[ English ] [ 中文 ]
0891-6325020
དབུ་ཤོག>རྩོམ་རིག་སྒྱུ་རྩལ།>མི་སྣ།
  • ལྷ་འབྲི་བ་གྲུབ་མཆོག་གི་གཏམ་རྒྱུད།

  • ཡོང་ཁུངས།   ​ ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2017-09-30

    640.webp.jpg

    གྲུབ་མཆོག་གིས་ཐང་ག་བཞེངས་བཞིན་པ།

    གྲུབ་མཆོག་གི་སྨི་ངོས་གྲུ་100ལྷག་ཙམ་ཡོད་པའི་ཐང་ག་བཞེངས་ཁང་དུ་བོད་རུམ་བཏིང་འདུག་ལ་མེ་ཏོག་ཁོག་མ་ཁ་ཤས་བསྒྲིགས་འདུག་པས། བལྟས་པ་ཙམ་གྱིས་སྐྱིད་སྣང་དོད་པ་ཞིག་འདུག

    ཁོང་གིས་ང་ཚོ་ཚོམས་ཆེན་དུ་འབོད་ནས་ཇ་བླུགས་པ་དང་འབྲེལ་རང་ཉིད་ཀྱི་གཏམ་རྒྱུད་བརྗོད་བྱུང་། ལོ་28ལ་སླེབས་པའི་གྲུབ་མཆོག་ནག་ཆུའི་འབྲོག་དུད་ཅིག་ཏུ་སྐྱེས་པ་དང་ཆུང་དུས་ནས་ཐང་གར་དགའ་པོ་ཡོད་ལ། ལྷག་པར་དུ་ཐང་གའི་ངོས་ཀྱི་ཕྱག་རྒྱ་སྣ་ཚོགས་ཀྱི་སྐུ་དང་རྣམ་པར་བཀྲ་བའི་ཚོས་གཞིར་དེ་བས་དགའ་པོ་ཡོད།

    ལོ་12ལ་སླེབས་སྐབས་ཁོང་གིས་ཀརྨ་སྒར་བྲིས་ལུགས་ཀྱི་ཐང་གའི་རྒྱུན་འཛིན་པ་སངས་རྒྱས་ཕུན་ཚོགས་སློབ་དཔོན་ལ་བསྟེན་ནས་ཐང་ག་འབྲི་རྩལ་གྱི་རྨང་གཞི་སྦྱངས། ལོ་ལྔ་སོང་རྗེས་ཡང་དགེ་རྒན་བློ་བཟང་ལགས་ཀྱི་ས་ནས་འཇིམ་སྐུ་བཞེངས་སྟངས་སྦྱངས། 2009ལོར་སྨན་ཐང་ལུགས་ཀྱི་ཐང་གའི་རྒྱུན་འཛིན་པ་བསྟན་པ་རབ་བརྟན་གྱི་དྲུང་ནས་སྨན་ཐང་ལུགས་ཀྱི་ཐང་ག་འབྲི་རྩལ་སྦྱོང་འགོ་ཚུགས།

    2015ལོར་སླེབས་སྐབས་གྲུབ་མཆོག་གིས་ལོ་གསུམ་གྱི་རིང་བྲིས་པའི་ཐོན་ཐང《རྡོ་རྗེ་འཆང》ཞེས་པ་ལེགས་གྲུབ་ཟིན།

    ཁོང་གི་ཐང་ག་དེར་རྒྱལ་ཡོངས་དང་། བོད་ལྗོངས། མཚོ་སྔོན་སོགས་ཀྱི་ཐང་གའི་འགྲེམས་སྟོན་ཐོག་བྱ་དགའ་རག་པ་མ་ཟད། ཁོང་རང་ཉིད་ཀྱང་སྐད་གྲགས་ཆོད་འགོ་ཚུགས། ད་བར་ཁོང་གིས་ཐང་ག་དེ་རང་ཉིད་ཀྱི་གཅེས་ནོར་ལྟ་བུར་བརྩི་བ་དང་གཞན་གྱིས་སྒོར་ཁྲི་130སྤྲད་དེ་འཚོང་རོགས་ཞེས་བཤད་ཀྱང་བཙོངས་མེད།

    “སྐབས་དེ་དུས་སློབ་གྲྭ་ཐོན་མ་ཐག་ཡིན་སྟབས། དངུལ་དཀོན་ཙམ་ཡོད། གོང་ཚད་མཐོ་པོ་དེ་འདྲ་སྤྲོད་དུས་འཚོང་འདོད་ཆེན་པོ་བྱུང་། འོན་ཀྱང་ཉིན་གསུམ་ཏག་ཏག་བསམ་བློ་བཏང་རྗེས་འཚོང་ཕོད་མ་བྱུང” ཐང་ག་དེར་རང་ཉིད་ཀྱི་རྩལ་ཡོད་ཚད་བཏོན་ཡོད་པ་མ་ཟད། རྒན་བསྟན་པ་རབ་བརྟན་ལགས་ཀྱིས་ཐང་ག་དེ་ཡག་པོ་ཇི་འདྲ་ཡོད་ལུགས་བྲིས་ཡོད་པས་འཚོང་ག་ལ་ཕོད་ཅེས་བརྗོད་བྱུང་།

