ཉེ་ཆར། རང་ལྗོངས་ཀྱི་རིམ་ཁག་མེ་ཟོན་རོགས་སྐྱོབ་སྒྲིག་གཞིས་ལྗོངས་བབ་དང་སྤྱི་ཚོགས་ཀྱི་གནས་བབ་ལ་གཞི་ཚུགས་ནས“3·15”རྒྱལ་སྤྱིའི་འཛད་སྤྱོད་པའི་ཁེ་དབང་སྲུང་སྐྱོང་ཉིན་མོ་གོ་སྐབས་སུ་བྱས་ཏེ། ལྗོངས་ཡོངས་ཀྱི་ཁྱབ་ཁོངས་སུ་ཟུར་ཚད་མང་པོའི་ཐོག་ནས་དྲ་ཐོག་དང་དྲ་ཕྱིའི་མེ་ཟོན་ཐོན་རྫས་སྤུས་ཚད་ཀྱི་མཉམ་འབྲེལ་བཅོས་སྒྲིག་དང་གཅིག་སྡུད་དྲིལ་བསྒྲགས་བྱེད་སྒོ་སྤེལ་ནས་མེ་ཟོན་ཐོན་རྫས་ཀྱི་སྤུས་ཚད་ཀྱི་ལྟ་སྐུལ་དོ་དམ་ལ་ཤུགས་སྣོན་ཏན་ཏིག་བརྒྱབ་སྟེ་མེ་ཟོན་ཐོན་རྫས་ཀྱི་ཁྲོམ་རའི་སྒྲིག་ལམ་ཚད་ལྡན་དུ་བཏང་ནས་མི་དམངས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་སྲུང་སྐྱོང་ཏན་ཏིག་བྱས་ཡོད།

ཚན་རིག་དང་མཐུན་པའི་ཇུས་འགོད་དང་བཀོད་སྒྲིག་ཞིབ་ཚཌ་བྱས་པ།

རང་སྐྱོང་ལྗོངས་མེ་ཟོན་རོགས་སྐྱོབ་སྤྱི་ཁྱབ་རུ་ཁག་གིས་དུས་ཐོག་ཏུ་ཚོགས་འདུ་འཚོགས་ཏེ་ཆེད་དོན་བཀོད་སྒྲིག་བྱས་པ་དང་ཆབས་ཅིག 《“3·15”མེ་ཟོན་ཐོན་རྫས་སྤུས་ཚད་ཀྱི་ཆེད་དོན་བཅོས་སྒྲིག་ལས་དོན་གཅིག་སྡུད་ཐོག་སྤེལ་རྒྱུའི་སྐོར་གྱི་བརྡ་ཐོ》བཀྲམ་ནས་རིམ་ཁག་མེ་ཟོན་རོགས་སྐྱོབ་སྒྲིག་གཞིས་དེ་སྔའི་ལས་ཀའི་ཉམས་མྱོང་ཕྱོགས་སྡོམ་བྱེད་པའི་རྨང་གཞིའི་ཐོག་ཞན་ཆར་ལྟ་སྟངས་ཡང་དག་འཛིན་པ་དང་གསར་འབྱེད་གསར་གཏོད་ཀྱིས་དུས་ཡུན་ཟླ་བ་གཅིག་གི་མེ་ཟོན་ཐོན་རྫས་སྤུས་ཚད་ཀྱི་ཆེད་དོན་བཅོས་སྒྲིག་བྱ་སྤྱོད་སྒྲིག་འཛུགས་ནན་ཏན་བྱས་ཏེ། ཚད་གཞི་མི་ལོན་པའི་མེ་ཟོན་ཐོན་རྫས་བཟོ་བ་དང་། ཕྱིར་འཚོང་། དེ་བཞིན་བེད་སྤྱོདགཏོང་བའམ་ཡང་ན་རྒྱལ་ཁབ་ཀྱིས་མེད་པར་བཟོ་རྒྱུའི་བཀའ་རྒྱ་ཡོངས་བསྒྲགས་བྱས་པའི་མེ་ཟོན་ཐོན་རྫས་ཀྱི་ཁྲིམས་འགལ་བྱེད་སྤྱོད་ལ་རྡུང་རྡེག་ཚ་ནན་གཏོང་དགོས་པའི་བླང་བྱ་བཏོན་པ་རེད།

