“གྲུབ་འབྲས་བཟང་པོ་ཐོབ་པའི་གཏམ་བཟང་ཡང་ཡང་ཁྱབ་ཅིང་། ནག་ཆུ་གྲོང་ཁྱེར་གྱི་སྐབས་གསུམ་པའི‘གྲོང་གསེབ་དར་རྒྱས། ནག་ཆུ་མདུན་སྐྱོད’ཅེས་པའི་བྱེད་སྒོའི་རྐོ་འདྲུའི་འཕྲུལ་འཁོར་བཀོལ་སྤྱོད་རྩལ་ནུས་ཀྱི་མཐའ་བསྡུར་ནང་ཤན་རྩ་རྫོང་གཞུང་སྨད་གྲོང་རྡལ་གྲོང་ཚོ་ལྔ་པའི་བདམས་ཐོན་པ་ཚེ་རིང་རྒྱལ་པོས་དཔའ་ངར་ཆེན་པོས་འབད་འཐབ་བྱས་མཐར་གྲུབ་འབྲས་ཨང་དང་པོ་ཐོབ་འདུག གཏམ་བཟང་དེ་ཆེད་དུ་ཁྱབ་བསྒྲགས་བྱས་ནས་གཟི་བརྗིད་དང་དགའ་སྣང་ཚང་མ་དང་མཉམ་དུ་ལོངས་སྤྱོད་བྱ་རྒྱུ་ཡིན”

ཚེ་རིང་རྒྱལ་པོར་གྲུབ་འབྲས་ཐོབ་པ་དེ‘གྲོང་གསེབ་དར་རྒྱས། ནག་ཆུ་མདུན་སྐྱོད’ཅེས་པའི་བྱེད་སྒོས་གོ་སྐབས་ཆེན་པོ་བསྐྲུན་པ་དང་ཁ་འབྲལ་ཐབས་མེད། བྱེད་སྒོ་དེ་ནི་ནག་ཆུའི་མི་འབོར་དང་། མི་སེམས། ཤེས་ལྡན་པ་བཅས་ཀྱི་གནད་དོན་ཐག་གཅོད་བྱེད་པའི་ཞིབ་ཕྲའི་བྱ་ཐབས་ཤིག་ཡིན་ཞིང་། མང་ཚོགས་སྒྲིག་འཛུགས་དང་དྲིལ་བསྒྲགས་བྱེད་པ་དང་། མང་ཚོགས་ལ་སློབ་གསོ་ཁྲིད་སྟོན་བྱེད་པ། མང་ཚོགས་གཅིག་སྡུད་དང་ཞབས་འདེགས་ཞུ་བ་བཅས་བྱས་པ་བརྒྱུད། ཞིང་འབྲོག་མང་ཚོགས་ལ་སྣང་ཆེན་གྱིས་འགྲན་སློབ་སྙེག་བརྒལ་གྱི་རྣམ་པ་ཟབ་མོ་ཞིག་བཏོད་ཐོག་མི་རིགས་ཁག་གི་མང་ཚོགས་ཀྱིས“དོན་ཆེན་བཞིར”དམིགས་པ་དང“འཛུགས་གཏོད་བཞིར”ཤུགས་རྒྱག་པའི་སྤྲོ་སེམས་འཕེལ་བར་བྱས་པ་རེད།

མི་འབོར་གྱི་བྱང་ཚད། སློབ་གསོའི་མེ་ཏོག་རབ་ཏུ་བཞད།

ཤན་རྩ་རྫོང་དུ་གསོན་ཤུགས་ཀྱིས་ཁེངས་ཤིང་མཐུན་སྒྲིལ་གྱི་སྟོབས་ཤུགས་རྒྱས་པའི་འཛིན་གྲྭ་ཞིག་ཡོད་པ་དེ་ནི་ཤན་རྩ་རྫོང་སློབ་འབྲིང་དམའ་རིམ་ལོ་རིམ་གཉིས་པའི་འཛིན་གྲྭ་དང་པོ་ཡིན་ཞིང་། འཛིན་གྲྭའི་ཀྲུའུ་རེན་བསྟན་འཛིན་དབང་འདུས་ཀྱི་སྣེ་ཁྲིད་འོག་སློབ་མ་50ཡོད་པའི་འཛིན་གྲྭ་དེས་དཔའ་ངར་ཆེར་སྐྱེད་ཀྱི་ཉམས་འགྱུར་ཐོག་ནས་ཁོང་ཚོར་དབང་བའི་ལང་ཚོའི་ཕུགས་འདུན་མངོན་འགྱུར་བྱེད་བཞིན་ཡོད་པ་རེད།

2023དང་2024ལོའི་སློབ་ལོར། འཛིན་གྲྭ་དེར་རིག་གནས་དང་ལུས་རྩལ་གཉིར་ཀར་གྲུབ་འབྲས་བཟང་པོ་ཐོབ་ནས་སློབ་གྲྭ་རིམ་པའི་སྤོ་ལོའི་རིགས་ཀྱི་འགྲན་བསྡུར་བྱ་དགའ་ཐེངས་གསུམ་དང་ཕུལ་བྱུང་འཛིན་གྲྭའི་མཚན་སྙན་ཐེངས་གཅིག་ཐོབ་པ་རེད། སྐབས་གསུམ་པའི“གྲོང་གསེབ་དར་རྒྱས། ནག་ཆུ་མདུན་སྐྱོད”ཅེས་པའི་བྱེད་སྒོའི་ཁྲོད་སློབ་གྲྭ་རིམ་པ་དང་རྫོང་རིམ་པའི་སློབ་གྲྭའི་རིག་རྩལ་རིག་གནས་གར་སྟེགས་རིགས་ཀྱི་དམའ་རིམ་སློབ་འབྲིང་ཚོགས་ཆུང་གི་ཨང་དང་པོ་དང་རྒྱལ་ཁབ་ཀྱི་སྤྱི་སྤྱོད་སྐད་ཡིག་གྱེར་འདོན་གྱི་དམའ་རིམ་སློབ་འབྲིང་ཚོགས་ཆུང་གི་ཨང་དང་པོ་བསྟུད་མར་ཐོབ་ནས་ཤན་རྩ་རྫོང་གི་ཚབ་བྱས་ཏེ་གྲོང་ཁྱེར་རིམ་པའི་མཐའ་བསྡུར་ནང་ཞུགས་རྗེས། ཁོང་ཚོར་སླར་ཡང་གྲོང་ཁྱེར་རིམ་པའི་རྒྱལ་ཁབ་ཀྱི་སྤྱི་སྤྱོད་སྐད་ཡིག་གྱེར་འདོན་འགྲན་བསྡུར་གྱི་ཨང་དང་པོ་ཐོབ་པ་རེད། 

འཛིན་གྲྭའི་ཀྲུའུ་རེན་བསྟན་འཛིན་དབང་འདུས་ཀྱིས། “ཤེས་བྱའི་འོད་སྣང་གིས་འབྱུང་འགྱུར་ལ་ལམ་སྟོན་བྱེད་པ་དང་སློབ་གསོ་ནི་མི་འབོར་གྱི་བྱང་ཚད་མཐོ་རུ་གཏོང་བའི་འགག་རྩ་རེད”ཅེས་བརྗོད་པ་དང་། ཁོང་གིས། ཚན་ཁག་ཁག་གི་དགེ་རྒན་ཚོས་སློབ་ཚན་གྲ་སྒྲིག་དང་། ནག་པང་ཡི་གེ སྦྱོང་ཚན་དཔྱད་བརྗོད་སོགས་ཀྱི་ལྷུ་ཚིགས་སུ་ཚད་ལྡན་རྒྱ་ཡིག་བེད་སྤྱོད་ནན་པོ་བྱེད་པ་དང་། འཛིན་གྲྭའི་ནང་ད་དུང་དྲིལ་བསྒྲགས་ཡིག་སྒྲོམ་དང་། འཛིན་གྲྭའི་ནག་པང་ཚགས་པར། སློབ་གྲྭའི་རྒྱང་བསྒྲགས། དགའ་མོས་འཛིན་གྲྭ་སོགས་བརྒྱུད། རྒྱལ་ཁབ་ཀྱི་སྤྱི་སྤྱོད་སྐད་ཡིག་དྲིལ་བསྒྲགས་ཤུགས་ཆེན་གྱིས་སྐད་བརྡའི་ཁོར་ཡུག་བཟང་པོ་ཞིག་བཏོད་དེ། སློབ་མ་ཚོར་རྒྱལ་ཁབ་ཀྱི་སྤྱི་སྤྱོད་སྐད་ཡིག་གི་ཡིད་དབང་འཕྲོག་ཤུགས་རིམ་བཞིན་ཚོར་དུ་འཇུག་གི་ཡོད་ཅེས་ངོ་སྤྲོད་བྱས།

