[ English ] [ 中文 ]
0891-6325020
དབུ་ཤོག>ཚན་སློབ་འཕྲོད་བསྟེན།>སློབ་གསོའི་གསར་འགྱུར།
  • གཞན་ཕན་ལྷག་བསམ་དཀར། ངལ་བ་དང་དུ་བླངས།

    —— ལྷ་ས་གྲོང་ཁྱེར་ཚོད་ལྟའི་སློབ་ཆུང་གི་དགེ་རྒན་སྤེན་པ་དབང་འདུས་ཀྱི་སྐོར་བཀོད་པ།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2019-10-06

    662831_yis_1568869281340.jpg

    འདི་ནི་རྒན་སྤེན་པ་དབང་འདུས་ཀྱིས་སློབ་མའི་སྦྱོང་ཚན་བཅོས་བཞིན་པ།

    སློབ་གསོའི་འཐབ་ས་མདུན་མར་ཕྱག་ལས་གནང་བཞིན་པའི་དགེ་རྒན་གྱི་ཉིན་གཅིག་གི་འཚོ་བ་དང་ལས་ཀར་རྒྱུས་ལོན་བྱ་ཆེད། ཉེ་ཆར། གསར་འགོད་པས་ཆེད་མངགས་ལྷ་ས་གྲོང་ཁྱེར་ཚོད་ལྟའི་སློབ་ཆུང་གི་སློབ་གསོའི་གྲོང་གི་ཡན་ལག་སློབ་གྲྭར་བསྐྱོད་དེ། སློབ་གྲྭ་དེའི་སློབ་དཔྱོད་ཁང་གི་ཀྲུའུ་རེན་རྒན་སྤེན་པ་དབང་འདུས་ལགས་ལ་བཅར་འདྲི་ཞུས་པ་ཡིན།

    ཞག་སྡོད་སློབ་གྲྭ་ཞིག་གི་འཛིན་བདག་ཡིན་པའི་ངོས་ནས། རྒན་སྤེན་པ་དབང་འདུས་ལགས་ཀྱིས་དུས་དང་རྣམ་པ་ཀུན་ཏུ་སློབ་མ་ཚོར་རང་གི་ཤ་ལས་མཆེད་པའི་ཕྲུ་གུ་ལྟ་བུའི་བྱམས་སེམས་བཅངས་ཏེ། ཉིན་ལྟར་ཞོགས་སྔ་ལངས་དང་དགོང་ཕྱི་ཉལ་གྱིས་སློབ་མའི་འཚོ་བ་དང་སེམས་ཁམས་ལ་ཐུགས་ཁུར་ཟབ་བཞེས་གནང་གི་ཡོད། དེས་ན། ཕྲུ་གུའི་ཉལ་ཁང་དང་། ལུས་རྩལ་ཐང་། སློབ་ཁང་སོགས་ཕྱོགས་གང་སར་ཁོང་གིས་ཕྲུ་གྲུ་ཚོར་བྱམས་བརྩེའི་བཀའ་མོལ་དང་། ཁམས་བདེའི་འཚམས་འདྲི། ཤ་ཚའི་སློབ་གསོ་གནང་བ་ཡང་ཡང་མཐོང་རྒྱུ་ཡོད། གསར་འགོད་པ་རྒན་ལགས་ཀྱི་སློབ་ཁྲིད་བྱེད་ཡུལ་འཛིན་གྲྭར་སྐྱོད་སྐབས། སློབ་མ་མང་པོས། རྒན་ལཌ་ཀྱིས་རྣམ་ཀུན་ང་ཚོའི་ཆེད་དུ་སྐུ་ལས་ཧ་ཅང་མང་པོ་སྐྱོན་གྱི་ཡོད་ལ། ང་ཚོར་ཕ་མ་ལྟ་བུའི་བྱམས་སྐྱོང་གནང་གི་ཡོད། བྱས་ཙང་ང་ཚོ་ཁོང་གི་སློབ་ཚན་ལ་དགའ་པོ་ཡོད་པ་མ་ཟད། ཁོང་རང་ཉིད་ལའང་ཧ་ཅང་དགའ་པོ་ཡོད་ཅེས་མ་གྲོས་གཅིག་མཐུན་ངང་བརྗོད་བཞིན་འདུག

    དགེ་བའི་བཤེས་གཉེན་ཞིག་ཡིན་པའི་ངོས་ནས། སློབ་ཁྲིད་མ་བྱས་གོང་། ཁོང་གིས་ཁྲིད་བྱའི་བསླབ་གཞིར་ནན་གྱིས་ཞིབ་འཇུག་གནང་ཐོག ཁྲིད་བྱའི་ཡུལ་གྱི་སློབ་མའི་དོན་དངོས་དང་ཟུང་དུ་འབྲེལ་ནས་ཁྲིད་ཟིན་འབྲི་བ་དང་། སློབ་ཁྲིད་དངོས་སུ་གནང་སྐབས་སློབ་དེབ་སྒྲོག་སྦྱངས་བྱེད་པ་སོགས་ཀྱི་སྐྱོན་རིང་དུ་དོར་ནས། གསོན་ཉམས་དོད་ལ་ཆོབ་ཚ་བའི་སྐད་ཆར་བརྟེན་ནས་སློབ་ཁྲིད་གནང་གི་ཡོད་སྟབས། རྟག་ཏུ་སློབ་ཁྲིད་ཀྱི་ཕན་འབྲས་ཧ་ཅང་ལེགས་པོ་ཐོན་བཞིན་ཡོད། ཡང་སློབ་ཚན་ཁྲིད་ཚར་རྗེས། ཁོང་གིས་གཙིགས་སྣང་ཆེན་པོས་ཕྲུ་གུའི་སྦྱོང་ཚན་ལེགས་པར་བཅོས་ལ། སློབ་ཁྲིད་ཁྲོད་དུ་ཐོབ་པའི་ཉམས་མྱོང་ལ་ཕྱོགས་སྡོམ་གང་ལེགས་དང་། ལྷག་པའི་གནད་དོན་ལ་བསམ་གཞིག་གཏིང་ཟབ་གནང་གི་ཡོད།

