[ English ] [ 中文 ]
0891-6325020
དབུ་ཤོག>ཚན་སློབ་འཕྲོད་བསྟེན།>སློབ་གསོའི་ལྡུམ་རྭ།>སློབ་གསོའི་དཔྱད་རྩོམ།
  • སློབ་མར་རྩོམ་འབྲིའི་སློབ་ཚན་ལེགས་པར་ཁྲིད་རྒྱུ་དེ་སློབ་ཁྲིད་ཀྱི་གལ་ཆེའི་གནས་བབ་ཏུ་འཇོག་དགོས་པའི་སྐོར་མདོ་ཙམ་གླེང་བ།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2018-06-24

    རྩོམ་འབྲི་ནི་ཐད་ཀར་བཤད་ན་སློབ་མའི་ཕྱོགས་ཡོངས་ཀྱི་བྱང་ཚད་མཐོར་འདེགས་བྱེད་པའི་གྲུབ་ཆ་གལ་ཆེན་ཞིག་ཡིན་པས། གཤམ་དུ་རང་ལྗོངས་ཀྱི་བོད་ཡིག་དགེ་རྒན་ཚོའི་སློབ་ཁྲིད་བྱེད་ཕྱོགས་ལ་བློ་སྒོ་འབྱེད་ཕྱིར་དང་། ཕན་ཚུན་མྱོང་བ་འདོན་སྤྲོད་དང་། དགེ་མཚན་སྤེལ་རེས། སྐུལ་ལྕག་གཏོང་རེས་སོགས་ཕྱོགས་ཡོངས་ལ་དམིགས་ཏེ། སློབ་མར་རྩོམ་འབྲིའི་སློབ་ཚན་ལེགས་པར་ཁྲིད་རྒྱུ་དེ་གནས་བབ་གལ་ཆེན་ཐོག་འཇོག་དགོས་པའི་སྐོར་རང་ཉིད་ཀྱི་ལྟ་ཚུལ་དང་། གྲོས་འགོ་ཅུང་ཟད་གླེང་བར་འདོད།

    དང་པོ། རྩོམ་འབྲིའི་གནས་བབ་ལ་མཐོང་ཆེན་གང་ལེགས་བྱེད་དགོས་པའི་སྐོར།

    རྩོམ་འབྲི་ནི་མིའི་རིགས་ཀྱིས་རང་བྱུང་ཁམས་སྒྱུར་བཀོད་བྱེད་པ་དང་། རང་ཉིད་ཀྱི་འཚོ་གནས་ཆ་རྐྱེན་ལེགས་སུ་གཏོང་བ། རང་ཉིད་གནས་སའི་སྤྱི་ཚོགས་འདིར་ཤེས་དཔལ་དར་སྤེལ་གཏོང་བ་སོགས་ཀྱི་བྱ་བ་ཐམས་ཅད་ལ་ཁྱབ་པའི་བྱེད་སྒོ་གལ་ཆེན་ཞིག་ཡིན་ལ། རྩོམ་འབྲི་ཁྱིམ་ཚང་དང་མི་སྒེར་ཚང་མར་ཁྱབ་པའི་བྱེད་ལས་ཤིག་ཡིན་པས། ང་ཚོའི་རྩོམ་འབྲིའི་དགོས་མཁོ་དང་དེའི་གནས་བབ་ལ་བསམ་བློའི་ཐད་ནས་ངོས་འཛིན་ལེགས་པོ་བྱེད་དགོས་པ་དང་། བྱ་སྤྱོད་ཀྱི་ཐད་ནས་མཐོང་ཆེན་བྱེད་རྒྱུ་དེ་ཁ་ཚ་དགོས་གཏུགས་ཤིག་ཡིན། མི་ཁག་གཅིག་གིས་ཡི་གེ་སྦྱོང་རྒྱུར་མཐོང་ཆེན་བྱེད་པ་ཙམ་ལས་རྩོམ་འབྲིར་སྣང་ཆུང་བྱེད་ཀྱི་ཡོད་ཅིང་། ཡི་གེ་ཤེས་ནས་གཞན་གྱི་རྩོམ་ཡིག་ཀློག་ཐུབ་ཙམ་དང་། དེ་བཞིན་བརྗེད་ཐོ་འགོད་ཐུབ་པ་ཙམ་བྱུང་ན་འགྲིག་པའི་ངོས་འཛིན་བྱེད་པ་ལས། རྩོམ་ཡིག་འབྲི་རྒྱུར་དོ་ཁུར་གཏན་ནས་བྱེད་ཀྱི་མེད་པས། དེ་ནི་དོན་དངོས་ཐོག་ཡི་གེ་སྦྱངས་པའི་དགོས་འདུན་ལ་ཕྱོགས་ཡོངས་ནས་བསམ་གཞིག་ནན་ཏན་མ་ཐུབ་པའི་ཞན་ཆ་ཞིག་རེད། ང་ཚོས་རྩོམ་འབྲིའི་གནས་བབ་ལ་མཐོང་ཆེན་བྱེད་སྐབས། རྩོམ་འབྲི་བྱས་པ་ལས་བྱུང་བའི་ཤེས་ཡོན་གང་དང་གང་ཡོད་པ་དེ་ངེས་པར་དུ་རྟོགས་དགོས་ཀྱི་ཡོད་ལ། རྩོམ་ཡིག་འབྲི་མ་ཤེས་པའམ་ཡང་ན་ཡག་པོ་འབྲི་མ་ཤེས་ཚེ། ཡི་གེ་མ་ཤེས་པ་དང་ཁྱད་པར་ཆེན་པོ་མེད་པའི་ངོས་འཛིན་བྱེད་དགོས་ཀྱི་ཡོད། 

