[ English ] [ 中文 ]
0891-6325020
དབུ་ཤོག>རྩོམ་རིག་སྒྱུ་རྩལ།>ལེགས་བཤད་འོས་སྦྱོར།
  • ལེགས་པར་བཤད་པ་ཆུའི་བསྟན་བཅོས།

  • ཡོང་ཁུངས།   སེམས་ཀྱི་ཉི་ཟླའི་བོད་ཡིག་དྲ་བ།    |    རྩོམ་པ་པོ།      |    སྤེལ་དུས།   2016-11-23

    མཁྱེན་པའི་གཏིང་མཐའ་མི་མངོན་ཞིང་།།ཐུགས་རྗེའི་ཡིད་བཞིན་ནོར་གྱིས་གཏམས། །

    མཛད་པའི་རླབས་ཕྲེང་གཡོ་བ་ཅན།།ཐུབ་དབང་ཆོས་ཀྱི་རྒྱ་མཚོ་རྒྱལ། །

    རྙོག་བྲལ་དྭངས་པའི་ཆུ་རྒྱུན་གྱིས།།ལུས་ཅན་གདུང་བ་ཞི་བྱེད་ལྟར། །

    ལེགས་བཤད་གསར་པའི་བདུད་རྩི་ཡིས།།བློ་ལྡན་སྐྱེ་བོ་དབུགས་དབྱུང་བྱ། །

    དྲི་བཟང་བསྒོས་པའི་ཆུ་གཙང་དེ།།མཆོད་ཡོན་ཞབས་བསིལ་བསང་གཏོར་སོགས། །

    གང་དུ་བྱས་ཀྱང་ལེགས་པ་ལྟར།།ལེགས་བཤད་གཏམ་ནི་ཀུན་ལ་མཛེས། །

    ལུགས་གཉིས་བླང་དོར་ཤེས་པ་ཡིས།།གནས་སྐབས་མཐར་ཐུག་དོན་འགྲུབ་སྟེ། །

    བརྟག་པ་ཀུན་ལ་མཁས་པ་ཡིས།།དེད་དཔོན་རྒྱ་མཚོར་ཞུགས་པ་བཞིན། །

    ཆུ་ཕྲན་བརྒལ་བར་མི་ནུས་དེས། །རྒྱ་མཚོ་རྐྱལ་གྱིས་ག་ལ་ཆོད། །

    ཡ་རབས་ལུགས་ཀྱང་མི་ཤེས་ན། །ཆོས་ཀྱི་དེ་ཉིད་ཇི་ལྟར་རྟོགས། །

    གཟུར་གནས་རིག་པར་ལྡན་པ་དེས།།གཞན་གྱི་ཡོན་ཏན་ལེན་པར་བྱེད། །

    སྤང་ལྗོངས་གཙང་མའི་དལ་འགྲོ་མ།།ལྷུང་ལྷུང་ཟེར་ཞིང་མེ་ཏོག་འཐུ། །

    ངན་པས་ཕྱོགས་མཐའ་བསྐོར་ན་ཡང་།།སྐྱོན་གྱི་རིགས་རྣམས་སྡུད་པར་བྱེད། །

    ངམ་གྲོག་ས་རལ་ཅན་གྱི་ཆུས།།འདམ་གྱི་སྙིགས་མ་འདྲེན་དང་མཚུངས། །

    ཡོན་ཏན་དང་པོར་སློབ་དཀའ་ལ། །ཤེས་བཞིན་མེད་ན་ཉམས་པ་སླ། །

    ཆུ་ཐིགས་བསགས་པས་འགེངས་དཀའ་ཡང་།།བོ་ན་ཅིག་ཅར་ཉིད་དུ་འཛད། །

    དཀའ་སྤྱད་ཁུར་དུ་འཁྱེར་ནུས་ན། །བྱ་བ་གང་ཡང་དཀའ་བ་མེད། །

    ཆུ་ཡི་ནང་དུ་ཞུགས་པ་དེར། །ཆར་གྱིས་ལྷག་པར་གནོད་མི་འགྱུར། །

