ཉེ་བའི་ལོ་ཤས་རིང་། རང་ལྗོངས་ཀྱིས“རི་སྔོ་ཆུ་དྭངས་གསེར་དངུལ་རི་ལས་ལྷག གངས་རི་འཁྱགས་ཀླུང་ཡིན་ཡང་གསེར་དངུལ་རི་ཡིན་པའི”འདུ་ཤེས་བརྟན་པོ་བཙུགས་ཏེ། ནུས་ཤུགས་ཡོད་རྒུས་རྒྱལ་ཁབ་ས་ཆ་སྔོ་འགྱུར་གྱི་ལས་དོན་ཡག་པོ་བསྒྲུབས་ནས་ནགས་བཟོ་ནགས་སྐྱོང་གི་སྔོན་འཛུགས་རྗེས་གསབ་དང་། གནམ་གྲུས་སོན་གཏོར་ནགས་བཟོ། གྲོང་གསེབ་ཀྱི་རྒྱབ་མདུན་ཚང་མར་ཤིང་འཛུགས་བྱ་སྤྱོད་སོགས་ཀྱི་བཀྲག་མདངས་འཚེར་བའི་ལས་དོན་ལ་སྐུལ་འདེད་ཧུར་ཐག་བཏང་བར་གྲུབ་འབྲས་བཟང་པོ་ཐོབ་ཡོད།

2022ལོར་རང་ལྗོངས་ཀྱིས《ཚན་རིག་དང་མཐུན་པའི་སྔོ་འགྱུར་བྱེད་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གི་མཛུབ་ཁྲིད་བསམ་འཆར》གཞིར་བཟུང་། 《ཚན་རིག་དང་མཐུན་པའི་སྔོ་འགྱུར་བྱེད་རྒྱུའི་སྐོར་གྱི་བོད་རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཐིང་གི་ལག་བསྟར་བསམ་འཆར》བཀྲམ་སྟེ། ལྗོངས་ཡོངས་ཀྱི་རིམ་ཁག་དང་སྡེ་ཚན་ཁག་གིས་ཤིང་འཛུགས་ནགས་བཟོ་ནན་ཏན་བསྒྲུབས་ནས་འཆར་གཞིའི་ལས་འགན་ལས་ལེགས་སྒྲུབ་ཚད་བརྒལ་བྱས་པ་དང་། ནགས་བཟོ་ནགས་སྐྱོང་མུའུ་ཁྲི་117.85ལེགས་སྒྲུབ་བྱས་པ་ལས་མི་ཐབས་ལ་བརྟེན་ནས་ནགས་བཟོ་མུའུ་ཁྲི་38.65དང་། རི་རྒྱ་བསྡམས་ནས་ནགས་བཟོ་མུའུ་ཁྲི་4.19(བྱེ་འགོག་བྱེ་བཅོས་ཚུད་པ) གནམ་གྲུས་སོན་གཏོར་ནགས་བཟོ་མུའུ་ཁྲི་75.01བཅས་བྱས་ཡོད།

