[ English ] [ 中文 ]
0891-6325020
དབུ་ཤོག>བོད་རིག་པ་དང་ཆོས་ལུགས།
  • པཎ་ཆེན་སྐུ་ཕྲེང་བཅུ་གཅིག་པ《ཀྲུང་ཧྭའི་རིག་མཛོད་ཆེ་མོ་བོད་ཡིག་བམ་པོ》ལས《པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ》གྱི་པར་ཕུད་འགྲེམས་སྤེལ་མཛད་སྒོར་བཞུགས་པ།

  • ཡོང་ཁུངས།   ཤིན་ཧྭ་གསར་འགྱུར་ཁང་།    |    རྩོམ་པ་པོ།      |    སྤེལ་དུས།   2019-09-06

     ཟླ་9ཚེས་4ཉིན་གྱི་སྔ་དྲོ། རྒྱལ་ཡོངས་སྲིད་གྲོས་ཀྱི་རྒྱུན་ཨུ་དང་། ཀྲུང་གོ་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ། ཀྲུང་གོ་ནང་བསྟན་མཐུན་ཚོགས་བོད་ཡན་ལག་མཐུན་ཚོགས་ཀྱི་ཚོགས་གཙོ་བཅས་ཡིན་པའི་པཎ་ཆེན་ཨེར་ཏེ་ནི་ཆོས་ཀྱི་རྒྱལ་པོ་བོད་ལྗོངས་གཞིས་རྩེར་འཚོགས་པའི《ཀྲུང་ཧྭའི་རིག་མཛོད་ཆེ་མོ་བོད་ཡིག་བམ་པོ》ལས《པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ》གྱི་པར་ཕུད་འགྲེམས་སྤེལ་མཛད་སྒོར་ཞུགས་པ་དང་འབྲེལ་ཤིས་ཚིག་ཀྱང་བསྒྲོན་པ་རེད།

    པཎ་ཆེན་སྐུ་ཕྲེང་བཅུ་གཅིག་གིས་ཤིས་ཚིག་བསྒྲོན་སྐབས། པཎ་ཆེན་སྐུ་ཕྲེང་རིམ་བྱོན་ནི་བོད་བརྒྱུད་ནང་བསྟན་གྱི་རྒྱལ་གཅེས་ཆོས་གཅེས་ཀྱི་དར་ཆ་ཞིག་རེད། པཎ་ཆེན་སྐུ་ཕྲེང་རིམ་བྱོན་གྱི་རྒྱལ་གཅེས་ཆོས་གཅེས་ཀྱི་དགོངས་པ་རྒྱུན་འཛིན་དང་དར་སྤེལ་གཏོང་བ་ནི་བོད་བརྒྱུད་ནང་བསྟན་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་སྤྱི་ཚོགས་དང་དེ་བས་ལེགས་པའི་སྒོ་ནས་འཚམ་མཐུན་ཡོང་རྒྱུར་སྐུལ་འདེད་གཏོང་བ་དང་། བོད་བརྒྱུད་ནང་བསྟན་གྱིས་རྒྱལ་ཁབ་གཅིག་གྱུར་ལ་དེ་བས་ལེགས་པའི་སྒོ་ནས་སྲུང་སྐྱོང་བྱ་རྒྱུར་སྐུལ་འདེད་གཏོང་བ། ཀྲུང་ཧྭ་མི་རིགས་ཀྱི་མཐུན་སྒྲིལ་ལ་སྐུལ་འདེད་གཏོང་བ། སྤྱི་ཚོགས་ཞི་མཐུན་དང་བརྟན་ལྷིང་ལ་ཞབས་འདེགས་ཞུ་རྒྱུར་སྲུང་སྐྱོང་བྱེད་པ་བཅས་ལ་གལ་འགངས་ཤིན་ཏུ་ཆེ་བའི་ནུས་པ་ལྡན་ཡོད། 《པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ》དེར་ལོ་རྒྱུས་ཀྱི་དོན་སྙིང་ཟབ་མོ་ལྡན་ཡོད། གསུང་འབུམ་དེབ་གཟུགས་སུ་བཏོན་པ་དེ་ནི་དུས་རབས་ཀྱི་རླབས་རྒྱུན་དང་འཚམ་པ་དང་། རྒྱ་ཆེའི་དད་ལྡན་མང་ཚོགས་དང་། ཆོས་ལུགས་ལས་རིགས་ཀྱི་རིགས་གཅིག་མཁས་ཅན་དང་མཁས་དབང་། ལྷག་པར་དུ་གཞོན་རབས་པ་ཚོ་བཅས་ལ་པཎ་ཆེན་སྐུ་ཕྲེང་རིམ་བྱོན་གྱི་རྒྱལ་གཅེས་ཆོས་གཅེས་ཀྱི་དགོངས་པའི་སྙིང་བཅུད་དེ་བས་སྟབས་བདེ་བ་དང་དེ་བས་བརྒྱུད་རིམ་ལྡན་པའི་སྒོ་ནས་སློབ་སྦྱོང་བྱ་རྒྱུར་སྟབས་བདེ་བསྐྲུན་ཡོད་ཅེས་གསུངས། ཁོང་གིས་བོད་བརྒྱུད་ནང་བསྟན་ལས་རིགས་ཀྱི་མི་སྣ་ཚོས་བོད་བརྒྱུད་ནང་བསྟན་གྱི་རྒྱལ་གཅེས་ཆོས་གཅེས་ཀྱི་སྐྱེས་ཆེན་རིམ་བྱོན་མིག་དཔེར་བཟུང་ནས་ཏང་གི་བཀའ་དྲིན་དྲན་པ་དང་མེས་རྒྱལ་ལ་དྲིན་ལན་འཇལ་ནས་མདོ་སྔགས་ཀྱི་སྙིང་པོར་ཐོས་བསམ་སྒོམ་གསུམ་ཧུར་ཐག་བྱས་ཏེ་འགྲོ་བ་ཀུན་ལ་བདེ་བ་བསྐྲུན་དགོས་པའི་ཐུགས་རེ་གནང་བ་རེད།

    ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་སྤྱི་ཁྱབ་ལས་འཛིན་དགྲ་འདུལ་གྱིས《ཀྲུང་ཧྭའི་རིག་མཛོད་ཆེ་མོ། བོད་ཡིག་བམ་པོ》དང《པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ》རྩོམ་སྒྲིག་པར་སྐྲུན་གྱི་གནས་ཚུལ་ངོ་སྤྲོད་གནང་ཞིང་། 《ཀྲུང་ཧྭའི་རིག་མཛོད་ཆེ་མོ། བོད་ཡིག་བམ་པོ》ནི་2011ལོར་ཆོག་མཆན་སྤྲད་དེ་རྩོམ་སྒྲིག་བྱེད་འགོ་ཚུགས་པའི་རྒྱལ་ཁབ་ཀྱི“ལོ་ལྔ་ཚན་བཅུ་གཉིས་པའི”གཙོ་གནད་རིག་གནས་འདུ་འགོད་ཅིག་དང་། 《ཀྲུང་ཧྭའི་བཀའ་བསྟན་འགྱུར》(བོད་ཡིག་པར་གཞིའི)རྣམ་གྲངས་རྗེས་ཀྱི་ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཀྱིས་སྒྲིག་འཛུགས་དང་ལག་བསྟར་བྱས་པའི་རང་རྒྱལ་གྱིས་ཕུལ་བྱུང་རིག་གནས་སྲུང་སྐྱོང་དང་དར་སྤེལ་བཏང་བའི་མཚོན་རྟགས་རང་བཞིན་གྱི་འདུ་འགོད་ཅིག་རེད། 《ཀྲུང་ཧྭའི་རིག་མཛོད་ཆེ་མོ། བོད་ཡིག་བམ་པོ》ཡི་ནང་ད་ཆ་གཏན་འཁེལ་བྱས་པའི་རྣམ་གྲངས་ཀྱི་གྲས་སུ་གསུང་འབུམ་ཁག་36དང་བམ་པོ་1000ལྷག་ཙམ་ཡོད་པ་རེད། མིག་སྔར《ས་སྐྱ་གོང་མ་རྣམ་ལྔའི་གསུང་འབུམ》བམ་པོ་30དང་། 《མར་པ་ལོ་ཙཱ་བ་དང་། མི་ལ་རས་པ། དྭགས་པོ་ལྷ་རྗེ་བཅས་ཀྱི་གསུང་འབུམ》བམ་པོ་12《རྗེ་ཙོང་ཁ་པའི་གསུང་འབུམ》བམ་པོ་18《རྒྱལ་ཚབ་རྗེའི་གསུང་འབུམ》བམ་པོ་8 《མཁས་གྲུབ་རྗེའི་གསུང་འབུམ》བམ་པོ་12《པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ》བམ་པོ་39བཅས་ཁྱོན་བམ་པོ་119ལེགས་སྒྲིག་པར་སྐྲུན་བྱས་ཡོད། ཉེ་ཆར་ད་དུང《ཀློང་ཆེན་གསུང་འབུམ》དང《ཇོ་ནང་པ་ཏཱ་ར་ནཱ་ཐའི་གསུང་འབུམ》《འཇུ་མི་ཕམ་གྱི་གསུང་འབུམ》《ཡོངས་འཛིན་ཡེ་ཤེས་རྒྱལ་མཚན་གྱི་གསུང་འབུམ》《འཇམ་དབྱངས་མཁྱེན་བརྩེ་དབང་པོའི་གསུང་འབུམ》《དཀོན་མཆོག་འཇིགས་མེད་དབང་པོའི་གསུང་འབུམ》《ཀོང་སྤྲུལ་ཡོན་ཏན་རྒྱ་མཚོའི་གསུང་འབུམ》《འཇིགས་མེད་དམ་ཆོས་རྒྱ་མཚོའི་གསུང་འབུམ》སོགས་གཅིག་རྗེས་གཉིས་མཐུད་ངང་པར་སྐྲུན་བྱ་རྒྱུ་དང་། 《པཎ་ཆེན་སྐུ་ཕྲེང་རིམ་བྱོན་གྱི་གསུང་འབུམ》ནི《ཀྲུང་ཧྭའི་རིག་མཛོད་ཆེ་མོ། བོད་ཡིག་བམ་པོའི》གྲུབ་ཆ་གལ་ཆེན་གྱི་གྲས་ཤིག་རེད།

    --    --

    འགན་འཁུར་རྩོམ་སྒྲིག་པ། ཉི་མ་ཚེ་རིང་།