    ཐང་ག་ཞིག་བཞེངས་པར་ཉུང་ན་གཟའ་འཁོར་གསུམ་ནས་ལྔ་བར་དང་མང་ན་ལོ་གསུམ་ནས་ལྔ་བར་འགོར་གྱི་ཡོད་པས་སྙིང་རུས་ཆེན་པོ་དགོས་ཤིང་། གལ་ཏེ་དགའ་ཕྱོགས་དང་དད་སེམས་མེད་ན། མཐའ་འཁྱོལ་དཀའ་མོ་རེད། གྲུབ་མཆོག་གིས་རང་ཉིད་ཀྱི་དགེ་ཕྲུག་ལ་སློབ་ཚན་འཁྲིད་སྐབས་ངེས་པར་དུ་སེམས་གནས་ཐུབ་པ་བྱེད་དགོས། ལམ་སེང་མིང་གྲགས་ཐོབ་ཐབས་མི་བྱེད་པར་སྔོན་ལ་ཐང་ག་བཞེངས་སྟངས་དང་ཚོན་མདོག་སྲེ་སྟངས་ཡག་པོ་སྦྱོང་དགོས་ཞེས་ཁ་ཏ་བསླབ་བྱ་བྱེད་ཀྱི་ཡོད།

    ཁོང་གིས་དགེ་ཕྲུག་ཚོར་སློབ་ཚན་ཁྲིད་པ་དང་ཆབས་ཅིག་རྒྱུན་དུ་ཐང་ག་གསར་རྩོམ་དང་གསར་གཏོད་ཀྱི་ལས་ལ་གཞོལ་ཞིང་། ཁོང་གི་ཐང་གར་ཀརྨ་སྒར་བྲིས་ལུགས་དང་སྨན་ཐང་ལུགས་ཀྱི་འབྲི་རྩལ་གྱི་ཉམས་འགྱུར་ལྡན་པ་མ་ཟད། དེང་རབས་སྒྱུ་རྩལ་གྱི་མཚོན་ཐབས་དང་རྒྱ་རིགས་ཀྱི་སྲོལ་རྒྱུན་རི་མོའི་གཞི་རྒྱུ་ཡང་བརྩམས་ཆོས་ནང་མཉམ་དུ་བསྡུས་ཡོད།

    མིག་རྒྱང་རིང་དུ་གཏོང་བ་དང་དགེ་ཕྲུག་ཡག་པོ་སྐྱོང་ཆེད། ཁོང་རྟག་ཏུ་ས་གནས་ཁག་ཏུ་མཛེས་ལྗོངས་ལ་ལྟ་བར་བསྐྱོད་དེ་འགྲེམས་སྟོན་ལ་བལྟས་ནས་གསར་གཏོད་ཀྱི་རིག་པའི་ཀློང་བརྡོལ་ཐབས་བྱེད་པ་དང་འབྲེལ། རྒྱུན་དུ་སློབ་མ་ཚོ་ལྷ་སའི་དགོན་སྡེ་ཁག་ཏུ་ལྟ་སྐོར་དང་ལྡེབས་རིས་ལྟ་བར་ཁྲིད་ནས་རི་མོའི་སྒྱུ་རྩལ་དང་གསར་རྩོམ་གྱི་ཐབས་རྩལ་སློབ་ཀྱི་ཡོད་པས་དགེ་ཕྲུག་ཚོས་ཧ་ཅང་དགའ་པོ་བྱེད་ཀྱི་ཡོད།

    མ་འོངས་པའི་ཐད་གྲུབ་མཆོག་ལ་རང་ཉིད་ཀྱི་བསམ་འཆར་དང་འཆར་གཞི་ཞིག་ཡོད་པ་སྟེ། སང་ལོ་སྒེར་གྱི་ཐང་གའི་འགྲེམས་སྟོན་ཞིག་གཉེར་རྩིས་ཡོད་པ་དེ་རེད།

    640.webp (1).jpg

    དགེ་རྒན་ཆེ་མོ་བ་བསྟན་པ་རབ་བརྟན(གཡོན)དང་གྲུབ་མཆོག་མཉམ་དུ་བརྒྱབ་པའི་འདྲ་པར།

    642.webp.jpg

    གྲུབ་མཆོག་གིས་དགེ་ཕྲུག་རིན་ཆེན་པ་སངས(མཚོ་སྔོན་ཁྲི་ཀ་ནས་ཡོང་བ)ཀྱི་ཐོན་ཐང་ལ་མཛུབ་ཁྲིད་བྱེད་བཞིན་པ།

    643.webp.jpg

    གྲུབ་མཆོག་གིས་ལྷོ་ཁ་གྲོང་ཁྱེར་ལྷོ་བྲག་རྫོང་ནས་ཡིན་པའི་དགེ་ཕྲུག་གསང་སྔགས་བསྟན་འཛིན(དཀྱིལ)དང་ཡུན་ནན་བདེ་ཆེན་ནས་ཡོང་བའི་དགེ་ཕྲུག་པད་མ་དོན་གྲུབ(གཡས)གཉིས་དང་ཐང་གའི་སྐོར་ལ་སྤེལ་རེས་དང་སློབ་སྦྱོང་བྱེད་བཞིན་པ།

    644.webp.jpg

    གྲུབ་མཆོག་ལ་ཐོབ་པའི་གཟེངས་བསྟོད་ལག་ཁྱེར།

    646.webp.jpg

    གྲུབ་མཆོག་གི་ལོ་ན་ཆུང་ཤོས་ཀྱི་དགེ་ཕྲུག་སྟེ། ནག་ཆུ་ས་ཁུལ་ནས་ཡིན་པའི་ལོ་7ལ་སོན་པའི་བཀྲ་ཤིས་ཟླ་བས་ཐང་གའི་ཤེས་བྱ་སྦྱོང་བཞིན་པ།

    647.webp.jpg

    གྲུབ་མཆོག(གཡོན)དང་དགེ་རྒན་བྱང་ཆུབ་ཕུན་ཚོགས་ཕོ་བྲང་པོ་ཏ་ལའི་མདུན་དུ་བརྒྱབ་པའི་པར་ཡིན་པ།

    --    --

    འགན་འཁུར་རྩོམ་སྒྲིག་པ། སྐལ་བཟང་གྲགས་པ།