ཤེས་རྟོགས་བྱུང་བར་གཞིགས་ན། ཤན་རྩ་རྫོང་གིས་སློབ་གསོའི“འདུ་འགོད་ཁག་བདུན”ལག་ལེན་བསྟར་ནས། རིམ་ཁག་སློབ་གྲྭ་ཚང་མར་གཅིག་སྡུད་ཐོག་དྲོད་རླངས་མཁོ་འདོན་ཐུབ་པ་དང་། རྫོང་ཐད་གཏོགས་སློབ་གྲྭའི་སྨན་དོན་ཁང་བསྐྲུན་པ། སློབ་ཁྲིད་འཛིན་གྲྭ91གི་སློབ་གསོ་གཞི་གཅིག་གི་འཕྲུལ་ཆས་སྒྲིག་སྦྱོར་བྱེད་ཚད་དང་སློབ་གྲྭ་འབྲིང་ཆུང་10ལ་རྩིས་འཁོར་ཁང་ཁྱབ་ཚད་ཚང་མ་100%ཟིན་པ། རྫོང་སློབ་འབྲིང་གིས“གྲངས་འཛིན་སློབ་ར”བདེ་བླག་བཙུགས་པ། ཐེམ་ཁུངས་ཤན་རྩ་རྫོང་ནས་ཡིན་པའི་གྲོང་གསེབ་ཁྱིམ་ཚང་གི་བུ་ཕྲུག་གི་མཐོ་རིམ་སློབ་གསོར་སློབ་ཡོན་མི་དགོས་པའི་ཁ་གསབ་སྤྲོད་རྒྱུ་གསར་གཏོད་ལག་བསྟར་བྱས་པ། རིམ་རྩིས་བརྒྱབ་ན། ལོ་གཉིས་བསྟུད་མར་མ་དངུལ་སྒོར་ཁྲི་200ལྷག་ཙམ་སྤྲད་པ་དང་། 2023ལོར། ལྗོངས་ནང་ཁུལ་གྱི་གཙོ་གནད་མཐོ་རིམ་སློབ་འབྲིང་གི་བོད་ལྗོངས་འཛིན་གྲྭའི་ཁོངས་གཏོགས་སུ་སློབ་མ་43ཚུད་པ་དེ་དུས་མཚུངས་ལས་19.4%མང་དུ་ཕྱིན་པ་བཅས་རེད།

མི་སེམས་གཅིག་སྒྲིལ། དུས་རབས་གསར་པར་འཕེལ་རྒྱས་ཀྱི་འབོད་སྒྲ་བསྒྲགས་པ།

སྨད་པ་ཤང་དོམ་རྭ་གྲོང་ཚོ་ནས་ཡིན་པའི་བཀྲ་ཤིས་གཡང་མཚོ་དཀར་ཆུའི་ཐོན་རྫས་ལས་སྣོན་བྱེད་པར་ཧ་ཅང་དགའ་པོ་ཡོད་ཅིང་། དཀར་ཆུའི་ཐོན་རྫས་ལས་སྣོན་ཐད་ལྷན་སྐྱེས་ཀྱི་ཤེས་རབ་ལྡན་པའི་ཁར་སྲོལ་རྒྱུན་བཟོ་རྩལ་རྒྱུན་འཛིན་དང་དར་སྤེལ་གཏོང་བར་ཡང་སྤྲོ་སེམས་ཆེན་པོ་ཡོད།

“དཀར་ཆུའི་ཐོན་རྫས་ཀྱི་ལས་སྣོན་རིགས་ཀྱང་འགྲན་བསྡུར་ལ་ཞུགས་ཆོག་གམ། འོ་ན་ང་ཞུགས་ཆོག་གམ”ཞེས་ཤོད་བཞིན། “གྲོང་གསེབ་དར་རྒྱས། ནག་ཆུ་མདུན་སྐྱོད”ཅེས་པའི་བྱེད་སྒོ་ཐོག་མར་སྤེལ་སྐབས། བཀྲ་ཤིས་གཡང་མཚོ་འགྲན་བསྡུར་ལ་ཞུགས་པར་གདེང་ཚོད་དེ་ཙམ་ཆེན་པོ་མེད།

