[ English ] [ 中文 ]
0891-6325020
དབུ་ཤོག>བོད་རིག་པ་དང་ཆོས་ལུགས།>ཆོས་ལུགས་གསར་འགྱུར།
  • པཎ་ཆེན་རིན་པོ་ཆེ་གཞིས་རྩེར་ཕེབས་འདུག

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2017-08-07

    ཉེ་ཆར། རྒྱལ་ཡོངས་སྲིད་གྲོས་ཀྱི་རྒྱུན་ཨུ་ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་ལྷ་ས་ནས་གཞིས་རྩེར་ཕེབས་ཏེ་ཆོས་ཕྱོགས་ཀྱི་མཛད་སྒོ་སྤེལ་བ་དང་རྟོག་ཞིབ་གནང་བ་རེད།

    ཟླ་8ཚེས་1ཉིན་གྱི་ཆུ་ཚོད་11ཡོལ་ཙམ་ལ་པཎ་ཆེན་མཆོག་བཞུགས་པའི་མེ་འཁོར་གཞིས་རྩེ་མེ་འཁོར་བབས་ཚུགས་སུ་དལ་བུར་འབྱོར་བ་དང་། པཎ་ཆེན་མཆོག་ཕེབས་སྒུག་ཞུ་བཞིན་པའི་གཞིས་རྩེ་གྲོང་ཁྱེར་གྱི་འགོ་ཁྲིད་གཙོ་བོས་མེ་འཁོར་བབས་ཚུགས་སུ་པཎ་ཆེན་མཆོག་ལ་སྤྲོ་སེམས་འཁོལ་བའི་བསུ་བ་ཞུས་པ་དང་། མི་རིགས་ཀྱི་གཟབ་མཆོར་ལེགས་པར་སྤྲས་པའི་ན་གཞོན་ཚོས་པཎ་ཆེན་མཆོག་ལ་གྲོ་སོ་ཕྱེ་མར་ཕུལ་བ་དང་། དགའ་སྤྲོའི་རྣམ་པས་ཁེངས་པའི་ལྷ་མོ་སོགས་སྲོལ་རྒྱུན་གྱི་འཁྲབ་སྟོན་འོག་ས་གནས་ས་ཐོག་ཏུ་མང་ཚོགས་ཀྱི་འཐུས་མི་བརྒྱ་ཕྲག་གིས་པཎ་ཆེན་མཆོག་ཕེབས་སྒུག་ཞུ་བཞིན་ཡོད།  པཎ་ཆེན་མཆོག་དང་བཅས་པ་མེ་འཁོར་བབས་ཚུགས་ནས་རླངས་འཁོར་ལ་བཞུགས་ཏེ་གདན་ས་བཀྲ་ཤིས་ལྷུན་པོར་ཕེབས། ཕེབས་ལམ་དུ་ཕར་འགྲོ་ཚུར་འོང་བྱེད་མཁན་མང་ཚོགས་ཚོས་པཎ་ཆེན་མཆོག་ཕེབས་པ་མཐོང་སྐབས། ཞྭ་མོ་ཕུད་ནས་གུས་འདུད་ཞུ་བའམ་ཡང་ན་ཐལ་མོ་སྙིང་ཁར་སྦྱར་ནས་པཎ་ཆེན་རིན་པོ་ཆེ་ཕ་ཡུལ་དང་གདན་སར་ཕེབས་པར་བསུ་བ་ཞུས་པ་རེད།

    པཎ་ཆེན་མཆོག་གི་རླངས་འཁོར་རུ་ཁག་འབྱོར་བ་དང་བསྟུན་ནས་བཀྲ་ཤིས་ལྷུན་པོའི་རྒྱལ་སྒོའི་མདུན་དུ་སྐབས་ཤིག་རིང་དུང་རྒྱ་གླིང་གི་སྒྲ་ལྷང་ལྷང་དུ་གྲགས་པ་དང་དྲི་བསང་གི་དུ་བ་ལང་ལོང་དུ་འཕྱུར་ཞིང་། དགེ་འདུན་པ་ཚོས་ཆོས་ལུགས་ཀྱི་སྲོལ་རྒྱུན་མཛད་སྒོ་གཟབ་ཤོས་སྤེལ་ནས་པཎ་ཆེན་མཆོག་ལ་བསུ་བ་ཞུས། པཎ་ཆེན་མཆོག་བཀྲ་ཤིས་ལྷུན་པོའི་རྒྱལ་སྒོའི་མདུན་དུ་རླངས་འཁོར་ནས་བབས་རྗེས་སེར་སྐྱ་མང་ཚོགས་ཀྱི་དགའ་བསུའི་ཁྲོད་རྡོ་གཅལ་བརྒྱུད་ཚོམས་ཆེན་འདུ་ཁང་དུ་དལ་བུར་ཕེབས། འདུ་ཁང་དུ་པཎ་ཆེན་མཆོག་གིས་ཇོ་བོ་ཤཱཀྱ་མུ་ནེ་དང་བོད་བརྒྱུད་ནང་བསྟན་ཆོས་ལུགས་ཀྱི་དགེ་ལུགས་པའི་སྲོལ་གཏོད་མཁན་རྗེ་ཙོང་ཁ་པའི་སྐུ་བརྙན་ལ་མཇལ་ཁ་ཞུས་པ་མ་ཟད། དགེ་འདུན་པ་ཚོ་དང་མཉམ་དུ་ཞལ་འདོན་གནང་རྗེས་གཟིམ་ཆུང་བླ་བྲང་དུ་ཕེབས།

    ཕྱི་དྲོ་བཀྲ་ཤིས་ལྷུན་པོའི་ཉི་འོད་འདུ་ཁང་དུ་པཎ་ཆེན་མཆོག་ཆོས་ཁྲིར་བཞུགས་ནས་བཀྲ་ཤིས་ལྷུན་པོའི་དོ་དམ་ཨུ་ཡོན་ལྷན་ཁང་གི་དགེ་འདུན་པའི་ཁོངས་མི་དང་བླ་མ་སྐྱེས་ཆེན་ཚོར་ལྷག་བསམ་རྣམ་དག་ངང་མཇལ་ཁ་གནང་བ་དང་། པཎ་ཆེན་མཆོག་གིས་ཁོང་ཚོར་ཕྱག་དབང་གནང་ནས་བདེ་བ་བསྩལ་བ་དང་མཇལ་མདུད་གནང་བ་མ་ཟད། བླ་མ་སྐྱེས་ཆེན་ཚོའི་སྣེ་ཁྲིད་དེ་ཞལ་འདོན་གནང་ནས་གསོལ་བ་སྨོན་ལམ་བཏབ་པ་རེད།

    --    --

    འགན་འཁུར་རྩོམ་སྒྲིག་པ། བསོད་ནམས་སྟོབས་ལགས།