[ English ] [ 中文 ]
0891-6325020
དབུ་ཤོག>བོད་རིག་པ་དང་ཆོས་ལུགས།>མཁས་དབང་ཡིག་ཚགས།
  • སློབ་དཔོན་ཨརྱ་དེ་ལྦའམ་འཕགས་པ་ལྷ།

  • ཡོང་ཁུངས།      |    རྩོམ་པ་པོ།      |    སྤེལ་དུས།   2015-12-17

    W020150915411709416591.png

    སློབ་དཔོན་ཨརྱ་དེ་ལྦའམ་འཕགས་པ་ལྷ་ནི་སློབ་དཔོན་ཀླུ་སྒྲུབ་ཀྱི་སློབ་མའི་གཙོ་བོ་ཡིན། ཁོང་གིས་ལྷོ་ཕྱོགས་དཔལ་གྱི་རིར་འཕགས་པ་ཀླུ་གྲུབ་ཀྱི་ཞབས་ལ་ཡུན་རིང་དུ་བསྟེན་པའི་མཐུ་ལས་སའི་སྟེང་ན་འགྲན་ཟླ་དང་བྲལ་བའི་མཁས་གྲུབ་ཆེན་པོར་གྱུར། སྐབས་དེར་མུ་སྟེགས་ས་རྟ་དབྱངས་ཀྱིས་ནཱ་ལེན་དྲའི་དགེ་འདུན་རྣམས་ལ། ང་མུ་སྟེགས་རྟ་དབྱངས་བྱ་བ་ཡིན། ང་རྒྱལ་ན་ཁྱེད་རྣམས་ངའི་གྲུབ་མཐའ་ལ་ཞུགས་ཏེ་གཙུག་ལག་ཁང་དང་ཆོས་རྣམས་བསྒྲེག་དགོས། དེའི་དཔང་པོ་རྒྱལ་པོ་ལ་བཅོལ་བ་ཡིན་པས་དུས་ཐོབས་ཤིག་ཅེས་བསྒྲགས་པ་ན། ནང་པའི་མཁས་པ་སུས་ཀྱང་ལན་ལྡོག་མ་ནུས། སྐབས་དེར་པཎྜི་ཏ་ཞིག་གི་རྨི་ལམ་དུ་མུ་སྟེགས་ཀྱི་རྩོད་པ་བཟློག་པའི་ཐབས་སུ་ཆོས་སྐྱོང་མགོན་པོ་ལ་འཕྲིན་ལས་བཅོལ་ན། ཆོས་སྐྱོང་གི་སྤྲུལ་པས་ལྷོ་ཕྱོགས་དཔལ་གྱི་རི་ནས་སློབ་དཔོན་ཀླུ་སྒྲུབ་ཡབ་སྲས་གདན་འདྲེན་པའི་ཕོ་ཉ་བྱེད་པར་འགྱུར་ཞེས་ལུང་བསྟན་བྱུང་བ་ལྟར། འཕྲིན་ཡིག་བྲིས་ཏེ་གཏོར་མའི་སྟེང་དུ་བཞག་ནས་མགོན་པོ་ལ་ཆོས་གཏོར་རྒྱ་ཆེན་པོ་ཕུལ་བ་ན། མགོན་པོའི་རྣམ་སྤྲུལ་བྱ་རོག་ཅིག་གིས་འཕྲིན་ཡིག་དེ་ཁྱེར་ནས་ལྷོ་ཕྱོགས་དཔལ་གྱི་རིར་སློབ་དཔོན་ཀླུ་སྒྲུབ་ལ་ཕུལ། ནཱ་ལེན་དྲར་མུ་སྟེགས་རྟ་དབྱངས་གདུལ་བའི་དོན་སློབ་དཔོན་ཀླུ་སྒྲུབ་ཕེབས་པར་བརྩམས་པ་ན། སློབ་དཔོན་ཨརྱ་དེ་བས། སློབ་དོན་ཕེབས་མི་དགོས། རྟ་དབྱངས་བདག་གིས་གདུལ་ནུས་ཟེས་ཟུས་ཏེ་སློབ་དཔོན་ཨརྱ་དེ་ལྦ་ནཱ་ལེན་དྲར་ཕེབས། སྐབས་དེར་ཕྱི་ནང་གི་པཎྜི་ཏ་འབུམ་ཕྲག་དུ་མ་ནཱ་ལེན་དྲར་འདུས། སློབ་དཔོན་གྱིས་ནཱ་ལེན་དྲའི་ཆུ་ལེན་མཁན་ཞིག་ལ། ང་འོངས་སོ་གྱིས་གསུངས་པ་ལྟར།“དེས་ཀྱང་དགེ་འདུན་རྣམས་ལ་ང་འོངས་སོ་ཟེར་མཁན་ཞིག་ཆུ་ཁར་འདུག་ཞུས་པས། འཕགས་པ་ཡབ་སྲས་གང་རུང་ཞིག་ཕེབས་པར་བསམས་ཏེ་མཆོད་པའི་བྱེ་བྲག་རྣམ་པ་མང་པོ་ཐོག་སྟེ་ཕེབས་བསུ་རྒྱ་ཆེ་ཞུས། དེ་ནས་སློབ་དཔོན་གྱིས་རྟ་དབྱངས་ཆུ་གཏོར་གཏོང་སར་བྱོན་ཏེ་ཅི་བྱེད་དྲིས་པས། སྔར་ཤི་བའི་ཕ་མེས་རྣམས་ལ་སྟེར་བ་ཡིན་ཟེར། སློབ་དཔོན་གྱིས་ངས་ཀྱང་ལྷོ་ཕྱོགས་དཔལ་གྱི་རིར་ཤིང་སྐམ་པོ་ཞིག་ཡོད་པ་དེ་ལ་གཏོར་བ་ཡིན་གསུངས་ནས་ཆུ་གཏོར་བས། རྟ་དབྱངས་ཀྱིས་དཔལ་གྱི་རི་ལ་འདི་ནས་ཆུ་གཏོར་བྱས་པས་ཅི་ལ་ཕན་ཟེར་བས། སློབ་དཔོན་གྱིས་འོ་ན་ཕ་མེས་སྔར་ཤི་བ་ལ་ད་ལྟར་ཆུ་གཏོར་བྱས་པས་ཅི་ལ་ཕན་གསུངས། ཡང་རྟ་དབྱངས་འབབ་སྟེགས་སུ་ཁྲུས་བྱེད་པའི་སྐབས་སློབ་དཔོན་གྱིས་ཅི་བྱེད་གསུངས་པས། སྡིག་པ་སྦྱོང་བ་ཡིན་ཟེར། སློབ་དཔོན་གྱིས་གསེར་བུམ་མི་གཙང་བས་བཀང་བ་ཞིག་གི་ཕྱི་བཀྲུས་པས་རྟ་དབྱངས་ཀྱིས། མི་གཙང་བ་ནང་ན་ཡོད་པ་ལ་ཕྱི་བཀྲུས་པས་ཅི་ལ་ཕན་ཟེར་བར། སློབ་དཔོན་གྱིས་སྡིག་པ་སེམས་ལ་ཡོད་པར་ལུས་བཀྲུས་པས་ཅི་ཕན་གསུངས། དེ་ནས་སློབ་དཔོན་ཚོགས་སུ་དགེ་འདུན་གྱི་གྲལ་སྨད་དུ་བཞུགས་པའི་སྐབས་རྟ་དབྱངས་ཀྱིས་ཚོགས་སུ་སྔར་བཞིན་བགྲངས་པས་གྲངས་གཅིག་ལྷག་པ་ན། སྔོན་མེད་པའི་མགོ་ཟླུམ་གང་ན་ཡོད་ཟེར་བ་ལ་སློབ་དཔོན་གྱིས། མགོ་ཟླུམ་སྐེའི་སྟེང་ན་ཡོད་གསུངས་པས་རྩོད་པ་བྱེད་པར་ཤེས་ཏེ། རྟ་དབྱངས་ཀྱིས་བྱིའུ་སྦར་མོར་བཅུག་སྟེ་འདི་འཆིའམ་གསོན་ཟེར་བས། དེ་ཁྱོད་ཀྱི་སྙིང་རྗེ་ལ་རག་ལས་སོ་ཞེས་གསུངས། ང་ཕྱི་ནང་གང་དུ་འགྲོ་བ་འདུག་དྲིས་པར། སློབ་དཔོན་གྱིས་དེ་ཁྱོད་ཀྱི་འདོད་དོན་གང་ན་ཡོད་པ་དེར་རག་ལས་སོ་གསུངས