ཚེས་27ཉིན་གྱི་སྔ་དྲོར། རྒྱུན་གཏན་མིན་པའི“འདུ་འཛོམས”ཏེ། “ཧི་མ་ལ་ཡའི་མཐའ་འཁོར”གྱི་ཁེ་ལས་མཁས་ཅན་གྱི་རྒྱལ་སྤྱིའི་ཚོགས་འདུ་ཉིང་ཁྲིར་འགོ་ཚུགས་པ་རེད།

“ད་རེས་རང་ཉིད་ཉིང་ཁྲིར་ཡོང་ཐེངས་དང་པོ་ཡིན་པས། ཧ་ཅང་དགའ་པོ་བྱུང་། འདི་གའི་སྐྱེ་ཁམས་དང་། དཔལ་འབྱོར། སྤྱི་ཚོགས་བཅས་ཀྱི་འཕེལ་རྒྱས་ནི་ངའི་བསམ་ཚོད་ལས་དེ་བས་ཡག་པ་འདུག”ཅེས་ཧན་གོའི་ཅིན་ཁྲེང་ཏུང་ཀྲུའུ་ཧྲི་ཧུའེ་ཧྲེ་ཡི་སྤྱི་ཁྱབ་ཅིང་ལི་ཆུས་ཐེན་གྱིས་མྱོང་ཚོར་ཟབ་མོས་བརྗོད།

“ཧི་མ་ལ་ཡའི་མཐའ་འཁོར”གྱི་གླེང་སྟེགས(གཤམ་ལ“ཧི་མ་ལ་ཡའི་གླེང་སྟེགས”ཞེས་བསྡུ་རྒྱུ)ཀྱི་ཡན་ལག་གལ་ཆེན་ཞིག་ཡིན་པའི་ཆ་ནས། “ཧི་མ་ལ་ཡའི་མཐའ་འཁོར”གྱི་ཁེ་ལས་མཁས་ཅན་གྱི་རྒྱལ་སྤྱིའི་ཚོགས་འདུ་ནི་ཀྲུང་གོའི་ནུབ་རྒྱུད་ཀྱིས“གཉེར་སྐྱོང་བློ་གྲོས་སྤེལ་རེས་བྱེད། ཐོན་ལས་ཐོན་ཁུངས་མཐུན་སྦྱོར་བྱེད”ལྟེ་བའི་ངེས་གནས་སུ་བྱས་པའི་རྒྱལ་སྤྱི་རང་བཞིན་གྱི་མཐོ་རིམ་དབར་གླེང་མོལ་བྱེད་སའི་ལས་སྟེགས་ཐོག་མ་དེ་རེད། ད་ཐེངས་ཀྱི་ཚོགས་འདུས“ཧི་མ་ལ་ཡའི་མཐའ་འཁོར་གྱི་སྟོབས་ཤུགས་གཅིག་ཏུ་འདུས། འཕེལ་རྒྱས་ཀྱི་སྒུལ་ཤུགས་འཕེལ་བར་བྱེད”ཅེས་པ་བརྗོད་དོན་གཙོ་བོར་བྱས་ཏེ། སྐབས་རིམ་བྱུང་གི་ཧི་མ་ལ་ཡའི་མཐའ་འཁོར་གྱི་གླེང་སྟེགས་ཀྱི་གྲུབ་འབྲས་ཐོབ་པའི་ཉམས་མྱོང་རྒྱུན་སྲིང་དང་རྒྱ་སྐྱེད་བཏང་སྟེ། སྲིད་ཚོང་སློབ་ཞིབ་དང་སྨྱན་སྦྱོར་གྱི་ལས་སྟེགས་འཛུགས་པར་དམིགས་ནས་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་འདེད་བཏང་ཡོད།

ཚོགས་རའི་ནང་མི་ཚོགས་ཀྱིས་ཁེངས་ནས་རྐུབ་བཀྱག་སྟོང་པ་གཅིག་ཀྱང་ལུས་མེད་ཅིང་། རྒྱལ་ཁབ་10ལྷག་ཙམ་ནས་ཡོང་བའི་སྐུ་མགྲོན་དང་ཁེ་ལས་ཀྱི་འཐུས་མི་150ལྷག་ཙམ་མཉམ་དུ་འཛོམས་ནས་ཕྱར་བ་གྲུ་འདེགས་ཀྱིས་ལས་འགན་གལ་ཆེན་ལེགས་པར་བསྒྲུབས་ཡོད།

