གཅིག་ནི་སྣེ་ཁྲིད་དེ་དྲིལ་བསྒྲགས་སློབ་གསོའི་ནང་ཞུགས་པ། ནང་བསྟན་སློབ་གླིང་ཡན་ལག་སློབ་གླིང་གི་འགན་འཁུར་བ་དང་རང་སྐྱོང་ལྗོངས་རིམ་པ་དང་གྲོང་ཁྱེར་རིམ་པའི་སྒྲོག་འགྲེལ་པ་ཞིག་ཡིན་པའི་ངོས་ནས་ངས《ས་སྐྱ་དགོན་པའི་དགེ་འདུན་པ་ཚོའི་རིགས་པའི་གཞུང་ལུགས་དང་སྲིད་ཇུས་ཁྲིམས་སྲོལ་བཅས་ལ་སློབ་སྦྱོང་བྱེད་པའི་ལམ་ལུགས》ལག་ལེན་བསྟར་ནས་ས་སྐྱ་དགོན་དོ་དམ་ཨུ་ལྷན་གྱིས་ཟླ་རེར་གཏན་འཁེལ་བྱས་པའི་གཅིག་སྡུད་སྒྲོག་འགྲེལ་བྱེད་སྒོ་དང་དེ་བཞིན་རྒྱུན་རྣམ་ཅན་གྱི་བོད་གསར་རྙིང་བསྡུར་བའི་སློབ་གསོ་དང་མི་རིགས་མཐུན་སྒྲིལ་ཡར་ཐོན་སློབ་གསོ་སོགས་བྱེད་སྒོ་རབ་དང་རིམ་པར་རང་འགུལ་ངང་གཞོགས་འདེགས་དང་རྒྱབ་སྐྱོར་བྱས་ཏེ། “འདུ་ཤེས་གསུམ”དཔེ་སྟོན་སྣེ་ཁྲིད་ཀྱིས་སྒྲོག་འགྲེལ་བྱེད་པ་དང་། སྣེ་ཁྲིད་དེ་ཏཱ་ལ་སྐྱེ་ཕྲེང་བཅུ་བཞི་པར་ཐེར་འདོན་དགག་རྒྱག་བྱེད་པ་དང་འབྲེལ་དེ་དང་དབྱེ་མཚམས་གསལ་པོ་འབྱེད་པ། ས་སྐྱ་དགོན་གྱི་རྒྱ་ཆེའི་དགེ་འདུན་པ་ཚོས་རང་རྟོགས་ངང་ཏང་དང་རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ། དེ་བཞིན་ཏང་གི་མི་རིགས་ཆོས་ལུགས་སྲིད་ཇུས་བཅས་སློབ་སྦྱོང་དང་ཁོང་དུ་ཆུད་རྒྱུར་ཤུགས་རྐྱེན་དང་སྐུལ་ཁྲིད་བྱས་པ་དང་། སྤྱི་ཁྱབ་ཧྲུའུ་ཅིའི་བྱམས་བརྩེའི་ཐུགས་ཁུར་དང་། ཏང་དང་རྒྱལ་ཁབ་ཀྱིས་བོད་ཀྱི་དགེ་འདུན་པ་དང་མང་ཚོགས་ལ་ཕན་པའི་དམིགས་བསལ་གཟིགས་སྐྱོང་སྲིད་ཇུས་ལག་བསྟར་གནང་བའི་བཀའ་དྲིན་དྲན་པ་བཅས་བྱས་པས། “མོས་སེམས་ལྔ”སྔར་བས་ཟབ་ཏུ་ཕྱིན་པ་དང་། “ཆོས་ལུགས་ལས་རྒྱལ་ཁབ་གཙོ་དང་། འདུལ་ཁྲིམས་ལས་རྒྱལ་ཁྲིམས་གཙོ། ཆོས་པ་ལས་སྤྱི་དམངས་གཙོ”བཅས་ཀྱི་ཡོངས་ཁྱབ་ཀྱི་ངོས་འཛིན་བློ་ལ་བརྟན་པོར་ངེས་པ། ཁ་ཕྲལ་ལ་ངོ་རྒོལ་དང་། མེས་རྒྱལ་གཅིག་གྱུར་དང་མི་རིགས་མཐུན་སྒྲིལ་ལ་སྲུང་སྐྱོང་བྱེད་པ་སོགས་ཡིན་མིན་ཆེན་པོའི་ཐད་སྐད་ཆ་ཤོད་ཕོད་པ་དང་འཐབ་རྩོད་བྱེད་ཕོད་པའི་རང་རྟོགས་བྱ་སྤྱོད་མངོན་གསལ་དོད་དུ་སོང་ཡོད།

