འཛིན་ཤོག་ནི་རྒྱུན་གཏན་དཔལ་འབྱོར་འཚོ་བའི་ཁྲོད་ཚོང་དོན་གྱི་དཔང་ཡིག་ཅིག་ཡིན་པ་དང་། དེས་ནོར་དོན་ཞིབ་རྩིས་དང་རྒྱུན་གཏན་གྱི་སྤྱི་ཚོགས་དང་དཔལ་འབྱོར་སྒྲིག་ལམ་སྲུང་བའི་ཐད་ནུས་པ་གལ་ཆེན་ཐོན་པ་མ་ཟད། ཁྲལ་དོན་སྡེ་ཚན་གྱིས་ཁྲལ་དོན་ལྟ་སྐུལ་དོ་དམ་ལ་ཤུགས་སྣོན་རྒྱག་པའི་གཞི་འཛིན་ས་གལ་ཆེན་ཞིག་ཡིན། གསར་འགོད་པས་རང་སྐྱོང་ལྗོངས་རྒྱལ་ཁྲལ་ཅུས་ཞིབ་བཤེར་ཅུས་ནས་ཤེས་རྟོགས་བྱས་པར། འཛིན་ཤོག་ཐད་ཀྱི་ཁྲིམས་འགལ་ཉེས་གསོག་བྱེད་སྤྱོད་ལ་རྡུང་རྡེག་གཏོང་རྒྱུའི་སྐོར་གྱི་རྒྱལ་ཁབ་ཁྲལ་དོན་སྤྱི་ཁྱབ་ཅུས་ཀྱི་ལས་དོན་བཀོད་སྒྲིག་གཞིར་བཟུང་། 2015ལོར་རང་སྐྱོང་ལྗོངས་རྒྱལ་ཁྲལ་ཅུས་ཀྱིས་ཁྲིམས་འཛིན་ལག་བསྟར་བྱ་རྒྱུར་སྔར་བས་ཤུགས་སྣོན་བརྒྱབ་པ་དང་། འཛིན་ཤོག་ཐད་ཀྱི་ཁྲིམས་འགལ་ཉེས་གསོག་བྱེད་སྤྱོད་ལ་རྡུང་རྡེག་གཏོང་བའི་ལས་དོན་གཏིང་ཟབ་ངང་སྤེལ་རྒྱུར་སྐུལ་འདེད་བཏང་བར་ཕན་འབྲས་ངེས་ཅན་ཞིག་ཐོབ་ཡོད།

འཛིན་ཤོག་རྫུས་མ་སྤྲོད་མཁན་ཆབ་མདོའི་འཁོར་རིགས་ཚོང་མཁན་ཞིག་ལ་ཉེས་ཆད་སྒོར་ཁྲི་48བཏང་བ།

2015ལོའི་ལོ་འགོར་ཆབ་མདོ་གྲོང་ཁྱེར་རྒྱལ་ཁྲལ་ཅུས་ཁྲལ་འཇལ་ཞབས་ཞུའི་ཚོམས་ཆེན་གྱི་རླངས་འཁོར་ཉོ་སྒྲུབ་ཁྲལ་གཉེར་སྐར་ཁུང་གི་ལས་དོན་མི་སྣས་ལས་སྒོ་གཉེར་སྐབས། ཁྲལ་འཇལ་མཁན་གྱིས་དོགས་གཞི་ཡོད་པའི་འཕྲུལ་སྒུལ་འཁོར་རིགས་ཀྱི་གཅིག་གྱུར་འཛིན་ཤོག་འཁྱེར་ནས་ཁྲལ་འཇལ་འགྲོ་ལུགས་གཉེར་བར་ཡོང་བ་ཤེས་རྟོགས་བྱུང་བ་དང་། སྔ་རྗེས་སུ་དོགས་པ་ཡོད་པའི་འཛིན་ཤོག་རྐང་139གཞུང་བཞེས་བཏང་བ་དང་། འཛིན་ཤོག་དེ་དག་ནི་སི་ཁྲོན་ཞིང་ཆེན་ཁྲེང་ཏུའུ་AAསྦག་སྦག་ཕྱིར་ཚོང་ཚད་ཡོད་ཀུང་སིས་སྤྲད་པ་ཤེས། དོན་དེར་ཆབ་མདོ་གྲོང་ཁྱེར་རྒྱལ་ཁྲལ་ཅུས་ཀྱིས་ཚད་མཐོའི་མཐོང་ཆེན་བྱས་ཏེ། ཞིབ་བཤེར་ཅུས་ཀྱི་རྐང་འཛིན་མི་སྣ་ལས་གྲུབ་པའི་ཞིབ་བཤེར་ཚོགས་ཆུང་གིས་བརྟག་དཔྱད་ལས་དོན་སྤེལ་ཞིང་། ཆབ་མདོ་གྲོང་ཁྱེར་རྒྱལ་ཁྲལ་ཅུས་ཀྱིས་ཞིབ་བཤེར་བྱས་པ་བརྒྱུད། ཆབ་མདོ་གྲོང་ཁྱེར་གྱི་ཚན་པ་ག་གེ་མོ་ཞིག་གི་ཉོ་སྒྲུབ་ཁང་དང་ཁྲུང་ཆིང་རླངས་འཁོར་ཀུང་སི་ག་གེ་མོ་དང་དེ་བཞིན་འཁོར་རིགས་ལས་རིགས་ག་གེ་མོའི་དབར་སྦག་སྦག་བྲིན་ཚོང་གི་གན་རྒྱ་བཞག་པ་དང་། འཁོར་རིགས་འཚོང་མཁན(ཁྲུང་ཆིང་རླངས་འཁོར་ནང་འདྲེན་ཀུང་སི་ག་གེ་མོས་ཆབ་མདོར་བཙུགས་པའི་ཚབ་གཉེར་ཚོང་ཁང)དེས་འགན་འཁུར་བ་ཞིག་གི་མིང་ཐོག་ནས་ཁ་པ་ཕྱོགས་ལ(ཆབ་མདོ་གྲོང་ཁྱེར་གྱི་ཚན་པ་ག་གེ་མོ་ཞིག་གི་ཉོ་སྒྲུབ་ཁང)འཕྲུལ་སྒུལ་འཁོར་རིགས་ཕྱིར་ཚོང་གི་གཅིག་གྱུར་འཛིན་ཤོག་སྤྲད་པ་དང་འབྲེལ་དེ་བཞིན་སྦག་སྦག་བཙོངས་རྗེས་དང་། སྒྲིག་སྦྱོར། ཚོད་ལྟ་བཅས་ཀྱི་ཞབས་ཞུ་མཁོ་འདོན་བྱས།

ཁྲུང་ཆིང་རླངས་འཁོར་ཀུང་སི་ག་གེ་མོ་ཞིག་དང་ཆབ་མདོ་གྲོང་ཁྱེར་ཚན་པ་ག་གེ་མོའི་དབར་གྱི་ཉོ་སྒྲུབ་བྱ་བ་དེ་2012ལོར་འགོ་ཚུགས་པ་དང་། 2013ལོ་བར་གྱི་ལོ་གཉིས་ནང་ཆབ་མདོ་གྲོང་ཁྱེར་གྱི་ཚན་པ་ག་གེ་མོ་ཞིག་ལ་རིན་ཐང་སྒོར་6479950རི་བའི་སྦག་སྦག་1142བཙོངས་པ་དང་། འཁོར་རིགས་ཚོང་ཁང་ག་གེ་མོ་དེས་2012ལོར་ཆབ་མདོ་གྲོང་ཁྱེར་གྱི་ཚན་པ་ག་གེ་མོ་ཞིག་ལ་མཁོ་འདོན་བྱས་པའི་འཕྲུལ་སྒུལ་འཁོར་རིགས་ཀྱི་གཅིག་གྱུར་འཛིན་ཤོག་རྐང་577སྤྲད་པ་ཚང་མ་གཙོ་གཉེར་ཁྲལ་དོན་ལས་ཁུངས་ཀྱིས་ཚབ་སྤྲོད་བྱས་པ་ཞིག་རེད། 