དམངས་ཀྱི་འབོད་སྒྲ་ཉན་པ་དང་། དམངས་ཀྱི་བསམ་འདུན་བསྡུ་ལེན། དམངས་ཀྱི་བློ་གྲོས་གཅིག་སྡུད། དམངས་ཀྱི་སྟོབས་ཤུགས་གཅིག་སྒྲིལ་བཅས་བྱས་ཤིང་། ཟླ་3ཚེས་11ཉིན་རྒྱལ་ཡོངས་མི་དམངས་འཐུས་ཚོགས་སྐབས་བཅུ་བཞི་པའི་ཚོགས་འདུ་ཐེངས་གསུམ་པའི་གྲོས་རིམ་ཁག་ཕུན་སུམ་ཚོགས་པོའི་ངང་ལེགས་གྲུབ་ཟིན་ནས་པེ་ཅིང་དུ་རྒྱལ་ཁའི་ངང་གྲོལ་བ་རེད། ཚོགས་ཞུགས་འཐུས་མི་ཚོས་བློ་བསྡུས་དགེ་འཚོལ་དང་། ཚོགས་སྲོལ་སྤྱོད་གཙང་གཞུང་དྲང་། ཚོགས་འདུའི་གྲུབ་འབྲས་ཕུན་སུམ་ཚོགས་པ་བཅས་ཀྱི་ཐོག་ནས་ཏང་གི་འདོད་ཚུལ་དང་མི་དམངས་ཀྱི་འདོད་བློ་གཅིག་གྱུར་བྱུང་བ་གང་ལེགས་མཚོན་ཡོད། ང་ཚོས་ཚོགས་ཆེན་ཐུགས་གྲ་ལེགས་འགྲིག་བྱུང་བར་སྤྲོ་སེམས་འཁོལ་པོས་རྟེན་འབྲེལ་ཞུ་རྒྱུ་ཡིན།

“ལོ་ལྔ་ཚན་བཅུ་བཞི་པའི”འཆར་འགོད་མཇུག་བསྡུའི་ལོར་འཚོགས་པའི་ད་ཐེངས་ཀྱི་ཚོགས་ཆེན་ཐོག་ཐུན་མོང་གི་ངོས་འཛིན་གཅིག་ཏུ་བསྒྲིལ་བ་དང་། ལས་འགན་ཁ་གསལ་བཟོས་པ། ཡིད་ཆེས་བརྟན་དུ་བཏང་ཡོད། དེ་ནི་སེམས་ནུས་གཅིག་སྒྲིལ་དང་། དངོས་འཛིན་དངོས་སྒྲུབ། མཐུན་སྒྲིལ་འབད་འབུངས་བཅས་ཀྱི་ཚོགས་ཆེན་ཞིག་རེད། ཚོགས་ཆེན་ཐོག་འདས་ཟིན་པའི་ལོ་གཅིག་ནང་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག རང་རྒྱལ་གྱིས་སྤྱིར་བཏང་གཏན་ནས་མིན་པའི་འཕེལ་རྒྱས་ཀྱི་བརྒྱུད་རིམ་ཞིག་འགྲིམས་ཤིང་། མི་རྣམས་ལ་སྐུལ་མ་ཐེབས་པའི་གྲུབ་འབྲས་ཀྱང་ཐོབ་སྟེ། ཀྲུང་གོའི་ལུགས་ཀྱི་དེང་རབས་ཅན་གྱིས་སྲ་ཞིང་བརྟན་པའི་གོམ་སྟབས་གསར་པ་སྤོས་པར་ཚད་མཐོའི་གདེང་འཇོག་བྱས་ཡོད། ཚོགས་ཆེན་ཐོག་སྲིད་གཞུང་གི་ལས་དོན་སྙན་སྒྲོན་དང་སྙན་སྒྲོན་གལ་ཆེན་གཞན་དག་ལ་གྲོས་ཞིབ་བྱས་པ་དང་འབྲེལ་ཆོག་མཆན་ཡང་སྤྲད་ཅིང་། འཆར་གཞི་དང་སྔོན་རྩིས་ལ་ཞིབ་བཤེར་བྱས་ནས་ཆོག་མཆན་ཡང་སྤྲད་ཡོད། འཐུས་མི་ཚོས་སྲིད་གཞུང་གི་ལས་དོན་སྙན་སྒྲོན་ནང་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཕྱོགས་ཡོངས་ནས་ལག་ལེན་བསྟར་བ་དང་། གྲུབ་འབྲས་ཕྱོགས་སྡོམ་དངོས་ཐོག་བདེན་འཚོལ་ཡིན་པ། དུས་བབ་ལ་དབྱེ་ཞིབ་དོན་དངོས་དང་མཐུན་ཞིང་གནད་ལ་འཁེལ་བ། དམིགས་ཚད་གཏན་འཁེལ་ཡིན་པ་ཚན་རིག་དང་མཐུན་ལ་ལུགས་དང་མཐུན་པ། བཏོན་པའི་བྱེད་ཐབས་ལག་ལེན་དུ་འཁྱོལ་བ་བཅས་ཡོད། དེ་ནི་བརྗོད་དོན་མངོན་གསལ་དོད་པ་དང་། ཐེག་ཁུར་ཡར་བརྩོན་ཆེ་བ། མཐུན་སྒྲིལ་ངར་ཤུགས་སྐྱེ་བ་བཅས་ཀྱི་སྙན་སྒྲོན་ཡག་པོ་ཞིག་ཡིན་པའི་ངོས་འཛིན་གནང་གི་ཡོད། ཚོགས་ཆེན་ཐོག་འཐུས་མིའི་བཅའ་ཁྲིམས་བཟོ་བཅོས་རྒྱག་རྒྱུའི་སྐོར་གྱི་གཏན་འབེབས་ལ་གྲོས་ཞིབ་བྱས་ནས་གྲོས་འཆམ་བྱུང་བ་དང་། དུས་རབས་གསར་པའི་མི་དམངས་འཐུས་ཚོགས་ཀྱི་འཐུས་མིའི་ལས་དོན་གྱི་ལག་ལེན་ཉམས་མྱོང་དང་གསར་གཏོད་གྲུབ་འབྲས་ཕྱོགས་སྡོམ་གཏིང་ཟབ་བྱས་ཡོད། མི་དམངས་འཐུས་ཚོགས་ཀྱི་འཐུས་མིའི་ལས་དོན་ལམ་ལུགས་ཅན་དང་། ཚད་ལྡན་ཅན། གོ་རིམ་ཅན་བཅས་སུ་འགྱུར་ཚད་མཐོ་རུ་གཏོང་རྒྱུའི་ངོས་ནས་བརྗོད་ན་དེར་དོན་སྙིང་གལ་ཆེན་ལྡན་ཡོད།

ཚོགས་ཆེན་ཐོག་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་འདས་ཟིན་པའི་ལོ་གཅིག་ནང་ཁྲིམས་ལྟར་འགན་འཁྲི་བསྒྲུབས་པ་དང་འགན་འཁྲི་གཙང་སྒྲུབ་བྱས་ཤིང་། ལས་དོན་ཁག་ལ་འཕེལ་རྒྱས་གསར་པ་བྱུང་བ་དང་ཕན་འབྲས་གསར་པ་ཐོབ་པར་ཁས་ལེན་གང་ལེགས་བྱས་ཡོད། ཚོགས་ཆེན་ཐུགས་གྲ་ལེགས་འགྲིག་བྱུང་བ་ལས་རྒྱལ་ཡོངས་མི་རིགས་ཁག་གི་མི་དམངས་ཀྱིས་མུ་མཐུད་འབད་འཐབ་དང་དཔའ་ངར་ཆེན་པོས་མདུན་སྐྱོད་བྱས་ཏེ། 2025ལོའི་ལས་དོན་ཁག་ཏན་ཏིག་ངང་ལེགས་པར་བསྒྲུབས་ནས་རྒྱང་ལམ་གསར་པའི་ཐོག་འགན་འཁྲི་གསར་པ་འཁུར་རྒྱུ་དང་བྱས་རྗེས་གསར་པ་འཇོག་རྒྱུར་སྐུལ་མ་ཆེན་པོ་ཐེབས་ཡོད།

