འདི་ནི་རང་ལྗོངས་ཀྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མིས་བོད་ཀྱི་འཐུས་མི་ཚོགས་པའི་ཚོགས་འདུར་གཏམ་བཤད་གནང་བཞིན་པ།

འདི་ནི་རང་ལྗོངས་ཀྱི་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་སྐལ་བཟང་སྒྲོལ་མས(གཡོན)ལྗོངས་ཕྱིའི་སྨྱན་སྦྱོར་གྱི་གསར་འགོད་པའི་བཅར་འདྲི་དང་ལེན་གནང་བཞིན་པ།

“ཙུང་ལི་ལི་ཆང་གིས་གནང་བའི་སྲིད་གཞུང་གི་ལས་དོན་སྙན་སྒྲོན་ནང‘སྤྱི་པའི་རིག་གནས་ཞབས་ཞུའི་མ་ལག་འཐུས་སྒོ་ཚང་དུ་བཏང་ནས་སྤུས་ལེགས་ཀྱི་རིག་གནས་ཐོན་ཁུངས་ཐད་ཀར་གཞི་རིམ་དུ་ཁྱབ་པར་སྐུལ་འདེད་གཏོང་དགོས། རིག་གནས་ཐོན་ལས་མ་ལག་དང་ཁྲོམ་རའི་མ་ལག་འཐུས་སྒོ་ཚང་དུ་བཏང་ནས་རིག་གནས་ཀྱི་ལས་རྣམ་གསར་པ་འཕེལ་རྒྱས་མགྱོགས་སུ་གཏོང་དགོས། རིག་གནས་ཤུལ་བཞག་ལ་མ་ལག་རང་བཞིན་གྱིས་སྲུང་སྐྱོང་བྱེད་པར་སྐུལ་འདེད་བཏང་ནས་རིག་དངོས་དང་མངོན་མིན་རིག་གནས་ཤུལ་བཞག་སྲུང་སྐྱོང་བེད་སྤྱོད་དང་གནའ་རྫས་རྟོག་ཞིབ་ཞིབ་འཇུག་གི་ཆུ་ཚད་མཐོ་རུ་གཏོང་དགོས’ཞེས་བཏོན་གནང་ཡོད། དེས་ང་ཚོས་སྤྱི་པའི་རིག་གནས་ཞབས་ཞུའི་སྤུས་ཚད་མཐོ་རུ་གཏོང་བ་དང་ཕུལ་བྱུང་རིག་གནས་རྒྱུན་འཛིན་དང་འཕེལ་རྒྱས་སོགས་ཀྱི་ལས་དོན་ཡག་པོ་བསྒྲུབ་པར་འབད་འཐབ་ཀྱི་ཁ་ཕྱོགས་གཏན་འཁེལ་བྱས་པ་དང་སྒུལ་ཤུགས་ཆེན་པོ་བསྣན་སོང”ཞེས་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་མངའ་རིས་ས་ཨུད་ཀྱི་ཧྲུའུ་ཅི་བསོད་ནམས་བསྟན་འཛིན་གྱིས་གསར་འགོད་པར་གསུངས་བྱུང་།

བསོད་ནམས་བསྟན་འཛིན་གྱིས་ངོ་སྤྲོད་གནང་དོན། མིག་སྔར་མངའ་རིས་ས་ཁུལ་ལ་མངོན་མིན་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་རྣམ་གྲངས་137དང་མངོན་མིན་རིག་གནས་ཤུལ་བཞག་གི་རྒྱུན་འཛིན་པ་80ཡོད་པ་དང་། མངའ་རིས་ས་ཁུལ་གྱི་ལོ་རྒྱུས་རིག་གནས་མཚོན་པའི་རྩོམ་རིག་དང་། ཟློས་གར། ཞབས་བྲོ་སོགས་ཀྱི་བརྩམས་ཆོས་ཕུལ་བྱུང་213གསར་གཏོད་དང་ལེགས་སྒྲིག་བྱས་པ། ཆེད་ལས་སྒྱུ་རྩལ་ཚོགས་པ་དང་རིག་རྩལ་འཁྲབ་སྟོན་རུ་ཁག་155འཕེལ་རྒྱས་གསོ་སྐྱོང་བྱས་པ། ཆེད་ལས་དང་ལས་ཞོར་རིག་རྩལ་འཁྲབ་སྟོན་རུ་ཁག་1500ལྷག་ཙམ་ཡོད་པ་རེད།

