ཞོགས་པའི་ཆུ་ཚོད་དགུ་དང་ཕྱེད་ཀ་ཙམ་ལ་གསེར་མདོག་གི་ཉི་འོད་ཁུ་ཁུ་ཤི་རིའི་ཁུལ་དུ་རིམ་གྱིས་འཕྲོས་ལ། ས་བབ་སྨི་4547ཟིན་པའི་མཚོ་བོད་ལྕགས་ལམ་ཐོག་ཐོན་གཙང་པོའི་བབས་ཚུགས་ཀྱི་ཉེ་འགྲམ་དུ་ཁ་བས་བཀླུབས་འདུག

“དེ་རིང་ང་ཚོས་སྤྱི་ལེ་100ལྷག་ཙམ་དང་། མེ་འཁོར་བབས་ཚུགས་7 ཕུག་ལམ་1བཅས་ལ་སྐོར་གཡེང་བྱེད་དགོས”ཞེས་བཀོད་སྒྲིག་བྱས་རྗེས། གསར་འགོད་པས་མཚོ་བོད་ལྕགས་ལམ་སྤྱི་བདེ་ཅུས་གོར་མོ་སྤྱི་བདེ་ཁྲུའུ་ཐོག་ཐོན་གཙང་པོའི་ས་ཚིགས་མངགས་གཏོང་ཁང་གི་སུའོ་ཀྲང་གཞོན་པ་ཀྲའོ་ཧུང་ལུང་དང་། མི་དམངས་ཉེན་རྟོག་པ་ལིན་ཧྲེང་དང་ཞུའེ་ཤིང་ཧྲེང་བཅས་ཀྱི་རྗེས་སུ་འབྲངས་ནས་ཉིན་གཅིག་གི་ལས་ཀར་ཉམས་ལེན་བྱེད་འགོ་ཚུགས།

ཉེན་རྟོག་པའི་རླངས་འཁོར་ཤར་ཕྱོགས་སུ་དལ་བུར་བསྐྱོད་པ་དང་བསྟུན་ནས་རིམ་བཞིན་བྲང་ཁ་མི་བདེ་བ་དང་མགོ་ན་བའི་ཚོར་སྣང་མངོན་གསལ་དོད་དུ་ཕྱིན། ཀྲའོ་ཧུང་ལུང་གིས་གསོ་རླུང་དམ་ཆུང་ཞིག་སྤྲོད་ཞོར་དུ། ང་ཚོ་མངགས་གཏོང་ཁང་གི་ཁོངས་གཏོགས་ལམ་ཐིག་མཚོ་སྔོན་དང་བོད་གཉིས་བརྒྱུད་དགོས། ས་བབ་སྨི་5072ཟིན་པའི་འཛམ་གླིང་ལྕགས་ལམ་གྱི་མཐོ་ཤོས་གདང་ལ་ཉག་ཁ་དང་འཛམ་གླིང་ཐོག་ས་བབ་མཐོ་ཤོས་ཀྱི་འཁྱགས་སའི་ལྕགས་ལམ་ཕུག་ལམ་གྱི་མེ་རླུང་རི་བོའི་ཕུག་ལམ་སོགས“འཛམ་གླིང་ཐོག་གི་མཐོ་ཤོས”6ཡོད་ཅིང་། ཆ་སྙོམས་ས་བབ་སྨི་4500ཟིན་པ་དང་། མཁའ་རླུང་དཀོན་ལ་ཁྱིམ་དུད་ཀྱང་ཉུང་ཞེས་ངོ་སྤྲོད་བྱས།

ཆུ་ཚོད་གཅིག་ཙམ་བསྐྱོད་རྗེས་རླངས་འཁོར་དལ་གྱིས་ཁ་བཀག རླངས་འཁོར་ལས་བབས་མ་ཐག“སྤྱང་ཀའི་གདོང་ས་ཚིགས”ཀྱི་བྱང་བུ་མིག་ལམ་དུ་འཆར་ཞིང་། ཕྱོགས་ཀུན་ཏུ་མི་གཅིག་ཀྱང་མཐོང་དཀོན། རྐང་འོག་གི་མཚོ་བོད་ལྕགས་ལམ་དང་འགྲམ་གྱི་མཚོ་བོད་གཞུང་ལམ་གཉིས་ནི་མཉམ་དུ་གཤིབས་པའི་གཡུ་འབྲུག་རིང་པོ་དང་འདྲ་བར་མུ་མཐའ་མེད་པའི་རི་ཀླུང་མཉམ་དུ་སྦྲེལ།