གཉིས་ནི་རང་གིས་རང་ལ་སློབ་གསོ་གཏོང་རྒྱུར་དོ་སྣང་བྱས་པ། རིམ་ཁག་ཏང་ཨུད་དང་སྲིད་གཞུང་གི་ཡིད་ཆེས་ལ་གཅེས་སྤྲས་ལྡབ་འགྱུར་གྱིས་ནང་པའི་ཆོས་གཞུང་ལ་སློབ་གཉེར་བྱེད་པ་དང་དུས་མཚུངས་སུ། ཆབ་སྲིད་དང་། ཁྲིམས་ལུགས། དེ་བཞིན་དེང་རབས་ཀྱི་ཚན་རིག་རིག་གནས་ཤེས་བྱ་བཅས་རྒྱ་ཁྱབ་ངང་སློབ་སྦྱོང་བྱས་ཏེ། རྒྱལ་ཁབ་ཀྱི་འདུ་ཤེས་དང་། ཁྲིམས་སྐྱོང་གི་འདུ་ཤེས། སྤྱི་དམངས་ཀྱི་འདུ་ཤེས་བཅས་དང་ལྟ་བསྡུར་བྱས་ནས་སྣེ་ཁྲིད་དེ་བསམ་བློའི་མྱོང་ཚོར་འབྲི་བ་དང་། ས་སྐྱ་དགོན་དོ་དམ་ཨུ་ལྷན་གྱིས་སྒྲིག་འཛུགས་བྱས་པའི“འདུ་ཤེས་གསུམ”གྱི་ཆེད་དོན་བགྲོ་གླེང་ཚོགས་འདུའི་ཐོག་མྱོང་ཚོར་ཧུར་གླེང་དང་། རྣམ་འགྱུར་གསལ་སྟོན། ལངས་ཕྱོགས་གསལ་སྟོན་བཅས་བྱེད་པ་དང་། དུས་རྒྱུན་དཔེ་ཁྲིད་བྱེད་པའི་བརྒྱུད་རིམ་ཁྲོད་དགེ་ཕྲུག་ཚོ་དང་མྱོང་ཚོར་སྤེལ་རེས་བྱས་པས། བགྲོ་གླེང་ཁྲོད་ཕན་ཚུན་དབར་གྱི་བློ་སྒོ་འབྱེད་རེས་དང་། རྒྱ་ཆེའི་དགེ་འདུན་པ་ཚོ་དང་མཉམ་དུ་ཐོས་བསམ་སློབ་གཉེར་དང་སྒོམ་སྒྲུབ་ཉམས་ལེན་བྱེད་ཀྱི་ཡོད། དེ་དང་ཆབས་ཅིག་དགོན་སྡེའི་དོ་དམ་ལས་བྱེད་པའི་མཛུབ་ཁྲིད་དང་རོགས་རམ་འོག“འདུ་ཤེས་གསུམ” ལ་རང་འགུལ་ངང་ལྟ་བསྡུར་དང་དམིགས་ཚད་ཀྱི་བླང་བྱར་དམིགས་ཏེ། དམིགས་སའི་རང་བཞིན་ལྡན་པའི་སྒོ་ནས“སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་རྒྱུན་གཏན་གྱི་དཔེ་ཁྲིད་ཁྲོད་མཉམ་འདྲེས་ལ་དོ་སྣང་བྱེད་པའི་ཐད་མི་འདང་བ”སོགས་གནད་དོན་ཁག་3ཤེས་རྟོགས་བྱུང་བར་བཅོས་སྒྲིག་བྱེད་ཐབས་ཁག་5བཟོས་པ་དང་དག་ཐེར་ཡོ་བསྲང་ཏན་ཏིག་བྱས་པ། སློབ་སྦྱོང་དང་། བསམ་གཞིགས། ཉམས་ལེན་བཅས་བྱས་ཏེ“འདུ་ཤེས་གསུམ”གྱི་སློབ་གསོའི་ནང་དོན་ཤེས་རྟོགས་བྱེད་པའི་ཐད་འཕེལ་རྒྱས་གསར་པ་ཡོང་བར་འབད་བརྩོན་བྱས་ཡོད།

