འགྲིམ་འགྲུལ་གནས་ཚུལ་ཐོན་རྗེས་བྲོས་བྱོལ་དུ་སོང་བའི་གྱོད་གཞི་ཞིག་ལྷ་སའི་འགྲིམ་འགྲུལ་ཉེན་རྟོག་པས་རྩད་ཆོད་པ།
ཉེ་ཆར། འགྲིམ་འགྲུལ་གནས་ཚུལ་ཐོན་རྗེས་བྲོས་བྱོལ་དུ་སོང་བའི་གྱོད་གཞི་ཞིག་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་མགྱོགས་མྱུར་རྩད་བཅད་ནས། ཁོངས་གཏོགས་ཁུལ་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་འགན་ལེན་ནུས་ལྡན་བྱས་ཡོད། གྱོད་གཞི་དེ་2023ལོའི་ཟླ་2ཚེས་27ཉིན་གྱི་ཆུ་ཚོད་21དང་སྐར་མ་40ཙམ་ལ་ལྷག་པ་དང་། སྐབས་དེ་དུས་ཁ་ལོ་བ་བྱམས་ཆེ་གེ་མོས་ལག་ཁྱེར་དང་འཁོར་རྟགས་མེད་པའི་འཁོར་གཉིས་སྦག་སྦག་བཏང་ནས་ལྷ་ས་གྲོང་ཁྱེར་ཁྲེང་ཀོན་ཆུས་རྡོ་སེང་གེ་ལམ་བརྒྱུད་ལྷོ་ནས་བྱང་དུ་བསྐྱོད་པ་དང་། རྡོ་སེང་གེ་ལམ་དང་གཡུ་ཐོག་ལམ་གྱི་བཞི་མདོ་ཁར་སླེབས་སྐབས་འགྲིམ་འགྲུལ་བརྡ་གཏོང་གློག་སྒྲོན་ལས་འགལ་ནས་སྐྱོད་སྐབས། ནུབ་ནས་ཤར་དུ་མི་བགྲོད་ལམ་དུ་སྐྱོད་མཁན་དང་རྡུང་ཁ་ཤོར་ནས་ལམ་འགྲུལ་བར་རྨས་སྐྱོན་ཕོག་པ་དང་། བྱམས་ཆེ་གེ་མོའི་ངན་སྐུལ་འོག་བཀྲ་ཆེ་གེ་མོས་ལག་ཁྱེར་མེད་པར་སྦག་སྦག་བཏང་ནས་བྱམས་ཆེ་གེ་མོ་དང་ཚེ་ཆེ་གེ་མོ་སྦག་སྦག་ལ་བསྐྱོན་ནས་ཆག་སྒོ་ཐོན་ཡུལ་ལས་བྲོས་པ་རེད།
གནས་ཚུལ་ཐོན་རྗེས་ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་ལས་འཛོལ་འདུམ་འགྲིག་རུ་ཆེན་གྲོང་ཤར་རུ་འབྲིང་གི་ལས་རེས་མི་དམངས་ཉེན་རྟོག་པས་བརྟག་དཔྱད་བྱས་པ་དང་སྐད་ཆ་ཐེངས་མང་དྲིས་པ། ལྟ་སྐུལ་ཚོད་འཛིན་གྱི་བརྙན་ལམ་འབོར་ཆེན་བལྟས་ནས། 2023ལོའི་ཟླ་2ཚེས་28ཉིན་གྱི་ཐོ་རེངས་ཆུ་ཚོད་དང་པོ་ཙམ་ལ་ལྷ་ས་གྲོང་ཁྱེར་ཁྲེང་ཀོན་ཆུས་སེ་ར་ལམ་ཆུ་ཐོག་སྤྱི་གླིང་གི་ཉེ་འགྲམ་དུ་བྲོས་བྱོལ་དུ་སོང་བའི་བཀྲ་ཆེ་གེ་མོ་དང་ཚེ་ཆེ་གེ་མོ་འཛིན་བཟུང་བྱས་པ་མ་ཟད། ད་དུང་ཉེས་གསོག་དོགས་ཅན་བྱམས་ཆེ་གེ་མོའི་མིང་ཐོབ་གཏན་འཁེལ་བྱས་པ་དང་ཆབས་ཅིག་དེ་དང་འཕྲལ་མར་འབྲེལ་བ་བྱས་པ་རེད། གྱོད་གཞི་དེའི་འགན་འཁུར་མཁན་མི་དམངས་ཉེན་རྟོག་པ་དབྱང་ཙེ་ཀྲིས“ང་ཚོས་ཉེས་གསོག་དོགས་ཅན་དང་འབྲེལ་བ་བྱས་རྗེས་ཁོ་ལ་འབྲེལ་ཡོད་བཅའ་ཁྲིམས་ཀྱི་ཤེས་བྱ་འགྲེལ་བཤད་བརྒྱབ་པ་མ་ཟད། ངང་རྒྱུད་རིང་པོས་ཁོ་ལ་རང་ཉེས་ངོས་ལེན་ཞུ་དགོས་པའི་ཁ་ཏ་བསླབ་བྱ་བྱས་མཐར་ཁོ་པ་རང་ཉིད་ཀྱི་ནོར་འཁྲུལ་ངོས་འཛིན་ཐུབ་ནས་ཟླ་3ཚེས་3ཉིན་ཁྲིམས་སྦྱོར་བྱས་པ་ཡིན”ཞེས་གསར་འགོད་པར་བརྗོད།
དབྱང་ཙེ་ཀྲིས། འདྲི་རྩད་བྱས་པ་བརྒྱུད་བྱམས་ཆེ་གེ་མོས་འགྲིམ་འགྲུལ་གནས་ཚུལ་ཐོན་ནས་བྲོས་བྱོལ་དུ་སོང་བའི་དོན་དངོས་སྦ་གསང་མེད་པར་ངོས་ལེན་ཞུས་པ་དང་། གྱོད་གཞི་དེ་སྔར་བས་འདྲི་ཞིབ་བྱེད་བཞིན་ཡོད་ཅེས་བཤད། ད་དུང་ཁོང་གིས་རྒྱ་ཆེའི་ཁ་ལོ་བ་ཚོར་འཁོར་རིགས་བཏང་སྟེ་འགྲིམ་འགྲུལ་གནས་ཚུལ་ལྷག་རྗེས་ངེས་པར་དུ་འཕྲལ་མར་འཁོར་རིགས་ཁ་བཀག་སྟེ་རྨས་མ་མྱུར་སྐྱོབ་བྱེད་པ་དང་ཆབས་ཅིག ས་ཡུལ་དངོས་སྲུང་སྐྱོང་བྱེད་པ་དང་འབྲེལ་གྱོད་དོན་སྙན་སེང་ཞུ་དགོས་པ་ལས་སྟེས་དབང་གི་བསམ་པ་ཁྱེར་ནས་འཁོར་རིགས་བཏང་སྟེ་བྲོས་བྱོལ་དུ་འགྲོ་མི་རུང་བའི་དྲན་སྐུལ་བྱས་པ་རེད།