མིག་སྔར་རང་རྒྱལ་འཕེལ་རྒྱས་གཏོང་བར་ཕྱི་ཕྱོགས་ཁོར་ཡུག་གི་ངེས་གཏན་མེད་པའི་འགྲན་སློང་འཕྲད་ཡོད་ལ། སྒུལ་ཤུགས་གསར་རྙིང་བརྗེ་སྤོར་གྱི་གནོན་ཤུགས་ཀྱང་འཕྲད་ཡོད། “ལོ་ལྔ་ཚན་བཅུ་བཞི་པའི”འཆར་འགོད་དམིགས་ཚད་དང་ལས་འགན་སྤུས་ཚད་མཐོ་པོས་ལེགས་པར་བསྒྲུབས་ཏེ“ལོ་ལྔ་ཚན་བཅོ་ལྔ་པའི”འགོ་ཡག་པོ་འཛུགས་རྒྱུར་རྨང་གཞི་བརྟན་པོ་འདིང་བའི་ལས་འགན་དཀའ་ཚེགས་ཧ་ཅང་ཆེན་པོ་ཡོད་ལ་འགན་འཁྲི་ཡང་ཧ་ཅང་ལྕི་པོ་ཡོད། དུས་བབ་ཇི་ཙམ་རྙོག་འཛིང་ཆེ་བ་དང་ཛ་དྲག་ཆེ་ན། བསམ་བློ་དང་བྱ་སྤྱོད་དེ་ཙམ་གྱིས་ཏང་ཀྲུང་དབྱང་གི་ཐབས་ཇུས་བཀོད་སྒྲིག་ཐོག་གཅིག་གྱུར་བྱས་ཏེ། དམིགས་ཚད་ལ་དམ་པོར་དམིགས་པ་ལས་ལྷོད་གཡེང་སྤུ་ཙམ་མི་གཏོང་བའི་ཁར། གདོང་མཆོང་བྱེད་ཕོད་པ་དང་ལས་དོན་སྒྲུབ་ཕོད་ཁར་དངོས་སྒྲུབ་བྱས་ནས། ཚོགས་འདུའི་དགོངས་དོན་སྒྱུར་བཅོས་ཀྱི་ཕན་འབྲས་དང་འཕེལ་རྒྱས་ཀྱི་གྲུབ་འབྲས་དངོས་ལ་སྒྱུར་དགོས།

ཆར་རླུང་ཁྲོད་དུ་འཚར་ལོངས་དང་ཚོད་བགམ་ཐེགས་ནས་སྟོབས་ཆེར་ཕྱིན་ལ། རྒྱལ་ཁ་ཐོབ་ངེས་ཡིན་པའི་ང་ཚོའི་ཡིད་ཆེས་ཀྱང་སྔར་བས་བརྟན་དུ་ཕྱིན་ཡོད། འདས་ཟིན་པའི་ལོ་གཅིག་ནང་དཀའ་ངལ་དང་འགྲན་སློང་མང་པོའི་མདུན་དུ་རང་རྒྱལ་གྱི་དཔལ་འབྱོར་སྤྱི་འབོར་སྒོར་དུང་ཕྱུར་ཁྲི་130ལས་ཐོག་མར་བརྒལ་བ་དང་འཕར་ཚད་འཛམ་གླིང་གི་དཔལ་འབྱོར་དངོས་ཚན་གཙོ་བོའི་མདུན་གྲལ་དུ་སླེབས་ཡོད། དེ་ཐོག་ནས་རང་རྒྱལ་འཕེལ་རྒྱས་ཀྱི་གཞི་ཁྱོན་གྱི་ལེགས་ཆ་དང་། ཁྲོམ་རའི་ལེགས་ཆ། ཤེས་ལྡན་པའི་ལེགས་ཆ། གསར་གཏོད་ཀྱི་ལེགས་ཆ་བཅས་གང་ལེགས་མཚོན་པ་མ་ཟད། ཏང་ཀྲུང་དབྱང་གིས་གཅིག་སྡུད་གཅིག་གྱུར་གྱི་འགོ་ཁྲིད་གནང་བའི་ཆབ་སྲིད་ཀྱི་ལེགས་ཆ་དང་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ལམ་ལུགས་ཀྱི་ལེགས་ཆ་ཡང་དེ་བས་མངོན་གསལ་དོད་པོས་མངོན་ཡོད། འབྱུང་འགྱུར་ལ་ཕྱོགས་ཚེ། དུས་ཚོད་དང་། དུས་བབ། དོན་སྙིང་བཅས་ཚང་མ་ང་ཚོའི་ཕྱོགས་སུ་ཡོད། དད་སེམས་དང་ཡིད་ཆེས་བརྟན་པོ་དང་འཐབ་ཇུས་ཀྱི་ངེས་ཤུགས་རྒྱུན་འཁྱོངས་བྱས་ནས་སེམས་ནུས་གཅིག་སྡུད་ཀྱིས་རང་ཉིད་ཀྱི་ལས་དོན་ལེགས་པར་བསྒྲུབས་ཚེ། དཀའ་ངལ་མཐའ་དག་ལས་རྣམ་པར་རྒྱལ་ཐུབ་ངེས་རེད། མི་དམངས་འཐུས་མི་ཚོགས་ཆེན་ལམ་ལུགས་ཀྱིས་རྒྱལ་ཁབ་འཕེལ་རྒྱས་དང་། མི་དམངས་བདེ་སྐྱིད། མི་རིགས་བསྐྱར་དར་བཅས་ལ་སྐུལ་འདེད་གཏོང་བའི་བརྒྱུད་རིམ་ནང་ཆབ་སྲིད་ཀྱི་ལེགས་ཆ་དང་རྩ་འཛུགས་ཀྱི་ནུས་པ་ཧ་ཅང་ཆེན་པོ་མངོན་པར་བྱས་ཡོད། ལམ་ལུགས་ཀྱི་གདེང་ཚོད་སྔར་བས་བརྟན་དུ་བཏང་ནས་མི་དམངས་འཐུས་མི་ཚོགས་ཆེན་གྱི་ལམ་ལུགས་རྒྱུན་འཁྱོངས་དང་། འཐུས་ཚང་། འཁོར་རྒྱུག་བཅས་ཡག་པོ་བྱས་ཚེ། དུས་རབས་གསར་པ་དང་རྒྱང་ལམ་གསར་པར་ཏང་དང་མི་དམངས་ཀྱི་འབད་འཐབ་དམིགས་ཚད་མངོན་འགྱུར་བྱེད་པར་ལམ་ལུགས་ཀྱི་འགན་སྲུང་བརྟན་པོ་བྱེད་ཐུབ།

རྡོག་རྩ་གཅིག་ཏུ་བསྒྲིལ་ནས་འཕེལ་རྒྱས་དོན་གཉེར་བྱེད། ངར་ཤུགས་ཆེ་རུ་བཏང་ནས་འབྱུང་འགྱུར་ཕྱོགས་སུ་སྐྱོད། མཇུག་བསྡུའི་ལོར་སྔོན་དཔག་དམིགས་ཚད་མངོན་འགྱུར་བྱེད་པའི་དུས་ཚོད་ཐུང་བ་དང་། ལས་འགན་ལྕི་བ། བླང་བྱ་མཐོ་བས་ངེས་པར་དུ་དུས་ཚོད་ཀྱིས་མི་མི་སྒུག་པའི་སྙིང་སྟོབས་དང་དུས་ཚོད་སྐར་ཆ་ཙམ་ཡང་བརྩོན་ལེན་བྱེད་པའི་བྱ་སྤྱོད་ཐོག་ནས་དོན་འཁྱོལ་ལ་དམ་འཛིན་ནན་པོ་བྱེད་དགོས། དུས་ཚོད་ཀྱིས་མི་སྒུག་མི་སྲིད་ལ་ལོ་རྒྱུས་ཀྱིས་མི་དེ་བས་སྒུག་མི་སྲིད། ང་ཚོས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་མཐུན་སྒྲིལ་དེ་བས་དམ་ཟབ་བྱས་ཏེ། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པ་ཕྱོགས་ཡོངས་ནས་ལག་བསྟར་བྱེད་པ་དང་། “གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་གཏིང་ཟབ་ལེན་པ། “འདུ་ཤེས་བཞི”ཟབ་ཏུ་གཏོང་བ། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བཅས་བྱས་ཏེ། མཐུན་སྒྲིལ་འབད་འཐབ་དང་བློ་རྩ་བརྟན་པོས་ཡར་རྒྱས་བརྩོན་ལེན་གྱིས་གོམ་པ་རེ་ལ་རྐང་རྗེས་རེའི་དཔེ་ལྟར་ཀྲུང་གོའི་ལུགས་ཀྱི་དེང་རབས་ཅན་གྱི་བརྗིད་ཆེའི་འཆར་གཞི་མཛེས་སྡུག་ལྡན་པའི་དོན་དངོས་སུ་སྒྱུར་དགོས།

(ཤིན་ཧྭ་གསར་འགྱུར་ཁང་པེ་ཅིང་ནས་ཟླ་3ཚེས་11ཉིན་འབྱོར་བའི་གློག་འཕྲིན)