འདི་ལོ་ནས་བཟུང་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་འཕྲུལ་སྒུལ་མིན་པའི་འཁོར་རིགས་དོ་དམ་སུའོ་ཡིས་གོང་རིམ་གྱི་གཅིག་གྱུར་བཀོད་སྒྲིག་ལ་ནན་པོར་གཞིགས་ནས་གྲ་སྒྲིག་ཧུར་ཐག་དང་། ལས་བགོས་མཉམ་སྒྲུབ། གནད་སྨིན་སྐུལ་འདེད་བཅས་བྱས་ཏེ《བོད་རང་སྐྱོང་ལྗོངས་ཀྱི་གློག་སྒུལ་སྦག་སྦག་དོ་དམ་བྱ་ཐབས》དང《བོད་རང་སྐྱོང་ལྗོངས་ཀྱི་གློག་སྒུལ་སྦག་སྦག་ཐོ་འགོད་གཏན་འབེབས》ལ་ནན་པོར་གཞིགས་ནས་གློག་སྒུལ་སྦག་སྦག་གི་ཐོ་འགོད་ལས་དོན་ཏན་ཏིག་དང་གོ་རིམ་ལྡན་པའི་སྒོ་ནས་སྤེལ་བར་སྐུལ་འདེད་བཏང་བ་རེད།

གཞུང་ལམ་འགྲིམ་འགྲུལ་ལས་འཛོལ་མང་པོ་དང་ལས་འཛོལ་ཚབས་ཆེན་མ་ཐོན་སྔོན་འགོག་བྱེད་པའི”ལས་ཀའི་བླང་བྱ་ལག་བསྟར་དོན་འཁྱོལ་གཏིང་ཟབ་བྱ་ཆེད། ལྷ་སའི་འགྲིམ་འགྲུལ་ཉེན་རྟོག་པས་མཉམ་སྤྱོད་གློག་སྒུལ་སྦག་སྦག་གི་བདེ་འཇགས་ཀྱི་མངོན་མེད་རྐྱེན་ངན་ལ་གྲལ་བཤེར་དང་བཅོས་སྒྲིག་ཧུར་ཐག་བྱས་པ་དང་། མཉམ་སྤྱོད་གློག་སྒུལ་སྦག་སྦག་གི་འབྱུང་རྩའི་དོ་དམ་ལས་དོན་ལ་ཤུགས་སྣོན་ཏན་ཏིག་བརྒྱབ་ནས་མཉམ་སྤྱོད་གློག་སྒུལ་སྦག་སྦག་གི་ཐོ་འགོད་དང་། འཁོར་རྟགས་སྒར་བ། དོ་དམ་བཅས་ཀྱི་ལས་དོན་སྔར་བས་ཡག་པོ་སྤེལ་བ་རེད། དེའི་རིང་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་འཕྲུལ་སྒུལ་མིན་པའི་འཁོར་རིགས་དོ་དམ་སུའོ་ཡིས་མཉམ་སྤྱོད་གློག་སྒུལ་སྦག་སྦག་གཉེར་སྐྱོང་ཁེ་ལས་ཁག་སྒྲིག་འཛུགས་བྱས་ནས་འཁོར་རིགས་ཐོ་འགོད་དང་། འཁོར་རྟགས་སྒར་བ། འཁོར་རྟགས་དོ་དམ། སྦག་སྦག་མང་དྲགས་པ་སོགས་ཀྱི་གནད་དོན་དག་ཐེར་བྱས་ཏེ་ཁེ་ལས་ལ་འབྲེལ་ཡོད་སྡེ་ཚན་གྱི་ཞིབ་བཤེར་ཆོག་མཆན་གྱི་ཚད་གཞི་ལྟར་སྦག་སྦག་གི་མང་ཉུང་ལ་ཚོད་འཛིན་བྱེད་པ་དང་ཐོ་བཀོད་མེད་པ་དང་འཁོར་རྟགས་སྒར་མེད་པའི་སྦག་སྦག་ཁྲོམ་རར་འདོན་མི་ཆོག་པའི་བླང་བྱ་བཏོན་པ་མ་ཟད། སྦག་སྦག་ལ་བདེ་འཇགས་རྨོག་ཞྭ་སྒར་བ་དང་། འཕྲོ་བརླག་ཕྱིན་པའི་སྦག་སྦག་དུས་ཐོག་ཏུ་བརྗེ་དགོས་པ། སྦག་སྦག་མང་དྲགས་རིགས་དུས་ཐོག་ཏུ་བསྡུས་ནས་བདེ་འཇགས་ཀྱི་མངོན་མེད་རྐྱེན་ངན་བསལ་ཏེ་མི་དམངས་མང་ཚོགས་ཀྱི་ཚེ་སྲོག་བདེ་འཇགས་ལ་འགན་ལེན་བྱེད་དགོས་པའི་བླང་བྱ་བཏོན་པ་རེད།

2023ལོའི་ཟླ་1ཚེས་1ཉིན་ནས་ཟླ་6ཚེས་30ཉིན་བར། རྒྱལ་ཁབ་ཀྱི་ཚད་གཞི་ལྡན་པའི་གློག་སྒུལ་སྦག་སྦག་ཁྱོན་5578ཐོ་བཀོད་པ་དང་། 2023ལོའི་ཟླ་3ཚེས་20ཉིན་ནས་2023ལོའི་ཟླ་6ཚེས་30ཉིན་བར་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་འཁོར་རིགས་དོ་དམ་སུའོ་ལ་གཞོགས་འདེགས་ཧུར་ཐག་བྱས་ནས་གློག་སྒུལ（འབར་སྣུམ）སྦག་སྦག་14886ཐོ་བཀོད་པ་རེད།