ཉེ་དུས་གསར་འགོད་པར་ལྷ་ས་གྲོང་ཁྱེར་མི་སྤྱི་ཅུས་ནས་ཤེས་རྟོགས་བྱུང་བར། 2022ལོར་ལྷ་ས་གྲོང་ཁྱེར་མི་སྤྱི་ཅུས་ཀྱིས་གླ་ཆ་འགྱངས་ཆད་རྩ་འཆོས་ཀྱི་ལས་དོན་ལ་སྐུལ་འདེད་གཏིང་ཟབ་བཏང་སྟེ། ཨར་སྐྲུན་ཁྱབ་ཁོངས་ཀྱི་རང་མིང་འགོད་ལམ་དོ་དམ་དང་། ཞིང་པ་ལས་མིའི་གླ་ཆ་ཆེད་སྤྱོད་རྩིས་ཐོ། གླ་ཆ་འགན་ལེན་དངུལ་བཅས་ཀྱི་ལམ་ལུགས་ཕྱོགས་ཡོངས་ནས་དོན་འཁྱོལ་བྱས་ནས། ཞིང་པ་ལས་མིར་ངལ་རྩོལ་གླ་ཆ་སྒོར་ཁྲི་2555.43ལེན་རོགས་བྱས་ཏེ་གླ་ཆ་འགྱངས་ཆད་ཀྱི་གནད་དོན་རྒྱུན་མཐུད་བཀག་འགོག་ཐུབ་ཡོད།

ད་ཕན་ལོ་ཤས་རིང་། ལྷ་ས་གྲོང་ཁྱེར་མི་སྤྱི་སྡེ་ཚན་གྱིས་འབྱུང་རྩར་བཅོས་སྒྲིག་དང་། སྔོན་འགོག་གཙོ་བཟུང་། འགོག་བཅོས་ཟུང་འབྲེལ། རྩ་ལག་མཉམ་འཆོས་བཅས་ཀྱི་བླང་བྱ་གཞིར་བཟུང་། གླ་ཆ་འགྱངས་ཆད་རྩ་འཆོས་ལས་དོན་གྱི་སྒྲིག་འཛུགས་མཐུན་སྦྱོར་དང་དོ་དམ་མཛུབ་ཁྲིད་ལ་ཤུགས་སྣོན་བརྒྱབ་སྟེ། ངལ་རྩོལ་བའི་གླ་ཆའི་ཁེ་དབང་སྲུང་སྐྱོང་ཏན་ཏིག་བྱས་ཡོད། 2022ལོར་ཀན་སུའུ་ནས་ཡིན་པའི་ཞིང་པ་ལས་མི་བུད་མེད་ཀྲང་ལགས་དང་ཁོང་གི་ཕ་ཡུལ་གཅིག་པ་ལྷ་སར་གླ་པ་རྒྱུག་པར་སླེབས། ལས་འགོ་མ་ཚུགས་གོང་། ཕྱོགས་གཉིས་ཀས་ལས་གྲྭ་མཇུག་འགྲིལ་རྗེས་གླ་ཆ་ཚང་མ་རྩིས་རྒྱག་པའི་ཁ་ཆད་བྱས་ཡོད། ལོ་མཇུག་ཏུ་ལས་གྲྭ་མཇུག་འགྲིལ་ཡང་གླ་ཆ་ལམ་སེང་མ་སྤྲད་པར་རྦད་དེ་འགྱངས་ནས་བཞག་པས། ཁོ་ཚོས་ལས་གྲྭའི་རྣམ་གྲངས་སྡེ་ཚན་ལ་ཞུས་རུང་གླ་རྒྱག་མཁན་བྱུང་མེད། མཐར་ལྷ་ས་གྲོང་ཁྱེར་མི་སྤྱི་སྡེ་ཚན་གྱི་ངལ་རྩོལ་འགན་སྲུང་ལྟ་ཞིབ་ཉིང་ལག་རུ་ཁག་གི་རོགས་རམ་འོག་ཆད་པའི་གླ་ཆ་རྣམས་ཆད་ལུས་མེད་པར་རག་པ་རེད།

ཞིང་པ་ལས་མིའི་གླ་ཆ་གཏོང་སྤྲོད་འགན་ལེན་བྱེད་པ་ནི་རྒྱ་ཆེའི་ཞིང་པ་ལས་མིའི་རྩ་བའི་ཁེ་ཕན་དང་དམངས་འཚོའི་བདེ་རྩ་དང་འབྲེལ་བ་ཡོད། ལྷ་ས་གྲོང་ཁྱེར་མི་སྤྱི་ཅུས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་དོན། འདི་ལོ་ལྷ་ས་གྲོང་ཁྱེར་མི་སྤྱི་ཅུས་ཀྱིས་ལས་ཞུགས་