ཀྲུང་དབྱང་རྩ་འཛུགས་པུའི་ཏང་ནང་ཁུལ་གྱི་བསྡོམས་རྩིས་གྲངས་གཞི་གསར་ཤོས་ལས་མངོན་པར། 2022ལོའི་ལོ་མཇུག་བར། ཀྲུང་གོ་གུང་ཁྲན་ཏང་གི་ཏང་ཡོན་ཁྲི་9804.1ཟིན་པ་དེ་ལོ་གོང་མ་ལས་ཁྲི་132.9འཕར་ཡོད། ཏང་གི་གཞི་རིམ་རྩ་འཛུགས་ཁྲི་506.5ཟིན་པ་དེ་ལོ་གོང་མ་ལས་ཁྲི་12.9འཕར་ཡོད། ལོ་ངོ་བརྒྱའི་དྲག་ཆར་རླུང་འཚུབ་དང་དུས་རབས་གསར་པའི་ལོ་བཅུའི་གསར་བརྗེའི་རང་བཞིན་གྱི་སྦྱོང་བརྡར་བརྒྱུད་ཀྲུང་གོ་གུང་ཁྲན་ཏང་དེ་བས་ཞུམ་མེད་སྟོབས་ལྡན་དང་དེ་བས་གསོན་ཤུགས་ཀྱིས་ཁེངས་པར་གྱུར་ནས། ཏང་གི་རྩ་འཛུགས་མ་ལག་ཉིན་བཞིན་ཚགས་དམ་དུ་ཕྱིན་ནས་ཏང་གི་སྲིད་སྐྱོང་རྨང་གཞི་རྒྱུན་ཆད་མེད་པར་བརྟན་དུ་ཕྱིན་ཡོད་པ་རེད།

ཏང་ཡོན་གྱི་བསྡོམས་འབོར་བརྟན་པོའི་ངང་འཕར་ཡོད། ཏང་ཡོན་གྱི་བསྡོམས་འབོར་ལོ་གོང་མ་ལས་1.4%འཕར་ཡོད། 2022ལོར་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོགས་ཡོད། ལས་རིགས་ཁག་དང་ཁྱབ་ཁོངས་ཁག་གི་སྔོན་ཐོན་པ་གཅིག་རྗེས་གཉིས་མཐུད་ངང་ཏང་ནང་ཞུགས་པས་ལོ་ཧྲིལ་པོར་གསར་དུ་འཕེལ་རྒྱས་བྱུང་བའི་ཏང་ཡོན་ཁྲི་244.9ཟིན་ཡོད། དེའི་ནང་། ཆེད་ཚན་དང་དེ་ཡན་གྱི་སློབ་རྒྱུས་ལྡན་པ་དང་། ལོ་35་དང་དེ་མན། བུད་མེད། གྲངས་ཉུང་མི་རིགས་བཅས་ཀྱིས་51.4%དང་། 81.2% 45.5% 10.5%བཅས་སོ་སོར་བཟུང་ཡོད། ཐོན་སྐྱེད་དང་ལས་ཀའི་འཐབ་ཕྱོགས་དང་པོར་ཏང་ཡོན་ཁྲི་128.8འཕེལ་རྒྱས་ཕྱིན་ཡོད་པ་རེད།

