ཧུའུ་ནན་ཞིང་ཆེན་ཀྲུའུ་ཀྲོའུ་གྲོང་ཁྱེར་དུ་G60ཧུའུ་ཁུན་མྱུར་བགྲོད་གཞུང་ལམ་ཅིན་ཡུས་ཧྲི་ནས་ལི་ལིན་ལམ་དུམ་བར་གྱི་རྒྱ་སྐྱེད་རྣམ་གྲངས་ཚ་ཚ་འུར་འུར་ངང་འཛུགས་སྐྲུན་བྱེད་བཞིན་ཡོད་ཅིང་། “ཞིང་ཆེན་དང་གྲོང་ཁྱེར་གྱི་འབྲེལ་ཡོད་འགན་ནུས་སྡེ་ཚན་གྱིས་རྣམ་གྲངས་ལ་ལྟ་སྐུལ་མཛུབ་ཁྲིད་དང་བཀོད་གཏོང་ཐེངས་མང་བྱས་ནས་ས་ཆ་སྤྱོད་པའི་ཞིབ་བཤེར་ལ་དུས་ཚོད་ཟླ་བ་གཅིག་ལས་འགོར་མེད། དེ་ནི་ཧུའུ་ནན་ཞིང་ཆེན་གྱི་སྔོན་ལ་ས་ཆ་སྤྱོད་པའི་མཆན་བཀོད་བཀའ་ལན་གྱི་མོས་མཐུན་ཐོབ་པའི་རྣམ་གྲངས་ཤིག་རེད”ཅེས་རྣམ་གྲངས་སྐྲུན་འགན་འཁུར་མཁན་ཕྱོགས་ཧུའུ་ནན་ལམ་ཟམ་ཚོགས་པའི་ཏང་ཨུད་ཀྱི་ཧྲུའུ་ཅི་ཏུང་ཧྲི་ཀྲང་ཝང་ཆི་ཧྥེས་བརྗོད།
G60ཧུའུ་ཁུན་མྱུར་བགྲོད་གཞུང་ལམ་ཅིན་ཡུས་ཧྲི་ནས་ལི་ལིང་ལམ་དུམ་བར་གྱི་རྒྱ་སྐྱེད་རྣམ་གྲངས་ནི་རྒྱལ་སྲིད་སྤྱི་ཁྱབ་ཁང་གིས་སྐུལ་འདེད་ནུས་ལྡན་བཏང་བའི་ཧུའུ་ནན་ཞིང་ཆེན་གྱི་གཙོ་གནད་རྣམ་གྲངས་ཤིག་ཡིན་ཞིང་། ལས་ཡུན་ལོ་གཉིས་ཡིན་པས་དུས་ཡུན་ཐུང་ལ་ལས་འགན་ལྕི་པོ་ཡོད། ད་ལོའི་ཟླ་10པར་ཧུའུ་ནན་ཞིང་ཆེན་སྲིད་གཞུང་གི་འབྲེལ་ཡོད་གཙོ་གཉེར་སྡེ་ཚན་གྱིས་མཐུན་སྦྱོར་འབྲེལ་མཐུད་བྱས་པ་བརྒྱུད། རྒྱལ་ཁབ་གསར་སྤེལ་དངུལ་ཁང་གིས་རྣམ་གྲངས་དེར་ཆེད་དོན་ཐེབས་རྩའི་དངུལ་སྒོར་དུང་ཕྱུར་0.94བཏང་བས་མ་དངུལ་གྱི་གནོན་ཤུགས་ཧ་ཅང་ཆུང་དུ་ཕྱིན་ཡོད་པ་རེད།
དེ་ནི་ཧུའུ་ནན་ཞིང་ཆེན་གྱིས་མ་དངུལ་ནུས་ལྡན་བཏང་བའི་རྣམ་གྲངས་གལ་ཆེན་ལ་སྐུལ་འདེད་གཏོང་བའི་མཐུན་སྦྱོར་ལམ་སྲོལ་གྱི་ལས་དོན་ཆེད་ཚན་བཙུགས་ནས་དངུལ་རྩའི་བྱ་ཐབས་གང་ལེགས་སྤྱད་དེ་རྣམ་གྲངས་གལ་ཆེན་འཛུགས་སྐྲུན་ལ་རྒྱབ་སྐྱོར་བྱེད་པའི་གསོན་ཉམས་དོད་པའི་ལག་ལེན་ཞིག་རེད། ད་ལོའི་ཟླ་8པ་ནས་བཟུང་། ཧུའུ་ནན་གྱིས་ཞིང་ཆེན་ཡོངས་སུ་མ་དངུལ་ནུས་ལྡན་གཏོང་བར་སྐུལ་འདེད་གཏོང་བའི་རྣམ་གྲངས་གལ་ཆེན་མཐུན་སྦྱོར་ལམ་སྲོལ་བཙུགས་ནས་ལས་དོན་ཆེད་ཚན་བཀོད་སྒྲིག་བྱས་པ་དང་ཡུག་སྦྲེལ་ཞིབ་མཆན་བཀོད་དེ་རྣམ་གྲངས་ལེགས་འདེམས་དང་། རྒྱུ་རྐྱེན་གཙོ་བོ་འགན་ལེན། ཐེབས་རྩའི་དངུལ་གཏོང་སྤྲོད་བཅས་ལ་ཐུན་མོང་ཐོག་སྐུལ་འདེད་བཏང་ཡོད་པ་རེད།
ད་ལོའི་ཚུན་དུ། ཧུའུ་ནན་གྱིས་ད་དུང་ལས་བྱེད་པ་ཆིག་ཁྲིས་ཁེ་ལས་ཆིག་ཁྲིར་འབྲེལ་བ་བྱེད་པའི“སྲིད་ཇུས་དྲིལ་བསྒྲགས་དང་། དཀའ་གནད་སེལ་བ། ཞབས་འདེགས་ལེགས་གཏོང་”བཅས་ཀྱི་བྱ་སྤྱོད་མུ་མཐུད་སྤེལ་བ་རེད། ཕུལ་བྱུང་ལས་བྱེད་པ་ཁེ་ལས་སུ་བཏང་ནས་རིམས་ནད་སྔོན་འགོག་དང་ཚོད་འཛིན་གྱི“ཁྲིད་སྟོན་པ”ཡག་པོ་བྱས་པ་མ་ཟད། གོ་རིམ་ལྡན་པའི་ཐོན་སྐྱེད་ཀྱི“ཞབས་ཞུ་བ”ཡག་པོའང་བྱས་ཡོད་པ་རེད།
རིམས་ནད་སྔོན་འགོག་དང་ཚོད་འཛིན་གྱི་ཇུས་གཞི་ཁག་དགུ་པ་དང་། ལེགས་སུ་བཏང་བའི་བྱ་ཐབས་དོན་ཚན་ཉི་ཤུ། “དོན་ཚན་གསར་པ་བཅུའི”སྔོན་འགོག་དང་ཚོད་འཛིན་གྱི་བྱ་ཐབས་བཅས་ཆད་ལུས་མེད་པར་དོན་འཁྱོལ་བྱས་ཤིང་། ཧུའུ་ནན་ཞིང་ཆེན་གྱིས་གཙོ་གནད་ལས་འགན་ཁག་15དང་། འགན་འཁྲིའི་འཁོར་འབྲེལ་དོན་ཚན་50 ཚད་གཞི་ཁག་138སོགས་འགན་འཁྲིའི་སྡེ་ཚན་དང་འགན་འཁུར་བར་ཞིབ་ཕྲར་དོན་འཁྱོལ་ཐུབ་པར་བྱས་ནས་ཞིང་ཆེན་དང་། གྲོང་ཁྱེར། རྫོང་བཅས་རིམ་གསུམ་མཐུན་སྦྱོར་མཉམ་འགུལ་གྱི་བཀོད་འདོམས་མ་ལག་ཆགས་པར་བྱས་ཏེ་སྲིད་ཇུས་དོན་ཐོག་ཏུ་འཁྱོལ་བའི་འགན་ལེན་བྱས་ཡོད་པ་རེད།
ད་ལོའི་དུས་ཚིགས་དང་པོ་ནས་གསུམ་པའི་བར་ཧུའུ་ནན་ཞིང་ཆེན་གྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་35332.63ཟིན་པ་དེ་དུས་མཚུངས་ལས་4.8%འཕར་ནས་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་1.8%མཐོ་བ་རེད།