    རྒྱུ་མཚན་ངེས་གཏན་ཞིག་ནས་བཤད་ན། རྩོམ་ཡིག་འབྲི་ཤེས་པ་ཞིག་ཡིན་ཕྱིར། ད་གཟོད་ང་ཚོས་ཤེས་ཡོན་ཅན་གྱི་ཁོངས་སུ་གཏོགས་ཆོག་སྙམ་པ་དང་། དེ་ལས་ལྡོག་པ་ཞིག་སྟེ། རྩོམ་ཡིག་འབྲི་མི་ཤེས་མཁན་ཞིག་ཡིན་ཕྱིར། ཤེས་ཡོན་ཅན་གྱི་ཁོངས་སུ་གཏོགས་པར་དཀའ་ཞིང་། རྟོགས་པའི་དབང་དུ་བཏང་ནའང་རང་ཉིད་ངོ་ཚའི་རྒྱུ་ལས་མ་མཆིས། ཡི་གེ་ཤེས་ཀྱང་རྩོམ་ཡིག་འབྲི་མི་ཤེས་པ་དང་། ཡི་གེ་ཤེས་ཤིང་རྩོམ་ཡིག་ཀྱང་འབྲི་ཤེས་པའི་དབར་གྱི་ཁྱད་པར་གང་ཡོད་དམ་ཞེ་ན། དེ་ཡང་བསམ་གཞིག་གི་ནུས་པ་ཆེ་ཆུང་གཏན་ནས་མི་འདྲ་བ་དེ་ཡིན་སྙམ། རྩོམ་ཡིག་འབྲི་ཤེས་དང་མི་ཤེས་དབར་གྱི་བསམ་གཞིག་གི་ནུས་པ་གང་འདྲ་བྱས་ནས་བྱུང་བ་ཡིན་ནམ་ཞེ་ན། དེ་ཡང་རྩོམ་ཡིག་འབྲི་མཁན་གྱི་ཐོས་བསམ་རྒྱ་ཆེ་ལ་སྦྱོང་བརྡར་ནང་ཐེངས་མང་ཞུགས་ཡོད་པས་ཡིན་པ་དང་། རྩོམ་ཡིག་འབྲི་མི་ཤེས་མཁན་གྱི་ཐོས་བསམ་རྒྱ་ཆུང་ལ་ཁོང་ཚོས་རྩོམ་ཡིག་གི་ཆེད་དུ་སྨྱུ་གུ་མ་འགུལ་བའམ་ཡང་ན་ཐེངས་དང་པོ་ལེགས་གྲུབ་མ་བྱུང་བ་ཙམ་དུ་ཕྱིར་བཤོལ་བའི་ལོ་རྒྱུས་ཡོད་ངེས་པ་དེའོ། དེ་ཡང་དཔེར་ན། དཔྱིད་དུས་ཀྱི་ཕྱི་ལྗོངས་ལ་བསྔགས་པའི་ཚིག་ལྷུག་ཅིག་འབྲི་དགོས་ཚེ། ངེས་པར་དུ་དཔྱིད་རླུང་ལྡང་ཞིང་། མྱུ་གུ་འབུས་པ་དང་། འཁྱགས་རོམ་བཞུར་ནས་ས་གཞིར་བརླན་གཤེར་སླེབས་པ། སོ་ནམ་གྱི་འགག་རྩ་དཔྱིད་ལ་ཐུག་དུས་ཞིང་པས་བྱ་བ་གང་ཞིག་བྱེད་དམ། དེས་མི་རྣམས་ལ་ཚོར་སྣང་གང་འདྲ་ཞིག་སྤྲོད་ཀྱི་ཡོད་མེད་སོགས་ཀྱི་རང་བྱུང་ཁོར་ཡུག་གསར་པ་ཞིག་ཡིན་པའི་སྣང་ཚུལ་དང་བཅས་པ་འཚོལ་ཞིབ་ལེགས་པོ་བྱེད་དགོས་ཀྱི་ཡོད། རྩོམ་འབྲི་མ་བྱས་གོང་བརྗོད་དོན་རྒྱ་ཆེན་པོ་ཞིག་འཚོལ་ཐུབ་ན་རྩོམ་ཡིག་ལེགས་གྲུབ་ཡོང་ངེས་ཡིན་ལ། རྩོམ་ཡིག་གི་སྤུས་ཚད་ལ་མཚོན་ན། འཚོལ་བསྡུ་བྱས་པའི་བརྗོད་དོན་གྱི་ཁྲོད་ནས་གདམ་གསེས་མཁས་པོ་ཡོད་མེད་ལ་ཐུག་ཡོད་པ་གང་ཞིག ད་དུང་རྩོམ་གྱི་སྒྲིག་གཞི་ལེགས་མིན་དང་། བརྗོད་དོན་མཚོན་བྱེད་ཀྱི་ཚིག་སྦྱོར་ལེགས་མིན་སོགས་ཕྱོགས་མང་པོ་ཞིག་ལ་དོ་སྣང་བྱས་ཏེ་དང་དོད་ཆེན་པོ་བྱེད་དགོས་ཀྱི་ཡོད། 