བོད་ཀྱི་མཚན་ཉིད་རིག་པ་དང་སྤྱི་ཚོགས་ཚན་རིག་ཞིབ་འཇུག་ཁྱབ་ཁོངས་ཀྱི་མཁས་དབང་དང་རྒྱལ་ཡོངས་སྲིད་གྲོས་ཀྱི་ཨུ་ཡོན་དང་རང་སྐྱོང་ལྗོངས་སྤྱི་ཚོགས་ཚན་རིག་ཁང་གི་ཡོན་ཀྲང་གཞོན་པ་སྤེན་པ་ལྷ་མོས་གཞུང་འཁྱོངས་གསར་འབྱེད་ཁྲོད་བོད་ཀྱི་སྲོལ་རྒྱུན་རིག་གནས་རྒྱུན་འཛིན་དང་འཕེལ་རྒྱས་གཏོང་བའི་ཐད་དོ་ཁུར་ཆེན་པོ་གནང་གི་ཡོད།

སྤེན་པ་ལྷ་མོས་གསར་འགོད་པར། ད་ལོ་ནི་ཀྲུང་ཧྭ་མི་རིགས་ཀྱི་སྲོལ་རྒྱུན་དུས་ཆེན་ཏེ། “དཔྱིད་གསར་དུས་ཆེན”འཛམ་གླིང་ཤུལ་བཞག་ལ་རེ་ཞུ་ལེགས་གྲུབ་བྱུང་བའི་ལོ་དང་པོ་རེད། དཔྱིད་གསར་མཚན་ཚོགས་ཀྱི་ལྷ་སའི་ཡན་ལག་ཚོགས་ར་ངོ་མཚར་ཆེན་པོས་ལྟད་མོ་བའི་མིག་ལམ་དུ་བཤམས་པ་དེར་དོན་སྙིང་གལ་ཆེན་ལྡན་ཡོད་ཅེས་གསུངས་ཤིང་། ཁོང་གིས“གྲོང་ཁྱེར་དང་ས་ཁུལ་བདུན་གྱི་འཁྲབ་སྟོན་པ་3000གིས་སྐར་མ་བརྒྱད་ཀྱི་ལེགས་སྐྱེས་འབུལ་བའི་ལེ་ཚན་ནང་བོད་ཀྱི་སྲོལ་རྒྱུན་རིག་གནས་ལ་ཚད་བརྒལ་སྔར་ལས་ལྷག་པ་བྱུང་ཞིང་། དེང་རབས་དང་དར་སྲོལ་མཉམ་འདྲེས་ཀྱི་སྒྱུ་རྩལ་མཚོན་ཐབས་སྤྱད་དེ་བོད་ཀྱི་མངོན་མིན་རིག་གནས་ཤུལ་བཞག་དང་ཀྲུང་ཧྭའི་སྲོལ་རྒྱུན་རིག་གནས་གཞན་དག་དབར་ཕན་ཚུན་གཅིག་རམ་གཅིག་འདེགས་བྱས་ནས་རྒྱལ་ཁབ་ཕྱི་ནང་གི་ཀྲུང་ཧྭའི་བུ་ཕྲུག་ལ་ཀྲུང་ཧྭའི་རིག་གནས་ཀྱི་སྟོན་མོ་གཟབ་རྒྱས་ཤིག་བཤམས་པས། ལྟད་མོ་བ་ཚང་མར་ཀྲུང་ཧྭའི་རིག་གནས་ནི་རྒྱ་ཆེ་ལ་གཏིང་ཟབ་པ་དང་ལོ་རྒྱུས་ཡུན་རིང་ལྡན་པ་ཞིག་ཡིན་པའི་མྱོང་ཚོར་ཐུབ་ཡོད”ཅེས་གསུངས་བྱུང་།