2013ལོར་མཁོ་འདོན་བྱས་པའི་འཕྲུལ་སྒུལ་འཁོར་རིགས་ཀྱི་གཅིག་གྱུར་འཛིན་ཤོག་565དེ་དག་ཚང་མ་བརྡ་ཁྱབ་ཆུང་ངུ་བརྒྱུད་ནས་བཟོས་པའི་འཕྲུལ་སྒུལ་འཁོར་རིགས་ཀྱི་འཛིན་ཤོག་རྫུས་མ་ཡིན་པ་རེད། 2014ལོའི་ཟླ་བ་ལྔ་པར་སྦག་སྦག་ཉོ་མཁན་ཆབ་མདོའི་ཚན་པ་ག་གེ་མོས་འཕྲུལ་སྒུལ་འཁོར་རིགས་ཀྱི་གཅིག་གྱུར་འཛིན་ཤོག་དེ་དག་འཁྱེར་ནས་ཆབ་མདོ་གྲོང་ཁྱེར་ཁྲལ་དོན་ཅུས་ཀྱི་ཁྲལ་དོན་ཞབས་ཞུ་ལྟེ་གནས་སུ་སྦག་སྦག་ཉོ་སྒྲུབ་དཔྱ་ཁྲལ་གྱི་ཁྲལ་འཇལ་ལས་སྒོའི་འགྲོ་ལུགས་གཉེར་བར་ཡོང་སྐབས། ཁྲལ་དོན་མི་སྣས་འཛིན་ཤོག་དེ་དག་རྫུས་མ་ཡིན་པ་ཤེས་པ་དང་འབྲེལ་གཞུང་བཞེས་བཏང་ནས་ཁྲལ་འཇལ་ལས་སྒོ་གཉེར་མེད། ཆབ་མདོ་གྲོང་ཁྱེར་གྱི་ཚན་པ་ག་གེ་མོ་ཞིག་གི་ཉོ་སྒྲུབ་ཁང་གིས་གནས་ཚུལ་དེ་ཤེས་རྗེས་འཁོར་རིགས་འཚོང་མཁན་ག་གེ་མོ་དེར་འཕྲུལ་སྒུལ་འཁོར་རིགས་ཕྱིར་ཚོང་གི་གཅིག་གྱུར་འཛིན་ཤོག་ངོ་མ་སྤྲོད་དགོས་པའི་རེ་བ་བཏོན་ནས་སྦག་སྦག་གི་ཁྲལ་འཇལ་ལས་སྒོ་དང་འགྲོ་ལུགས་གཉེར་ཐུབ་པ་བྱས། དེ་རྗེས་འཁོར་རིགས་ཚོང་ཁང་ག་གེ་མོ་དེས་སླར་ཡང་ཆབ་མདོ་གྲོང་ཁྱེར་གྱི་ཚན་པ་ག་གེ་མོར་འཕྲུལ་སྒུལ་འཁོར་རིགས་ཀྱི་གཅིག་གྱུར་འཛིན་ཤོག་ངོ་མ་565སྤྲད་མོད། འོན་ཀྱང་ཞིབ་བཤེར་ཚོགས་ཆུང་གིས་བརྟག་དཔྱད་བྱས་པ་བརྒྱུད་རྗེས་སུ་གསབ་པའི་འཕྲུལ་སྒུལ་འཁོར་རིགས་ཀྱི་གཅིག་གྱུར་འཛིན་ཤོག་565ཡི་ནང་འཛིན་ཤོག་396ནི་ཁྲལ་འཇལ་ཟིན་པའི་འཛིན་ཤོག་ཡིན་པ་དང་འཛིན་ཤོག་169ནི་ཁྲལ་འཇལ་དུད་ཚང་གཞན་ནས་གཡར་བ་ཞིག་ཡིན་པ་ཤེས།