    རྒྱུན་ཆགས་བརྩོན་པ་མ་བཏང་བར།།བགས་ཀྱིས་བསྒྲུབས་ན་ཅི་ཡང་འགྲུབ། །

    ཆུ་བོ་དལ་གྱིས་འབབ་པ་ཡིས། །ཡངས་པའི་ས་ཆེན་བསྐོར་ནས་འགྲོ། །

    བྱ་བ་ཆེན་པོ་ཡུན་གྱིས་བསྒྲུབ། །ངང་ཐུང་འབད་པས་མཐར་མི་ཕྱིན། །

    རླུང་ཆེན་དལ་ཡང་རིང་འགྲོ་ལ། །རྦ་རླབས་དྲག་ཀྱང་ཆེར་མི་འགྲོ། །

    བྱ་བ་ཉམས་ཀྱིས་མི་ལྕོགས་ན། །གཞན་གྱིས་རྦད་ཀྱང་བྱར་མི་རུང་། །

    རྐྱལ་མི་ཤེས་ན་གཞན་དག་གིས། །བསྐུལ་ཡང་ཆུ་ནང་ཅི་ཕྱིར་མཆོང་། །

    ཆུ་བོ་ཐུན་མོང་མཆོད་ཡོན་ཏེ། །ཉི་ཟླ་ཐུན་མོང་སྒྲོན་མེ་གསལ། །

    དམ་པ་ཐུན་མོང་གཙུག་རྒྱན་དང་།།དམ་ཆོས་ཐུན་མོང་བདུད་རྩི་ཡིན། །

    དར་ཆེན་གྲུ་གཟིངས་རྒྱ་མཚོའི་རྒྱན།།སྤྲིན་བྲལ་ཟླ་བ་ནམ་མཁའི་རྒྱན། །

    མཁས་པའི་སྐྱེ་བོ་བསྟན་པའི་རྒྱན།།རུ་འདྲེན་དཔའ་བོ་དཔུང་གི་རྒྱན། །

    ཡ་རབས་མཛངས་སྤྱོད་དཔོན་དང་འབངས། །ཕན་ཚུན་ལེགས་ཚོགས་གོང་དུ་སྤེལ། །

    རྒྱ་མཚོ་ཆེ་དང་ཆུ་བོ་རྣམས། །རེས་མོས་ཚུལ་གྱིས་གྲོགས་སུ་འགྱུར། །

    རྗེ་བོ་ངན་དང་གཡོག་ངན་པ། །གཉིས་ཀས་གཉིས་ཀ་རྒུད་བྱེད་དེ། །

    རྫ་གསར་ནང་དུ་ཆུ་བླུགས་ན།།གཉིས་ཀ་ཆུད་ཟོས་བརླག་པར་འགྱུར། །

    ཤེས་རློམ་དབང་ཅན་མང་བ་ཡིས།།ཡུལ་ཁམས་མདུན་གྲོས་འཇིག་འགྱུར་ཏེ། །

    གཡས་གཡོན་ཀུན་ནས་ཆུ་འབུར་བའི།།ས་ལ་མཁར་ཁྱིམ་བརྟན་མི་སྲིད། །

    རྗེ་འབངས་མཐུན་ན་དགྲ་སྡེ་ཡིས། །ཐུབ་དཀའ་སོ་སོར་གྱེས་ན་མིན། །

    རྟ་ཡིས་བརྒལ་དཀའི་ཆུ་བོ་ཡང་། །མང་དུ་གྱེས་ན་ལུག་ཀྱང་བགྲོད། །

    ཆོས་ལྡན་རྒྱལ་པོས་ཁྲལ་བསྡུས་ཀྱང་། །དེ་ཉིད་ཀྱིས་ནི་འབངས་རྣམས་སྐྱོང་། །

    སྤྲིན་ཆེན་རྒྱ་མཚོའི་ཆུ་དྲངས་ཏེ།།དལ་གྱིས་འབེབས་པས་འཛིན་མ་སྐྱོང་། །

    རྒྱལ་ངན་འབངས་ཀྱི་ཟས་ནོར་ཀུན།།ཕྲོགས་ཀྱང་ད་དུང་ལྟོགས་ཤིང་བཀྲེན། །

    རྒོད་མ་ཁ་ཡིས་རྒྱ་མཚོའི་ཆུ།།འཐུང་གིན་རྟག་ཏུ་འབར་དང་མཚུངས། །