    རྩོམ་ཡིག་གིས་མིའི་རིགས་ཀྱི་འཚོ་བའི་ཤེས་བྱ་གྲངས་ལས་འདས་པ་སྟོན་གྱི་ཡོད་པས། གལ་ཏེ་རྩོམ་ཡིག་ལྟ་བར་བྱང་དགོས་ན། ངེས་པར་དུ་རིང་ཐུང་ལ་མ་བལྟོས་པར་རྩོམ་ཡིག་སྣ་ཚོགས་འབྲི་ཤེས་པ་ཞིག་དགོས་ངེས་ཡིན་ལ། དེ་བཞིན་དུ་བོད་ལ་མཚོན་ན། ཆོས་ལུགས་རིག་གནས་དང་སྔོན་བྱོན་མཁས་པའི་བསྟན་བཅོས་ཆེས་མང་བའི་ཁུལ་ཞིག་ཡིན་པས། དེ་དག་ཁོང་དུ་རགས་ཙམ་ཆུད་ཐབས་བྱེད་རྒྱུ་ནི་རང་ཉིད་ཀྱི་རྩོམ་འབྲིའི་ལམ་དུ་ཞུགས་པའི་ཆ་རྐྱེན་འཚོལ་བ་ཞིག་རང་ཡིན། དེ་ཡང་དཔེར་ན། སྔོན་བྱོན་མཁས་པའི་བསྟན་བཅོས་དང་ལེགས་བཤད། སྙན་ངག་སོགས་བརྗོད་དོན་ཟབ་ལ་བརྗོད་བྱའི་ཚིག་སྦྱོར་ལེགས་པའི་རྩོམ་ཡིག་ཡིན་མོད། འོན་ཀྱང་རང་ཉིད་རྩོམ་འབྲི་མི་ཤེས་མཁན་ཞིག་ཡིན་ཕྱིན། ཡི་གེ་ཤེས་ཀྱང་བསྟན་བཅོས་དེ་རིགས་ཀློག་མི་ཐུབ་པའམ་ཀློག་ཀྱང་གོ་དོན་མི་ཤེས་པར་དཔེ་དེབ་ཀློག་རྒྱུའི་གོམ་ཁ་ཡང་རང་བཞིན་དུ་བཤོལ་མཁན་ལ་འགྱུར་སྲིད་པ་ཡིན། དེས་ན་ང་ཚོས་རྩོམ་འབྲིའི་གནས་བབ་ལ་མཐོང་ཆེན་བྱས་ཏེ་ཡི་གེ་ཤེས་པའི་རྗེས་སུ། ངེས་པར་དུ་རྩོམ་ཡིག་འབྲི་རྒྱུར་བྱང་བ་བྱེད་རྒྱུ་ནི་གལ་ཤིན་ཏུ་ཆེ། སློབ་གྲྭ་ཆུང་བའི་སློབ་མར་མཚོན་ན། སློབ་ཚན་ནང་གཏོང་ཡིག་འབྲི་སྟངས་ནས་འགོ་བཙུགས་ཏེ། རྩོམ་འབྲི་སྟངས་ཀྱི་སློབ་ཚན་བཀོད་སྒྲིག་བྱས་ཡོད་ཅིང་། གཏོང་ཡིག་འབྲི་སྟངས་ལྟ་བུ་སྟབས་བདེའི་རྩོམ་ཡིག་འབྲི་བ་དེ་ནི་རྩོམ་འབྲིར་འཇུག་པའི་བློ་སྒོ་འབྱེད་ཐབས་ཤིག་ཡིན་ལ། རྒྱུན་དུ་བརྗོད་པ་ཐུང་ངུ་བཟོ་བའི་སྦྱོང་ཚན་ཡང་རྩོམ་ཡིག་གི་རྗོད་བྱེད་ཀྱི་ཚིག་བྱང་གོམས་ཡོང་བའི་ཆེད་དུ་ཡིན་པ་དང་། དེ་བཞིན་དུ་སློབ་མར་ཉིན་ཐོ་འབྲི་རུ་འཇུག་པ་ཡང་དོན་དམ་དུ་རྩོམ་ཡིག་འབྲི་སྐབས་བདེ་བླག་ངང་འཇུག་ཐབས་བྱེད་པ་ལས་མ་འདས། གལ་ཏེ་མི་རྣམས་ཀྱིས་རྩོམ་ཡིག་འབྲི་སྟངས་རྩ་བའི་ཆ་ནས་ཤེས་གྱུར་ཚེ། ད་གཟོད་རྩོམ་ཡིག་སྤྱི་དང་བྱེ་བྲག་སྟེ། ཕ་མ་དང་དགེ་རྒན་ལ་བསྟོད་པ་དང་། དུས་རབས་ལ་བསྟོད་པ། བྱ་ངན་ལ་རྒོལ་བ་སོགས་རྩོམ་ལུས་སྣ་ཚོགས་ཀྱི་ཐོག་ནས་འབྲི་ཐུབ་ཀྱི་རེད།