འོ་མ་འཇོ་བ་དང་། རྩམ་པ་འཐག་པ། ཞོ་དཀྲོག་པ། ཚལ་བརྔོ་བ་དང་ཁ་ལག་བཟོ་བ། གྱོན་གོས་འཚེམ་པ། སྦག་སྦག་ཉམས་བཟོ། གྱང་རྡུང་བ། ཁང་པར་གཙང་སྦྲ་བྱེད་པ། རྐོ་འདྲུའི་འཕྲུལ་འཁོར་གཏོང་བ། གཏམ་བཤད་དང་སྒྲོག་འགྲེལ་བྱེད་པ། ཡི་གེ་དང་རི་མོ་འབྲི་བ། གླུ་ལེན་གར་འཁྲབ་བྱེད་པ་ལ་སོགས“གྲོང་གསེབ་དར་རྒྱས། ནག་ཆུ་མདུན་སྐྱོད”ཅེས་པའི་བྱེད་སྒོར་ཞིང་འབྲོག་པའི་རྒྱུན་གཏན་གྱི་ཐོན་སྐྱེད་དང་འཚོ་བའི་ཕྱོགས་ཚང་མ་ཚུད་ཡོད་པ་མ་ཟད། རྫོང(ཆུས)ཁག་གི་ཁྱད་ཆོས་གཞིར་བཟུང་། ལེགས་སྒྲིག་དང་ཕུན་སུམ་ཚོགས་སུ་རྒྱུན་ཆད་མེད་པར་བཏང་བ་དང་། མང་ཚོགས་དང་ཉེ་བཅར་གྱི་འགྲན་བསྡུར་རྣམ་གྲངས་དེ་ལྟ་བུར་རྒྱ་ཆེའི་ཞིང་འབྲོག་མང་ཚོགས་སྤྲོ་སེམས་ཆེན་པོས་ཞུགས་པའི་ཡིད་དབང་བཀུག་ཡོད་པ་རེད།

འགྲན་བསྡུར་གྱི་ཉིན་དེར། བཀྲ་ཤིས་གཡང་མཚོའི་རྩེར་སོན་གྱི་ལག་རྩལ་དང་སྲ་བརྟན་གྱི་རྨང་གཞི་གང་ལེགས་མངོན་ཞིང་། ཁོང་གིས་བྱང་ཆ་དོད་པོས་ལས་སྣོན་སྒྲིག་ཆས་སྤྱོད་བཞིན་རྒྱུ་ཆ་འདེམས་པ་ནས་ཐོན་རྫས་བཟོ་བའི་བར་གྱི་ལྷུ་ཚིགས་ཚང་མ་ཞིབ་ཅིང་ཕྲ་བ་ལེགས་སྒྲུབ་བྱས་པ་དང་། ཁོང་གིས་བཟོས་པའི་དཀར་ཆུའི་ཐོན་རྫས་ལྟ་སྣང་དོད་པོ་ཡོད་པ་མ་ཟད། བྲོ་བ་དང་འཚོ་བཅུད་ཀྱི་རིན་ཐང་ཡང་ཧ་ཅང་ཆེན་པོ་ཡོད་པ་རེད།

ཤེས་ལྡན་པ་གསོ་སྐྱོང་། རང་ཡུལ་གྱི་ཤེས་ལྡན་པ་གཅིག་རྗེས་གཉིས་མཐུད་ངང་ཐོན་པ།

ཤན་རྩ་རྫོང་གཞུང་སྨད་གྲོང་རྡལ་གྲོང་ཚོ་ལྔ་པའི་ཚེ་རིང་རྒྱལ་པོའི་དེ་སྔའི་ཉིན་རེའི་ལས་ཀ་ནི་ཨར་པོ་རྒྱག་ཁུལ་གྱི་སོ་ཕག་དབོར་མཁན་ཡིན་པས་འཚོ་བ་དེ་ཙམ་ཡག་པོ་མེད། ཉིན་ཞིག ཚེ་རིང་རྒྱལ་པོས་རྒྱུན་གཏན་ལྟར་ལས་ཀ་བྱེད་སྐབས་གློ་བུར་དུ་འུར་སྒྲ་ཞིག་གྲགས་པར། ཕར་ལྟ་དུས་རྐོ་འདྲུའི་འཕྲུལ་འཁོར་ཞིག་གིས་འདམ་བག་དང་སོ་ཕག་སོགས་སྟབས་བདེ་པོས་ཕར་དབོར་ཚུར་འདྲེན་བྱེད་པ་མཐོང་།