1 རྣམ་པ་གསར་པར་བརྟེན་ནས་ས་མཐོ་སྔར་བས་མཛེས་སྡུག་ལྡན་པར་གྱུར།

ལྷ་སའི་ལྷོ་རི་བྱང་རིའི་སྔོ་འགྱུར་ལ་ཚན་རིག་དང་མཐུན་པའི་འཆར་འགོད་དང་ཇུས་འགོད་ཡག་པོ་བྱ་ཆེད། 2022ལོར་རང་ལྗོངས་ཀྱིས《ལྷ་སའི་ལྷོ་རི་བྱང་རིའི་སྔོ་འགྱུར་འདུ་འགོད་ཀྱི་སྤྱིའི་འཆར་འགོད(2021ལོ་ནས་2030ལོ་བར)》དངོས་སུ་བཀྲམ་ནས། དེ་སྔའི་སྔོ་ཁེབས་ལ་གཏོར་སྐྱོན་མི་ཕོག་པ་སྔོན་འགྲོའི་ཆ་རྐྱེན་དུ་བྱས་ནས་སྲུང་སྐྱོང་སྔོན་དང་རང་བྱུང་ཉམས་གསོ་གཙོ་བོར་འཛིན་པའི་རྩ་དོན་མཐའ་འཁྱོངས་བྱས་ཏེ། 《ལྷ་སའི་ལྷོ་རི་བྱང་རིའི་སྔོ་འགྱུར་ལ་ཞུགས་པར་སྐུལ་ལྕག་དང་རྒྱབ་སྐྱོར་བྱེད་རྒྱུའི་སྐོར་གྱི་སྲིད་ཇུས་བྱ་ཐབས》སོགས་ཡིག་ཆ་རབ་དང་རིམ་པར་ཞིབ་འཇུག་བྱས་ནས་བཏོན་ཏེ། འགན་གཙང་ནགས་བཟོའི་བྱ་ཐབས་ཕྱོགས་ཡོངས་ནས་ལག་བསྟར་གྱིས་ནགས་བཟོའི་ཁེ་ལས་རྒྱལ་ཁབ་ས་ཆ་སྔོ་འགྱུར་ལ་ཞུགས་པར་ཁྲིད་སྟོན་བྱས་པར། ལྷ་ས་གྲོང་ཁྱེར་ཁྲེང་ཀོན་ཆུས་དང་། སྣེའུ་ཁུལ་གསར། སྟོད་ལུང་བདེ་ཆེན་ཆུས། སྟག་རྩེ་ཆུས། ཆུ་ཤུར་རྫོང་། མལ་གྲོ་གུང་དཀར་རྫོང་། ལྷུན་གྲུབ་རྫོང་། ལྷོ་ཁ་གྲོང་ཁྱེར་སྣ་དཀར་རྩེ་རྫོང་། གོང་དཀར་རྫོང་བཅས་རྫོང(ཆུས)9ཡི་ཤང་དང་གྲོང་རྡལ་35དང་འབྲེལ་བ་ཡོད།

ལས་གྲྭའི་འཆར་འགོད་འཛུགས་སྐྲུན་གྱི་དུས་ཡུན་ལོ་10ཡིན་པ་དང་། ནགས་བཟོ་ནགས་སྐྱོང་མུའུ་ཁྲི་206.72ལེགས་སྒྲུབ་བྱེད་རྩིས་ཡོད་ཅིང་། ཆུ་བེད་དང་། གློག་ཤུགས། འགྲོ་ལམ་སོགས་ལས་གྲྭ་འཛུགས་སྐྲུན་གྱི་ལེ་ལག་ཆ་ཚང་བཀོད་སྒྲིག་བྱས་ཡོད། 2022ལོར་འཛུགས་སྐྲུན་གྱི་ཁྱབ་ཁོངས་ལྷ་ས་གྲོང་ཁྱེར་ཁྲེང་ཀོན་ཆུས་དང་། སྣེའུ་ཁུལ་གསར། སྟོད་ལུང་བདེ་ཆེན་ཆུས། སྟག་རྩེ་ཆུས། ཆུ་ཤུར་རྫོང་། ལྷོ་ཁ་གྲོང་ཁྱེར་གོང་དཀར་རྫོང་བཅས་རྫོང(ཆུས)6དང་འབྲེལ་བ་ཡོད་ཅིང་། ནགས་བཟོ་ནགས་སྐྱོང་མུའུ་ཁྲི་10.34ལེགས་སྒྲུབ་བྱས་ཟིན་པ་དང་། “རི་ཀླུང་རེར་མཛེས་ལྗོངས་རེ”དང“རི་ལྡེབས་རེར་ཡུལ་ལྗོངས་རེ”“དཔྱིད་ཀར་མེ་ཏོག་ཤར་བ་དང་། དབྱར་ཁར་བསིལ་གྲིབ་ཡོད་པ། སྟོན་ཁར་ཉམས་དང་ལྡན་པ། དགུན་ཁར་ཡང་སྔོ་ལྗང་མཐོང་རྒྱུ་ཡོད་པ”བཅས་ཀྱི་འཆར་འགོད་དམིགས་ཚད་མངོན་འགྱུར་ཐུབ་པའི་འགན་ལེན་བྱས་ཡོད།

