ཟླ་2ཚེས་6ཉིན་ཀོང་ཀྲོའུ་ཡི་སློབ་གྲྭ་འབྲིང་ཆུང་གི་སློབ་འགོ་ཚུགས་པའི་ཉིན་དང་པོར། ཀོང་ཀྲོའུ་གྲོང་ཁྱེར་གྱི་2023ལོའི་དཔྱིད་དུས་ཀྱི་སློབ་དུས་འགོ་ཚུགས་རྗེས་ཀྱི་བསམ་བློ་ཆབ་སྲིད་ཀྱི་སློབ་ཚན་དང་པོ་དེ་ཧོང་ཕུའུ་ཆུས་ཀོང་ཀྲོའུ་ཚོད་ལྟའི་སློབ་འབྲིང་དུ་འཚོགས་པ་རེད། སློབ་ཚན་ལ“ཡུལ་དུས་ལས་བརྒལ་ནས་ལོ་རྒྱུས་ཀྱི་ཤུལ་ལམ་འཚོལ་ཞིབ་བྱེད”ཅེས་པ་བརྗོད་དོན་གཙོ་བོར་བྱས་ཏེ། གནའ་རྫས་རྟོག་ཞིབ་ཀྱི་གཏིང་ཟབ་པའི་ལོ་རྒྱུས་རིག་གནས་ཀྱི་ནང་དོན་ལ་བརྟེན་ནས་ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་དེ་སློབ་གྲྭའི་བསམ་བློ་ཆབ་སྲིད་སློབ་ཚན་ནང་གསར་གཏོད་སྒོ་ནས་ཁྱབ་གདལ་བཏང་བ་རེད།

“གནའ་རྫས་རྟོག་ཞིབ་ནི་ཅི་ཞིག་ཡིན་ནམ། ཅིའི་ཕྱིར་གནའ་རྫས་རྟོག་ཞིབ་བྱེད་དམ། གནའ་རྫས་རྟོག་ཞིབ་ཇི་ལྟར་བྱེད་དམ། ཀོང་ཀྲོའུ་ཡི་གནའ་རྫས་རྟོག་ཞིབ་ཀྱིས་གང་ཞིག་རྟོག་ཞིབ་བྱེད་དམ། སློབ་ཚན་ཐོག་ཀོང་ཀྲོའུ་གྲོང་ཁྱེར་རིག་དངོས་གནའ་རྫས་རྟོག་ཞིབ་ཞིབ་འཇུག་ཁང་གི་ཡོན་ཀྲང་ཞིབ་འཇུག་པ་དབྱི་ཤིས་པིང་གིས《གནའ་རྫས་རྟོག་ཞིབ་དང་ཉེ་བཅར》བརྗོད་དོན་གཙོ་བོར་བྱས་ནས་ཕྲུ་གུ་ཚོར་ཁོང་གི“གནའ་རྫས་རྟོག་ཞིབ་ཀྱི་ཉིན་ཐོ”མཉམ་སྤྱོད་བྱས་ཏེ་དབྱང་ཁྲེང་གི་ལོ་རྒྱུས་ཀྱི་ཤུལ་འཚོལ་ཞིབ་བྱས་པ་རེད། ཁོང་གིས་གནའ་རྫས་རྟོག་ཞིབ་ཀྱི་སྐད་ཆ་དེ་གོ་བདེ་ཤེས་སླའི་ཚན་རིག་ཁྱབ་གདལ་གྱི་སྐད་ཆ་དང་སློབ་ཁྲིད་ཀྱི་སྐད་ཆར་བསྒྱུར་ནས་ཏང་གི་ཚོགས་ཆེན་ཉི་ཤུ་པའི་དགོངས་དོན་དང་ཟུང་འབྲེལ་བྱས་ཏེ། གནའ་རྫས་རྟོག་ཞིབ་ལས་ཀའི་ནང་དོན་རེ་རེ་བཞིན་ལ་འགྲེལ་བཤད་བརྒྱབ་པ་རེད། དེ་དང་ཆབས་ཅིག་སློབ་གྲོགས་ཚོར“སློབ་སྦྱོང་ནན་ཏན་བྱས་ཏེ་ལོ་རྒྱུས་རིག་གནས་ཀྱི་སྙིང་བཅུད་བླངས་ནས་སྐྱོན་བྲལ་དང་བདེ་ཐང་ངང་འཚར་ལོངས་ཡོང་བ་དང་། ཀྲུང་ཧྭའི་ཤེས་དཔལ་ཤེས་རྟོགས་དང་དེར་ངོས་འཛིན་དེ་བས་ཡག་པོ་བྱེད་པ། ཀྲུང་ཧྭའི་ཕུལ་བྱུང་གི་སྲོལ་རྒྱུན་རིག་གནས་རྒྱུན་འཛིན་ཧུར་ཐག་བྱས་ནས་ཀྲུང་གོ་བའི་བློ་སྟོབས་དང་། སྙིང་རུས། གདིང་ཤུགས་བཅས་ཆེ་རུ་གཏོང་དགོས”ཞེས་ལྕག་སྐུལ་བྱས་པ་རེད།

