གསར་འགོད་པར་ཡུན་ནན་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་ནས་ཤེས་རྟོགས་བྱུང་བར། ཡུན་ནན་ཞིང་ཆེན་གྱིས་ལས་ཞུགས་རོགས་སྐྱོར་སྲིད་ཇུས་ཀྱི་ཁྱབ་ཁོངས་རྒྱ་སྐྱེད་དང་། ཤར་ནུབ་རྒྱུད་ཀྱི་ངལ་ལས་མཐུན་སྦྱོར་ལ་ཤུགས་སྣོན། ལས་ཞུགས་རོགས་སྐྱོར་འཁོར་ཁང་རིམ་སྤོར་འཕེལ་རྒྱས་གཏོང་བ། གྲོང་གསེབ་ཀྱི་སྤྱི་ཕན་རང་བཞིན་གྱི་ལས་གནས་ལ་ཚད་ལྡན་དོ་དམ་བྱེད་པ་སོགས་ཀྱི་བྱེད་ཐབས་ནུས་ལྡན་སྤྱད་དེ། 2022ལོར་ཞིང་ཆེན་ཡོངས་ཀྱི་དབུལ་སྒྲོལ་མི་འབོར་དང་ལྟ་ཞིབ་བྱ་ཡུལ་གྱི་ལས་མི་ཁྲི་344.6ཟིན་ནས་རྒྱལ་ཡོངས་ཀྱི་ཨང་དང་པོར་ཐེངས་དང་པོ་སླེབས་པ་དེ་2021ལོ་ལས་མི་ཁྲི་22.4མང་དུ་ཕྱིན་པ་དང་། དབུལ་སྒྲོལ་མི་འབོར་གྱི་གླ་ཕོགས་རང་བཞིན་གྱི་ཡོང་འབབ་འཕར་ཚད་སླར་ཡང་ཟིན་ཐོ་གསར་པ་བཏོད་དེ་སྒོར་9538ཟིན་པ་དེ་2021ལོ་ལས་སྒོར་1452འཕར་བ་དང་འཕར་ཚད་17.9%ཟིན་ནས་ཞིང་པའི་འབབ་འཕར་ལ་སྐུལ་འདེད་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དུ་གཏོང་བ། གྲོང་གསེབ་དར་རྒྱས་ལ་ཕྱོགས་ཡོངས་ནས་སྐུལ་འདེད་གཏོང་བ་བཅས་ལ་འདེགས་སྐྱོར་ནུས་ལྡན་བྱས་ཡོད་པ་རེད།

གོམ་སྟབས་རྗེས་མར། ཡུན་ནན་གྱིས་ལས་ཞུགས་ཐབས་ལམ་སྔར་བས་ཡངས་སུ་བཏང་ནས་སྲིད་ཇུས་ཀྱི་རྒྱབ་སྐྱོར་ནུས་པ་ཆེ་རུ་གཏོང་བ་དང་། ངལ་ལས་མཉམ་ལས་མུ་མཐུད་གཏིང་ཟབ་ཏུ་གཏོང་བ། ལས་ཞུགས་རོགས་སྐྱོར་འཁོར་ཁང་རིམ་སྤོར་འཕེལ་རྒྱས་གཏོང་བ། གུད་གསབ་ལས་སྤྲོད་ཀྱི་རྣམ་གྲངས་ལག་ལེན་ཤུགས་ཆེན་བསྟར་བ། དབུལ་སྒྲོལ་མི་འབོར་གྱི་ལས་གཏོད་ལ་རྒྱབ་སྐྱོར་ཧུར་ཐག་བྱེད་པ། གྲོང་གསེབ་ཀྱི་སྤྱི་ཕན་རང་བཞིན་གྱི་ལས་གནས་ལ་སྤྱི་འདོམས་གསར་སྤེལ་བྱེད་པ་སོགས་བྱས་ནས་དབུལ་སྒྲོལ་མི་འབོར་གྱི་ལས་མིའི་གཞི་ཁྱོན་བརྟན་པོ་ཡོང་བ་བྱ་རྒྱུ་དང་། གནད་སྨིན་ཇུས་བསྟར་མཐའ་འཁྱོངས་ཀྱིས་ལས་ཞུགས་ཞབས་ཞུ་ལེགས་སུ་གཏོང་བ་དང་། རྩལ་ནུས་གསོ་སྦྱོང་ལ་དམ་འཛིན་ཏན་ཏིག་བྱེད་པ། ངལ་ལས་སྤུས་རྟགས་སྟོབས་ཆེར་གཏོང་བ། ཁེ་དབང་སྲུང་སྐྱོང་ལ་ཤུགས་སྣོན་རྒྱག་པ་བཅས་བྱས་ནས་ལས་ཞུགས་རོགས་སྐྱོར་ལས་དོན་གྱི་སྤུས་ཕན་གཉིས་ཀ་ཆེ་རུ་གཏོང་རྒྱུ། ལས་ཀའི་ལམ་སྲོལ་འཐུས་སྒོ་ཚང་དུ་གཏོང་བ་དང་། གཙོ་གནད་མི་ཚོགས་ཀྱི་ཞབས་ཞུའི་ལམ་སྲོལ་འཐུས་སྒོ་ཚང་དུ་གཏོང་བ། གྲོང་ཁྱེར་དང་གྲོང་གསེབ་ཀྱི་ལས་ཞུགས་རོགས་སྐྱོར་ལམ་སྲོལ་འཐུས་སྒོ་ཚང་དུ་དང་སྤྱི་འདོམས་བྱེད་པ། གཙོ་གནད་ས་ཁུལ་གྱི་གཟིགས་སྐྱོང་རྒྱབ་སྐྱོར་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ནས་གཙོ་གནད་ཁྱབ་ཁོངས་ཀྱི་དབུལ་པོ་བསྐྱར་ལོག་གི་ཉེན་ཁར་འགོག་ཟོན་བྱེད་རྒྱུ་རེད།