    གཉིས་པ། སློབ་མའི་རྩོམ་འབྲིའི་བྱང་ཚད་ལ་ཤུགས་སྣོན་རྒྱག་པ་དེ་ནི་ཁྱོན་ཡོངས་ཀྱི་བྱང་ཚད་མཐོ་རུ་གཏོང་བ་ཞིག་ཡིན་པའི་སྐོར།

    དེ་ཡང་སློབ་ཆུང་དང་སློབ་འབྲིང་གང་རུང་དང་། ཐ་ན་སློབ་ཆེན་སློབ་མ་ཡིན་ཡང་རིང་ཐུང་ལ་མ་བལྟོས་པའི་རྩོམ་ཡིག་འབྲི་ཤེས་ཚེ། དང་ཐོག་རྩོམ་ཡིག་འབྲི་བ་དེ་ཡི་གེའི་དག་ཆ་དང་བཅས་པ་བརྡ་སྤྲོད་དང་མཐུན་པ་ཞིག་ཡོང་བར་རང་ཤུགས་སུ་ཤུགས་སྣོན་ཐེབས་ཀྱི་ཡོད་པ་དང་། དེ་དང་ཕྱོགས་མཚུངས་སློབ་མས་རྩོམ་འབྲི་བྱེད་རིང་དཔྱད་གཞི་ལྟ་བ་དང་ཕྱི་རོལ་ཡུལ་གྱི་བྱ་དངོས་ལ་ཤེས་རྟོགས་བྱེད་པ་དེས། སྤྱི་ཚོགས་ཀྱི་འཚོ་བར་རྒྱུས་ལོན་ཚད་ཟབ་ཏུ་འགྲོ་བ་དང་། དཔྱད་གཞི་སྣ་ཚོགས་ཀྱིས་གཞན་གྱི་ལེགས་ཆ་རང་ཉིད་ཀྱི་ཀླད་པར་འཇགས་པའི་དགེ་མཚན་ལྡན་ཐུབ་པ་དང་། དེ་བས་ཀྱང་ཁྱིམ་ཚང་དང་། སྤྱི་ཚོགས་ནང་ཐོན་པའི་འགལ་ཟླ་དང་། ཞི་མཐུན་སོགས་བརྗོད་དོན་གང་རུང་འབྲི་བ་དེས་སློབ་ཚན་གྱི་ཁྱབ་ཁོངས་ལས་བརྒལ་བའི་ཤེས་བྱ་ཕུན་སུམ་ཚོགས་པོ་བློར་ངེས་པའི་ཕན་པ་ཡོད་ཅིང་། ད་དུང་རྩོམ་ཡིག་འབྲི་བཞིན་དུ་དེར་དབྱིངས་ཞུགས་ཏེ་ཕྱི་རོལ་ནས་བྱ་དངོས་གསར་པ་ཞིག་མཐོང་མ་ཐག་རྩོམ་འབྲི་རྒྱུའི་བསམ་བློ་འཁོར་བའི་ཤུགས་རྐྱེན་བཟང་པོ་ཞིག་ཐེབས་ཐུབ་ཀྱི་ཡོད། ང་ཚོས་ཕུལ་བྱུང་སློབ་མ་ཁག་གཅིག་ལ་དཔྱད་སྐབས་ཁོང་ཚོས་སྒྲུང་དེབ་མང་པོ་ལྟ་བ་དེ་ཡང་རྩོམ་འབྲིའི་བློས་བསླངས་པའི་དཔེ་ཀློག་ལ་དགའ་བའི་སྣང་ཚུལ་ཞིག་ཡིན་འདུག ཕ་མ་དང་དགེ་རྒན་གྱིས་བསྐུལ་མི་དགོས་པར་རྩོམ་ཡིག་འབྲི་མཁན་ཞིག་ཏུ་གྱུར་ཚེ། རིམ་བཞིན་གཞན་གྱི་རྩོམ་ཡིག་ལ་དཔྱད་པ་བྱེད་པ་དང་། གཞན་རྩོམ་ནས་ལེགས་ཆ་དང་ལེན་བྱེད་པའི་ནུས་པ་ལྡན་པར་འགྱུར་ངེས་ཡིན།