ཀྲུང་གོར་བཅའ་སྡོད་ནེ་པ་ལའི་གཞུང་ཚབ་ཆེ་མོ་བ་ཁེ་ལི་ཞི་ནཱ·ཕུའུ་ལཱ་ས་ཏེ·ཨའོ་ལི་ཡིས། “ཧི་མ་ལ་ཡའི་མཐའ་འཁོར”གྱི་ཁེ་ལས་མཁས་ཅན་གྱི་རྒྱལ་སྤྱིའི་ཚོགས་འདུ་འཚོགས་པ་ནི་ཕྱོགས་གཉིས་པོའི་དབར་སྤེལ་རེས་དང་མཉམ་ལས་ཟབ་ཏུ་གཏོང་བའི་གོ་སྐབས་ཡག་པོ་ཞིག་རེད། ནེ་ཀྲུང་ཕྱོགས་གཉིས་པོས“ཧི་མ་ལ་ཡ་བརྒལ་བའི་མཉམ་སྦྲེལ་མཉམ་མཐུད”འཛུགས་སྐྲུན་ལ་སྐུལ་འདེད་གཏོང་བར་གཞོལ་བཞིན་ཡོད། དྲ་རྒྱ་གལ་ཆེན་འཛུགས་སྐྲུན་བྱེད་པ་དེ་འགྲིམ་འགྲུལ་སྐྱེལ་འདྲེན་དང་། ཚོང་ལས། ཤེས་བྱ་མཉམ་སྤྱོད་སོགས་རིམ་པ་མང་པོར་ཁྱབ་པའི་དམིགས་ཡུལ་ནི་གོ་སྐབས་གསར་པ་གསར་གཏོད་དང་། ཤེས་ལྡན་པ་གསར་པ་གསོ་སྐྱོང་། བསམ་བློ་གསར་པ་སྐྱེད་སྲིང་བཅས་བྱེད་པའི་ཕྱོགས་བསྡུས་རང་བཞིན་གྱི་ལས་སྟེགས་འཛུགས་རྒྱུ་དེ་རེད།

གསར་འགོད་པས་བཅར་འདྲི་བྱེད་སྐབས་ཤེས་རྟོགས་བྱུང་བར་གཞིགས་ན། བོད་རང་སྐྱོང་ལྗོངས་ཀྱིས་སྤེལ་བཞིན་པའི་གཞི་ཁྱོན་ཆེ་བའི་ཞིང་ལས་ཚན་རྩལ་གསར་གཏོད་བྱས་པ་དེས་ཁེ་ལི་ཞི་ནཱ·ཕུའུ་ལཱ་ས་ཏེ·ཨའོ་ལིར་བག་ཆགས་ཟབ་མོ་ཞིག་བཞག་ཡོད། ཁོང་གིས་བོད་ལ་ཞིང་ལས་ཚན་རྩལ་ཁྱབ་ཁོངས་སུ་ཐོབ་པའི་གསར་གཏོད་གྲུབ་འབྲས་དང་སྔོན་ཐོན་ལག་རྩལ་ནི་ནེ་པ་ལ་དང་ཐ་ན་ཧི་མ་ལ་ཡའི་མཐའ་འཁོར་ས་ཁུལ་གྱི་རྒྱལ་ཁབ་ཡོངས་ཀྱིས་སློབ་སྦྱོང་དང་དཔྱད་གཞིར་འཛིན་རིན་ཡོད་པ་ཞིག་རེད་ཅེས་བརྗོད།

