མངའ་རིས་ས་ཁུལ་གྱི་མཉམ་འདྲེས་སྨྱན་སྦྱོར་ལྟེ་གནས་ཀྱི་སྒྲོལ་མ་སྲི་ཆོས།

སེམས་ནུས་ཡོད་རྒུས་བོད་ཀྱི་ཁྲིམས་སྐྱོང་གཏམ་རྒྱུད་ཡག་པོ་བཤད་པ།

སྒྲོལ་མ་སྲི་ཆོས། བུད་མེད། བོད་རིགས། 1995ལོའི་ཟླ་10པར་སྐྱེས། ནུབ་བྱང་སྲིད་ཁྲིམས་སློབ་ཆེན་ནས་ཐོན། མངའ་རིས་ས་ཁུལ་གྱི་མཉམ་འདྲེས་སྨྱན་སྦྱོར་ལྟེ་གནས་ཀྱི་གསར་འགོད་པ་ཡིན་པ།

གསར་འགྱུར་སྤེལ་བའི་ལས་ལ་གཞོལ་ཚུན། སྒྲོལ་མ་སྲི་ཆོས་ཀྱིས་ཁྲིམས་སྐྱོང་སྐོར་དྲིལ་བསྒྲགས་དང་གསར་འགྱུར་འཕྲིན་སྤེལ་གཙོ་བོར་བྱས་ཏེ། མང་ཚོགས་ཀྱི་ཐོན་སྐྱེད་དང་འཚོ་བ་ཤེས་རྟོགས་ཟབ་མོ་དང་། བཅའ་ཁྲིམས་ཀྱི་ཤེས་བྱ་དྲིལ་བསྒྲགས་དང་ཁྱབ་གདལ། ཁྲིམས་སྐྱོང་གི་སྙིང་སྟོབས་དར་སྤེལ་ཤུགས་ཆེན་བཅས་བྱས་ནས། མངའ་རིས་ས་ཁུལ་གྱི་ཁྲིམས་སྐྱོང་འཛུགས་སྐྱོང་གི་གྲུབ་འབྲས་ཕྱོགས་ཡོངས་ནས་མངོན་པར་བྱས་ཡོད། རྒྱལ་ཁབ་རྩ་ཁྲིམས་ཉིན་མོ་དང་དམངས་དོན་ཁྲིམས་གཞུང་དྲིལ་བསྒྲགས་ཟླ་བ་སོགས་ཀྱི་མཚམས་ཚིགས་གལ་ཆེན་དུ་རྣམ་པ་དཔེ་གསར་དང་། མྱོང་ཚོར་ཟབ་མོ། ཤུགས་རྐྱེན་བཟང་པོ་བཅས་ལྡན་པའི་གསར་འགྱུར་སྤེལ་ནས། རྒྱ་ཆེའི་མང་ཚོགས་ཚོས་ཁྲིམས་བཀུར་དང་། ཁྲིམས་སྦྱོང་། ཁྲིམས་སྲུང་། ཁྲིམས་སྤྱོད་བཅས་བྱེད་པར་་སློབ་གསོ་དང་ཁྲིད་སྟོན་བྱས་ཡོད་པ་རེད།

ཁྲིམས་སྐྱོང་ཁྱབ་ཁོངས་ཀྱི་གནས་བབ་གསར་པ་དང་འཕེལ་ཕྱོགས་གསར་པར་དམིགས་ནས། ཁོང་གིས་རྒྱུན་དུ་གཞི་རིམ་དུ་བསྐྱོད་དེ་མང་ཚོགས་ཚོས་ལྟ་འདོད་ལ་ཉན་སྤྲོ་བའི་ཁྲིམས་སྐྱོང་སྐོར་གྱི་གསར་འགྱུར་སྤེལ་ཏེ། མང་ཚོགས་ལ་རྩ་ཁྲིམས་དང་། དམངས་དོན་ཁྲིམས་གཞུང་། ངལ་རྩོལ་གན་རྒྱ། གཉེན་སྒྲིག་ཁྱིམ་ཚང་། ཁྲིམས་ལས་འགལ་ནས་མ་དངུལ་བསྡུ་རུབ་ལ་སྔོན་འགོག་དང་དྲ་རྒྱའི་ཁ་བསླུས་རྒྱག་སྟངས་གསར་པར་དོགས་ཟོན་སོགས་ཀྱི་འབྲེལ་ཡོད་ཤེས་བྱ་ཁྱབ་གདལ་བཏང་བ་དང་། མང་ཚོགས་ཀྱིས་ཡོངས་ཁྱབ་དོ་ཁུར་བྱེད་ས་དང་ཐོན་སྐྱེད་དང་འཚོ་བར་འབྲེལ་བ་ཟབ་མོ་ཡོད་པའི་གླེང་མང་བའི་གནད་དོན་སྐོར་རྩོམ་ཡིག་བྲིས་ནས། མང་ཚོགས་ཀྱིས་གོ་སླ་བ་དང་ལྟ་འདོད་པའི་གསར་འགྱུར་སྤེལ་ཡོད་པ་རེད།

ཏོག་གསར་གློ་ཚད་རིམས་ནད་མཆེད་ཚུན། སྒྲོལ་མ་སྲི་ཆོས་ཀྱིས་གཡོ་འགུལ་སྤུ་ཙམ་མེད་པར“ལྡོག་སྐྱོད”བྱས་ཤིང་། ཁྲིམས་སྐྱོང་གི་ནང་དོན་དང་ཟུང་འབྲེལ་གྱིས་མངའ་རིས་ས་ཁུལ་གྱི་རིམས་ནད་སྔོན་འགོག་དང་ཚོད་འཛིན་གྱི་བྱེད་ཐབས་ཁག་ཕྱོགས་ཡོངས་ནས་སྤེལ་ནས། འཐབ་ས་མདུན་མའི་གནས་ཚུལ་དངོས་མང་ཚོགས་ལ་བརྒྱུད་བསྒྲགས་བྱས་པ་དང་། རིམས་ནད་སྔོན་འགོག་དང་ཚོད་འཛིན་གྱི་འབྲེལ་ཡོད་བཅའ་ཁྲིམས་དང་། ཁྲིམས་སྲོལ། སྲིད་ཇུས་བཅས་དྲིལ་བསྒྲགས་དང་གསལ་འགྲེལ་བྱས་ནས་མང་ཚོགས་ཀྱི་ཁྲིམས་སྐྱོང་འདུ་ཤེས་ཟབ་ཏུ་བཏང་ཡོད། དེའི་རིང་ཁོང་གིས་གསར་འགྱུར་རྩོམ་ཡིག་ཁག་60ལྷག་ཙམ་བྲིས་པ་དང་བཅར་འདྲི་ཐེངས་100ལྷག་ཙམ་བྱས་པ། གཞན་ཡང་རྩོམ་ཡིག10ལྷག་ཙམ《མི་དམངས་ཉིན་རེའི་ཚགས་པར》དང་། སློབ་སྦྱོང་རྒྱལ་ཁབ་སྟོབས་ཆེན། 《བོད་ལྗོངས་ཉིན་རེའི་ཚགས་པར》སོགས་སུ་བརྒྱུད་སྤེལ་བྱས་པ་དང་། 《མངའ་རིས་ས་ཁུལ་ཞང་ཞུང་སྒྲོམ་ཚང་སྨན་ཁང》གི་པར་རིས་མཐོང་ཚོར་ཀྲུང་གོ་ཞེས་པའི་སྨྱན་སྦྱོར་སྟེང་སྤྱད་པ། 《ཏང་ཡོན་གདོང་ལེན་རུ་ཁག་གིས་ཉིང་སྐྱུར་བརྟག་དཔྱད་ཀྱི་མ་དཔེ་བརྒྱུད་འདྲེན་འགན་ལེན་གྱི་ལས་དོན》དང་། 《དངོས་ཟོག་མཁོ་སྤྲོད་འགན་ལེན་དང་སྡེབ་སྐྱེལ་རུ་ཁག་གིས་དམངས་ལ་ཞབས་འདེགས་ཞུ་བའི་དམིགས་ཡུལ་ལག་ལེན་བསྟར་བ》 《བདེ་སྐྱིད་གྲོང་གསར་གྱི་ཁུལ་བཞི་པའི་རིམས་མེད་ཁུལ་གྱི་གྲོང་གཏོད་ཟིན་ཐོ》སོགས་ཀྱི་རྩོམ་ཡིག“མཁའ་དབྱིངས་ཀྱི་མངའ་རིས”ཞེས་པའི་སྐད་འཕྲིན་སྤྱི་རྟགས་སུ་བཏང་བར་མི་ཐེངས་ཁྲི་1.5ལྷག་ཟིན་གྱི་བལྟས་ཡོད་པ་རེད།

