[ English ] [ 中文 ]
0891-6325020
དབུ་ཤོག>ཁྲིམས་ལུགས།>རྒྱལ་ནང་གསར་འགྱུར།
  • མིག་སྔར་རང་རྒྱལ་གྱི་འཛད་སྤྱོད་ཁྲོམ་རའི་སྤྱི་ཡོངས་ཀྱི་འཁོར་སྐྱོད་བརྟན་པོ་ཡོད་པ།

  • ཡོང་ཁུངས།   ཀྲུང་གོའི་བོད་ཀྱི་གསར་འགྱུར་དྲ་བ།    |    རྩོམ་པ་པོ།      |    སྤེལ་དུས།   2019-09-24

    མིག་སྔར། རང་རྒྱལ་གྱི་འཛད་སྤྱོད་ཁྲོམ་རའི་སྤྱི་ཡོངས་ཀྱི་འཁོར་སྐྱོད་བརྟན་པོ་ཡོད་པ་དང་། རྒྱལ་ཁབ་བསྡོམས་རྩིས་ཅུས་ཀྱི་གྲངས་གཞི་ལ་གཞིགས་ན། ཟླ་8པར་རྒྱལ་ཡོངས་ཀྱི་སྤྱི་ཚོགས་འཛད་རྫས་ཀྱི་སིལ་ཚོང་དངུལ་འབོར་སྒོར་དུང་ཕྱུར་ཁྲི་3.4ཟིན་པ་དེ་དུས་མཚུངས་ལས་7.5%འཕར་བ་དང་། འཕར་ཚད་ཟླ་སྔོན་མ་དང་བསྡུར་ན་བརྒྱ་ཆའི་གྲངས་0.1ཆག་པ་དང་། རླངས་འཁོར་ཕུད་པའི་འཛད་རྫས་ཀྱི་སིལ་ཚོང་དངུལ་འབོར་9.3%འཕར་བ་དེ་ཟླ་སྔོན་མ་དང་བསྡུར་ན་བརྒྱ་ཆའི་གྲངས་0.5འཕར་ཡོད། ཚོང་དོན་པུས་གཙོ་གནད་ལྟ་ཞིབ་ཚད་ལེན་བྱས་པའི་སིལ་ཚོང་ཁེ་ལས་ཀྱི་ཟླ་8པའི་ཕྱིར་ཚོང་དངུལ་འབོར་དུས་མཚུངས་ལས་2.3%འཕར་བ་དང་། འཕར་ཚད་ཟླ་སྔོན་མ་དང་མཚུངས་ཡོད་པ་རེད།

    འགན་འཁུར་བས་བརྗོད་དོན། འཛད་སྤྱོད་ཁྲོམ་རར་གཙོ་བོ་གཤམ་གྱི་ཁྱད་ཆོས་ཁག་ཡོད་པ་སྟེ། གཅིག་ནི་བཟའ་བཏུང་དང་རིག་རྩལ་རོལ་རྩེད་ཀྱི་འཛད་སྤྱོད་མཐོ་རུ་ཕྱིན་པ་དང་། གཉིས་ནི་གཞི་རྩའི་འཚོ་བའི་འཛད་སྤྱོད་མཐོ་རུ་ཕྱིན་པ། གསུམ་ནི་དྲ་བའི་སིལ་ཚོང་འཕར་ཚད་མགྱོགས་སུ་ཕྱིན་པ། བཞི་ནི་འཛད་སྤྱོད་རིན་གོང་རིམ་བཞིན་འཕར་ཡོད་པ་བཅས་རེད།

    འགན་འཁུར་བས་བརྗོད་དོན། རང་རྒྱལ་གྱི་འཛད་སྤྱོད་ཁྲོམ་ར་སྤྱི་ཡོངས་སྔར་བཞིན་འཕར་བཞིན་ཡོད་པ་དང་། ཁྲོམ་རའི་གཏིང་ཤུགས་ཆེ་ལ་འཕེལ་རྒྱས་འགྲོ་ནུས་ཆེ་བ་དང་འཕེལ་རིམ་ལེགས་པས། རྒྱལ་ཁབ་ཀྱི་ཁྲལ་རིན་གཉིས་གཅོག་དང་། སྒོ་དབྱེ་རྒྱ་སྐྱེད། དམངས་འཚོ་ལེགས་གཏོང་། ཚོང་ལས་འཛད་སྤྱོད་ལ་སྐུལ་འདེད་གཏོང་བ་བཅས་ཀྱི་སྲིད་ཇུས་དང་བྱེད་ཐབས་རབ་དང་རིམ་པ་དོན་འཁྱོལ་བྱས་པ་བརྒྱུད། འཛད་སྤྱོད་ལ་སྐུལ་འདེད་གཏོང་བའི་ཕན་འབྲས་རྒྱུན་མཐུད་ཆེ་རུ་ཕྱིན་ནས་སྔོན་དཔག་བྱས་ན། དུས་མཇུག་གི་འཛད་སྤྱོད་བརྟན་པོའི་ངང་འཕར་བའི་རྣམ་པ་མུ་མཐུད་རྒྱུན་འཁྱོངས་ཐུབ་རྒྱུ་རེད།

    --    --

    འགན་འཁུར་རྩོམ་སྒྲིག་པ། སྐལ་བཟང་གྲགས་པ།