གསུམ་ནི་རང་གིས་རང་ལ་གཅུན་སྡོམ་ནན་པོ་བྱས་པ། པཎ་ཆེན་སྐུ་ཕྲེང་བཅུ་པ་ཆེན་པོས“དགོན་པ་དགོན་པ་འདྲ་བ་དང་། གྲྭ་པ་གྲྭ་པ་འདྲ་བ་བྱེད་དགོས”ཞེས་པའི་བཀའ་སློབ་ཟབ་མོ་བློ་ལ་བརྟན་པོར་ངེས་ནས་ས་སྐྱ་པཎྜི་ཏ་དང་འགྲོ་མགོན་ཆོས་རྒྱལ་འཕགས་པ་སོགས་ཀྱི་རྒྱལ་གཅེས་ཆོས་གཅེས་ཀྱི་སྲོལ་རྒྱུན་བཟང་པོ་རྒྱུན་འཛིན་དང་དར་སྤེལ་བཏང་སྟེ“ཁ་སྣོན་མི་བྱེད་པ་གསུམ”གྱི་སྲིད་ཇུས་ཀྱི་མཐའ་ཚད་དང་ཆོས་ལུགས་བྱེད་སྒོའི“བླང་བྱ་ཁག་གསུམ”ལ་བརྩི་སྲུང་ནན་པོ་ཞུས་ནས། སྡོམ་ཁྲིམས་ཀྱིས་དགེ་འདུན་པ་གཅུན་པ་དང་། ཀུན་སྤྱོད་ཚད་ལྡན་དུ་གཏོང་བ། སྡོམ་ཁྲིམས་ཀྱིས་གྲྭ་བཙུན་གྱི་འཆམ་མཐུན་སྲུང་བ། དགོན་སྡེའི་སྒྲིག་ལམ་སྲུང་སྐྱོང་བཅས་བྱས་ཐོག ས་སྐྱ་དགོན་གྱི་ནང་བསྟན་ཡན་ལག་སློབ་གླིང་གི་འགན་འཁུར་བ་དང་པོའི་འགན་འཁྲི་ནན་ཏན་ངང་བསྒྲུབས་ནས“གཅིག་གྱུར་དྲུག”གི་བླང་བྱ་ཕྱོགས་ཡོངས་ནས་དོན་འཁྱོལ་བྱས་ཏེ། སློབ་ཁྲིད་དོ་དམ་ལ་ཤུགས་སྣོན་རྒྱག་པ་དང་། སྒྲིག་བཀོད་སྒྲིག་ཆས་འཐུས་སྒོ་ཚང་དུ་གཏོང་བ། སློབ་ཁྲིད་སྤུས་ཚད་དང་སློབ་གཉེར་ཆུ་ཚད་ཕྱོགས་ཡོངས་ནས་མཐོ་རུ་གཏོང་བ་བཅས་བྱས་པས། 2020ལོ་དང་། 2021ལོ། 2022ལོ་བཅས་ལོ་གསུམ་བསྟུད་མར་བོད་ལྗོངས་ནང་བསྟན་སློབ་གླིང་ཡན་ལག་ཁང་གི་ལས་རྗེས་དཔྱད་ཞིབ་ཁྲོད“ཕུལ་བྱུང་རིམ་པར”བདམས་ཡོད། རང་རྟོགས་ངང་སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ལག་ལེན་བསྟར་ནས་ཆོས་ལུགས་ལས་རིགས་ཀྱི་འཐུས་མིའི་དགེ་མཚན་ལྡན་པའི་ནུས་པ་རང་འགུལ་ངང་འདོན་སྤེལ་གང་ལེགས་བྱེད་པ་དང་། བྱམས་སྙིང་རྗེ་དང་། འགྲོ་བར་ཕན་པ། སྡིག་སྤོང་དགེ་སྒྲུབ་བཅས་ཀྱི་ནང་པའི་གཞི་རྩའི་དགོངས་དོན་དར་སྤེལ་ཧུར་ཐག་བཏང་ནས་ལུས་སེམས་ཞི་བདེ་དང་། མི་ཚང་མ་འཆམ་མཐུན། མི་དང་སྤྱི་ཚོགས་ཞི་མཐུན་བཅས་ཀྱི་གཞི་རྩའི་དགོངས་དོན་རྒྱུན་འཛིན་བྱས་ཏེ། རང་ཉིད་ཚུལ་ལྡན་དང་། མི་སེམས་བཟང་འགྱུར། གཞན་ཕན་ལས་སྒྲུབ། མི་སེམས་ཡར་སྐུལ་