    རྩོམ་འབྲིས་ཁྱོན་ཡོངས་ཀྱི་བྱང་ཚད་མཐོ་རུ་གཏོང་བར་ཕན་པ་ཡོད་ཅེས་པའི་ཁྱོན་ཡོངས་དེ་ཁོ་མོས་གོང་དུ་སྨོས་པ་དེ་ཙམ་གྱིས་མི་ཚད་པར། བློ་རིག་སྤྱང་བའི་སློབ་མ་ཞིག་གིས་འཇིག་རྟེན་མི་ཡུལ་ལ་ངེས་པར་དུ་འཛོམས་དགོས་པའི་སྤྱོད་ངན་འདོར་ཐུབ་པ་དང་། ཡ་རབས་ཀུན་སྤྱོད་དར་སྤེལ་གཏོང་བར་བསམ་བློ་གཏོང་མཁན་ཞིག་ཏུ་འགྱུར་བ་སོགས་ཀྱི་ནུས་པ་ཐོན་གྱི་ཡོད། དེ་ཡང་སློབ་མས་རྩོམ་ཡིག་འབྲི་བ་དང་གཞན་རྩོམ་ལྟ་བ་དེ་ནས་ཇི་ལྟར་བྱས་ཏེ་འཇིག་རྟེན་ཀུན་མཐུན་གྱི་མི་ཞིག་བྱེད་དགོས་མིན་དང་། སྤྱོད་ལམ་གང་ཞིག་ལ་སྤྱི་ཚོགས་ཀྱིས་ངོ་རྒོལ་བྱེད་ཀྱི་ཡོད་པ། བསམ་བློ་དང་བྱ་སྤྱོད་གང་ཞིག་གི་ཐད་ནས་སྐྱེ་བོ་ཡ་རབས་ཤིག་ཏུ་འགྱུར་མིན་སོགས་ཀྱང་ཤེས་ཐུབ་པར་འགྱུར་གྱི་ཡོད། དེའི་ཐད་ང་ཚོས་གནད་དོན་འདི་འདྲ་ཞིག་གི་ཐོག་ནས་བསམ་གཞིག་བྱེད་ཆོག་པ་སྟེ། དེའང་སྤྱིར་གངས་ལྗོངས་ཀྱི་ལོ་རྒྱུས་ཐོག་དང་བྱེ་བྲག་ཏུ་འཛམ་གླིང་ས་གནས་གང་དང་མི་རིགས་གང་གི་ཁྲོད་དུ་བརྟག་ཀྱང་བྱེད་ལས་ནུས་པ་ལྡན་པ་དང་། གྲུབ་འབྲས་ཕུལ་དུ་བྱུང་བ་གཏོད་མཁན་ཕལ་མོ་ཆེ་ནི་ཤེས་ལྡན་པ་ཡིན་པ་དང་། ཤེས་ལྡན་པས་ཤེས་ཡོན་ཡང་དག་པའི་སྒོ་ནས་བེད་སྤྱོད་བྱས་པ་ཤ་སྟག་ཡིན་ལ། ཤེས་ཡོན་ཡང་དག་པར་སྤྱོད་པའི་སྔོན་འགྲོའི་བསམ་བློ་ནི་དཔེ་དེབ་ལ་བརྟེན་པ་དང་། རང་གི་མཐོང་ཐོས་མྱོང་གྲུབ་ལ་བརྟེན་ནས་འཆད་རྩོད་རྩོམ་ལ་ཞུགས་པ་དང་། དེའི་དབང་གིས་ཐོས་བསམ་རྒྱ་ཆེར་སོང་བ་ཞིག་ཡིན་པ་ནི་ཟུར་བལྟས་ལེབ་མཐོང་ཡིན་པ་གསལ་བཤད་ཡོང་གི་ཡོད་པ་དེ་རེད།

    གསུམ་པ། སློབ་མའི་རྩོམ་འབྲིའི་ཆུ་ཚད་གོང་མཐོར་གཏོང་བའི་གོམ་སྟབས་མགྱོགས་སུ་གཏོང་ཐབས་སྐོར།