ཚོགས་འདུའི་བར་གསེང་དུ་ཚོགས་ཞུགས་སྐུ་མགྲོན་དང་ཁེ་ལས་ཀྱི་འཐུས་མིས་ཁྱད་ལྡན་ཕྱོགས་བསྡུས་འགྲེམས་ཁུལ་ལ་ལྟ་སྐོར་བྱས་པ་རེད། དེ་གར་ཁོང་ཚོས་བོད་སྨན་དང་། ཡིག་གཟུགས་བརྩམས་ཆོས། ཇ། ཐང་ག་སོགས་བོད་ཀྱི་སྲོལ་རྒྱུན་ཁྱད་ལྡན་ཐོན་རྫས་ལ་རྒྱུས་ལོན་གཏིང་ཟབ་བྱས་པ་མ་ཟད། ད་དུང་རིག་གནས་བསམ་བཀོད་ཐོན་རྫས་སྣ་ཚོགས་ཉམས་ལེན་ཡང་བྱས་པ་རེད།

དེ་རྗེས་ཚོགས་ཞུགས་སྐུ་མགྲོན་དང་ཁེ་ལས་ཀྱི་འཐུས་མིས《ཧི་མ་ལ་ཡའི་མཐའ་འཁོར་གྱི་ཁེ་ལས་མཁས་ཅན་གྱི་རྒྱལ་སྤྱིའི་ཚོགས་འདུའི་མཉམ་ལས་བརྗེད་ཐོར》མིང་རྟགས་བཀོད་པ་རེད།

“ད་ཐེངས་མིང་རྟགས་བཀོད་པའི་མཉམ་ལས་བརྗེད་ཐོར‘རི་སྔོན་ཆུ་དྭངས་ནི་གསེར་རི་དངུལ་རི་ཡིན་པའི’འདུ་ཤེས་གལ་ཆེན་ལག་ལེན་བསྟར་ནས་སྐྱེ་ཁམས་སྲུང་སྐྱོང་གི་སྟོབས་ཤུགས་གཅིག་སྡུད་བྱས་ཏེ་ལྗང་མདོག་འཕེལ་རྒྱས་ཀྱི་སྒུལ་ཤུགས་འཕེལ་བར་བྱེད་དགོས་པའི་བླང་བྱ་ཁ་གསལ་བཏོན་ཡོད”ལྷ་ས་ཧོའུ་པེ་ཧོའུ་ལན་སྨན་ཁང་ཚད་ཡོད་ཀུང་སིའི་ཏུང་ཧྲི་ཀྲང་ཐན་ཆིང་ལན་གྱིས། ད་ཐེངས་ཀྱི་ཚོགས་འདུ་འཚོགས་པ་དེས་ས་ཁོངས་ནང་གི་ཁེ་ལས་རྒྱུན་རྣམ་ཅན་གྱི་འཚམས་འདྲི་སྤེལ་རེས་བྱེད་པ་དང་། ཆ་འཕྲིན་སྤེལ་རེས་ལ་སྐུལ་འདེད་གཏོང་བ་དང་། ཐོན་ལས་མཉམ་ལས་གཏིང་ཟབ་ཏུ་གཏོང་བ་བཅས་ལ་ལས་སྟེགས་བཏོད་ནས་ས་ཁོངས་ཀྱི་རྒྱུན་མཐུད་ཆོག་པའི་འཕེལ་རྒྱས་དང་མཉམ་ལས་གཉིས་ཕན་ལ་སྐུལ་འདེད་ནུས་ལྡན་གཏོང་རྒྱུ་རེད་ཅེས་བརྗོད།

ཧི་མ་ལ་ཡའི་རི་རྒྱུད་བརྗིད་ཆགས་ཤིང་འགྱིང་ངེར་གནས་པ་དང་། ཚོགས་ཞུགས་སྐུ་མགྲོན་དང་ཁེ་ལས་མཁས་པ་ཚོས་སྤྲོ་སེམས་དང་བློ་རིག་ལ་བརྟེན་ནས་བཙུགས་པའི་ཟམ་པ་དེས་ས་ཁོངས་ཀྱི་བཀག་རྒྱ་ལས་བརྒལ་ཏེ་ཧི་མ་ལ་ཡའི་མཐའ་འཁོར་ས་ཁུལ་དུ་འཕེལ་རྒྱས་ཀྱི་ལེའུ་གསར་པ་རྩོམ་པར་འབད་བཞིན་མཆིས།