གྲོང་ཁྱེར་ཡོངས་ཀྱི་སློབ་གྲྭ་འབྲིང་ཆུང་གི་སློབ་མས་དྲ་བ་ནས་དམིགས་བསལ་སློབ་ཚན་དེ་ཉན་པ་བརྒྱུད“གནའ་རྫས་རྟོག་ཞིབ་ལ་དགའ་པོ་བྱེད་མཁན་ཆུང་ངུར”གྱུར་ཡོད། སློབ་ཚན་གི་མཇུག་ཏུ་ཀོང་ཀྲོའུ་གྲོང་ཁྱེར་རིག་དངོས་གནའ་རྫས་རྟོག་ཞིབ་ཞིབ་འཇུག་ཁང་གིས་ཀོང་ཀྲོའུ་ཚོད་ལྟའི་སློབ་འབྲིང་ལ་ལོ་རྒྱུས་དང་གནའ་རྫས་རྟོག་ཞིབ་རིགས་ཀྱི་དཔེ་དེབ་སྤྲད་དེ་ཕྲུ་གུ་ཚོས་སྔར་བས་གནའ་རྫས་རྟོག་ཞིབ་བྱེད་པར“དཔེ་ཀློག་གི་ཟམ་པ”ཞིག་བཙུགས་ཡོད། ས་གནས་ས་ཐོག་ཏུ་ད་དུང་རིག་དངོས་DIYཉམས་ལེན་ཁུལ་བཙུགས་ཡོད་པ་དང་། སྐུ་མགྲོན་དང་དགེ་སློབ་ཚོས་སྲོལ་རྒྱུན་ལག་ཤེས་བཟོ་རྩལ་ཉམས་ལེན་བྱས་ཏེ་ལོ་རྒྱུས་རིག་གནས་ཐོན་རྫས་ཀྱི་ངོ་མཚར་མྱོང་ཚོར་ཐུབ་ཡོད།

“བསམ་བློ་ཆབ་སྲིད་ཀྱི་སློབ་ཚན་ཆེ་མོ”སྤྱོད་མཁས་པོ་བྱ་རྒྱུ་ནི་བསམ་བློ་ཆབ་སྲིད་ཀྱི་སློབ་ཚན་ལེགས་པོ་གཉེར་རྒྱུའི་དམ་འཛིན་བྱ་གཞི་གལ་ཆེན་ཞིག་རེད། ད་ཐེངས་ཀྱི་དཔྱིད་དུས་སློབ་འགོ་ཚུགས་རྗེས་ཀྱི་བསམ་བློ་ཆབ་སྲིད་ཀྱི་སློབ་ཚན་དང་པོ་ནི་ཀོང་ཀྲོའུ་གྲོང་ཁྱེར་གྱིས“བསམ་བློ་ཆབ་སྲིད་ཀྱི་སློབ་ཚན་ཆེ་མོའི”སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་ལག་བསྟར་དོན་འཁྱོལ་གཏིང་ཟབ་བྱེད་པའི་ལག་ལེན་གྱི་འཚོལ་ཞིབ་ཞིག་རེད། དེའི་ནང་ཧོང་ཕུའུ་ཆུས་ཀྱིས་ཉེ་བའི་ལོ་ཤས་རིང“5G+VR”ཡི་བསམ་བློ་ཆབ་སྲིད་ཀྱི་རིག་ལྡན་སློབ་ཁང་བསྐྲུན་ནས་གསར་བརྗེའི་སློབ་གསོའི་རྟེན་གཞི་དང་ཚན་རྩལ་རྟེན་མཛོད་ཁང་དེ“སློབ་ཁང་ཆེ་མོར”འགྱུར་བར་བྱས་ཏེ“རིག་གནས་དང་། སློབ་གསོ། ཚན་རྩལ”བཅས་ཟུང་དུ་འབྲེལ་བའི་ཁྱབ་ཁོངས་ལས་བརྒལ་བའི་འཕེལ་རྒྱས་འགྲོ་རྒྱུར་སྐུལ་འདེད་བཏང་བ་དང་། ཚན་རིག་མཁས་ཅན་དང་། སྒྱུ་རྩལ་མཁས་ཅན། མངོན་མིན་རིག་གནས་ཤུལ་བཞག་གི་རྒྱུན་འཛིན་པ། དམར་དམག་རྒན་གྲས་སོགས་གདན་དྲངས་ནས་བསམ་བློ་ཆབ་སྲིད་ཀྱི་སློབ་ཚན་ཁྲིད་ཅིང་། དགུན་དུས་ཨོ་རྩལ་འགྲན་ཚོགས་ཀྱི་འགོ་ཚུགས་མཛད་སྒོའི“འབྲུག་མགོའི”བརྐོས་རིས་མཁས་ཅན་ཀྲང་ཝུའེ་ཁྲའོ་དང་། ཀྲུང་གོ་ཚན་རིག་ཁང་གི་ཡོན་ཧྲི་ཀྲའོ་ཡུས་ལེང་། ཐེན་ཧན་གྱི་རྗེས་རབས་པ་དགེ་རྒན་ཆེ་མོ་བ་ཨོའུ་དབྱང་ཝུའེ་བཅས་ཀྱི་འཆད་ཁྲིད་ལ་དགེ་སློབ་ཡོངས་ཀྱི་དགའ་བསུ་ཚད་མེད་ཐོབ་ཡོད།