དཀའ་སྤྱད་ཀྱི་རྔུལ་ཆུ་རེ་རེ་ལས་ལོ་ལེགས་ཀྱི་འབྲས་རྡོག་རེ་རེ་བྱུང་། སྒྲོལ་མི་སྲི་ཆོས་ལ“2022ལོའི་མངའ་རིས་ས་ཁུལ་གྱི་དྲིལ་བསྒྲགས་བསམ་བློའི་ཁོངས་གཏོགས་ཀྱི་སྔོན་ཐོན་མི་སྒེར”གྱི་གཟི་བརྗིད་མཚན་སྙན་ཐོབ་ཡོད་པ་རེད།

གཞིས་རྩེ་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གི་ཁྲེན་ཡུན་ཧྥེང་།

ལོ་རབས“90པའི་ནང་སྐྱེས”ཀྱི་འགྲིམ་འགྲུལ་ཉེན་རྟོག་པས་ལང་ཚོའི་ཁྲག་དྲོན་སྐྱེས་སུ་ཕུལ་བ།

ཁྲེན་ཡུན་ཧྥེང་། སྐྱེས་པ། རྒྱ་རིགས། 1995ལོའི་ཟླ་11པར་སྐྱེས། གཞིས་རྩེ་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གི་ཁྲིམས་སྐྱོང་དྲིལ་བསྒྲགས་ཁོའོ་ཡི་མི་དམངས་ཉེན་རྟོག་པ་ཡིན་པ།

ཁོང་གིས་ཐོག་མཐའ་བར་གསུམ་དུ“སྤྱི་བདེ་འགྲིམ་འགྲུལ་དོ་དམ་གྱི་ཁྲིམས་སྐྱོང་དྲིལ་བསྒྲགས་ལས་དོན་ནི་སྤྱི་བདེ་འགྲིམ་འགྲུལ་དོ་དམ་ལས་དོན་གྱི་སྲོག་རྩ་ལྟ་བུ་ཡིན་པའི”ལས་ཀའི་འདུ་ཤེས་འཛིན་ནས། དང་ཐོག་གི་དྲིལ་བསྒྲགས་ཤོག་བྱང་སྤྲད་པ་ནས་ད་ཆའི“གཞིས་རྩེའི་འགྲིམ་འགྲུལ་ཉེན་རྟོག་པའི”སྨྱན་སྦྱོར་གསར་པ་གཉེར་སྐྱོང་བྱེད་པའི་བར། ཁོང་གིས་མདུན་སྐྱོད་ཀྱི་གོམ་སྟབས་གཏན་ནས་མཚམས་འཇོག་མྱོང་མེད། ཏོག་གསར་གློ་ཚད་རིམས་ནད་ཐོན་རིང་ཁོང་གིས་འཐབ་ས་དང་པོར་བསྐྱོད་དེ་འགྲིམ་འགྲུལ་བདེ་འཇགས་དང་འགོག་སྲུང་བྱ་ཐབས་སོགས་ཀྱི་ཤེས་བྱ་དྲིལ་བསྒྲགས་བྱས་པ་དང་། CCTV-1《འཚོ་བའི་དྲན་སྐུལ》དང《ཀྲུང་དབྱང་བརྙན་འཕྲིན》སོགས་ཀྱི་ལེ་ཚན་བརྒྱུད“གཞིས་རྩེའི་འགྲིམ་འགྲུལ་ཉེན་རྟོག་པ”ཅེས་པའི་འགྲིམ་འགྲུལ་བདེ་འཇགས་སྐོར་སྒྲོག་འགྲེལ་དང་འགྲེལ་བཤད་རྒྱག་པའི་ལེ་ཚན་བཏོད་པར་རྒྱལ་ཡོངས་སུ་ཤུགས་རྐྱེན་བཟང་པོ་ལྡན་ཡོད་པ་རེད།

ཁོང་གིས་ཐོག་མཐའ་བར་གསུམ་དུ“མང་ཚོགས་གཙོ་བོ་དང་ཞབས་ཞུ་རྩ་བར་འཛིན་པའི”འདུ་ཤེས་མཐའ་འཁྱོངས་ཀྱིས་རྒྱ་ཆེའི་ཁ་ལོ་བ་དང་འགྲུལ་པར་ལྷག་བསམ་རྣམ་དག་གིས་ཞབས་འདེགས་ཞུས་ཡོད། ཁྲིམས་སྒྱུར་བྱེད་རིང་ཁོང་གིས་ངང་རྒྱུད་རིང་པོས་གྱོད་གཞི་དྲངས་ནས་བཅའ་ཁྲིམས་གསལ་འགྲེལ་བྱས་ཏེ། རྒྱ་ཆེའི་ཁ་ལོ་བ་དང་འགྲུལ་པར་བྱེད་སྤྱོད་ཀྱི་ཁྲིམས་འགལ་རང་བཞིན་དང་དེ་བཞིན་ཐོན་སྲིད་པའི་མཇུག་འབྲས་ཤེས་སུ་བཅུག་པ་དང་། ཉེ་འགྲམ་དུ་ལྷག་པའི་གྱོད་དཔེ་ངོ་མ་དྲངས་ནས་རྒྱ་ཆེའི་ཁ་ལོ་བ་དང་འགྲུལ་པར་འགྲིམ་འགྲུལ་བདེ་འཇགས་ཀྱི་བཅའ་ཁྲིམས་ཤེས་བྱ་སྦྱངས་ནས་རླངས་འཁོར་གཏོང་དུས་ཀྱི་གོམས་གཤིས་ངན་པ་དང་ཚུལ་མིན་གྱི་འགྲིམ་འགྲུལ་བྱེད་སྤྱོད་སྒྱུར་བཅོས་གཏོང་དུ་བཅུག་ཡོད།

