འདི་ནི་དྲིལ་བསྒྲགས་བྱེད་སྒོ་སྤེལ་ཡུལ་ཡིན་པ།

ཚེས་26ཉིན་གྱི་སྔ་དྲོ་རང་སྐྱོང་ལྗོངས་ཡིག་འབུལ་ཞུ་བཅར་ཅུས་ཀྱིས་ལྗོངས་སྤྱི་བདེ་ཐིང་དང་། ལྗོངས་མི་སྤྱི་ཐིང་། ལྷ་ས་གྲོང་ཁྱེར་ཡིག་འབུལ་ཞུ་བཅར་ཅུས་སོགས་ཚན་པ་20སྒྲིག་འཛུགས་བྱས་ཏེ་གཡུ་ཐོག་ལམ་དུ《ཡིག་འབུལ་ཞུ་བཅར་ལས་དོན་གྱི་སྲོལ་ཡིག》(གཤམ་དུ《སྲོལ་ཡིག》ཅེས་བསྡུ་རྒྱུ)ལག་བསྟར་བྱས་ནས་ལོ་གཅིག་འཁོར་བའི་དྲིལ་བསྒྲགས་ཉིན་མོའི་བྱེད་སྒོ་སྤེལ་བ་རེད།

བྱེད་སྒོ་སྤེལ་ཡུལ་དུ་དྲིལ་བསྒྲགས་འཕྲེད་འགེལ་ཡི་གེ་འགེལ་བ་དང་། དྲིལ་བསྒྲགས་འགྲེམས་པང་འཛུགས་པ། དྲིལ་བསྒྲགས་དཔྱད་ཡིག་དང་དྲན་རྟེན་དངོས་པོ་སྤྲོད་པ། ས་གནས་ས་ཐོག་ཏུ་དོགས་གནད་སེལ་བ་སོགས་བྱེད་པ་བརྒྱུད། འགྲོ་འོང་བྱེད་མཁན་གྲོང་མི་དང་མང་ཚོགས་ལ《སྲོལ་ཡིག》དྲིལ་བསྒྲགས་དང་འགྲེལ་བཤད་བརྒྱབ་སྟེ། མང་ཚོགས་ལ་ཚུལ་མཐུན་གྱི་རེ་འདུན་ཞུ་བ་དང་ཁྲིམས་ལྟར་ཁྲིམས་མཐུན་ཁེ་དབང་སྲུང་སྐྱོང་བྱ་རྒྱུར་ཁྲིད་སྟོན་ཏན་ཏིག་བྱས་པ་རེད།

རང་སྐྱོང་ལྗོངས་ཡིག་འབུལ་ཞུ་བཅར་ཅུས་ཀྱི་ཅུས་ཀྲང་གཞོན་པ་ཀུའོ་ཧྲུན་ཁྲེང་གིས“ད་ཐེངས་ཀྱི་དྲིལ་བསྒྲགས་བྱེད་སྒོ་སྤེལ་བ་བརྒྱུད། རྒྱ་ཆེའི་མང་ཚོགས་ཚོས་ཡིག་འབུལ་ཞུ་བཅར་ལས་དོན་གྱི་རྣམ་པ་དང་། བྱེད་ཐབས། ཐབས་ལམ་བཅས་སྔར་བས་ཤེས་ནས་ལྗོངས་ཡོངས་སུ་ཁྲིམས་ལྟར་བྱ་བ་སྒྲུབ་པ་དང་། དོན་དག་འཕྲད་སྐབས་ཁྲིམས་ལ་བརྟེན་པ། དོན་དག་ཐག་གཅོད་སྐབས་ཁྲིམས་སྤྱོད་པ། འགལ་ཟླ་སེལ་སྐབས་ཁྲིམས་ལ་བརྟེན་པ་བཅས་ཀྱི་སྤྱི་ཚོགས་ཀྱི་རྣམ་པ་བཟང་པོ་ཞིག་གཏོད་རྒྱུ་ཡིན”ཞེས་བཤད་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་ཀྱི་དྲིལ་བསྒྲགས་བྱེད་སྒོར་ཁྱོན་དྲིལ་བསྒྲགས་དཔྱད་ཡིག་3000ལྷག་ཙམ་དང་དྲིལ་བསྒྲགས་དངོས་རྫས་600ལྷག་ཙམ་སྤྲད་པ་དང་། ས་གནས་ས་ཐོག་ཏུ་མང་ཚོགས་100ལྷག་ཙམ་གྱི་ཡིག་འབུལ་ཞུ་བཅར་སྐོར་གྱི་བློ་འདྲི་དང་ལེན་བྱས་པ་རེད།