མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ། མི་རིགས་ཁག་དབར་གཅིག་སེམས་གཅིག་ཏུ་སྦྲེལ།
—— ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཚོས་ཕྱར་བ་གྲུ་འདེགས་ཀྱིས་མཛེས་སྡུག་ལྡན་པའི་ཁྱིམ་གཞིས་མཉམ་དུ་སྐྲུན་པའི་སྐོར་རགས་ཙམ་བཀོད་པ།
ཉིང་ཁྲི་གྲོང་ཁྱེར་སྣང་རྫོང་སྣང་གྲོང་རྡལ་ཐོགས་མེད་གྲོང་ཚོའི་གྲོང་མི་བདེ་སྐྱིད་ཆོས་སྒྲོན་དང་བཟའ་ཟླ་ཐང་ཅན་ཧྭ་ཐོགས་མེད་གྲོང་ཚོ་ནས་ངོ་ཤེས་རྗེས་ཕན་ཚུན་དགའ་རོགས་བསྒྲིགས་པ་མ་ཟད། ལས་འགྲོའི་མདུད་པའང་ཐེབས། སྐད་བརྡ་མི་འཕྲོད་པ་དང་འཚོ་བའི་གོམས་གཤིས་མི་འདྲ་ནའང་ཁོང་གཉིས་ཀྱི་ལས་དབང་ལ་བར་ཆད་འཕྲད་མེད། གཉེན་སྒྲིག་བྱས་རྗེས་ཕན་ཚུན་བརྩི་འཇོག་དང་། ཕན་ཚུན་བསྟུན་མཁས། མཉམ་དུ་ཡར་རྒྱས་བཅས་བྱས་ཏེ་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་མི་སེམས་འགུལ་བའི་གཏམ་རྒྱུད་བརྩམས་ཡོད།
ཐང་ཅན་ཧྭ་དང་འདྲ་བར་ཀྲོའུ་ཅིན་མིང་བོད་དུ་ལས་ཀ་བྱེད་རིང་། སྤོ་བོ་རྫོང་ཡིད་འོང་ཤང་དགོན་གྲོང་གྲོང་ཚོའི་བུ་མོ་ཉི་མ་ལྷ་མོ་དང་དགའ་རོགས་བསྒྲིགས་ནས་གཉེན་སྒྲིག་བྱས་རྗེས། མཐར་ས་མཐོར་འཚོ་བ་སྐྱེལ་རྒྱུའི་གདམ་ག་བྱས། གཉེན་སྒྲིག་བྱས་རྗེས་ཁོང་གཉིས་འཆམ་མཐུན་མཉམ་གནས་ཀྱིས་འཚོ་བ་ཡག་ཏུ་གཏོང་ཆེད་སེམས་ཤུགས་གཅིག་ཏུ་སྒྲིལ་བཞིན་ཡོད། “མིག་སྔར། ང་ཚོས་ཞིང་ཁྱིམ་སྤྲོ་སྐྱིད་ཁང་དང་། སྐྲ་ཁང་། ཁྱིམ་ཚང་མགྲོན་ཁང་བཅས་གཉེར་སྐྱོང་བྱེད་བཞིན་ཡོད་ལ། ཕྲུ་གུ་གཉིས་པོའང་བདེ་ཐང་ངང་འཚར་ལོངས་ཡོང་བཞིན་ཡོད་པ་མ་ཟད། ང་དང་མནའ་མའི་ནང་མི་ཚོའང་ཧ་ཅང་འཆམ་པོ་ཡོད”ཅེས་ཀྲོའུ་ཅིན་མིང་གིས་རང་ཉིད་ཀྱི་ད་ལྟའི་འཚོ་བར་བློ་ཡིད་ཚིམ་པོ་བྱེད་ཀྱི་ཡོད།
ཐང་ཅན་ཧྭ་དང་བདེ་སྐྱིད་ཆོས་སྒྲོན་བཟའ་ཚོ་དང་། ཀྲོའུ་ཅིན་མིང་དང་ཉི་མ་ལྷ་མོ་བཟའ་ཚོ་གཉིས་ཀྱི་བདེ་སྐྱིད་ལྡན་པའི་འཚོ་བའི་གཏམ་རྒྱུད་ནི་རང་ལྗོངས་ཀྱིས་དུས་རབས་གསར་པའི་མི་རིགས་མཐུན་སྒྲིལ་ཡར་ཐོན་གྱི་ལས་དོན་ཡག་པོ་སྒྲུབ་པ་དང་མི་རིགས་མཐུན་སྒྲིལ་ཡར་ཐོན་བྱ་གཞག་གི་རྣམ་པ་གསར་པ་རྒྱུན་ཆད་མེད་པར་བཏོད་པའི་བསྡུས་རིས་ཤིག་རེད།