མཉམ་འབྲེལ་ཁྲིམས་བསྟར་དང་མཉམ་སྐྲུན་མཉམ་བཅོས་བྱས་པ།

ལྗོངས་ཡོངས་ཀྱི་རིམ་ཁག་མེ་ཟོན་རོགས་སྐྱོབ་སྒྲིག་གཞིས་ཁྲོམ་རའི་ལྟ་འདོམས་དང་། སྡོད་ཁང་འཛུགས་སྐྲུན། སྤྱི་བདེ་སྡེ་ཚན་བཅས་དང་སྦྲེལ་མཐུད་ཧུར་ཐག་བྱས་ཏེ། མེ་ཟོན་ཐོན་རྫས་ཐོན་སྐྱེད་དང་ཕྱིར་འཚོང་བྱེད་མཁན་ཁེ་ལས་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ་དང་། ཁྲིམས་ལྟར་བབ་མཚུངས་ཀྱི་ཐོབ་ཐང་མེད་ཀྱང་གཞན་གྱི་ཐོ་འགོད་ཚོང་རྟགས་རང་འགར་ཐོན་སྐྱེད་དང་ཕྱིར་འཚོང་། གཞན་གྱི་ཚོང་རྟགས་གཡོ་རྫུས་བྱེད་པ། ཚོང་ཟོག་གྲགས་ཅན་འདྲ་བཟོ་བྱེད་པ། ཁེ་ལས་གཞན་གྱི་མིང་རང་འགར་སྤྱོད་པ། ཚད་གཞི་མི་ལོན་པའི་མེ་ཟོན་ཐོན་རྫས་སམ་ཡང་ན་རྒྱལ་ཁབ་ཀྱིས་མེད་པར་བཟོ་རྒྱུའི་བཀའ་རྒྱ་ཡོངས་བསྒྲགས་བྱས་པའི་མེ་ཟོན་ཐོན་རྫས་ཐོན་སྐྱེད་དང་ཕྱིར་འཚོང་སོགས་ཁྲིམས་འགལ་བྱེད་སྤྱོད་ལ་མཉམ་འབྲེལ་ཐོག་རྡུང་རྡེག་ཚ་ནན་གཏོང་བ་དང་ཡིད་རྟོན་གཅུན་སྡོམ་དང་མཉམ་འབྲེལ་ཐོག་ཆད་གཅོད་བསླབ་འདོམས་བྱེད་ཤུགས་ཆེ་རུ་བཏང་བ་རེད། ཆེད་དོན་བཅོས་སྒྲིག་བྱེད་རིང་། རྫུས་ལྷད་ཞན་གསུམ་གྱི་མེ་ཟོན་ཐོན་རྫས་1100ལྷག་ཙམ་གཅིག་སྡུད་ཐོག་མེད་པར་བཟོས་ནས་རྫུས་མར་རྡུང་རྡེག་གཏོང་བའི་ཟིལ་ཤུགས་ཆེ་རུ་བཏང་ཡོད།

