[ English ] [ 中文 ]
0891-6325020
དབུ་ཤོག>རྩོམ་རིག་སྒྱུ་རྩལ།>བོད་ལྗོངས་སྒྱུ་རྩལ།
  • ཚེ་རིང་རྣམ་དྲུག་གི་བྱུང་རབས་བརྗོད་པ།

  • ཡོང་ཁུངས།   ​ ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2017-09-07

    ཚེ་རིང་རྣམ་དྲུག་ནི། བྲག་ཚེ་རིང་དང་། མི་ཚེ་རིང་། ཆུ་ཚེ་རིང་། ཤིང་ཚེ་རིང་། བྱ་ཚེ་རིང་། རི་དྭགས་ཚེ་རིང་བཅས་སོ། འདི་དག་ནི་བོད་ལས་སྟོང་ཁུན་ལུགས་ཀྱི་རི་མོ་ལ་སྤྱོད་སྒོ་ཆེ་ཞིང་ནང་རྟེན་ཁྱབ་ཆེ་བ་ཞིག་སྟེ། ཚེ་ལོ་དཔག་མེད་ཀྱི་རང་གཟུགས་ཡིན།

    བྲག་ཚེ་རིང་ནི།

    སྔོན་གྱི་དུས་སུ་མ་ཧཱ་ཙི་ནའི་ཡུལ་གྲུ་ཆེན་པོའི་རྣམ་དག་བདེ་ཆེན་གྱི་ཚལ་ཞེས་བྱ་བ། དབེན་ཞིང་ཉམས་དགའ་བ་སྤྲུལ་པའི་བཟོ་བོས་བྱས་པ་བས་ཀྱང་ཆེས་མཛེས་པའི་ཡུལ་དེའི་དབུས་སུ། བསྐལ་པ་ཆགས་པའི་ཐོག་མར་བྱུང་བའི་བྲག་རི་དུང་དཀར་དབྱིབས་སུ་འཁྱིལ་བའི་རྣམ་པ་ཅན། སྲིད་པའི་འཇིག་པའང་མི་སྙམ་པ་ལྟར་བརྗིད་ཅིང་རབ་ཏུ་བརྟན་པ། སངས་རྒྱས་ཚེ་དཔག་མེད་ཀྱིས་བྱིན་གྱིས་བརླབས་པའི་གནས། རྩེ་མོ་མཁའ་ལ་བསྙེགས་པ། སྐྱེ་བོ་ཕལ་བ་རྒྱུ་བའི་སྐབས་དང་བྲལ་ཞིང་འཆི་མེད་ཚེ་ཡི་སྒྲུབ་ཆུ་རྒྱུན་དུ་འབབ་པ་ཞིག་ཡོད་པ་དེ་ཡིན།

    མི་ཚེ་རིང་ནི།

    གོང་གི་བྲག་དེའི་དྲུང་དུ་འཆི་མེད་ཚེའི་དངོས་གྲུབ་བརྙེད་པ། དབེན་པའི་གནས་དེར་མི་ལོ་སྟོང་ལ་ཉེ་བར་བསྒོམས་པས་འབྱུང་བ་བཞི་ལ་རང་དབང་ཐོབ་པའི་རིག་འཛིན་གྱི་དྲང་སྲོང་ཆེན་པོ་སྨ་ར་དང་སྨིན་མ་དུང་ལྟར་དཀར་ཞིང་། དཀར་ལ་དམར་བའི་མདངས་ཆགས་པ། ཕྱག་གཡས་ཀ་པེད་ཀྱི་ཚེ་བུམ་དར་གྱི་མགུལ་ཆིངས་ཅན་གྱིས་བརྒྱན་པའི་ཕྱག་འཁར་དང་། གཡོན་དུ་མི་ལོ་སྟོང་ལས་སྨིན་པའི་ལྷའི་ཁམ་བུ་བསྣམས་ཏེ་སྦྱིན་པའི་ཚུལ་གྱིས་བཞུགས་པའོ།

