ཉེ་བའི་ལོ་ཤས་རིང་། ལྷོ་ཁ་གྲོང་ཁྱེར་གྱིས་འབྲུ་རིགས་ཀྱི་ཐོན་ནུས་མཐོ་རུ་གཏོང་བ་དེ་དམིགས་ཚད་ཨང་དང་པོར་བརྩིས་ཏེ“མང་ཚོགས་ལ་བརྟེན་ནས་ཚད་གཞི་མཐོ་བའི་ས་ཞིང་འཛུགས་སྐྲུན་དང་མང་ཚོགས་ཀྱི་ཆེད་དུ་ཚད་གཞི་མཐོ་བའི་ས་ཞིང་ཡག་པོ་སྐྲུན་པ”འགོ་འཛུགས་སར་བྱེད་པ་དང་བྱེད་ཐབས་སྣ་ཚོགས་སྤྱད་དེ་ཚད་གཞི་མཐོ་བའི་ས་ཞིང་འཛུགས་སྐྲུན་ལ་སྐུལ་འདེད་བཏང་བ་རེད།

ལོ་བཅུའི་རིང་། ལྷོ་ཁ་གྲོང་ཁྱེར་གྱིས་རིམ་རྩིས་བྱས་ན་ཚད་གཞི་མཐོ་བའི་ས་ཞིང་མུའུ་ཁྲི་66.33བསྐྲུན་པ་དེ་གྲོང་ཁྱེར་ཡོངས་ཀྱི་གྲོང་ཚོ་530ལྷག་ཙམ་དང་འབྲེལ་བ་ཡོད་པས་མང་ཚོགས་ཁྲི་23.5ལྷག་ཙམ་ལ་ཕན་པ་ཐོབ་ཡོད་པ་རེད། དེ་དང་ཆབས་ཅིག་ལྷོ་ཁ་གྲོང་ཁྱེར་གྱི་ཚད་གཞི་མཐོ་བའི་ས་ཞིང་འཛུགས་སྐྲུན་རྣམ་གྲངས་ཁུལ་དུ་ཐག་ཉེ་ས་དང་སྟབས་བདེ་སའི་མང་ཚོགས་ཁྲི་5ལྷག་ཙམ་བསྡུས་པས་ཞིང་འབྲོག་མང་ཚོགས་ཁྱིམ་གྱི་སྒོ་རྩར་ལས་ཞུགས་ཐུབ་པ་དང་དངུལ་སྨར་ཡོང་འབབ་སྒོར་ཁྲི་2400ལྷག་ཙམ་བྱུང་ཡོད་པ་རེད།

ཚད་གཞི་མཐོ་བའི་ས་ཞིང་འཛུགས་སྐྲུན་རྣམ་གྲངས་ལག་བསྟར་བྱས་པ་བརྒྱུད། ལྷོ་ཁ་གྲོང་ཁྱེར་གྱིས་དེ་སྔའི་ས་ཞིང་ཆུང་གྲས་ཟླ་སྒྲིལ་བཏང་ནས་ས་ཞིང་ཆེན་པོ་དང་ཁོད་སྙོམས་ཡུག་སྦྲེལ་བྱས་པས“ས་ཞིང་གྲུ་བཞི་དང་། ནགས་དྲ་ཆགས་པ། འགྲོ་ལམ་འབྲེལ་མཐུད། ཆུ་ཡུར་མཉམ་འདྲེན། ཞོད་སྐྱོན་འགོག་པ། ཐན་སྐྱོན་སེལ་བ”བཅས་ཀྱི་ཚད་གཞི་མཐོ་བའི་བླང་བྱ་མངོན་འགྱུར་བྱུང་སྟེ་རྨོ་ཞིང་སོར་འཇོག་དང་། ས་སྦོལ་རྒྱག་པ། སྔོ་ལུད་འདེབས་པ། སྐྱེ་ལྡན་ལུད་མང་དུ་གཏོང་བ་སོགས་ཀྱི་བྱེད་ཐབས་སྤྱད་པ་བརྒྱུད་གྲོང་ཁྱེར་ཡོངས་ཀྱི་རྨོ་ཞིང་གི་ཆ་སྙོམས་སྤུས་ཚད་རིམ་པ་2019ལོའི་8.21ནས་2021ལོའི་8.04བར་མཐོ་རུ་ཕྱིན་ཡོད་པ་རེད།

ཚད་གཞི་མཐོ་བའི་ས་ཞིང་བསྐྲུན་རྗེས། ལྷོ་ཁ་གྲོང་ཁྱེར་གྱི་ལོ་རེའི་འབྲུ་རིགས་ཐོན་འབབ་2012ལོའི་ཏུན་ཁྲི་14.71ནས་2021ལོའི་ཏུན་ཁྲི་16.8བར་མང་དུ་ཕྱིན་པ་དང་མུའུ་རེར་ཆ་སྙོམས་ཐོན་འཕར་རྒྱ་མ་52ཟིན་ནས་ཡོང་འབབ་སྒོར་ཁྲི་3000ལྷག་ཙམ་ཟིན་ཡོད་པ་རེད།

ཚད་གཞི་མཐོ་བའི་ས་ཞིང་འཛུགས་སྐྲུན་བྱས་པ་བརྒྱུད་ལྷོ་ཁ་གྲོང་ཁྱེར་རྣམ་གྲངས་ཁུལ་གྱི་འཕྲུལ་རྨོའི་ལམ་ཤར་གཏོང་ཐུབ་ཚད་95%ཡན་ཟིན་པ་དང་། གྲོང་ཁྱེར་ཡོངས་ཀྱི་ས་ཞིང་རྨོ་འདེབས་བརྔ་བསྡུ་ཕྱོགས་བསྡུས་ཀྱི་འཕྲུལ་ཆས་ཅན་2012ལོའི་65%ནས་2022ལོའི་75%བར་མཐོ་རུ་ཕྱིན་པ། རྨོ་འདེབས་ངལ་རྩོལ་ནུས་ཤུགས་འདོན་ཚད་ཟམ་མི་ཆད་པར་གྲོན་ཆུང་ཐུབ་ནས་མ་གནས་དམའ་རུ་ཕྱིན་པ་མ་ཟད། ཐོན་འབབ་ཀྱང་མང་དུ་ཕྱིན་ཡོད་པ་བཅས་རེད།