2022ལོར་སྔ་རྗེས་སུ་གཞིས་རྩེ་དང་། ལྷོ་ཁ། ཆབ་མདོ་བཅས་གྲོང་ཁྱེར་3ལ་ནགས་བཟོ་ནགས་སྐྱོང་གི་སྔོན་འཛུགས་རྗེས་གསབ་ཀྱི་ལས་གྲྭ་འཛུགས་སྐྲུན་བྱས་ནས་འཛུགས་སྐྲུན་ལས་འགན་མུའུ་ཁྲི་3.47ལེགས་སྒྲུབ་བྱས་ཡོད།

2 ལག་རྩལ་གསར་པར་བརྟེན་ནས་སྔོ་ལྗང་ཁུལ་མང་དུ་བཏང་བ།

2021ལོའི་ཟླ་5པར་རང་ལྗོངས་ཀྱིས་མི་མེད་གནམ་གྲུས་སོན་གཏོར་ནགས་བཟོའི(རྩྭ་འདེབས)ཚོད་ལྟའི་ལས་དོན་ཐོག་མར་སྤེལ་བ་དང་། ཁྱོན་བསྡོམས་གནམ་གྲུས་སོན་གཏོར་ནགས་བཟོ་ཁུལ་25རུ་ཤིང་སྣ(རྩྭ)16བཏབ་ཡོད་པ་རེད།

2020ལོའི་ཟླ་6པར་རང་སྐྱོང་ལྗོངས་ནགས་ཚལ་དང་རྩྭ་ཐང་ཅུས་ཀྱིས་ལྷ་ས་གྲོང་ཁྱེར་དུ་གནམ་གྲུས་སོན་གཏོར་ནགས་བཟོའི་ལས་དོན་ཐོག་མར་སྤེལ་བ་དང་ཁྱོན་བསྡོམས་གནམ་གྲུས་སོན་གཏོར་ནགས་བཟོ་ཁུལ་9ཇུས་འགོད་བྱས་པར་ལྷ་ས་གྲོང་ཁྱེར་དུ་7དང་ལྷོ་ཁ་གྲོང་ཁྱེར་དུ་2ཡོད་ཅིང་། ཐད་འཕུར་གནམ་གྲུ་བཏང་ནས་གླ་ཚེར་དང་སྐྱི་བ་སོགས་ཤིང(རྩྭ)རིགས་ཀྱི་སོན་ཏུན་119.3ཙམ་བཏོར་བ་རེད།

རྒྱལ་ཁབ་ས་ཆ་སྔོ་འགྱུར་གྱི་གོམ་སྟབས་མགྱོགས་སུ་གཏོང་བ་དང་ནགས་བཟོ་སྔོ་འགྱུར་གྱི་མ་གནས་དམའ་རུ་གཏོང་ཆེད། 2022ལོའི་ཟླ་6པར་རང་སྐྱོང་ལྗོངས་ནགས་ཚལ་དང་རྩྭ་ཐང་ཅུས་ཀྱིས་མུ་མཐུད་གནམ་གྲུས་སོན་གཏོར་ནགས་བཟོའི་ལས་དོན་སྤེལ་ནས་སྔ་རྗེས་སུ་ལྷ་ས་དང་། གཞིས་རྩེ། ལྷོ་ཁ་བཅས་གྲོང་ཁྱེར་གསུམ་དུ་གནམ་གྲུས་སོན་གཏོར་ནགས་བཟོ་མུའུ་ཁྲི་75.01ལེགས་སྒྲུབ་བྱས་ཡོད།

