ཟླ་10ཚེས་18ནས་24ཉིན་བར། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ཁང་གིས་སྒྲིག་འཛུགས་བྱས་པའི་སུའེ་ཙེར་དང་། ཁ་ན་ཏ། སི་ཕེན་བཅས་ཀྱི་ཕྱི་རྒྱལ་གྱི་རིགས་གཅིག་མཁས་ཅན་དང་མཁས་དབང་4ཡི་འཚམས་འདྲི་ཚོགས་པ་ལྷ་ས་དང་ཉིང་ཁྲི་གྲོང་ཁྱེར་དུ་འཚམས་འདྲིར་ཡོང་བ་རེད།

འཚམས་འདྲི་ཚོགས་པ་དང་བཅས་པ་སྔ་རྗེས་སུ་ཕོ་བྲང་པོ་ཏ་ལ་དང་། བོད་ལྗོངས་རྟེན་མཛོད་ཁང་། ལྷ་ལྡན་གཙུག་ལག་ཁང་། བར་སྐོར་ཁྲོམ་གཞུང་། སྤང་མདའ་ཚང་སྒོ་ར། བོད་ལྗོངས་སློབ་ཆེན། ལྷོ་རི་སྤྱི་གླིང་། བྲག་གསུམ་མཚོ། ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུ་སོགས་སུ་འཚམས་འདྲིར་བསྐྱོད་ནས། ས་གནས་ས་ཐོག་ཏུ་བོད་ཀྱི་སྲོལ་རྒྱུན་རིག་གནས་སྲུང་སྐྱོང་དང་དེ་བཞིན་རིག་དངོས་སྲུང་སྐྱོབ་འཕེལ་རྒྱས་དང་། བོད་ལུགས་གསོ་རིག་བྱ་གཞག་དང་དེ་བཞིན་སྐྱེ་ཁམས་ཤེས་དཔལ་འཛུགས་སྐྱོང་། གྲོང་གསེབ་དར་རྒྱས། ཡུལ་སྐོར་ལ་བརྟེན་ནས་མང་ཚོགས་ཀྱི་འབབ་འཕར་ལ་སྐུལ་འདེད་གཏོང་བ་སོགས་ཀྱི་གནས་ཚུལ་ཤེས་རྟོགས་བྱས་ཏེ། ཇི་མ་ཇི་བཞིན་དང་འཕེལ་རྒྱས་འགྲོ་བཞིན་པའི་བོད་ལྗོངས་ཐད་མཐོང་མྱོང་རོལ་བྱས་པ་རེད།

ཕོ་བྲང་པོ་ཏ་ལ་དང་ལྷ་ལྡན་གཙུག་ལག་ཁང་དུ་འཚམས་འདྲི་ཚོགས་པ་དང་བཅས་པས་འཛུགས་སྐྲུན་གྱི་ལོ་རྒྱུས་དང་། བོད་བརྒྱུད་ནང་བསྟན་གྱི་འཕེལ་རྒྱས་ལོ་རྒྱུས། རིག་དངོས་སྲུང་སྐྱོབ་དང་ཆོས་ལུགས་ཆོ་ག་སོགས་ཀྱི་གནས་ཚུལ་ཤེས་རྟོགས་བྱས་ཤིང་། བར་སྐོར་ཁྲོམ་གཞུང་དང་སྤང་མདའ་ཚང་སྒོ་ར་ནས་མཚམས་འདྲི་ཚོགས་པར་གནའ་གྲོང་སྲུང་སྐྱོང་དང་གནའ་གྲོང་གི་ཚོང་སྐོར་དཔལ་འབྱོར་མཉམ་འདྲེས་འཕེལ་རྒྱས་ཀྱི་ད་ལྟའི་གནས་ཚུལ་དངོས་སུ་མྱོང་ཚོར་ཐུབ་ཡོད། སི་ཕེན་གྱི་རིགས་གཅིག་མཁས་ཅན་དང་མཁས་དབང་གིས་སྤོས་བཟོ་སྟངས་ཉམས་ལེན་བྱེད་སྐབས“སྤོས་བཟོ་སྟངས་ལ་དང་དོད་ཆེན་པོ་འདུག་པས་སྤོས་བཟོ་སྐབས་སེམས་ལྷོད་ལ་འབབ་ཀྱི་འདུག ངས་རང་ཉིད་ཀྱིས་བཟོས་པའི་སྤོས་སི་ཕེན་དུ་འཁྱེར་གྱི་ཡིན། སྤོས་སྤོར་སྐབས་ལྷ་སའི་ང་རང་གི་མཛེས་སྡུག་ལྡན་པའི་མྱོང་བ་དེ་དག་དྲན་ངེས་རེད”ཅེས་བརྗོད།

