འདི་ནི་མི་དམངས་ཉེན་རྟོག་པ་བཞིས་གློག་སྒུལ་སྦག་སྦག་བཏང་ནས་སྐོར་གཡེང་བྱེད་བཞིན་པ།

“གློག་སྒུལ་སྦག་སྦག་ཡོད་པས་ང་ཚོ་ཁོངས་གཏོགས་ཁུལ་དུ་སྐོར་གཡེང་བྱེད་བདེ་རུ་ཕྱིན་སོང”ཉེ་ཆར་བོད་ལྗོངས་མངའ་རིས་མཐའ་མཚམས་དོ་དམ་ཉིང་ལག་རུ་ཁག་གི་འཁོར་ཆགས་མཐའ་མཚམས་མངགས་གཏོང་ཁང་གི་བསོད་ནམས་སྟོབས་རྒྱལ་གྱིས་རུ་སྣེ་ཁྲིད་པའི་མི་དམངས་ཉེན་རྟོག་པ་བཞིས་སྤུ་ཧྲེང་རྫོང་གྲོང་རྡལ་ཏང་ཨུད་དང་སྲིད་གཞུང་གིས་སྤྲད་པའི་གློག་སྒུལ་སྦག་སྦག་བཞོན་ནས་ཁོངས་གཏོགས་ཁུལ་དུ་ཉིན་གཅིག་གི་སྐོར་གཡེང་ལས་འགན་སྒྲུབ་འགོ་ཚུགས།

དུས་ཡུན་རིང་པོ་ཉེན་རྟོག་པའི་སྒྲིག་ཆས་དང་ཁ་ལོ་བ་ཉུང་བར་བརྟེན་མི་དམངས་ཉེན་རྟོག་པས་སྡེ་ཁུལ་དུ་རྒྱུན་གཏན་ལས་འགན་སྒྲུབ་པར་སྟབས་བདེ་ཡོང་གི་མེད། “སྐབས་རེ་ཁོངས་གཏོགས་ཁུལ་དུ་སྐོར་གཡེང་ལ་སྐྱོད་བསམ་ཡང་ཁ་ལོ་བ་མང་ཆེ་བ་ལས་འགན་གཞན་སྒྲུབ་པར་སྐྱོད་དགོས་པས་སྐོར་གཡེང་ལ་འགྲོ་ཐུབ་ཀྱི་མི་འདུག”ཅེས་མི་དམངས་ཉེན་རྟོག་པ་བསོད་ནམས་སྟོབས་རྒྱལ་གྱིས་མྱོང་ཚོར་ཟབ་མོས་བརྗོད་བྱུང་།

ཤེས་རྟོགས་བྱུང་བར་གཞིགས་ན། ད་ཐེངས་སྤུ་ཧྲེང་གྲོང་རྡལ་ཏང་ཨུད་དང་སྲིད་གཞུང་གིས་མངགས་གཏོང་ཁང་དེར་གློག་སྒུལ་སྦག་སྦག་བཞི་སྤྲད་པར་བརྟེན་མི་དམངས་ཉེན་རྟོག་པས་རྒྱུན་གཏན་གྱི་སྐོར་གཡེང་དང་ཁོངས་གཏོགས་ཁུལ་གྱི་མང་ཚོགས་ལ་ཞབས་འདེགས་ཞུ་བར་སྟབས་བདེ་བྱུང་ཡོད།

“གློག་སྒུལ་སྦག་སྦག་ཡོད་པས། ང་ཚོའི་མི་དམངས་ཉེན་རྟོག་པ་ཁོངས་གཏོགས་ཁུལ་དུ་སྐྱོད་སྐབས་སྟབས་ཧ་ཅང་བདེ་རུ་ཕྱིན་པ་དང་ལས་ཀའི་སྤྲོ་སེམས་ཆེ་རུ་ཕྱིན་ཡོད”ཅེས་མངགས་གཏོང་ཁག་གི་སུའོ་ཀྲང་གིས་བརྗོད། ཉེན་དོན་གློག་སྒུག་སྦག་སྦག་བྱུང་བ་་ནས་བཟུང་རིམ་རྩིས་བྱས་ན་མངགས་གཏོང་ཁང་དེས་ཉེན་རྟོག་པ་མི་ཐེངས་30ལྷག་ཙམ་བཏང་ནས་ཁོངས་གཏོགས་ཁུལ་གྱི་ཇ་ཁང་དང་ཨར་ཁང་སོགས་30ལྷག་ཙམ་ལ་སྐོར་གཡེང་བྱས་ཡོད།