3 བྱ་ཐབས་སྣ་ཚོགས་སྤྱད་དེ་གངས་ལྗོངས་ས་མཐོ་སྔོ་ལྗང་གོས་ཀྱིས་བཏུམས།

ཉེ་ཆར་ལྷ་ས་གྲོང་ཁྱེར་ནགས་ཚལ་དང་རྩྭ་ཐང་ཅུས་ཀྱིས་བོད་རང་སྐྱོང་ལྗོངས་ཀྱི་དམངས་ཡོངས་ཀྱི་འོས་འགན་ཤིང་འཛུགས་དྲ་བ་དང་། དམངས་ཡོངས་ཀྱི་འོས་འགན་ཤིང་འཛུགས་སྤྱི་རྟགས། ལྷ་སའི་ནགས་ཚལ་དང་རྩྭ་ཐང་གི་སྤྱི་རྟགས་བཅས་བརྒྱུད་སྐོང་བསྡུའི་བཀའ་རྒྱ་བཀྲམ་སྟེ། “ལེ་ཧྥུང་ལ་སློབ་སྦྱོང་བྱེད་པའི”ཟླ་བའི་བྱེད་སྒོ་དང་ཤིང་འཛུགས་དུས་ཆེན་ཟུང་འབྲེལ་བྱས་ནས། རྒྱ་ཆེའི་མང་ཚོགས་ཤིང་འཛུགས་བྱེད་སྒོར་མ་བསྐུལ་དང་བླངས་ངང་ཞུགས་སུ་བཅུག་པས། འོས་འགན་ཤིང་འཛུགས་བྱེད་སྒོའི་གཞི་རྟེན་དང་འགན་འཁྲི་འཁུར་བའི་རྣམ་པ་རྒྱུན་ཆད་མེད་པར་ཕུན་སུམ་ཚོགས་སུ་ཕྱིན་ཡོད་པ་རེད།

ལྷ་ས་གྲོང་ཁྱེར་ཕུད། གྲོང་ཁྱེར་དང་ས་ཁུལ་གཞན་དག་གིས་ཀྱང་སྔོ་འགྱུར་གྲོང་གསེབ་དར་རྒྱས་གཏོང་བའི་གཙོ་གནད་ལས་དོན་ལ་བརྩིས་ནས། བེད་མེད་ས་ཆ་བེད་སྤྱོད་ཧུར་ཐག་བྱས་ཏེ་ཁོར་ཡུག་སྔོ་འགྱུར་གྱི་ལས་དོན་སྤེལ་བས། ནགས་ཚལ་སྤྱི་གླིང་དང་ནགས་ཚལ་གྲོང་ཚོ་མང་པོ་ཐོན་པ་དང་། སྐྱེ་ཁམས་ལམ་དང་སྔོ་ལྗང་ས་ཚིགས་མང་པོ་རྒྱུན་ཆད་མེད་པར་ཐོན་ནས། གྲོང་མི་མང་ཚོགས་ཀྱིས་སྒོ་དོན་མ་ཐག་སྔོ་ལྗང་ལྗོན་ཤིང་མཐོང་ཐུབ་པ་དང་། གྲོང་གསེབ་ཀྱི་ཁོར་ཡུག་དེ་བས་མཛེས་པ། གྲོང་གསེབ་ཀྱི་སྐྱེ་ཁམས་སྡོད་མལ་ལ་དེ་བས་འཚམ་པ་བཅས་བྱུང་ཡོད།

རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་དོན་འཁྱོལ་བྱ་ཆེད། 《བོད་རང་སྐྱོང་ལྗོངས་གྲོང་གསེབ་ཀྱི་རྒྱབ་མདུན་ཚང་མར་ཤིང་འཛུགས་པའི་བྱ་སྤྱོད་ཀྱི་ཇུས་གཞི(2021ལོ་ནས་2023ལོའི་བར)》གཞིར་བཟུང་། 2022ལོར་རང་ལྗོངས་ཀྱིས་གྲོང་གསེབ་ཀྱི་རྒྱབ་མདུན་ཚང་མར་ཤིང་འཛུགས་པའི་བྱ་སྤྱོད་སྤེལ་བར་མུ་མཐུད་སྒྲིག་འཛུགས་དང་མཛུབ་ཁྲིད་བྱས་ནས། ནགས་བཟོ་ནགས་སྐྱོང་ཁྲི་538ལེགས་སྒྲུབ་བྱས་ཤིང་། 2021ལོ་ནས་2023ལོ་བར་སྲིད་འཛིན་གྲོང་ཚོ་2261ཏུ་ནགས་བཟོ་ནགས་སྐྱོང་ཁྲི་1027བྱས་ཏེ། “གྲོང་ཚོ་དང་དུད་ཚང་ཚང་མར་ལྗོན་ཤིང་ཡོད་དགོས་པའི”གྲུབ་འབྲས་སྔར་བས་སྲ་བརྟན་དང་ཆེ་རུ་བཏང་ནས། སྐྱེ་ཁམས་སྡོད་མལ་ལ་འཚམ་པའི་མཛེས་སྡུག་ལྡན་པའི་གྲོང་གསེབ་བསྐྲུན་ཆེད་རྨང་གཞི་བརྟན་པོ་བཏིང་བ་རེད།