པར་གསུམ་པོ་འདི་ནི་དུག་འགོག་དྲིལ་བསྒྲགས་བྱེད་སྒོ་སྤེལ་ཡུལ་ཡིན་པ།

དམངས་ཡོངས་ཀྱི་དུག་འགོག་རྣམ་པ་ཟབ་མོ་མུ་མཐུད་བཏོད་དེ་རྒྱ་ཆེའི་མང་ཚོགས་ཀྱི་དུག་རྫས་ངོས་འཛིན་པ་དང་དུག་མི་འཐེན་པ། དུས་རྫས་འགོག་པ་བཅས་ཀྱི་འདུ་ཤེས་སྔར་བས་ཟབ་ཏུ་གཏོང་ཆེད། ལྷོ་ཁ་གྲོང་ཁྱེར་སྣེ་གདོང་ཆུས་སྤྱི་བདེ་ཅུས་ཀྱིས་ཁོངས་གཏོགས་ཁུལ་དུ་དུག་འགོག་གི་དྲིལ་བསྒྲགས་བྱེད་སྒོ་སྣ་ཚོགས་སྤེལ་བ་རེད།

ལྷོ་ཁའི་ཧྲེན་ལི་ཐང་ཆེན་དུ་སྣེ་གདོང་ཆུས་དུག་འགོག་གཞུང་ལས་ཁང་གིས་གྲོང་ཁྱེར་དུག་འགོག་ཅུས་དུག་འགོག་ཉིང་ལག་རུ་ཁག་དང་མཉམ་དུ་་དྲིལ་བསྒྲགས་ས་ཚིགས་བཙུགས་ཏེ། མི་དམངས་ཉེན་རྟོག་པས་འགྲོ་འོང་བྱེད་མཁན་མང་ཚོགས་ལ་དྲིལ་བསྒྲགས་དཔྱད་ཡིག་དང་ལག་རྟགས་སྤྲད་དེ་ཁོ་ཚོར་དུག་རྫས་ཀྱི་གནོད་འཚེ་དང་དེ་བཞིན་ཁྲིམས་དང་འགལ་ནས་དུག་རྫས་ཀྱི་མ་བཅོས་རྩི་ཤིང་འདེབས་པའི་བཅའ་ཁྲིམས་ཀྱི་འགན་འཁྲིའི་སྐོར་སྒྲོག་འགྲེལ་བྱས་ནས། ཚང་མར་སྤྱི་བདེ་ལས་ཁུངས་ལ་དུག་འབྲེལ་གྱི་ཁྲིམས་འགལ་ཉེས་གསོག་གི་ཁུངས་སྣེ་ཐེར་འདོན་ཧུར་ཐག་བྱས་ཏེ་ཉེན་རྟོག་པ་དང་མི་དམངས་ཀྱིས་མཉམ་དུ་བདེ་འཇགས་དང་བདེ་ཐང་གི་སྤྱི་ཚོགས་ཁོར་ཡུག་སྲུང་སྐྱོང་བྱེད་དགོས་པའི་ལྕག་སྐུལ་བྱས་པ་རེད།

བྱ་ས་སྲང་ལམ་མངགས་གཏོང་ཁང་གི་མི་དམངས་ཉེན་རྟོག་པས་ལྷོ་ཁ་གྲོང་ཁྱེར་གྱི་མེ་འཁོར་བབས་ཚུགས་དང་སྣེ་གདོང་ཆུས་སློབ་འབྲིང་དུ་གོ་བདེ་ཤེས་སླའི་སྐད་ཆས་རྒྱལ་ཁབ་ཀྱི་དུག་འགོག་བྱེད་ཕྱོགས་དང་། སྲིད་ཇུས། དེ་བཞིན་འབྲེལ་ཡོད་བཅའ་ཁྲིམས་ཀྱི་ཤེས་བྱ་སྒྲོག་འགྲེལ་བྱས་པ་དང་། དུག་རྫས་ཀྱི་ངོ་བོ་དང་། སྣ་ཁ། དེ་བཞིན་དུག་རྫས་ཀྱི་གནོད་འཚེ་བཅས་ལ་འགྲེལ་བཤད་བརྒྱབ་ནས། མང་ཚོགས་དང་དགེ་སློབ་ཚོར་དུག་འཐེན་ཚེ་རང་ངོས་དང་། ཁྱིམ་ཚང་། སྤྱི་ཚོགས་བཅས་ལ་གནོད་འཚེ་ཚབས་ཆེན་གང་འདྲ་བཟོ་མིན་གསལ་བཤད་བྱས་ནས། ཚང་མར་དུག་འགོག་གི་ལས་དོན་ལ་ཧུར་ཐག་ཞུགས་པ་དང་རྒྱབ་སྐྱོར་བྱེད་དགོས་པའི་ལྕག་སྐུལ་བྱས་པ་རེད།

ཕོ་བྲང་ཤང་མངགས་གཏོང་ཁང་གིས་མདའ་ཐང་གྲོང་ཚོར“ཚང་མས་ཁྲིམས་ལྟར་དུག་འགོག་ལས་ལ་གཞོལ། དུད་ཚང་ཁྲི་སྟོང་མང་པོའི་བདེ་སྐྱིད་མཉམ་དུ་སྲུང”བའི་དུག་འགོག་གི་སྒྲོག་འགྲེལ་ཚོགས་འདུ་འཚོགས་ཏེ་མང་ཚོགས་ཚོར་དུག་རྫས་གསར་པའི་ངོ་བོ་དང་། ཁྱད་ཆོས། སྣ་ཁ། གནོད་འཚེ། དེ་བཞིན་འབྲེལ་ཡོད་ཀྱི་བཅའ་ཁྲིམས་དང་ཁྲིམས་སྲོལ་ངོ་སྤྲོད་བྱས་པ་མ་ཟད། ད་དུང་དཔེ་མཚོན་གྱོད་དཔེ་དྲངས་ནས་དུག་རྫས་ཀྱི་གནོད་འཚེར་འགྲེལ་བཤད་ཞིབ་ཕྲ་བརྒྱབ་པ་རེད། དེ་རྗེས་མི་དམངས་ཉེན་རྟོག་པས་སྒེར་ལྷ་གྲོང་ཚོའི་སྐད་གཉིས་བུ་བཅོལ་ཁང་དུ་བསྐྱོད་དེ་དགེ་སློབ་དང་ཁྱིམ་བདག་ཚོར་ན་སོ་དར་ལ་མ་བབས་པའི་མིས་དུག་རྫས་ཀྱི་གནོད་འཚེ་འགོག་ཟོན་བྱེད་ཐབས་སྒྲོག་འགྲེལ་བྱས་ནས་ཚང་མས་ཐུན་མོང་ཐོག་བདེ་འཇགས་དང་བདེ་ཐང་གི་སློབ་གྲྭའི་ཁོར་ཡུག་གཏོད་དགོས་པའི་འབོད་སྐུལ་བྱས་པ་རེད།