རང་སྐྱོང་ལྗོངས་རྒྱལ་ཁྲལ་ཅུས་ཞིབ་བཤེར་ཅུས་ཀྱི་འབྲེལ་ཡོད་འགན་འཁུར་བས“འཁོར་རིགས་ཚོང་མཁན་ག་གེ་མོ་དེས་ཆབ་མདོ་གྲོང་ཁྱེར་གྱི་ཚན་པ་ག་གེ་མོར་སྤྲད་པའི་འཕྲུལ་སྒུལ་འཁོར་རིགས་ཕྱིར་ཚོང་གི་གཅིག་གྱུར་འཛིན་ཤོག་ནང་སྔ་རྗེས་སུ་ཁྲིམས་འགལ་ངང་འཛིན་ཤོག་རག་ཐབས་དང་མི་གཞན་གྱི་འཛིན་ཤོག་གཡར་ནས་སྤྱོད་པའི་ཁྲིམས་འགལ་བྱེད་སྤྱོད་ཡོད་པ་དང་འཕྲུལ་སྒུལ་འཁོར་རིགས་ཕྱིར་ཚོང་གི་གཅིག་གྱུར་འཛིན་ཤོག་རྫུས་མ་565སྤྲད་པ་དེའི་དངུལ་འབོར་སྒོར་ཁྲི་325ཟིན་ཡོད། ཆབ་མདོ་གྲོང་ཁྱེར་གྱི་རྫོང་11གི་ཚན་པ་མང་པོར་འཛིན་ཤོག་དེ་རིགས་རག་ནས། སྤྱི་ཚོགས་ཐོག་ཤུགས་རྐྱེན་ངན་པ་བཟོས་ཡོད་ལ། གནས་ཚུལ་་ཚབས་ཆེ་བར་བརྟེན《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འཛིན་ཤོག་དོ་དམ་བྱ་ཐབས》ཀྱི་དོན་ཚན་སོ་དགུ་པའི་གཏན་འབེབས་གཞིར་བཟུང། འཁོར་རིགས་ཚོང་ཁང་ག་གེ་མོའི་ཁྲིམས་འགལ་བྱེད་སྤྱོད་ལ་དངུལ་ཆད་སྒོར་480000གཏོང་རྒྱུ་རེད”ཅེས་ངོ་སྤྲོད་བྱས།

ཁྲིམས་འགལ་འཛིན་ཤོག་རྐང་4700ལྷག་ཙམ་ཞིབ་བཤེར་ཐུབ་པ།

རང་སྐྱོང་ལྗོངས་རྒྱལ་ཁྲལ་ཅུས་ཞིབ་བཤེར་ཅུས་ཀྱི་འབྲེལ་ཡོད་འགན་འཁུར་བས་ངོ་སྤྲོད་བྱས་པར། 2015ལོར་རྒྱལ་ཁྲལ་སྤྱི་ཁྱབ་ཅུས་ཀྱིས་དངུལ་རྩ་འགན་བཅོལ་དང་། ས་ཁང་བདག་ཁོངས་ཐོན་ལས། ཚོང་ལས་སྡེབ་ཚོང་སིལ་ཚོང་། སྨན་དང་སྨན་བཅོས་ལག་ཆ། བཟའ་བཏུང་རོལ་རྩེད། ལས་སྣོན། བར་སྦྲེལ་སྒྲིག་གཞི་བཅས་ལས་རིགས་ཆེ་གྲས་བདུན་གྱི་འཛིན་ཤོག་སྤྱོད་ཚུལ་ལ་གཙོ་གནད་ཐོག་ཞིབ་བཤེར་བྱས་པ་དང་འབྲེལ་རང་ལྗོངས་ཀྱི་ཁྲལ་བསྡུའི་དོ་དམ་གྱི་གནས་ཚུལ་དངོས་དང་དེ་བཞིན་འཛིན་ཤོག་གི་གནད་དོན་ཐོན་མང་བ་དང་། ཡང་ཡང་ཐོན་པའི་གནས་ཚུལ་བཅས་དང་ཟུང་འབྲེལ་བྱས་པའི་རྨང་གཞིའི་ཐོག་ཞབས་ཞུའི་ལས་རིགས་དང་། འཛུགས་སྐྲུན་སྒྲིག་སྦྱོར་ལས་རིགས། ལྷུ་ལག་ཉམས་བཟོ་སོགས་ཀྱི་འཛིན་ཤོག་ལ་ཞིབ་བཤེར་བྱ་རྒྱུའི་ལས་དོན་བཀོད་སྒྲིག་བྱས་ཡོད། 