-
གནས་སྤོས་ཡུལ་མིའི་ཉེན་རྟོག་པས་ཆུ་ཚོད་4ཡི་ནང་རི་རྐེད་དུ་ལུས་པའི་རླངས་འཁོར་དང་མང་ཚོགས་ཉེན་ཁ་ལས་བསྐྱབས་པ།
-
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ། | སྤེལ་དུས། 2023-04-18
འདི་ནི་མི་དམངས་ཉེན་རྟོག་པས་གངས་གསོག་གཙང་སེལ་དང་ལམ་བར་དུ་ལུས་པའི་མི་སྣ་དང་རླངས་འཁོར་ལ་རོཌ་རམ་བྱེད་བཞིན་པ།
ཉིན་ཤས་གོང་། གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་ཕག་རི་མཐའ་མཚམས་མངགས་གཏོང་ཁང་ལ་ཉེན་བརྡ་ཞིག་འབྱོར་བ་ལྟར་ན། ཁོངས་གཏོགས་ཁུལ་གྱི་སྐྱིད་རས་ལར་རླངས་འཁོར་དང་མང་ཚོགས་ཉེན་ཁའི་གནས་སུ་གྱར་ནས་རོགས་སྐྱོབ་བྱ་རྒྱུའི་རེ་འདུན་ཞུས་པ་རེད། ཉེན་བརྡ་དང་ལེན་བྱས་རྗེས་ཕག་རི་མཐའ་མཚམས་མངགས་གཏོང་ཁང་གིས་འཕྲལ་མར་ཉེན་རྟོག་པ་མངགས་ནས་ས་གནས་ས་ཐོག་ཏུ་བསྐྱོད་དེ་ལམ་བར་དུ་ལུས་པའི་མི་སྣ་དང་རླངས་འཁོར་ཉེན་ཁ་ལས་སྒྲོལ་རོགས་བྱས་པ་རེད།
ས་གནས་ས་ཐོག་ཏུ་འབྱོར་སྐབས་ཤར་རླུང་རྟགས་ཅན་གྱི་ཐེན་ལུང་ཟོག་འདྲེན་རླངས་འཁོར་ཆེ་གྲས་གཉིས་རི་རྐེད་དུ་ལུས་ནས་འགྲོ་ཐབས་བྲལ། ཤེས་རྟོགས་བྱུང་བར་གཞིགས་ན། དེ་ཉིན་ཕག་རི་གྲོང་རྡལ་དུ་གངས་ཆེན་པོ་བབས་པས་ཁ་ལོ་བ་གཉིས་པོ་རླངས་འཁོར་བཏང་ནས་རི་རྐེད་དུ་སླེབས་སྐབས་ལམ་གསལ་པོ་མི་མཐོང་བར་བརྟེན་མུ་མཐུད་གཏོང་ཐབས་བྲལ་བ་མ་ཟད། རི་རྐེད་དུ་བརྡ་རྟགས་མེད་པས་ཉིན་མཚན་གཅིག་དེར་ལུས། ཉིན་གཉིས་པའི་ཕྱི་དྲོ་གངས་བབས་མཚམས་ཆད་རྗེས་ཁོང་གཉིས་པོས་རྐང་ཐང་མར་རི་རྩེར་བསྐྱོད་དེ་བརྡ་རྟགས་ཡོད་པ་དང་བསྟུན་ནས་ཉེན་རྟོག་པར་རོགས་སྐྱོབ་བྱ་རྒྱུའི་རེ་འདུན་ཞུས་པ་རེད།
རོགས་སྐྱོབ་མི་དམངས་ཉེན་རྟོག་པས་གནས་ཚུལ་ཤེས་རྟོགས་ཐུབ་རྗེས་འཕྲལ་མར་ཁ་ལོ་བར་བཟའ་བཅའ་དང་འཐུང་ཆུ་བསྐྱལ་བ་དང་འབྲེལ། ལྕགས་ཁེམ་སྤྱད་དེ་ལམ་ངོས་ཀྱི་གངས་གསོག་གཙང་སེལ་བྱས་པ་དང་བྱེ་མ་བཤོས་ནས་ཟོག་འདྲེན་རླངས་འཁོར་འདྲེད་བརྡར་མི་ཤོར་བ་བྱས་ཏེ། ཉེན་ལུས་ཟོག་འདྲེན་རླངས་འཁོར་མུ་མཐུད་འགྲོ་སྐྱོད་བྱ་རྒྱུར་ཁྲིད་སྟོན་བྱས་པ་རེད།
ཆུ་ཚོད་4ལྷག་ཙམ་རིང་ཛ་དྲག་ངང་རོགས་སྐྱོབ་བྱས་པ་བརྒྱུད། མཐར་དེ་གར་ལུས་པའི་རླངས་འཁོར་དང་མི་སྣ་ཉེན་ཁ་ལས་སྒྲོལ་རོགས་བྱས་ཏེ་བདེ་བླག་ངང་འགྲོ་སྐྱོད་ཐུབ་པ་རེད།