བྱེད་པ་དང་། བསྟན་དོན་ཁྲོད་སྤྱི་ཚོགས་ཞི་མཐུན་དང་སྐྱོན་བྲལ་ཤེས་དཔལ་ལ་ཕན་པའི་ནང་དོན་སྔོག་འདོན་གང་ལེགས་བྱེད་པ། དད་ལྡན་མང་ཚོགས་ཚོས་དགེ་སྒྲུབ་སྡིག་སྤོང་དང་། འདྲ་མཉམ་ཁོང་ཡངས། དབུལ་སྐྱོར་དཀའ་སེལ་བཅས་ཀྱི་དགེ་མཚན་ལྡན་པའི་བསམ་བློ་ལག་ལེན་བསྟར་རྒྱུར་ཁྲིད་སྟོན་བྱེད་པ། དད་ལྡན་མང་ཚོགས་ཚོས་རང་ནུས་གང་ཡོད་ཀྱིས་འབད་བརྩོན་དང་། ཚན་རིག་དང་ཤེས་དཔལ་ལ་གོང་བཀུར། ལུགས་རྙིང་སྲོལ་ངན་དོར་བ་བཅས་བྱས་ཏེ་དུས་ཚོད་དང་། ནུས་ཤུགས། རྒྱུ་ནོར་བཅས་དེ་བས་མང་བ་ཐོན་སྐྱེད་འཕེལ་རྒྱས་དང་། ཕྱུག་འགྱུར་ལས་བརྩོན། འཚོ་བ་ལེགས་གཏོང་བཅས་ཀྱི་ཐད་སྤྱད་ནས་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་འཛུགས་སྐྲུན་ལ་སྐུལ་འདེད་གཏོང་རྒྱུའི་ཐད་སློབ་གསོ་ཁྲིད་སྟོན་བྱས་ཡོད།

“འདུ་ཤེས་གསུམ”གྱི་སློབ་གསོ་གཏོང་བའི་ཁྲོད་དུ་ངས“ཏང་ཡོད་ན་ད་གཟོད་རྒྱལ་ཁབ་ཡོད་པ་དང་། རྒྱལ་ཁབ་ཡོད་ན་ད་གཟོད་ཁྱིམ་ཚང་ཡོད་པའི”གནས་ལུགས་ལ་ངོས་འཛིན་དེ་བས་ཟབ་མོ་བྱུང་། ཆོས་ལུགས་ལས་རིགས་ཀྱི་འཐུས་མི་ཞིག་ཡིན་པའི་ངོས་ནས་རང་ཉིད་ཀྱི་འགན་འཁྲི་ཤིན་ཏུ་ཆེན་པོ་ཡིན་པ་ཤེས་ཚོར་ཟབ་མོ་བྱུང་། ངས་ཏང་དང་རྒྱལ་ཁབ་ཀྱི་བཀའ་དྲིན་བློ་ལ་བརྟན་པོར་བཅངས་ནས་རྒྱལ་གཅེས་ཆོས་གཅེས་ཀྱི་འགན་འཁྲི་རང་རྟོགས་ངང་འཁུར་གྱི་ཡིན། དེ་རིང་ཧྲུའུ་ཅི་ཝང་ཅུན་ཀྲེང་མཆོག་གིས་གནང་བའི་གསུང་བཤད་ཀྱི་དགོངས་དོན་བློ་ལ་ངེས་ནས་དུས་རྒྱུན་ནང་ཆོས་ལ་སློབ་གཉེར་དང་སྒོམ་སྒྲུབ་ཉམས་ལེན། ལས་ཀ་དང་འཚོ་བའི་ཁྲོད་རང་ཉིད་ཀྱི་འཐུས་ཚབ་རང་བཞིན་མངོན་པ་བྱ་རྒྱུ་དང་། རང་ཉིད་ཀྱི་ཤུགས་རྐྱེན་ཐེབས་ཤུགས་འདོན་སྤེལ་གང་ལེགས་ཀྱིས་སྣེ་ཁྲིད་དཔེ་སྟོན་དང་རང་གཅུན་བློ་སྦྱོང་བྱས་ཏེ་ཆོས་ལུགས་ཞི་མཐུན་དང་། སྤྱི་ཚོགས་འཆམ་མཐུན། མི་རིགས་འཆམ་མཐུན་བཅས་ལ་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་འབུལ་གྱི་ཡིན།