    “ཁོང་ནི་དུས་རྒྱུན་ནས་སློབ་ཁྲིད་ཀྱི་ལས་ཀར་ཧུར་བརྩོན་ཆེ་བ་མ་ཟད། འཛིན་གྲྭའི་སློབ་མ་ཡོངས་ལ་འགན་སེམས་ཧ་ཅང་ཆེན་པོ་ཡོད”ཅེས་སློབ་གྲྭའི་ཀུན་སྤྱོད་སློབ་གསོ་ཁང་གི་ཀྲུའུ་རེན་ཉི་མ་ཕུན་ཚོགས་ལགས་ཀྱིས་གསུང་གི་འདུག

    2009ལོར་རྒན་སྤེན་པ་དབང་འདུས་ལགས་ལྷ་ས་དགེ་འོས་ཆེད་ཚན་སློབ་གླིང་ནས་ཐོན་པ་ནས་བཟུང་། སྔ་རྗེས་སུ་ཁོང་ལ་སློབ་གྲྭ་རིམ་པའི་སློབ་ཁྲིད་འགྲན་བསྡུར་ནང་བྱ་དགའ་དང་པོ་ཁག་གཉིས་དང་གཉིས་པ་གཅིག་ཐོབ་པ་དང། ཁྲེང་ཀོན་ཆུས་རིམ་པའི་སློབ་ཁྲིད་འཆར་འགོད་འགྲན་བསྡུར་དང་སློབ་ཁང་སློབ་ཁྲིད་འགྲན་བསྡུར་ནང་བྱ་དགའ་རིམ་པ་དང་པོ་དང་གསུམ་པ་བཅས་ཐོབ་མྱོང་། དེ་བཞིན་རིམ་པ་མི་འདྲ་བའི་ཡིག་གཟུགས་འགྲན་བསྡུར་དང་། རྩོམ་ཡིག་གྱེར་འདོན་སོགས་ཀྱི་འགྲན་བསྡུར་ནང་དུ་ཡང་བྱ་དགའ་མི་ཉུང་བ་ཐོབ་ཡོད། གཞན་ཡང་། ཁོང་2013ལོར་དགེ་རྒན་གྱི་ཀུན་སྤྱོད་དཔེ་བཟང་བ་དང་། 2015ལོར་མི་རིགས་མཐུན་སྒྲིལ་གྱི་སྔོན་ཐོན་མི་སྒེར། 2019ལོར་སྔོན་ཐོན་སློབ་གསོའི་ལས་དོན་པ་སོགས་ལ་བདམས་འདུག

    གཟེངས་བསྟོད་དང་གཟི་བརྗིད་མཚན་སྙན་འདི་དག་ལས་ཀྱང་ཁོང་ནི་སློབ་ཁྲིད་ཀྱི་ལས་ལ་ཧུར་བརྩོན་ཆེ་བ་མ་ཟད། མི་རིགས་ཁག་དབར་མཐུན་སྒྲིལ་ཟབ་པ། སློབ་ཁྲིད་ཙམ་མ་ཟད། ཁྱབ་ཁོངས་གཞན་ལའང་འབྲས་བུ་ལེགས་པར་ཐོབ་པ་ཟུར་བལྟས་ལེབ་མཐོང་རེད་འདུག

    མཚན་མོའི་ཆུ་ཚོད་བཅུ་པ་ཟིན་པ་དང་སྦྲགས། ཉལ་ཁང་གི་གློག་བསད་པས་སློབ་མ་རྣམས་རྨི་ལམ་གྱི་ཞིང་ཁམས་སུ་ཆས། དེས་ན། རྒན་སྤེན་པ་དབང་འདུས་ལགས་ཀྱིས་གཞི་ནས་ཉིན་གཅིག་གི་སློབ་གསོ་སློབ་ཁྲིད་ཀྱི་འཚོ་བར་རྗོགས་ཤད་ཅིག་བརྒྱབ་ཅིང་། ཁོང་གིས་ལྷོད་ལ་བབས་པའི་དབུགས་རིང་ཞིག་གཏོང་ཞོར་དུ་སློབ་གསོ་སློབ་ཁྲིད་ཀྱི་འཐབ་ས་མདུན་མར་ཞུགས་བཞིན་པའི་དགེ་རྒན་ནམ་འཛིན་བདག་ཚོའི་འཚོ་བ་ཕལ་ཆེར་འདི་འདྲ་རེད་ཅེས་གསུང་གི་འདུག

    --    --

    འགན་འཁུར་རྩོམ་སྒྲིག་པ། བདེ་སྐྱིད་བུ་ཁྲིད།