    གཙོ་བོ་ངན་པ་རྟག་བཀུར་ཡང་།།གསུག་དང་བྲལ་བ་ཙམ་གྱིས་སྡང་། །

    ཆུ་བོ་ཉིན་ཞག་མང་བསྐོལ་ཀྱང་། །མེ་དང་བྲལ་བའི་མོད་ལ་གྲང་།

    ཁེངས་དྲེགས་གདུག་རྩུབ་ཆེ་བ་ཡི། །དཔོན་ལ་སུ་ཡང་བརྟེན་མི་སྤྲོ། །

    ཤིན་ཏུ་འཁྲུགས་པའི་རྦ་ཀློང་དུ། །ཉ་ལ་སོགས་ཀྱང་སྡོད་མི་བྱེད། །

    བརྩེ་ཞིང་ཕན་གདགས་ནུས་པ་དེར།།སྐྱེ་བོ་ཐམས་ཅད་ངང་གིས་འདུ། །

    ཡིད་བཞིན་གྱི་ནི་རྒྱ་མཚོའི་ངོགས།།འགྲོ་བ་ཀུན་གྱིས་བརྟེན་པར་བྱེད། །

    ཆེ་མཐོ་བརྟེན་པས་དཔལ་ཐོབ་ཀྱང་།།དེ་ལས་ལྷག་པའི་འཇིགས་པ་འབྱུང་། །

    རྒྱ་མཚོ་རིན་ཆེན་འབྱུང་གནས་དེ།།གདུག་ཅན་ན་ཀྲའི་གྲོང་ཡང་ཡིན། །

    རྒྱུས་མེད་མི་ལ་གསར་འགྲོགས་ཀྱིས།།ཡིད་བརྟན་བྱེད་པ་ཉམས་པའི་རྒྱུ། །

    རྒྱལ་སྲས་ངང་པའི་སྡེ་དཔོན་ཡང་།།མཚོ་གསར་བརྟེན་པས་རྙི་ཡིས་ཟིན། །

    རྣ་བ་སྲབ་པའི་མཛའ་གཅུགས་དེ།།རིང་མིན་དབྱེན་གྱིས་སོ་སོར་གཏོང་། །

    ཆུ་དང་འོ་མ་རོ་གཅིག་ཏུ། །འདྲེས་པ་ངང་པའི་མཆུ་ཡིས་འབྱེད། །

    མཁས་པས་བདེན་བརྫུན་བརྟགས་ནས་བྱེད། །བླུན་པོ་གྲགས་པའི་རྗེས་སུ་རྒྱུག །

    ཆུ་ནང་ཅལ་གྱི་སྒྲ་བསྒྲགས་པས།།གཅན་གཟན་རི་དྭགས་ཕལ་ཆེར་བྲོས། །

    འགྲོགས་ན་ལེགས་སྤྱོད་འཕེལ་འགྲིབ་ལས། །དགེ་དང་སྡིག་པའི་གྲོགས་འགྱུར་ཏེ། །

    དྭངས་བསིལ་འདྲ་ཡང་ཕན་གནོད་ལས།།སྨན་གྱི་ཆུ་དང་དུག་ཆུར་འཇོག །

    སྡིག་གྲོགས་གཡེམ་མའི་འཛུམ་དཀར་ལས།།ཤ་ཚའི་གདུག་རྩུབ་ཁྲོ་གཉེར་བཟང་། །

    ཐན་ཁྱེར་སྤྲིན་གྱི་མདོག་དཀར་ཡང་།།ཆུ་ལྡན་སྤྲིན་ནག་ཞིང་པའི་གསོས། །

    བློ་ལྡན་རང་བཞིན་བཟང་པོ་དེ།།མཆོག་དམན་བར་མ་ཀུན་གྱིས་བསྟེན། །

    འཇུག་ངོགས་བདེ་བའི་རྫིང་བུ་ལ།།སྐྱེ་བོ་ཐམས་ཅད་དགའ་བཞིན་འཇུག །

    --    --

    འགན་འཁུར་རྩོམ་སྒྲིག་པ། ཉི་ཆོས།