[ English ] [ 中文 ]
0891-6325020
དབུ་ཤོག>ལོ་རྒྱུས་ས་ཁམས།>ལོ་རྒྱུས་མི་སྣ།
  • བོད་ཀྱི་རྩལ་པོ་ཆེ་མི་བདུན།

  • ཡོང་ཁུངས།   ​ ཁམས་པའི་གསར་འགྱུར་དྲ་བའི་ལེ་ཚན།    |    རྩོམ་པ་པོ།      |    སྤེལ་དུས།   2016-05-17

    དེ་ཡང་སྤྱི་ལོའི་དུས་རབས་བདུན་པའི་མཇུག་ཙམ་ལ། བོད་དུ་རྩལ་པོ་ཆེ་མི་བདུན་བྱུང་མྱོང་ཞེས་ས་ཁྱབ་རྡོ་ཁྱབ་ཏུ་བཀོད་ཡོད་པ་དེ་བོད་རྒྱལ་སུའི་རིང་ལ་ཇི་ལྟར་བྱུང་ཞེ་ན། དེ་ནི་བོད་ཀྱི་རྒྱལ་རབས་སོ་བཞི་པ་མང་སྲོང་མང་བཙན་གྱི་སྐབས་སུ་བྱུང་ཞིང་། སྐབས་དེར་རྒྱལ་བློན་འབངས་གསུམ་སོགས་མི་སྟོང་ཕྲག་མང་བོ་ཕྱོགས་བཞི་མཚམས་བརྒྱད་ནས་ལྷན་དུ་འདུས་ཏེ། རྣམ་པ་རྒྱ་ཆེ་བའི་སྟོབས་རྩལ་འགྲན་ཞིང་འགྲན་བསྡུར་དེའི་སྟེང་དུ།སྟོབས་ལྡན་རྩལ་པོ་ཆེ་མི་བདུན་བྱུང་ཞིང་། དེ་དག་གི་སྟོབས་རྩལ་གྱི་གྲགས་པ་རྣམས་སྐབས་དེར་བོད་ཁམས་ཡོངས་ལ་ཁྱབ་པས། ཁོང་རྣམ་པའི་སྙན་གྲགས་རེ་རེ་བཞིན་རྗེས་རབས་པ་དག་གིས་བོད་ཀྱི་ལོ་རྒྱུས་དེབ་ཐེར་དུ་བཀོད་ནས་ད་ལྟ་ང་ཚོ་རྗེས་རབས་པ་རྣམས་ཀྱི་མཐོང་བྱེད་ཡུལ་དུ་གྱུར་ཡོད་ལ།  འདིར་རྩལ་ཆེན་དེ་དག་གིས་བློ་ཡུལ་ལས་འདས་པའི་ནུས་རྩལ་ཅི་ཞིག་བཏོན་པ་མཚམས་སྦྱོར་ཙམ་བྱེད་ན།

    1.jpg

      དང་པོ་སྟོབས་རྩལ་འགྲན་ཟླ་མེད་པའི་འགོས་གཡག་ཆུང་གིས། ཤ་བོའི་བླུད་པུ་སྟེ་ཤ་ལྤགས་བུབས་བཤུས་ཀྱི་རྐྱལ་བ་བྱེ་མས་བཀང་བ་ཞིག་ཚོགས་ཐོག་ཏུ་ཀླད་ལ་བསྐོར་བ་དང་།

    2.jpg

    གཉིས་པ་ལུས་སྟོབས་ལྡན་པའི་རྔོག་རིང་ལ་ནག་པོས། གླང་པོ་ཆེ་ཆེན་པོ་ཞིག་ཡར་ལ་བཏེགས།

    3.jpg

    གསུམ་པ་ལུས་རྩལ་ཆེ་བའི་རྔོག་གླིང་ཁམས་ཀྱིས། གཡག་དྲུས་པོ་ཆེ་སྟེ་གཡག་རྒོད་ན་སོ་དར་ལ་བབ་ཡོད་པ་ཞིག་འདེགས་ཐུབ་པ་བྱུང་།

    4.jpg

    བཞི་པ་མཐེབ་རྩལ་གླིང་ལ་གྲགས་པའི་དབས་རྒོད་བཙན་གྱིས། མིག་རྒྱང་ཐག་གསུམ་སྟེ་མིག་གིས་མཐོང་ཚད་ཀྱི་རྒྱང་ཐག་གསུམ་གྱི་རིང་ལ་མདའ་རྒྱང་སླེབས་ཐུབ་པ་བྱུང་།

    5.jpg

    ལྔ་པ་མཐེབ་རྩལ་འགྲན་ཟླ་མེད་པའི་གནོད་རྒྱལ་མཚན་གྱིས། མདའ་མོ་སྟེའུ་ཁ་མས། བྱ་ཁྲ་སྟེ་བྱ་དང་བྱེའུ་གསོད་པའི་བྱ་གླག་རོག་དང་བྱ་ཁྲའི་རྐེད་པ་བཅད་ནས་ཚོགས་པའི་དཀྱིལ་དུ་ལྷུང་བར་བྱས།

    6.jpg

    དྲུག་པ་ཤུགས་རྩལ་འགྲན་མེད་ཅོག་རོ་འབྲོང་གཤོར་གྱིས། འབྲོང་ཐུར་རྒྱུགས་གྱེན་དུ་འཐེན་ནུས་པ་ཞིག་བྱུང་།

    7.jpg

    བདུན་པ་སྟོབས་ལྡན་གནོད་ཁྲི་བདུན་གཡུ་བྱིན་གྱིས། རྟ་བཟང་པོ་ཤུགས་ཚད་དཔོག་དཀའ་བ་ཞིག་གཡང་སར་མཆོངས་པ་གྱེན་དུ་འདྲེན་པ་བཅས་དཔའ་རྩལ་འདྲ་དང་མི་འདྲ་བ་འགྲན་ཟླ་དང་བྲལ་བ་དེ་དག་ངོམས་པས། དེར་ཚོགས་ཀྱི་རྒྱལ་བློན་འབངས་གསུམ་རྣམས་ཧ་ལས་ཤིང་ཡ་མཚན་པར་གྱུར། དེ་ནས་བཟུང་བོད་གངས་ཅན་གྱི་རྩལ་པོ་ཆེ་མི་བདུན་ཞེས་ས་ལ་རླུང་ལྟར་དུ་གྲགས་སོ། །

    --    --

    འགན་འཁུར་རྩོམ་སྒྲིག་པ། སྐལ་བཟང་གྲགས་པ།