2015ལོའི་ཟླ་བཅུ་གཉིས་པའི་ཟླ་མཇུག་བར། ལྗོངས་ཡོངས་ཀྱི་ཁྲལ་དོན་སྡེ་ཚན་གྱིས་ཁྲལ་འཇལ་དུད་ཚང་2313གྱི་འཛིན་ཤོག་གནས་ཚུལ་ལ་ཞིབ་བཤེར་བྱས་ཤིང་། ཁྲིམས་འགལ་ཁེ་ལས་610ཞིབ་བཤེར་དང་། དངུལ་འབོར་ཁྲི་20181.23ཟིན་པའི་ཁྲིམས་འགལ་འཛིན་ཤོག་གྲངས་འབོར་4708ཞིབ་བཤེར་ཐག་གཅོད། ཁྲལ་དངུལ་སྒོར་ཁྲི་47246ཞིབ་གསབ། འགྱངས་ཆད་ཀྱི་དངུལ་སྒོར་ཁྲི90.61གསབ་བསྡུ་བཅས་བྱས་པ་དང་འབྲེལ་དངུལ་ཆད་སྒོར་ཁྲི312.83བཏང་བའི་ནང་ཞབས་ཞུའི་ལས་རིགས192ལ་ཞིབ་བཤེར་བྱས་ཁར། འཛིན་ཤོག་རྫུས་མ་སྤྲོད་མཁན་ཚན་པ་རེར་མཐོ་ཤོས་སུ་དངུལ་ཆད་སྒོར་ཁྲི48བཏང་ཡོད།

སྡེ་ཚན་ཁག་མཉམ་འགུལ་བྱས་ཏེ་འཛིན་ཤོག་རྫུས་མ་ཚོང་བཟོ་བྱེད་ས་གཉིས་མེད་པ་བཟོས་པ།

ཉེས་གསོག་བྱེད་སྤྱོད་དེར་རྡུང་རྡེག་གཏོང་ཆེད་རང་ལྗོངས་ཀྱི་ཁྲལ་དོན་སྡེ་ཚན་གྱིས་སྤྱི་བདེ་དང་། འཕྲིན་གཏོང་། བཟོ་ཚོང་སོགས་སྡེ་ཚན་དང་མཉམ་ལས་བྱ་རྒྱུར་ཤུགས་སྣོན་བརྒྱབ་པ་དང་འབྲེལ་འཕྲལ་ཐག་ཆོད་པོས་བྱ་སྤྱོད་སྤེལ་ཏེ། ཁྲིམས་འགལ་འཛིན་ཤོག་བྱེད་སྤྱོད་ལ་ཞིབ་བཤེར་ཐག་གཅོད་ནན་པོ་བྱས་པར་ཕན་འབྲས་རགས་ཙམ་ཐོབ་ཅིང་། བསྡོམས་རྩིས་བརྒྱབ་པར་གཞིགས་ན། 2015ལོར་རང་ལྗོངས་ཀྱི་ཁྲལ་དོན་སྡེ་ཚན་དང་སྤྱི་བདེ་ལས་ཁུངས་ཀྱིས་འཛིན་ཤོག་རྫུས་མ་བཟོ་མཁན་གཉིས་རྩད་ཆོད་པ་དང་། འཛིན་ཤོག་རྫུས་མ་བཟོ་ས་གཉིས་མེད་པ་བཟོས་པ། ཉེས་གསོག་དོགས་ཅན་གཉིས་འཛིན་བཟུང་བྱས་པ། འཛིན་ཤོག་རྫུས་མ་2984དང་ཐམ་ག་རྫུས་མ་116གཞུང་བཞེས་བཏང་ཡོད།