གསར་གཏོད་དྲིལ་བསྒྲགས་ཀྱིས་ཁོར་ཡུག་བཟང་པོ་བཏོད་པ།

རང་ལྗོངས་ཀྱི་རིམ་ཁག་མེ་ཟོན་རོགས་སྐྱོབ་ལས་ཁུངས་ཀྱིས་བསམ་བློ་གསར་འབྱེད་བྱས་ནས་རྣམ་ཀུན་གྱི་དྲིལ་བསྒྲགས་ཙམ་མིན་པར་མེ་ཟོན་ཤེས་བྱ་དྲིལ་བསྒྲགས་བྱེད་པའི“དྲུག་སྐྱོད”ཀྱི་ལས་དོན་དང་ཟུང་འབྲེལ་ཧུར་ཐག་བྱས་ཏེ། གཏན་འཇགས་ཀྱི་དྲིལ་བསྒྲགས་ས་ཚིགས་85བཙུགས་པ་དང་ཆབས་ཅིག མང་ཚོགས་ཀྱི་གྲུབ་ཆར་དབྱེ་ཞིབ་ནན་ཏན་བྱས་ཏེ། དྲ་ཐོག་དང་དྲ་ཕྱིའི་ལས་སྟེགས་མང་པོར་བརྟེན་ནས་དམིགས་སའི་རང་བཞིན་ཡོད་པའི་ངང་མེ་ཟོན་ཐོན་རྫས་དྲིལ་བསྒྲགས་ངོ་སྤྲོད་ལས་དོན་སྤེལ་བ་དང་། ཕྱོགས་གང་ས་ཅི་ཐད་ནས་མེ་ཟོན་ཐོན་རྫས་ཀྱི་སྤུས་ཚད་རྫུན་བཟོ་དང་རྫུས་མར་རྡུང་རྡེག་ཚ་ནན་གཏོང་བའི་བྱེད་སྒོ་དང་མེ་ཟོན་ཐོན་རྫས་མི་ནོར་བར་སྤྱོད་པ་དང་དེ་བཞིན་ཁེ་དབང་སྲུང་སྐྱོང་སོགས་དྲིལ་བསྒྲགས་བྱས་པ། མེ་ཟོན་དྲིལ་བསྒྲགས་ཀྱི་སྤྱི་ཕན་ཕོ་ཉ་དང་སྐལ་བཟང་མེ་ཏོག་གི་མེ་ཟོན་དང་བླངས་པ་རྒྱ་ཁྱབ་ངང་སྐུལ་སློང་བྱས་ཏེ། འཐབ་ཕྱོགས་དང་པོར་བསྐྱོད་ནས་དྲིལ་བསྒྲགས་དཔྱད་ཡིག་སྣ་ཚོགས་ཁྲི་3.5ལྷག་ཙམ་སྤྲད་དེ་ཤུགས་རྐྱེན་ཐེབས་ཤུགས་ཆེ་རུ་བཏང་བ། ཚགས་པར་དང་། རླུང་འཕྲིན་བརྙན་འཕྲིན། དྲ་ཚིགས་སོགས་གཙོ་རྒྱུན་སྨྱན་སྦྱོར་དང་དེ་བཞིན་དཔོད་ཆུང་དང་། འཕྲིན་ཕྲན། འགོ་བརྗོད་གསར་འགྱུར་སོགས་སྨྱན་སྦྱོར་གསར་པའི་ལས་སྟེགས་ལ་བརྟེན་ནས་ཕྱོགས་ཡོངས་དང་སྤུས་ཚད་མཐོ་བའི་དྲིལ་བསྒྲགས་བྱས་ཏེ་ཤེས་རྟོགས་ཐུབ་ཚད་ཆེ་རུ་བཏང་ཡོད།

 འདི་ནི་མེ་ཟོན་སྡེ་ཚན་གྱིས་སྤྱི་བདེ་དང་ཁྲོམ་ར་ལྟ་འདོམས་སྡེ་ཚན་དང་མཉམ་འབྲེལ་ཐོག་ཁེ་ལས་ཀྱི་ཚོང་ཁང་དུ་བསྐྱོད་དེ་མེ་ཟོན་བདེ་འཇགས་ལ་ཞིབ་བཤེར་བྱེད་བཞིན་པ།

 འདི་ནི་མེ་ཟོན་སྡེ་ཚན་གྱིས་ཚད་གཞི་མ་ལོན་པའི་མེ་ཟོན་ཐོན་རྫས་གཅིག་སྡུད་ཐོག་མེད་པར་བཟོ་བཞིན་པ།

འདི་ནི་མེ་ཟོན་དྲིལ་བསྒྲགས་ཀྱི་སྤྱི་ཕན་ཕོ་ཉས(གཡས་ཀྱི་དང་པོ)མང་ཚོགས་ལ་མེ་ཟོན་གྱི་ཤེས་བྱ་ཁྱབ་གདལ་གཏོང་བཞིན་པ།

འདི་ནི་མེ་ཟོན་ལས་དོན་མི་སྣས་མེ་ཟོན་ཐོན་རྫས་ཀྱི་འབྲེལ་ཡོད་ཆ་འཕྲིན་བདེན་རྫུན་ཞིབ་བཤེར་བྱེད་བཞིན་པ།