། དེ་བས་རྟ་དབྱངས་ཀྱིས། ད་རང་རེ་གཉིས་རྩོད་པ་བྱའོ་ཟེར་བ་ལ་སློབ་དཔོན་གྱིས་ཞལ་གྱིས་བཞེས། རྒྱལ་པོ་དཔང་དུ་བཞག་སྟེ་སུ་ཕམ་པ་དེ་གང་རྒྱལ་བའི་ཕྱོགས་ཀྱི་བསྟན་པ་ལ་འཇུག་དགོས་པ་བྱས། རྒྱལ་ཕམ་ཤན་འབྱེད་ཀྱི་ཕྱི་ནང་གི་པཎྜི་ཏ་རྩོད་པ་མཐར་དབྱུང་གི་དཔང་པོ་དུ་མའི་ཁྲི་ཡང་བཤམས། ནངས་པར་ཁྲི་སོ་སོར་འཁོར་དང་བཅས་པ་འཁོད་པའི་དབུས་སུ་རྟ་དབྱངས་ན་རེ། མིག་གཅིག་པ་འདི་ཅི་སྨྲ་ཟེར་བ་ལ་སློབ་དཔོན་གྱིས། བརྒྱ་བྱིན་མིག་སྟོང་ལྡན་ཡང་དེ་ཉིད་མཐོང་བ་མེད། དྲག་པོར་མིག་གསུམ་ལྡན་ཡང་དེ་ཉིད་མཐོང་བ་མེད། ཨརྱ་དེ་ལྦ་མིག་གཅིག་པ་ནི་གང་ཡིན་པས། སྲིད་པ་གསུམ་པོ་མ་ལུས་པ་ཡིད་དེ་ཉིད་མཐོང་། ཞེས་གསུངས་པས། རྟ་དབྱངས་ན་རེ། ཁྱོད་ཀྱིས་ངའི་རྩོད་ཟླ་མི་ཡོང་བས། ངའི་སྲིང་མོ་འདི་དང་རྩོད་ཅིག་ཟེར་བ་ལྟར། སྲིང་མོ་ལྷ་མོ་ཨུ་མ་རྩོད་དུ་བྱུང་བས། དགེ་བསྙེན་ངོ་ཚ་མེད་པ་ལུས་གཅེར་བུར་ཕྱུང་བ་མཚན་མ་གྱེན་དུ་བསྒྲེངས་པ་ཞིག་ཏུ་སྤྲུལ་པས་ལྷ་མོ་ཨུ་མ་ངོ་ཚ་ནས་བྲོས་སོ།། དེ་ནས་རྟ་དབྱངས་ཀྱིས་ངའི་ནེ་ཙོ་འདི་དང་རྩོད་ཅིག་ཟེར་བ་ན། ཚངས་པའི་སྤྲུལ་པ་ནེ་ཙོ་རྩོད་དུ་བྱུང་བ་ལ། བྱི་ལ་བཏང་ནས་ནེ་ཙོའི་སྐེ་བཅད་པས། རྟ་དབྱངས་ན་རེ། ནང་པ་སངས་རྒྱས་པར་ཁས་འཆེ་བ་དང་སྲོག་གཅོད་པ་འགལ། ཁྱོད་ལ་སྡིག་པ་འོང་ཟེར་བ་ལ་སློབ་དཔོན་ཨརྱ་དེ་ལྦས། ལྷོ་ཕྱོགས་དཔལ་གྱི་རིར་སྡིག་སྦྱོང་བྱེད་པའི་སློབ་དཔོན་བཞུགས་ཡོད་གསུངས། དེས་སྡིག་སྦྱོང་བྱས་པས་ཁྱོད་ཀྱི་སྡིག་པ་བྱང་ངམ་ཟེར་བ་ལ། འོ་ན་བྱི་ལས་ནེ་ཙོ་བསད་པའི་སྡིག་པ་ང་ལ་འོང་ངམ་གསུངས། དེ་ནས་རྟ་དབྱངས་ཀྱིས། ངའི་ཐོད་ལེ་ཀོར་དང་རྩོད་ཅིག་ཟེར་ནས། ཁྱབ་འཇུག་གི་སྤྲུལ་པ་ཐོད་ལེ་ཀོར་སོ་ཕག་གི་སྟེང་དུ་བསྐྱུར་བྱུང་བས། སློབ་དཔོན་གྱིས་མར་ནག་བསྐུས་ནས་རི་མོ་མ་བྱུང་བས་རྟ་