    སློབ་མའི་རྩོམ་འབྲིའི་ཆུ་ཚད་གོང་མཐོར་གཏོང་བའི་ཐད། སྤྱིར་ན་སློབ་གྲྭ་ཆུང་འབྲིང་གང་རུང་ལ་སློབ་དེབ་ནང་ལོ་ནའི་ཁྱད་ཆོས་དང་མཐུན་པའི་སློབ་ཚན་འོས་འཚམ་ཞིག་བཀོད་སྒྲིག་བྱས་ཡོད་མོད། འོན་ཏེ་དེ་ཁོ་ནས་ཆོག་པ་ཞིག་མིན་པར་ང་ཚོ་དགེ་རྒན་ཚོས་དངོས་ཡོད་གནས་ཚུལ་ལ་གཞིགས་ནས་རྩོམ་འབྲིའི་ཆུ་ཚད་མཐོར་གཏོང་དང་དེའི་གོམ་སྟབས་མགྱོགས་སུ་གཏོང་བར་ཐབས་ལམ་འཚོལ་ཞིབ་བྱེད་དགོས་ཤིང་། དེ་འདྲ་བྱུང་ན་དུས་བསྟུན་འཕེལ་རྒྱས་གཏོང་བའི་ལས་ཀའི་ཆོས་ཉིད་དང་ཡོངས་སུ་མཐུན་པ་ཞིག་ཏུ་འགྱུར་ངེས་ཤིང་སློབ་མས་ཀྱང་དང་ལེན་བྱེད་ཐུབ་ངེས་ཡིན།