ཀྱི་རྣམ་པ་གསར་པའི་ངལ་རྩོལ་བའི་ཁེ་དབང་འགན་སྲུང་ལས་དོན་ལ་མུ་མཐུད་དམ་འཛིན་དང་། ལས་རྣམ་གསར་པའི་ཁྱབ་ཁོངས་ཀྱི་འགལ་ཟླ་དང་རྩོད་གཞི་སྣ་མང་འདུམ་འགྲིག་ལམ་སྲོལ་བཙུགས་ཏེ། ལས་རྣམ་གསར་པའི་ཁྱབ་ཁོངས་ཀྱི་ངལ་རྩོལ་རྩོད་གཞིའི་གྱོད་སྒྲུབ་མཛུབ་ཁྲིད་ལ་ཤུགས་སྣོན་བརྒྱབ་ཡོད། ཁེ་ལས་ལ་ཚད་ལྡན་ངང་ལས་མི་སྤྱོད་པ་དང་ངལ་རྩོལ་འབྲེལ་བ་ཐག་གཅོད་འོས་འཚམ་ལ་ལྟ་སྐུལ་བྱས་ཏེ། འབྱུང་རྩ་ནས་འགལ་ཟླ་དང་རྩོད་གཞི་ཉུང་དུ་བཏང་ཡོད། དེ་དང་ཆབས་ཅིག་རྩ་ལག་མཉམ་བཅོས་མཐའ་འཁྱོངས་དང་། གླ་ཆ་འགྱངས་ཆད་ཀྱི་འབྱུང་རྩ་བཅོས་སྒྲིག་ལས་དོན་ལ་སྐུལ་འདེད་གཏིང་ཟབ་བཏང་ནས། ཨར་སྐྲུན་ཁྱབ་ཁོངས་ཀྱི་ལས་མི་སྤྱོད་པའི་རང་མིང་འགོད་ལམ་དོ་དམ་དང་། ལས་གྲྭའི་དངུལ་དང་གླ་ཆའི་རྩིས་ཐོ་ཁག་དབྱེའི་དོ་དམ། ཞིང་པ་ལས་མིའི་གླ་ཆའི་འགན་ལེན་དངུལ། དངུལ་ཁང་གིས་ཞིང་པ་ལས་མིའི་གླ་ཆ་ཚབ་སྤྲོད་སོགས་ཀྱི་ལམ་ལུགས་དོན་འཁྱོལ་ལ་སྐུལ་འདེད་བཏང་ཡོད། གཞི་རིམ་གྱི་ལྟ་ཞིབ་ཁྲིམས་སྒྱུར་ལས་སྒོའི་གསོ་སྦྱོང་ལ་ཤུགས་སྣོན་དང་། གླ་ཆ་འགྱངས་ཆད་ཀྱི་མངོན་མེད་རྐྱེན་ངན་གྲལ་བཤེར་འདུམ་འགྲིག་བྱེད་སྒོ་སྤེལ་བ། གླ་ཆ་འགྱངས་ཆད་ཀྱི་མཉམ་སྒུལ་ལམ་སྲོལ་ནུས་པ་གང་ལེགས་འདོན་པ། ལས་མི་སྤྱོད་མཁན་ཕྱོགས་གཉིས་པོའི་ཁྲིམས་མཐུན་ཁེ་དབང་ཁྲིམས་ལྟར་སྲུང་བ་བཅས་བྱས་ནས། གླ་ཆ་འགྱངས་ཆད་ཀྱི་གྱོད་གཞི་མུ་མཐུད་སྐབས་བསྟུན་གཙང་བཟོ་ཐུབ་པའི་འགན་ལེན་བྱས་ཡོད། ཁྲིམས་ལྟར་ཐག་གཅོད་ལ་སྐུལ་འདེད་གཏིང་ཟབ་བཏང་སྟེ། ཁྲིམས་འགལ་གྱི་རྐང་བཙུགས་ནས་གླ་ཆ་འགྱངས་ཆད་དང་གླ་ཆ་ལེན་པའི་བཅོས་སྒྲིག་བྱེད་ཐབས་ཞིབ་འཇུག་བྱས་ནས་བཟོས་ཏེ། སྤྱི་ཚོགས་ལ་ངལ་རྩོལ་འགན་སྲུང་གི་ཁྲིམས་འགལ་བྱེད་སྤྱོད་གལ་ཆེན་ཡོངས་བསྒྲགས་བྱས་ནས“ཞིང་པ་ལས་མིའི་གླ་ཆ་འགྱངས་ཆད་དང་ཡིད་རྟོན་མེད་རིགས་བསླབ་སྡོམ་བྱ་ཡུལ་གྱི་མིང་ཐོ”བཀྲམ་སྟེ་ཡིད་རྟོན་མེད་པའི་ཁེ་ལས་ལ་མཉམ་འབྲེལ་བསླབ་སྡོམ་བྱེད་ཤུགས་ཆེ་རུ་བཏང་བ་རེད།