དབྱངས་ངོ་གནོང་ཞིང་སྐྱེངས་པར་གྱུར། འོན་ཀྱང་སྔར་དབང་ཕྱུག་གིས་མཆོག་བྱིན་པར་རློམ་སྟེ་སློབ་དཔོན་དང་ལྷན་ཅིག་སྩོད་པ་ལ་ཞུགས་པ་ན། རྟ་དབྱངས་ཀྱི་འདོད་ཚུལ་རྣམས་སློབ་དཔོན་གྱིས་དྲི་མ་མེད་པའི་རིགས་པ་སྟོང་ཕྲག་གིས་སུན་ཕྱུངས་ཏེ། རྟ་དབྱངས་རྣམ་པ་ཀུན་ཏུ་ཕམ་པར་མཛད། དེ་ནས་རྟ་དབྱངས་ཀྱིས། ད་རྫུ་འཕྲུལ་འགྲན་ཟླ་ནས་བརྒྱ་བྱིན་མིག་སྟོང་ཡོད་པ་ཞིག་ཏུ་སྤྲུལ་བར་སློབ་དཔོན་གྱིས་ཕྱག་སྟོང་སྤྱན་སྟོང་དུ་སྤྲུལ་ཏེ་ཟིལ་གྱིས་མནན། རྟ་དབྱངས་ཀྱི་ཁ་ནས་མེ་ཕྱུང་བ་སློབ་དཔོན་གྱིས་ཞལ་ནས་ཆུ་ཕྱུང་སྟེ་བསད། རྟ་དབྱངས་ཀྱིས་ནམ་མཁར་དཀྱིལ་འཁོར་བྲིས་པ་སློབ་དཔོན་གྱིས་རྫུ་འཕྲུལ་གྱི་རླུང་གིས་བསུབས་པས། རྩོད་པ་དང་། ནུས་པ། རྫུ་འཕྲུལ་སོགས་སྒོ་དུ་མས་རྟ་དབྱངས་ཕམ་སྟེ། ཆུ་བོ་གངྒཱར་ལྕེབས་པར་བརྩམས་པ་ན། རྒྱལ་པོས་རྟ་དབྱངས་བཀའ་སྡེ་སྣོད་མང་པོ་བཞུགས་པའི་གཙུག་ལག་ཁང་ཞིག་ཏུ་བཅུག དེར་རྟ་དབྱངས་ཀྱིས་མདོ་རྒྱུད་བསྟན་བཅོས་རྣམས་ལ་བལྟས་པས། ཕྱོགས་འཛིན་གྱི་འཆིང་བ་གྲོལ་ཞིང། ལྷག་པར་འཇམ་དཔལ་རྩ་རྒྱུད་ཀྱི་གླེགས་བམ་བཀླགས་པས། སློབ་དཔོན་ཀླུ་སྒྲུབ་ཡབ་སྲས་ལུང་གིས་ཟིན་ཚུལ་དང། རང་ཉིད་ཀྱང་ལུང་གིས་ཟིན་པའི་ཚུལ་རྣམས་མཐོང་བས། རྒྱལ་བའི་བཀའ་ལ་སྙིང་ཐག་པ་ནས་ཡིད་ཆེས་ཏེ། སངས་རྒྱས་བཅོམ་ལྡན་འདས་ལ་བསླུ་བ་མེད་པའི་ངེས་པ་རྙེད་ནས་སློབ་དཔོན་ལ་རབ་ཏུ་བྱུང་བར་ཞུས་པ་བཞིན། སློབ་དོན་ཨརྱ་དེ་ལྦས་རྟ་དབྱངས་སློབ་དཔོན་ཀླུ་སྒྲུབ་ཀྱི་སྤྱན་སྔར་ཁྲིད་དེ། རབ་ཏུ་བྱུང་ནས་མདོ་རྒྱུད་ཀྱི་བསྟན་བཅོས་མཐའ་དག་ལ་མཁས་པའི་ཕུལ་དུ་གྱུར། དེ་ནས་སློབ་དཔོན་འཕགས་པ་ལྷ་དཔལ་ནཱ་ལེན་དྲར་ཡུན་རིང་བཞུགས་མཐར་སྐུ་མྱང་ངན་ལས་འདས་པའི་ཚུལ་བསྟན་ཏོ།།

    --    --

    འགན་འཁུར་རྩོམ་སྒྲིག་པ། ཚེ་རིང་ཆོས་སྒྲོན།