འདི་ནི་སྨན་སྐྱིད་མཚོ་མོས་རིག་གཞུང་ཚོགས་འདུར་སྤེལ་རེས་གནང་བཞིན་པ། (སྨན་སྐྱིད་མཚོ་མོས་པར་མཁོ་འདོན་གནང་བ)

ཡངས་ཤིང་རྒྱ་ཆེ་བའི་མཚོ་བོད་ས་མཐོར་བོད་ཀྱི་གསོ་བ་རིག་པ་མུ་ཏིག་ཞིག་ལྟར་བཀྲག་མདངས་འཚེར་བཞིན་ཡོད་ལ། ལོ་མང་རྒྱུན་འཛིན་ཐུབ་ནས་ས་མཐོའི་མི་དམངས་ཀྱི་བདེ་ཐང་སྲུང་སྐྱོང་བྱེད་བཞིན་ཡོད། རྒྱལ་ཡོངས་སྲིད་གྲོས་ཀྱི་ཨུ་ཡོན་བོད་ལྗོངས་གསོ་རིག་སློབ་ཆེན་གྱི་དགེ་རྒན་ཆེ་མོ་བ་སྨན་སྐྱིད་མཚོ་མོ་ནི་བོད་ཀྱི་གསོ་བ་རིག་པ་སྲུང་སྐྱོང་བྱེད་མཁན་དང་རྒྱུན་འཛིན་བྱེད་མཁན་ཞིག་རེད།

རྒྱལ་ཡོངས་སྲིད་གྲོས་ཀྱི་ཨུ་ཡོན་ཞིག་ཡིན་པའི་ཁོང་གིས་སེམས་ནུས་ཚང་མ་བོད་སྨན་གྱི་ཞིབ་འཇུག་དང་སློབ་སྦྱོང་ཐོག་བཞག་ཅིང་། ལྷག་པར་དུ་བོད་ཀྱི་གསོ་བ་རིག་པ་མཉམ་འབྲེལ་རྒྱལ་ཚོགས་ཀྱི་མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་མིང་གཞུང་དུ་རེ་ཞུ་བྱེད་པའི་བརྒྱུད་རིམ་ཁྲོད། ཁོང་དང་ཁོང་གི་ཚོགས་པས་དཀའ་ངལ་མང་པོ་ཁྱད་བསད་དང་ཉིན་མཚན་དབྱེར་མེད་ངང་རེ་ཞུའི་དཔྱད་ཡིག་བཟོ་བཅོས་དང་ལེགས་སུ་གཏོང་བའི་ལས་དོན་བསྒྲུབས་ཡོད། “བོད་ཀྱི་གསོ་བ་རིག་པའི་ལུམས་བཅོས”མཐར་མཉམ་འབྲེལ་རྒྱལ་ཚོགས་ཚན་སློབ་རིག་གསུམ་རྩ་འཛུགས་ཀྱི《མིའི་རིགས་ཀྱི་མངོན་མིན་རིག་གནས་ཤུལ་བཞག་གི་མཚོན་བྱེད་མིང་གཞུང》ནང་གྲུབ་འབྲས་ཐོབ་པའི་ངང་ཚུད་ཐུབ་པ་བྱུང་ཡོད། འཛམ་གླིང་ཤུལ་བཞག་ལ་རེ་ཞུ་ལེགས་གྲུབ་བྱུང་བའི་གནས་ཚུལ་ཕྱིར་དྲན་གནང་སྐབས། ཁོང་གི་དགའ་སྤྲོའི་སེམས་པ་ད་དུང་འཇགས་ཐབས་བྲལ།

2024ལོའི་རྒྱལ་ཡོངས་ཀྱི་ཚོགས་འདུ་གཉིས་རིང་ཁོང་གིས་རྒྱལ་སྤྱིའི་རིག་གཞུང་སྤེལ་རེས་དང་ཤེས་ལྡན་པ་གསོ་སྐྱོང་སོགས་འབྲེལ་ཡོད་གནད་དོན་སྐོར་གྱི་གྲོས་འགོ་ཕུལ་ཏེ། རྒྱལ་ཁབ་ཀྱིས་བོད་ཀྱི་གསོ་བ་རིག་པའི་རྒྱལ་སྤྱིའི་ཤེས་ལྡན་པ་གསོ་སྐྱོང་བྱེད་ཤུགས་ཆེ་རུ་གཏོང་བ་དང་རྒྱལ་སྤྱིའི་སྤྱི་ཚོགས་སུ་ཀྲུང་གོའི་བོད་ཀྱི་གསོ་བ་རིག་པའི་གཏམ་བཤད་དབང་ཆ་དང་ཤུགས་རྐྱེན་ནུས་པ་ཆེ་རུ་དང་རྒྱ་ཆེར་གཏོང་རྒྱུའི་ཐུགས་རེ་གནང་ཡོད།

“ད་ཐེངས་ནི་ང་རྒྱལ་ཡོངས་ཀྱི་ཚོགས་འདུ་གཉིས་ལ་ཞུགས་ཐེངས་གསུམ་པ་ཡིན། ད་ཐེངས་ངས་འཁྱེར་བའི་གྲོས་འགོ་ནི་རིག་ཚན་འཛུགས་སྐྱོང་དང་། ཚན་རིག་ཞིབ་འཇུག་གསར་གཏོད། སྨན་རྩྭའི་ཐོན་ཁུངས་སྲུང་སྐྱོང་། སྨན་ཟས་འབྱུང་ཁུངས་གཅིག་མཚུངས་ཀྱི་སྲིད་ཇུས་སོགས་ཐད་ཀྱི་གནད་དོན་ཡིན”ཞེས་གསར་འགོད་པས་བཏོན་པའི་དྲི་བར་ལན་བསྐྱོན་པ་རེད། གྲོས་འགོ་དེ་དག་ནང་ཁོང་གིས་བོད་ཀྱི་གསོ་བ་རིག་པ་རྒྱུན་འཛིན་དང་འཕེལ་རྒྱས་གཏོང་བའི་ཐད་ཀྱི་བསམ་གཞིག་ཟབ་མོ་བསྡུས་ཡོད་ལ། བོད་ཀྱི་གསོ་བ་རིག་པའི་ལས་དོན་པ་གྲངས་མེད་ཀྱི་རེ་སྒུག་ཟབ་མོ་ཡང་མཚོན་ཡོད།