“གཞིས་རྩེའི་འགྲིམ་འགྲུལ་ཉེན་རྟོག་པའི”ལེ་ཚན་སྤུས་རྟགས་གཏོད་རྒྱུ་དམ་འཛིན་བྱ་གཞིར་བྱས་ནས། སྔ་རྗེས་སུ《སྣ་སུན་བློ་ལ་གཏན་པོར་ངེས》དང《ཇོ་མོ་གླང་མའི་འཁོར་ལམ》སོགས་ཀྱི་ལེ་ཚན་བཏོན་པ་རེད། “གཞིས་རྩེའི་འགྲིམ་འགྲུལ་ཉེན་རྟོག་པ”གཉེར་སྐྱོང་བྱས་པ་ནས་བཟུང་། རྒྱབ་སྐྱོར་བྱེད་མཁན་ཁྲི་14ལྷག་ཙམ་བར་མང་དུ་ཕྱིན་ཡོད། མང་ཚོགས་ཀྱི་ལྟ་སྐུལ་དང་བློ་འདྲི་ལ་དམ་པོར་དམིགས་ནས་2021ལོར《ཁྱེད་ཀྱིས་ཐེར་འདོན་བྱས་རིགས་ངས་ཐག་གཅོད་བྱེད》ཅེས་པའི་ལེ་ཚན་བཏོད་དེ། མང་ཚོགས་ཀྱི་དཀའ་གནད་ལ་ནན་ཏན་དང་ཞིབ་ཚགས་ངང་ལན་བརྒྱབ་པ་དང་མང་ཚོགས་ཀྱིས་ཐེར་འདོན་གོང་ཞུ་བྱས་པའི་ཁྲིམས་འགལ་བྱེད་སྤྱོད་ཚང་མར་ཁྲིམས་ལྟར་ཞིབ་དཔྱད་བྱས་པ་རེད། མིག་སྔའི་བར་མང་ཚོགས་ཀྱི་ལས་སྒོའི་བློ་འདྲི་ཐེངས་2000ལྷག་ཙམ་ལ་ལན་བཏབ་པ་དང་མང་ཚོགས་ཀྱིས་ཐེར་འདོན་བྱས་པའི་འགྲིམ་འགྲུལ་ཁྲིམས་འགལ་བྱེད་སྤྱོད་100ལྷག་ཙམ་ལ་ཞིབ་བཤེར་ཐག་གཅོད་བྱས་པ་རེད།

ལོ་རབས“90པའི་ནང་སྐྱེས”ཀྱི་ཁྲེན་ཡུན་ཧྥེང་གིས་བྱ་སྤྱོད་དངོས་ཀྱི་ཐོག་ནས་མི་དམངས་ཉེན་རྟོག་པའི་དམ་བཅའ་ལག་ལེན་བསྟར་ཡོད། ཉེ་བའི་ལོ་ཤས་རིང་ཁོང་ལ་རང་སྐྱོང་ལྗོངས་སྤྱི་བདེ་ཐིང་གི་གཟེངས་བསྟོད་ཐོབ་པ་དང་། གཞིས་རྩེ་གྲོང་ཨུད་དྲིལ་བསྒྲགས་པུའུ་ཡིས“མི་དམངས་འདུམ་སྒྲིག་པ་དང་། མི་དམངས་འདྲི་རོགས་པ། ཁྲིམས་འཛིན་རམ་འདེགས་པ”ཕུལ་བྱུང་དུ་བདམས་པ། “2022ལོའི་ཇོ་མོ་གླང་མའི་གསར་འགྱུར་བྱ་དགའ”ཐོབ་པ་རེད།