    ཆུ་ཚེ་རིང་ནི།

    དྲང་སྲོང་ཆེན་པོ་དེའི་སྐུ་གསུང་ཐུགས་ཀྱི་བྱིན་མཐུ་ལས། རྒྱབ་ཀྱི་བྲག་དུང་འདྲ་བའི་འཁྱིལ་ཁུག་ནས་རྒ་ཤི་མེད་པའི་བཅུད་ལེན། ཡན་ལག་བརྒྱད་ལྡན་ཚེའི་སྒྲུབ་ཆུ་རྒྱུན་མི་ཆད་པར་སྐྱེ་དགུའི་ཚེ་སྲོག་འཚོ་བའི་གཉེན་དུ་འབབ་པ་དེའོ།

    ཤིང་ཚེ་རིང་ནི།

    ཚེ་རིང་བའི་ཤིང་མྱ་ངན་མེད་པའི་རྩ་བ་བརྟན་ཅིང་ཡལ་ག་དང་ལོ་འདབ་རྒྱས་པ། མེ་ཏོག་གིས་མཛེས་ཤིང་འབྲས་བུ་ཁུར་དུ་ལྕི་བ། འགྲོ་ཀུན་ཚ་གདུང་སེལ་བྱེད་ཀྱི་གཉེན་དུ་བརྗིད་པ། དེའི་བསིལ་གྲིབ་རེག་པའམ་འབྲས་བུ་མྱོང་བའི་སྐལ་བ་ཙམ་ཐོབ་ནའང་ཚེ་བསྲིངས་ཏེ་ཚེ་ལོ་མཐར་ཕྱིན་པར་འགྱུར་བ་དེའོ།

    བྱ་ཚེ་རིང་ནི།

    དྲང་སྲོང་ཆེན་པོ་དེའི་ཁྱམས་ཀྱི་ར་བ་ན། རྒྱུན་པར་ཟང་ཟིང་གི་སྦྱིན་པ་དང་མི་འཇིགས་པ་སྐྱབས་ཀྱི་སྦྱིན་པའི་གཡབ་མོ་ལ་བརྟེན་ནས། སྤུ་སྡུག་འདབ་ཆགས་ཚོགས་ཀྱང་འདུ་བར་གྱུར་བ་ལས། ལྷ་བྱ་ཁྲུང་ཁྲུང་གངས་ལ་ཟླ་འོད་ཕོག་པ་ལྟར་ཁ་དོག་མཛེས་ཤིང་བཟང་བ། མགྲིན་པ་དང་རྐང་པ་རིང་བ། དཀར་ནག་མངོན་པར་བཀྲ་ཞིང་རིན་ཆེན་གྱི་ཏོག་དམར་པོས་སྤྱི་གཙུག་སྤུད་པ་ཟུང་ཡོད་པ་དེའོ།

    རི་དྭགས་ཚེ་རིང་ནི།

    དྲང་སྲོང་གང་དེའི་བཞུགས་གནས་དང་མི་རིང་བའི་སར་སྤང་གཞོང་གཡུའི་མེ་ལོང་འདྲ་བ་ལ་རི་དྭགས་རུ་རུའམ་ཤྭ་བ་རྭ་བཅུ་ཡོངས་སུ་རྒྱས་པ་ཡུ་མོ་དང་རྩེན་བཞིན་དུ་འགྲོགས་ཤིང་བག་ཕེབས་ཏེ་རྩྭ་ཆུར་ལོངས་སྤྱོད་པ་རྣམས་ཀྱང་དྲང་སྲོང་གི་བྱིན་རླབས་ལས་རྒ་ཤི་སྤངས་པའི་བདེ་བ་ལ་མངོན་སུམ་རེག་པར་གྱུར་པ་དེའོ།

    --    --

    འགན་འཁུར་རྩོམ་སྒྲིག་པ། སྐལ་བཟང་གྲགས་པ།