    འོ་ན། ཐབས་ལམ་ཇི་ལྟ་བུའི་སྒོ་ནས་རྩོམ་འབྲིའི་ཆུ་ཚད་གོང་མཐོར་གཏོང་དགོས་སམ་ཞེ་ན། ཁོ་མོས་ཆེད་རྩོམ་འདིའི་ཐོག་མར་རྩོམ་འབྲིའི་དགོས་མཁོ་དང་གནས་བབ་སྐོར་གླེང་བ་བཞིན་རྩོམ་ཡིག་སློབ་ཚན་ཁྲིད་པའི་ཐོག་མར་དགེ་རྒན་གྱིས་ངེས་པར་དུ། སློབ་མ་ཚོར་ཤེས་ཡོན་སྦྱོང་བ་དེ་རྩོམ་ཡིག་འབྲི་བའི་ཆེད་དུ་ཡིན་པའི་སྐོར་གྱི་གནས་ལུགས་གལ་ཆེན་གསལ་པོ་ཤོད་དགོས་ཏེ། སློབ་མ་ཚོར་རྩོམ་ཡིག་འབྲི་མ་ཤེས་ཚེ། ཕྱིན་ཆད་སྤྱི་ཚོགས་ཐོག་རྐང་པ་བརྟན་པོ་ཞིག་འཛུགས་མི་ཐུབ་པའི་ངེས་ཤེས་རྙེད་པ་ཞིག་བྱེད་དགོས་པ་དང་། སློབ་མར་རྩོམ་འབྲི་བའི་བསམ་བློའི་ཀུན་སློང་ཟུབ་ཐབས་མེད་པ་ཞིག་སླེབས་ཕྱིན། ད་གཟོད་རྩོམ་འབྲིའི་ཕན་ཡོན་དང་། མ་ཤེས་པའི་ཉེས་སྐྱོན་སོགས་རགས་ཙམ་ཤོད་དགོས་པ་དང་། རྩོམ་ཡིག་གི་འགོ་བརྗོད་དང་། གླེང་གཞི། གཙོ་དོན། མཇུག་བྱང་སོགས་སྒྲིག་གཞི་རྣམས་སྟབས་བདེའི་ཐོག་ནས་ངོ་སྤྲོད་དང་རིམ་གྱིས་རྒྱས་བཤད་ཀྱི་ཕྱོགས་སུ་གོམ་པ་སྤོ་དགོས། དོ་སྣང་བྱེད་དགོས་པ་ཞིག་ལ། ང་ཚོས་སློབ་མ་རྣམས་རྩོམ་ལ་དབྱིངས་ཞུགས་པའི་རྒྱལ་སྒོའི་འཁྲིས་སུ་སླེབས་པ་ལྟ་བུར་གྱུར་སྐབས། ཚོད་དཔག་མཐོ་དྲགས་ནས་བརྗོད་དོན་རྙོག་འཛིང་ཆེ་བ་དང་། གོ་དོན་རྒྱ་ཆེ་བ། བརྗོད་དོན་གྱི་འགལ་ཟླ་རྒྱ་ཆེ་བ་སོགས་གླེང་མི་རུང་བར། འགོ་འཛུགས་བདེ་བ་དང་། བརྒྱུད་རིམ་མང་མ་དྲགས་པ། མཇུག་འགྲིལ་བདེ་བ་བཅས་ཀྱི་རྩོམ་གཞི་ལུང་དུ་འདྲེན་དགོས། དཔེར་ན། འགོ་བརྗོད་དུ། “དཔྱིད་དུས”ཞེས་པ་ལྟ་བུ་ཞིག་བཏོན་རྗེས་སློབ་མར་དཔྱིད་དུས་ནི་ལོ་གསར་པ་ཞིག་གི་ནམ་ཟླའི་ཐོག་མ་ཡིན་པ་དང་། དཔྱིད་དུས་དེར་རྩི་ཤིང་ལ་སོགས་རྐང་འཐུང་ཡོངས་རྫོགས་ལང་ཚོ་དར་བའི་དུས་ཡིན་པ། དཔྱིད་ཀྱི་དྲོད་དང་བདེ་བས་བྱ་བྱིའུ་ཐམས་ཅད་གཉིད་ལས་སད་པ་ལྟར་ཐོན་ཞིང་གྲེ་འགྱུར་དབྱངས་སྙན་སྒྲོག་པ། ཕྱི་འཇིག་རྟེན་ཁམས་ཀྱི་ཉམས་འགྱུར་གསར་རྐྱང་དེས་མི་རྣམས་ཀྱི་བློ་ལ་རེ་བ་གསར་པ་སྦྱིན་ལུགས་དང་། དཔྱིད་ཀར་རེ་ཞིང་རང་ཉིད་ཀྱིས་འབད་བརྩོན་བྱེད་རྒྱུ་སོགས་འབྲི་དགོས་ལུགས་སྟོན་དགོས་པ་དང་། དེ་བཞིན་དུ་དཔྱིད་དུས་ནི་སྐྱེ་དངོས་ཐམས་ཅད་ཀྱི་འགོ་འཛུགས་ས་གསར་པ་ཞིག་ཡིན་པ་ལྟར། སློབ་མ་རང་ཉིད་ཀྱི་ལང་ཚོ་ཡང་དཔྱིད་དུས་ཀྱི་གསོན་ཤུགས་ལ་སྦྱར་ཏེ་རིག་པ་གཞོན་པའི་དུས་ནས་ཤེས་བྱའི་གནས་ལ་འབད་འབུངས་ལྷོད་མེད་བྱེད་དགོས་པའི་ཚུལ་སྟབས་བདེ་འགོད་དུ་འཇུག་པའི་སློབ་ཁྲིད་ཀྱི་ཐབས་ལམ་དུ་ཞུགས་དགོས་པ་དང་། དེ་མིན་དཔྱིད་དུས་ཀྱི་སྐོར་ནས་དགེ་རྒན་ཚོས་སློབ་མར་དཔྱིད་དུས་ནི་ལོ་ལྟར་འཆར་རྒྱུ་ཡོད་པ་ཞིག་དང་། གཞོན་ནུའི་ལང་ཚོ་ནི་མི་ཚེ་གཅིག་ལ་ཐེངས་གཅིག་ཡིན་པ་གསལ་བཤད་བྱས་ཏེ་རང་ཉིད་ཀྱི་ལང་ཚོའི་རིན་ཐང་ཡང་རྩོམ་འབྲིའི་ཁྲོད་ནས་ཤེས་ཐུབ་པ་དང་། དེ་ལྟར་ཤེས་ནས་རྩོམ་འབྲིའི་བྱང་ཚད་དང་གོང་མཐོར་གཏོང་བའི་གོམ་སྟབས་མགྱོགས་སུ་གཏོང་ཐབས་བྱེད་དགོས་ཀྱི་ཡོད། 

