་སེམས་ལ་བརྟན་པོར་ངེས་པ་བཅས་བྱེད་དགོས། རྒྱ་ཆེའི་མང་ཚོགས་ལ་ཁ་པར་ནང“རྒྱལ་ཁབ་ཁ་བསླུས་འགོག་རྒོལ་ལྟེ་གནས”ཀྱི་APPཕབ་ལེན་བྱེད་དུ་བཅུག་ནས་དམངས་ཡོངས་ཀྱིས་ཁ་བསླུས་ལ་འགོག་རྒོལ་བྱེད་དགོས་པའི་འབོད་སྐུལ་བྱས་ཡོད།

འཆད་ཁྲིད་མཇུག་འགྲིལ་རྗེས་ཟངས་རི་རྫོང་མི་དམངས་ཞིབ་དཔྱོད་ཁང་གིས་ད་དུང་མང་ཚོགས་ལ་གློག་འཕྲིན་དྲ་རྒྱའི་ཁ་བསླུས་ལ་འགོག་རྒོལ་དང་། ཉེན་ཁ་ཡོད་བཞིན་དུ་རླངས་འཁོར་གཏོང་བ། ནག་སེལ་གཤེད་བཅོམ། སྤྱི་ཕན་གཏུག་བཤེར། ན་སོ་དར་ལ་མ་བབས་པའི་མིར་སྲུང་སྐྱོང་སོགས་ནང་དོན་དུ་བྱས་པའི་དྲིལ་བསྒྲགས་ལག་དེབ་ཁྱོན་500ཙམ་སྤྲད་པ་རེད།