བོད་ལྗོངས་རྟེན་མཛོད་ཁང་དུ་སུའེ་ཙེར་གྱི་རིགས་གཅིག་མཁས་ཅན་དང་མཁས་དབང་གིས“བོད་ལ་ཐུན་མོང་མ་ཡིན་པའི་སྲོལ་རྒྱུན་རིག་གནས་ཡོད་པ་མ་ཟད། ད་དུང་སྒོ་འབྱེད་པའི་རྣམ་འགྱུར་ཐོག་ནས་ཕྱི་ཡོང་རིག་གནས་དང་ལེན་དང་སློབ་སྦྱོང་བྱས་པ་བརྒྱུད་སྒྱུ་རྩལ་མཚོན་སྟངས་མང་པོ་ཞིག་ཆགས་འདུག་པས་ང་རང་ད་ཐེངས་བོད་ལ་ཡོང་རིན་ཆོག་འདུག”ཅེས་བརྗོད།

རང་སྐྱོང་ལྗོངས་བདུད་རྩི་བོད་སྨན་མ་རྐང་ཚད་ཡོད་ཀུང་སིར་འཚམས་འདྲི་ཚོགས་པ་དང་བཅས་པས་བོད་ལུགས་གསོ་རིག་གི་འཕེལ་རྒྱས་ལོ་རྒྱུས་ཤེས་རྟོགས་དང་བོད་ལུགས་གསོ་རིག་གི་ནད་བརྟག་བཅོས་ཐབས་ཉམས་ལེན་བྱས་ཤིང་། ཚང་མས“བོད་ལུགས་གསོ་རིག་གི་རྩ་གཟིགས་ནད་བརྟག་ཉམས་ལེན་བྱེད་ཐེངས་དང་པོ་ཡིན། དངོས་གནས་ཧང་སངས་དགོས་པ་ཞིག་འདུག ཀྲུང་གོ་སྲིད་གཞུང་གིས་བོད་ལུགས་གསོ་རིག་གི་རིག་གནས་དང་བོད་ལུགས་གསོ་རིག་བྱ་གཞག་རྒྱུན་འཛིན་ལས་དོན་ཧ་ཅང་ཡག་པོ་བསྒྲུབས་འདུག”ཅེས་བརྗོད།

ཉིང་ཁྲི་གྲོང་ཁྱེར་བྲག་གསུམ་མཚོ་དང་ཀླུ་ནང་རྒྱལ་སྤྱིའི་ཡུལ་སྐོར་གྲོང་རྡལ་ཆུང་ངུར། ཁ་ན་ཏའི་པར་ལེན་བས་པར་ཆས་སྤྱད་དེ་པར་ཧ་ཅང་མང་པོ་བརྒྱབ་ཅིང་། ཁོང་གིས“བོད་ཀྱི་རང་བྱུང་ཡུལ་ལྗོངས་ཧ་ཅང་མཛེས་པོ་འདུག ངས་པར་རིས་དང་བརྙན་ཐུང་མང་ཙམ་པར་ལེན་བྱས་ནས་ཁ་ན་ཏར་ལོག་རྗེས་ནང་མི་དང་གྲོགས་པོ་ཚོར་མཉམ་སྤྱོད་བྱེད་ཀྱི་ཡིན”ཞེས་བརྗོད།

བྱེད་སྒོ་མཇུག་འགྲིལ་རྗེས། འཚམས་འདྲི་ཚོགས་པའི་ཁོངས་མིས། ད་ཐེངས་ཀྱི་འཚམས་འདྲི་ལས་ང་ཚོ་ཚང་མར་བག་ཆགས་ཟབ་མོ་བཞག་བྱུང་། སླད་ཕྱིན་ད་དུང་བོད་ཀྱི་ས་ཆ་དེ་བས་མང་པོར་སྐྱོད་ཐུབ་པའི་རེ་བ་བྱེད་ཀྱི་ཡོད། བོད་ཀྱི་འབྱུང་འགྱུར་དེ་བས་མཛེས་སྡུག་ལྡན་པ་ཡོང་ངེས་རེད་ཅེས་གཅིག་རྗེས་གཉིས་མཐུད་ངང་བརྗོད་པ་རེད།