མེ་འཁོར་བབས་ཚུགས་ཀྱི་བརྡ་རྟགས་འཁོར་ཁང་དུ་སྐྱོད་སྐབས་མི་དམངས་ཉེན་རྟོག་པས་ཞིབ་བཤེར་ཞིབ་ཚགས་དང་བཅས་རེ་རེ་བཞིན་ཟིན་ཐོ་བཀོད། “མི་མེད་བབས་ཚུགས་དེ་འདྲ་ཁོངས་གཏོགས་ཁུལ་དུ་ཁྱོན་27ཡོད་པ་དང་ཕར་འགྲོ་ཚུར་འོང་གི་མེ་འཁོར་གྱིས་འདི་གར་བརྡ་རྟགས་བརྗེ་རེས་དང་འདུ་གཏོང་བྱེད་ཀྱི་ཡོད”ཅེས་ལོ་27ལ་སླེབས་པའི་ལིན་ཧྲེང་གིས་མེ་གསོད་སྒྲིག་ཆས་ལ་ཞིབ་བཤེར་བྱེད་བཞིན་བརྗོད། ངོ་གདོང་ནག་པ་དང་མཆུ་ཏོ་སྨུག་པོར་གྱུར་པའི་ཀོང་ཏུང་ནས་ཡིན་པའི་ལིན་ཧྲེང་གིས“འདི་གར་བཅའ་སྡོད་མི་དམངས་ཉེན་རྟོག་པ་མི་རབས་ནས་མི་རབས་ཀྱིས་གོམ་པ་རེ་རེ་བྱས་ནས་སྤྱི་ལེ་582ཡོད་པའི་ལམ་ཐིག་ཏུ་སྐོར་གཡེང་ལས་འགན་ལེགས་སྒྲུབ་བྱས་ཡོད། གཞན་གྱིས་སྒྲུབ་ཐུབ་པ་ངས་ཀྱང་སྒྲུབ་ཐུབ”ཅེས་བརྗོད།

དགུན་དུས་རླངས་འཁོར་མང་པོ་མེད་རུང་མི་དམངས་ཉེན་རྟོག་པ་ཚོས་སྔར་བཞིན་ལས་ཀ་ནན་ཏན་སྒྲུབ་ཀྱི་ཡོད། “འཁྱགས་པ་རིམ་བཞིན་བཞུར་བ་དང་བསྟུན་ནས་ལམ་གཞི་རྡིབ་པའི་གནས་ཚུལ་རྟག་ཏུ་ཐོན་གྱི་ཡོད། འགྱུར་ལྡོག་ཕྲན་བུ་བྱུང་ཚེ་འགྲིམ་འགྲུལ་བདེ་འཇཌ་ལ་གནོད་སྲིད་པས་ཧོལ་རྒྱུག་གཏན་ནས་བྱ་མི་རུང”ཞེས་ཀྲའོ་ཧུང་ལུང་གིས་རླངས་འཁོར་ནས་ཡང་ཡང་བབས་ཏེ་ཞིབ་ཚགས་ལྟ་བ་དང་སྤྱི་ལེ་བརྒྱ་ལྷག་ཙམ་གྱི་ལམ་ཐག་ལ་ཞིབ་བཤེར་བྱེད་པར་ཆུ་ཚོད་ལྔ་ཙམ་འགོར།

དུས་རྒྱུན་སྐོར་གཡེང་བྱེད་པ་ཕུད། མི་དམངས་ཉེན་རྟོག་པ་ཚོས་ད་དུང་གནས་སྐབས་འགྲིམ་འགྲུལ་ཉེན་རྟོག་པ་དང་གནས་སྤོའི་གཙོད་ལ་གཞུང་ལམ་སྒྲོལ་རོགས་དང་འབྲོག་པར་འཚོ་བའི་མཁོ་ཆས་ཉོ་རོགས་བྱས་ནས། རང་བྱུང་ཁོར་ཡུག་ཞན་པའི་ས་ཆར་མི་དང་མིའི་དབར་གྱི་བབ་ཆགས་པའི་མཛའ་གྲོགས་རྒྱུན་འཛིན་བྱེད་བཞིན་མཆིས།