[ English ] [ 中文 ]
0891-6325020
དབུ་ཤོག>ལོ་རྒྱུས་ས་ཁམས།>དོན་ཆེན་ལོ་ཚིགས།
  • སྤྱི་ལོ་1127མེ་ལུག

  • ཡོང་ཁུངས།   ​ ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2016-10-28

    སྤྱི་ལོ་1127མེ་ལུག

    ༡.ཁ་ཆེ་པཎ་ཆེན་ཤཱཀྱ་ཤྲི་བྷ་དྲ་ནི། ཡབ་ཚོང་དཔོན་ཆེན་པོ་ས་མ་ཛ་ཡའི་སྲས་སུ་ཀསྨིར་སྐུ་འཁྲུངས། དགུང་ལོ་བཅུ་ནས་རིག་པའི་གནས་ལ་སྦྱང་པ་ལེགས་པར་མཛད། དེ་རྗེས་རྒྱ་གར་ཤར་ཕྱོགས་སུ་ཕེབས་ཏེ་ཚད་མ་དང་གསང་སྔགས་ཀྱི་ཆོས་སོགས་རིག་པའི་གནས་ལྔར་སྦྱང་པ་མཐར་ཕྱིན་མཛད་དེ་པཎྜི་ཏ་ཆེན་པོར་གྱུར། དེ་ནས་རྒྱ་གར་དུ་ཁ་ཆེའི་དམག་གིས་ནང་པའི་དགོན་སྡེ་མང་པོ་གཏོར་བས་བོད་དུ་བྲོས་ཕེབས། ཁྲོ་ཕུ་ལོ་ཙཱ་བའི་ཕེབས་རོགས་འོག་རིམ་བཞིན་མཚུར་ཕུ་དང་། ལྷ་སར་ཕེབས། འཛམ་གླིང་ན་གྲགས་ཆེ་བའི་མཚུར་ཕུའི་བྱམས་པའི་སྐུ་བརྙན་ཆེན་པོ་བཞེངས། བསྟན་བཅོས་མང་དུ་བསྒྱུར། བོད་དུ་ལོ་བཅུ་ཙམ་བཞུགས་རིང་བསམ་ཡས་དང་། མཆིམས་ཕུ། རྭ་སྒྲེང་། ལྷོ་བྲག་སོགས་དོན་གནས་མང་པོར་ཞབས་བཅགས་ཏེ་བསྟན་པ་རྒྱ་ཆེར་སྤེལ། དེ་ནས་རྒྱ་གར་གྱི་ཡུལ་གྲུ་ཀསྨིར་ཕྱིར་ཕེབས། དགུང་ལོ་དགུ་བཅུ་གོ་དགུར་ཕེབས་ཏེ་མེ་ཁྱི་(1226)ལོར་དགོངས་པ་གཞན་དོན་དུ་གཤེགས།

    ༢.འབའ་རོམ་བཀའ་བརྒྱུད་པའི་སྲོལ་གཏོད་པ་དར་མ་དབང་ཕྱུག་ནི། ཡབ་སྟོན་པ་འབྱུང་གནས་བློ་གྲོས་དང་། ཡུམ་ཇོ་མོ་ལོ་ཆུང་གཉིས་ཀྱི་སྲས་སུ་འཕན་ཡུལ་དཀའ་བ་ཡུལ་སྣ་ཞེས་པར་སྐུ་བལྟམས། རྗེ་འདི་ཉིད་ནི་ལོ་རྒྱུས་ཐོག་གྲགས་ཆེ་བའི་བློན་ཆེན་བྲན་ཀ་དཔལ་གྱི་ཡོན་ཏན་གྱི་གདུང་བརྒྱུད་བཅུ་གཅིག་པ་ཡིན། སྐུ་གཞོན་ནུའི་དུས་སུ་མཉམ་མེད་དྭགས་པོ་ལྷ་རྗེ་དང་མཇལ་ཏེ་སློབ་མ་མཛད། བཀའ་བརྒྱུད་པའི་གདམས་ངག་མན་ངག་གཞུང་ལུགས་མང་དུ་གསན་ནས་མཁས་པར་གྱུར། དེ་རྗེས་ཁམས་ཕྱོགས་སུ་ཕེབས་ནས་འགྲོ་དོན་རྒྱ་ཆེར་སྤེལ། དེ་ནས་འབའ་རོམ་དུ་ཕེབས། བྲག་དམར་གྱི་ལྡེབས་སུ་གཙུག་ལག་ཁང་དང་དགོན་པ་ཕྱག་བཏབ། དགེ་འདུན་གྱི་སྡེ་བཙུགས། སློབ་མ་མང་དུ་སྤེལ། དེ་ནས་བཟུང་འབའ་རོམ་བཀའ་བརྒྱུད་ཅེས་པའི་གྲུབ་མཐའ་དར་ཞིང་རྒྱས་པར་སྤེལ།

    ཤར་ཡུལ་ཕུན་ཚོགས་ཚེ་རིང་གིས་རྩོམ་སྒྲིག་བྱས་པའི《བོད་ཀྱི་ལོ་རྒྱུས་ཞིབ་འཇུག་ལ་ཉེ་བར་མཁོ་བའི་ལོ་རྒྱུས་དོན་ཆེན་རེའུ་མིག་རྒྱས་པ་ཀེ་ཏ་ཀ་ཞེས་བྱ་བ་བཞུགས་སོ》ཞེས་པ་ལས་བཏུས།

    --    --

    འགན་འཁུར་རྩོམ་སྒྲིག་པ། སྐལ་བཟང་གྲགས་པ།