ཏང་ཡོན་དཔུང་ཁག་གི་གྲུབ་ཆ་རྒྱུན་མཐུད་ལེགས་སུ་ཕྱིན་ཡོད། 2022ལོའི་ལོ་མཇུག་བར། ཆེད་ཚན་དང་དེ་ཡན་གྱི་སློབ་རྒྱུས་ལྡན་པའི་ཏང་ཡོན་ཁྲི་5365.4ཟིན་པ་དེས་54.7%བཟུང་བ་དང་ལོ་གོང་མ་ལས་བརྒྱ་ཆའི་གྲངས་1.5འཕར་ཡོད། བུད་མེད་ཏང་ཡོན་ཁྲི་2930.2ཟིན་པ་དེས་29.9%བཟུང་བ་དང་ལོ་གོང་མ་ལས་བརྒྱ་ཆའི་གྲངས་0.5འཕར་ཡོད། གྲངས་ཉུང་མི་རིགས་ཀྱི་ཏང་ཡོན་ཁྲི་744.5ཟིན་པ་དེས་7.6%བཟུང་བ་དང་ལོ་གོང་མ་ལས་བརྒྱ་ཆའི་གྲངས་0.1འཕར་ཡོད། བཟོ་པ་དང་ཞིང་པ་ནི་སྔར་བཞིན་ཏང་ཡོན་དཔུང་ཁག་གི་གྲུབ་ཆ་གཙོ་བོ་ཡིན་ཞིང་། ཏང་ཡོན་བསྡོམས་འབོར་གྱི་བརྒྱ་ཆ་33.3%བཟུང་ཡོད་པ་རེད།

ཏང་ཡོན་གྱི་སློབ་གསོ་དང་དོ་དམ་ལ་སྔར་བས་ཤུགས་སྣོན་ཐེབས་ཡོད། རིམ་ཁག་ཏང་རྩ་འཛུགས་ཀྱིས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་དང་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་གསོ་སྦྱོང་ལ་རྒྱུན་མཐུད་དམ་འཛིན་ཡག་པོ་བྱས་ཏེ་ལོ་ཧྲིལ་པོར་གསོ་སྦྱོང་འཛིན་གྲྭ་དུས་ཐེངས་ཁྲི་128.4གཉེར་བ་དང་། རྫོང་རིམ་པ་ཡན་གྱི་ཏང་ཨུད་ཀྱིས་གཞི་རིམ་ཏང་རྩ་འཛུགས་ཀྱི་ཧྲུའུ་ཅི་མི་ཐེངས་ཁྲི་510.1ལ་གཅིག་སྡུད་རེས་སྐོར་གསོ་སྦྱོང་བྱས་ཡོད་པ་རེད།

གཞི་རིམ་ཏང་རྩ་འཛུགས་འཛུགས་སྐྱོང་གི་སྤུས་ཚད་མཐོ་རུ་དང་ཕན་འབྲས་ཆེ་རུ་ཕྱིན་ཡོད། རྒྱལ་ཡོངས་སུ་གཞི་རིམ་ཏང་ཨུད་ཁྱོན་ཁྲི་28.9དང་། སྤྱི་ཁྱབ་ཀྲི་པུའུ་ཁྲི་32.0 ཀྲི་པུའུ་ཁྲི་445.6བཅས་བཙུགས་པ་དེ་ལོ་གོང་མ་ལས་ཁྲི་1.1དང་། ཁྲི་0.4 ཁྲི་11.4བཅས་སོ་སོར་མང་དུ་ཕྱིན་ནས། རྩ་འཛུགས་བཀོད་སྒྲིག་དེ་བས་ཚན་རིག་དང་མཐུན་ཞིང་ཚད་ལྡན་བྱུང་ཡོད། ཏང་འཛུགས་སྐྱོང་ལ་དམ་འཛིན་གྱིས་གྲོང་གསེབ་དར་རྒྱས་ལ་སྐུལ་འདེད་ཏན་ཏིག་བཏང་བ་དང་། གྲོང་ཚོའི་ཏང་རྩ་འཛུགས་ཀྱི་སྣེ་ཁྲིད་པའི་དཔུང་ཁག་འཛུགས་སྐྱོང་ལ་སྔར་བས་ཤུགས་སྣོན་བརྒྱབ་པ་བརྒྱུད། གྲོང་ཚོའི་ཏང་རྩ་འཛུགས་ཀྱི་ཧྲུའུ་ཅི་ཁྲི་49.0གྱི་ནང་ཆེད་ཚན་དང་དེ་ཡན་གྱི་སློབ་རྒྱུས་ལྡན་མཁན་གྱིས་42.5%བཟུང་བ་དེ་ལོ་གོང་མ་ལས་བརྒྱ་ཆའི་གྲངས་1.7འཕར་ཡོད་པ་རེད།