ཝང་ཞའོ་ཧུང་རྒྱལ་ཡོངས་ཀྱི་གློག་འཕྲིན་དྲ་རྒྱའི་ཁྲིམས་འགལ་ཉེས་གསོག་གསར་པར་རྡུང་རྡེག་དང་བཅོས་སྒྲིག་གི་ལས་དོན་གྱི་བརྙན་འཕྲིན་ཁ་པར་ཚོགས་འདུར་ཞུགས་པ།
ཉེ་ཆར། རྒྱལ་དོན་ཨུ་ཡོན་དང་སྤྱི་བདེ་པུའི་པུའུ་ཀྲང་ཝང་ཞའོ་ཧུང་གིས། རྒྱལ་ཡོངས་ཀྱི་གློག་འཕྲིན་དྲ་རྒྱའི་ཁྲིམས་འགལ་ཉེས་གསོག་གསར་པར་རྡུང་རྡེག་དང་བཅོས་སྒྲིག་བྱེད་པའི་ལས་དོན་གྱི་བརྙན་འཕྲིན་ཁ་པར་ཚོགས་འདུའི་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱེད་པ་དང་། གློག་འཕྲིན་དྲ་རྒྱའི་ཁ་བསླུས་ལ་ངོ་རྒོལ་བྱེད་པའི་བཅའ་ཁྲིམས་དང་ཀྲུང་གུང་ཀྲུང་དབྱང་གཞུང་དོན་ཐིང་དང་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གི《གློག་འཕྲིན་དྲ་རྒྱའི་ཁ་བསླུས་ཀྱི་ཁྲིམས་འགལ་ཉེས་གསོག་ལ་རྡུང་རྡེག་དང་བཅོས་སྒྲིག་བྱེད་པའི་ལས་དོན་ལ་ཤུགས་སྣོན་རྒྱག་རྒྱུའི་སྐོར་གྱི་བསམ་འཆར》དོན་འཁྱོལ་ནན་ཏན་བྱེད་པ། “ཆེད་དོན་ཞིབ་འཇུག་དང་། ཆེད་དོན་དཔུང་ཁག ཆེད་དམིགས་གྱོད་གཞི་འགག་སྒྲོལ། ཆེད་ལས་ལག་རྩལ་བཅས་ལ་བརྟེན་ནས་ནང་ཁུལ་གྱི་མཉམ་ཤུགས་ལ་དམ་འཛིན་ཡག་པོ་དང་ཕྱི་རོལ་གྱི་མཉམ་ཤུགས་ཆགས་པ་བྱེད་པའི”སྤྱིའི་བསམ་ཕྱོགས་མཐའ་འཁྱོངས་བྱེད་པ། རྡུང་རྡེག་དང་། འགོག་ཟོན། དོ་དམ། ཚོད་འཛིན་བཅས་ཀྱི་བྱ་ཐབས་ཁག་ལ་ཕྱོགས་ཡོངས་ནས་ཤུགས་སྣོན་རྒྱག་པ། རྡུང་རྡེག་དང་བཅོས་སྒྲིག་ལས་དོན་ལ་སྐུལ་འདེད་གཏིང་ཟབ་གཏོང་བ་བཅས་བྱས་ཏེ། ཁ་བསླུས་ལ་ངོ་རྒོལ་བྱེད་པའི་མི་དམངས་ཀྱི་དམག་འཐབ་ལ་རྒྱལ་ཁ་གསར་པ་ཧུར་ཐག་བླངས་ཏེ་བྱ་སྤྱོད་དངོས་ལ་བརྟེན་ནས་བརྗོད་དོན་གཙོ་བོའི་སློབ་གསོའི་གྲུབ་འབྲས་མངོན་པར་བྱེད་དགོས་པའི་ནན་བཤད་བྱས་པ་རེད།
ཝང་ཞའོ་ཧུང་གིས། རྡུང་རྡེག་གཏོང་ཤུགས་སྔར་བས་ཆེ་རུ་བཏང་ནས་ཉེས་ཅན་གྱི་འཛེམ་བག་མེད་པའི་ཧམ་སེམས་མཐའ་གཅིག་ཏུ་མེད་པར་བཟོས་ཏེ་གློག་འཕྲིན་དྲ་རྒྱའི་ཁ་བསླུས་ཀྱི་ཉེས་གསོག་ཐོན་མང་བའི་གནས་ཚུལ་བཀག་འགོག་ནུས་ལྡན་ཐུབ་པ་བྱེད་དགོས། འགོག་སྲུང་དྲ་བ་སྔར་བས་དམ་དུ་བཏང་སྟེ་ལག་རྩལ་ལ་བརྟེན་ནས་འགོག་རྒོལ་བྱེད་པ་དང་། ཉེན་བརྡ་བཏང་ནས་བཀག་སྡོམ་བསླབ་བྱ་བྱེད་པ། མ་དངུལ་ཕྱིར་སློག་བྱེད་པ། དྲིལ་བསྒྲགས་དང་དོགས་ཟོན་བཅས་ལ་ཤུགས་སྣོན་རྒྱག་པ་དང་། གང་ཐུབ་ཅི་ཐུབ་ཀྱིས་གྱོད་གཞི་སྔོན་འགོག་དང་མང་ཚོགས་ལ་རྒྱུ་ནོར་གྱི་གྱོང་གུན་ཉུང་དུ་གཏོང་དགོས། འབྱུང་རྩ་ནས་དོ་དམ་ཚོད་འཛིན་ལ་དམ་འཛིན་ཡག་པོ་དང་ལས་རིགས་བཅོས་སྒྲིག་བྱེད་ཟབ་ཏུ་བཏང་སྟེ། ཁ་བསླུས་དང་འབྲེལ་བའི་ཁྲིམས་འགལ་ཉེས་གསོག་བྱེད་སྤྱོད་སྤེལ་བའི་གོ་སྐབས་མེད་པར་བཟོ་དགོས། རྩ་འཛུགས་ཀྱི་སྐུལ་འདེད་ལ་སྔར་བས་ཤུགས་སྣོན་བརྒྱབ་ནས་ཏང་ཨུད་ཀྱིས་འགོ་ཁྲིད་པ་དང་། སྲིད་གཞུང་གིས་གཙོ་ཁྲིད་བྱེད་པ། སྡེ་ཚན་གྱིས་གཙོ་འགན་འཁུར་བ། ལས་རིགས་ཀྱིས་ལྟ་འདོམས་བྱེད་པ། འབྲེལ་ཡོད་ཕྱོགས་ཀྱིས་ཁུར་མཉམ་ལེན་དང་དོན་སྤྱི་སྒྲུབ་ཀྱི་སྤྱི་ཡོངས་རྣམ་པ་ཞིག་ཧུར་ཐག་གཏོད་དགོས་པའི་བླང་བྱ་བཏོན་ཡོད།