ཚེ་རིང་རྒྱལ་པོའི་སེམས་ལ། “གལ་སྲིད་ངས་ཀྱང་རྐོ་འདྲུའི་འཕྲུལ་འཁོར་གཏོང་ཤེས་ཚེ། དཀའ་ལས་ཁག་པོ་འདི་འདྲ་མྱོང་མི་དགོས་པར་འཚོ་བ་འདི་ལས་ཡག་པ་སྐྱེལ་ཐུབ་ངེས་རེད”ཅེས་སྙམ་བཞིན། རང་གི་ལས་དབང་ལ་འགྱུར་ལྡོག་གཏོང་བའི་རེ་བ་མཐོང་།

ཕྱིས་སུ། གྲོང་ཚོའི་རོགས་སྐྱོར་དང་རྫོང་དང་ཤང་གི་འབྲེལ་ཡོད་སྡེ་ཚན་གྱི་ཐུགས་ཁུར་འོག ཚེ་རིང་རྒྱལ་པོ་རྐོ་འདྲུའི་འཕྲུལ་འཁོར་གསོ་སྦྱོང་འཛིན་གྲྭར་ཞུགས་པ་རེད། གསོ་སྦྱོང་རིང་། ཁོང་གིས་རྟག་པར་དཀའ་སྤྱད་འབད་བརྩོན་གྱིས་རྐོ་འདྲུའི་འཕྲུལ་འཁོར་གཏོང་རྩལ་ཡག་པོ་སྦྱངས་པ་མ་ཟད། ད་དུང་རྐོ་འདྲུའི་འཕྲུལ་འཁོར་གྱི་གྲུབ་ཆ་དང་རྩ་བའི་རིག་པ་སོགས་ཀྱང་ནན་ཏན་སྦྱངས་ནས། ལག་ལེན་གྱི་ཉམས་མྱོང་ཡག་པོ་བསགས་པ་རེད།

“གྲོང་གསེབ་དར་རྒྱས། ནག་ཆུ་མདུན་སྐྱོད”ཅེས་པའི་བྱེད་སྒོས་ཞིང་འབྲོག་མང་ཚོགས་ཀྱི་རྩལ་ནུས་སྦྱོང་བའི་ཧུར་བརྩོན་རང་བཞིན་དང་། རྩལ་ནུས་བརྩོན་ཞིབ་བྱེད་པའི་རང་འགུལ་རང་བཞིན། རྩལ་ནུས་འགྲན་བསྡུར་བྱེད་པའི་གསར་གཏོད་རང་བཞིན་བཅས་གང་ལེགས་འཕེལ་བར་བྱས་པ་མ་ཟད། ད་དུང་ཤེས་ལྡན་པ་གསོ་སྐྱོང་ལ་སྐུལ་འདེད་དང་། ཤེས་ལྡན་པའི་གསར་གཏོད་ལ་སྐུལ་སྤེལ། ཤེས་ལྡན་པའི་གསོན་ཤུགས་འཕེལ་བར་བྱེད་པ་བཅས་ལའང་ནུས་པ་གལ་ཆེན་བཏོན་ཡོད་པ་རེད།

“གྲོང་གསེབ་དར་རྒྱས། ནག་ཆུ་མདུན་སྐྱོད”ཅེས་པའི་བྱེད་སྒོ་ནི་ཚ་ཚ་འུར་འུར་གྱི་འགྲན་བསྡུར་ཞིག་ཡིན་ལ། ཤེས་ལྡན་པ་སྣ་ཚོགས་ཐོན་པའི་བརྒྱུད་རིམ་ཞིག་ཀྱང་རེད། འགྲན་བསྡུར་རེ་རེ་སྤེལ་བ་བརྒྱུད། གྲོང་གསེབ་དར་རྒྱས་ཀྱི་བྱེད་པོའི་གནས་བབ་གང་ལེགས་མངོན་པ་དང་། མཛེས་སྡུག་ལྡན་པའི་ཁྱིམ་གཞིས་སྐྲུན་པའི་བདག་པོའི་འདུ་ཤེས་ནུས་ལྡན་འཕེལ་བ། རིམ་པ་ཁག་དང་རིགས་ཁག་གི་ཤེས་ལྡན་པ་འབུར་དུ་ཐོན་པས། ནག་ཆུས་རྒྱ་ཆེ་ལ་སྤྱོད་གོ་ཆོད་པའི་ཤེས་ལྡན་པའི་མཛོད་འཛུགས་པར་རྨང་གཞི་བརྟན་པོ་ཞིག་བཏིང་ཡོད་པ་རེད།