    སློབ་མའི་རྩོམ་འབྲིའི་ཆུ་ཚད་གོང་མཐོར་གཏོང་བར་རྩོམ་འབྲི་རུ་འཇུག་པ་ཕུད། ད་དུང་ཆུ་ཚད་མཐོར་འདེགས་ལ་ཕན་པའི་བྱེད་ཐབས་དཔེར་ན། ཕུལ་དུ་བྱུང་བའི་རྩོམ་ཡིག་ཐེངས་མང་ལྟ་ཀློག་བྱེད་དུ་འཇུག་པ་དང་ཕྱོགས་མཚུངས་དགེ་རྒན་ཚོས་རང་བློས་གང་དཔོག་གིས་རྩོམ་ཡིག་གང་དེའི་བརྗོད་དོན་གཙོ་བོ་གང་ཡིན་དང་། རྩོམ་ཡིག་དེ་རྩོམ་དགོས་པའི་བསམ་བློའི་རང་བཞིན་དང་། ཚིག་སྦྱོར་ལ་སོགས་པའི་སྒྱུ་རྩལ་གྱི་རང་བཞིན། སྒྲིག་གཞི་ཇི་ལྟར་གྲུབ་ཚུལ་སོགས་ལ་འགྲེལ་བཤད་བརྒྱབ་ནས། སློབ་མ་ཚོ་ལྟ་ཀློག་གི་དབྱིངས་སུ་ཚུད་ཐབས་བྱེད་དགོས་པ་དང་། དེ་བཞིན་སློབ་མས་བྲིས་པའི་རྩོམ་ཡིག་ལ་དགེ་རྒན་གྱིས་ལེགས་པར་བརྟག་ཅིང་བཟོ་བཅོས་དགོས་སར་བཟོ་བཅོས་བྱེད་པ་དང་ཆབས་ཅིག་བཅོས་དགོས་པའི་རྒྱུ་མཚན་བཤད་གསལ་བཤད་བྱེད་དགོས། ཡང་སློབ་མས་བྲིས་པའི་རྩོམ་ཡིག་གི་བརྗོད་དོན་མཚོན་སྟངས་དང་། རྗོད་བྱེད་ཚིག་སྦྱོར། དག་ཆ་སོགས་ཀྱི་ཐད་ལའང་ཆ་ཚང་ལེགས་པོ་ཡོད་སར་དམིགས་འཛུགས་ཀྱིས་བསྟོད་བསྔགས་བཏང་སྟེ། ཁོང་ཚོའི་སེམས་ནུས་དེ་སློབ་ཚན་ཁྲིད་དུས་ཙམ་མིན་པར་དུས་རྟག་ཏུ་རྩོམ་ཡིག་འབྲི་བའི་ཐོག་སླེབས་ཐབས་བྱེད་དགོས་ཀྱི་ཡོད། 

    སློབ་མ་ཕན་ཚུན་འགྲན་བསྡུར་བྱེད་དུ་འཇུག་པ་དེ་ཡང་སློབ་མའི་རྩོམ་འབྲིའི་ཆུ་ཚད་གོང་མཐོར་གཏོང་བའི་ཐབས་ལམ་གཞན་ཞིག་ཡིན་ཏེ། ཕན་ཚུན་འགྲན་སེམས་ཡོད་པ་དེས་སློབ་མར་གཞན་གྱིས་ཚབ་བྱེད་ཐབས་བྲལ་བའི་སྐུལ་ལྕག་ཡོང་གི་ཡོད་པས་ཡིན། འོན་ཀྱང་ཁོ་མོ་ལྟར་ན། སློབ་མ་ཕན་ཚུན་འགྲན་བསྡུར་བྱེད་སྐབས་དགེ་རྒན་གྱིས་རྩོམ་ཡིག་གི་བརྗོད་དོན་དེ་གཅིག་གྱུར་ཞིག་འདོན་དགོས་པ་སྟེ། དཔེར་ན། “རླབས་ཆེན་མེས་རྒྱལ”ཞེས་པ་ལྟ་བུ་ཞིག་བཏོན་ནས་དེར་སློབ་མ་སོ་སོས་རླབས་ཆེན་མེས་རྒྱལ་ཇི་ལྟར་འབྲི་མིན་བསྡུར་དགོས་པ་དེ་ཡིན། གལ་སྲིད་འགྲན་བསྡུར་བྱེད་གཞིའི་རྩོམ་ཡིག་གི་བརྗོད་གཞི་གཅིག་གྱུར་ཞིག་མ་བྱུང་ཚེ། འགྲན་བསྡུར་གྱི་རྩོམ་ཡིག་ལེགས་ཞན་དབྱེ་འབྱེད་བྱེད་དཀའ་བའི་ཕྱིར། འགྲན་བསྡུར་གྱི་ཐབས་ཤེས་དེ་ལྟ་བུ་སྤྱད་པ་བརྒྱུད། དགེ་རྒན་ཁ་ཤས་ཀྱིས་མཉམ་དུ་ཞིབ་དཔྱོད་བྱེད་དགོས་པ་དང་། ལེགས་ཞན་དབྱེ་ཟིན་རྗེས་རྩོམ་ཡིག་ལེགས་ཞན་སོ་སོར་དཔྱད་བརྗོད་ཐུང་ངུ་རེ་ཡོད་དགོས་ཤིང་། དེས་སློབ་མར་ཡར་སྐུལ་ཤུགས་ཆེན་ཡོང་ངེས་ལ་དེའི་ཐོག་ནས་དགེ་རྒན་གྱིས་སློབ་མའི་རྩོམ་འབྲིའི་ཤུགས་སྣོན་རྒྱག་པའི་འགན་སེམས་ཀྱང་མངོན་ཐུབ།

    (ལྷ་ས་གྲོང་ཁྱེར་ཁྲེང་ཀོན་ཆུས་སློབ་ཆུང་གཉིས་པ། པ་སངས་སྒྲོལ་དཀར)

    --    --

    འགན་འཁུར་རྩོམ་སྒྲིག་པ། ཉི་ཆོས།