ཉེ་བའི་ལོ་ཤས་རིང་། ཀྲུང་ཧྭ་མི་རིགས་ཀྱི་སྲོལ་རྒྱུན་གསོ་རིག་གི་གྲུབ་ཆ་གལ་ཆེན་ཞིག་ཡིན་པའི་བོད་ལུགས་གསོ་རིག་རྒྱུན་འཛིན་དང་འཕེལ་རྒྱས་དབྱར་མཚོ་རྒྱས་པ་ལྟར་བྱུང་ཡོད།

“བདུད་རྩི་རྟགས་ཅན་གྱི་བོད་སྨན་ལྟ་བུར་མཚོན་ན། ང་ཚོས་ལག་རྩལ་སྒྱུར་བཀོད་བྱས་པ་བརྒྱུད་སྲོལ་རྒྱུན་སྨན་ཐོའི་དེང་རབས་ཅན་གྱི་ཐོན་སྐྱེད་མངོན་འགྱུར་བྱུང་སྟེ། 2024ལོར་རྒྱལ་ཡོངས་ཀྱི་བོད་སྨན་གྱི་ཆེད་སྤྱོད་སྨན་བཅོས་ཡོ་བྱད་ཐོག་མ་གསར་སྤེལ་བྱུང་བ་མ་ཟད། རང་སྐྱོང་ལྗོངས་སྨན་རྫས་ལྟ་སྐུལ་ཅུས་ཀྱི་ཞིབ་མཆན་ཡང་ཐོབ་ནས་ཁྲོམ་རར་བཏོན་ཡོད”ཅེས་རྒྱལ་ཡོངས་མི་དམངས་འཐུས་ཚོགས་ཀྱི་འཐུས་མི་དང་བོད་ལྗོངས་བདུད་རྩི་རྟགས་ཅན་བོད་སྨན་མ་རྐང་ཚད་ཡོད་ཀུང་སིའི་ཐོན་སྐྱེད་འཁོར་ཁང་གི་ཀྲུའུ་རེན་ཚེ་རིང་མཚོ་མོས་གསར་འགོད་པར་གསུངས་བྱུང་།

ཚེ་རིང་མཚོ་མོས་ཚན་རྩལ་གྱིས་ནུས་པ་སྦྱིན་ཤུགས་ཆེ་རུ་བཏང་སྟེ། བོད་སྨན་ཚན་རྩལ་གསར་གཏོད་ཀྱི་ཆེད་དོན་ཐེབས་རྩ་འཛུགས་པ་དང་རྒྱལ་ཁབ་རིམ་པའི་བོད་སྨན་གཙོ་གནད་ཚོད་ལྟ་ཁང་སྐྲུན་པ་སོགས་ཀྱི་བྱེད་ཐབས་སྤྱད་དེ་ཐོན་ལས་ཀྱི་ལྟེ་བའི་འགྲན་རྩོད་ནུས་པ་ཆེ་རུ་གཏོང་བ་དང་། ཐོན་ལས་དང་ཤེས་ལྡན་པ་མཉམ་འདྲེས་གཏིང་ཟབ་བྱས་ཏེ“བོད་ལུགས་གསོ་རིག་རྒྱལ་སྤྱི་ཅན་གྱི་ཤེས་ལྡན་པའི་འཆར་གཞི”ལག་བསྟར་བྱས་ནས་སྤུས་ཚད་མཐོ་བའི་འཕེལ་རྒྱས་ཀྱི་རྨང་གཞི་བརྟན་དུ་གཏོང་བ། འཛམ་གླིང་གི་སྤུས་རྟགས་བཏོད་དེ་བོད་ལུགས་གསོ་རིག་རིག་གནས་རྒྱལ་སྤྱིའི་ཐོག་ཁྱབ་སྤེལ་གཏོང་རྒྱུར་སྐུལ་འདེད་ཤུགས་ཆེན་བཏང་ནས་བོད་ལུགས་གསོ་རིག་རིག་གནས་ཀྱི་ཤུགས་རྐྱེན་ཆེ་རུ་གཏོང་བ་བཅས་ཀྱི་གྲོས་འགོ་བཏོན་གནང་བ་རེད།