[ English ] [ 中文 ]
0891-6325020
དབུ་ཤོག>ཁྲིམས་ལུགས།>བཅའ་ཁྲིམས་རྒྱུན་ཤེས།
  • ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས།

  • ཡོང་ཁུངས།   ཤིན་ཧྭ་གསར་འགྱུར་ཁང་།    |    རྩོམ་པ་པོ།      |    སྤེལ་དུས།   2017-05-31

    ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཀྲུའུ་ཞིའི་བཀའ་རྒྱ།

    ཡིག་ཨང་ང་གསུམ་པ།

    《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས》འདི་2016ལོའི་ཟླ་11ཚེས་7ཉིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉེར་བཞི་པའི་ཐོག་གྲོས་འཆམ་བྱུང་དོན་བཞིན་ད་ལྟ་ཁྱབ་བསྒྲགས་བྱེད་རྒྱུ་དང་།  2017ལོའི་ཟླ་6ཚེས་1ཉིན་ནས་བཟུང་ལག་བསྟར་བྱེད་རྒྱུ།

    ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཀྲུའུ་ཞི། ཞི་ཅིན་ཕིང་།

    2016ལོའི་ཟླ་11ཚེས་7ཉིན།

    ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དྲ་རྒྱའི་བདེ་འཇགས་བཅའ་ཁྲིམས།

    (2016ལོའི་ཟླ་11ཚེས་7ཉིན་རྒྱལ་ཡོངས་མི་དམངས་འཐུས་མི་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཚོགས་འདུ་ཐེངས་ཉེར་བཞི་པའི་ཐོག་གྲོས་འཆམ་བྱུང་བ)

    དཀར་ཆག

    ལེའུ་དང་པོ། སྤྱིའི་རྩ་དོན།

    ལེའུ་གཉིས་པ།དྲ་རྒྱའི་བདེ་འཇགས་ལ་རྒྱབ་སྐྱོར་དང་སྐུལ་འདེད་གཏོང་ཕྱོགས།

    ལེའུ་གསུམ་པ།དྲ་རྒྱའི་འཁོར་རྒྱུག་བདེ་འཇགས།

    ས་བཅད་དང་པོ། སྤྱིར་བཏང་གི་གཏན་འབེབས།

    ས་བཅད་གཉིས་པ། འགག་རྩའི་ཆ་འཕྲིན་གྱི་རྨང་གཞིའི་སྒྲིག་བཀོད་ཀྱི་འཁོར་རྒྱུག་བདེ་འཇགས།

    ལེའུ་བཞི་པ།དྲ་རྒྱའི་ཆ་འཕྲིན་བདེ་འཇགས།

    ལེའུ་ལྔ་པ།  ལྟ་ཞིབ་ཚད་ལེན་གྱིས་སྔོན་བརྡ་དང་འཕྲལ་སྡོམ་ཐག་གཅོད་བྱེད་ཐབས།

    ལེའུ་དྲུག་པ།བཅའ་ཁྲིམས་ཀྱི་འགན་འཁྲི།

    ལེའུ་བདུན་པ།ཞར་བྱུང་།

    ལེའུ་དང་པོ། སྤྱིའི་རྩ་དོན།  

    དོན་ཚན་དང་པོ།  དྲ་རྒྱའི་བདེ་འཇགས་འགན་ལེན་བྱས་ཏེ། དྲ་རྒྱའི་བར་མཐོངས་ཀྱི་བདག་དབང་དང་།   རྒྱལ་ཁབ་ཀྱི་བདེ་འཇགས།  སྤྱི་ཚོགས་ཀྱི་སྤྱི་པའི་ཁེ་ཕན་བཅས་སྲུང་སྐྱོང་བྱེད་རྒྱུ་དང་། སྤྱི་དམངས་དང་། ཁྲིམས་ཚན། རྩ་འཛུགས་གཞན་དག་བཅས་ཀྱི་ཁྲིམས་མཐུན་ཁེ་དབང་སྲུང་སྐྱོང་བྱེད་རྒྱུ། དཔལ་འབྱོར་དང་སྤྱི་ཚོགས་ཆ་འཕྲིན་ཅན་དུ་སྐྱོན་བྲལ་ངང་འཕེལ་རྒྱས་འགྲོ་བར་སྐུལ་འདེད་གཏོང་རྒྱུ་བཅས་ཀྱི་ཆེད་དུ་བཅའ་ཁྲིམས་འདི་བཟོས་པ་ཡིན།

    དོན་ཚན་གཉིས་པ།  ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་ནང་དྲ་རྒྱ་འཛུགས་སྐྱོང་དང་། ལས་གཉེར། སྲུང་སྐྱོང་། བེད་སྤྱོད་བཅས་བྱེད་པ་དང་། དེ་བཞིན་དྲ་རྒྱའི་བདེ་འཇགས་ལ་ལྟ་སྐུལ་དོ་དམ་བྱེད་པར་བཅའ་ཁྲིམས་འདི་སྤྱོད་རྒྱུ།

    དོན་ཚན་གསུམ་པ།  རྒྱལ་ཁབ་ནས་དྲ་རྒྱའི་བདེ་འཇགས་ཆ་འཕྲིན་ཅན་དུ་འཕེལ་རྒྱས་གཏོང་རྒྱུ་དང་གལ་ཆེ་མཉམ་འཛིན་བྱེད་རྒྱུ་མཐའ་འཁྱོངས་བྱས་ཏེ།  བེད་སྤྱོད་ཧུར་ཐག་དང་། ཚན་རིག་དང་མཐུན་པའི་འཕེལ་རྒྱས། ཁྲིམས་ལྟར་དོ་དམ། བདེ་འཇགས་འགན་ལེན་བཅས་བྱེད་པའི་མཛད་ཕྱོགས་ལ་བརྩི་སྲུང་ཞུས་ནས་དྲ་རྒྱའི་རྨང་གཞིའི་སྒྲིག་བཀོད་འཛུགས་སྐྲུན་དང་མཉམ་འབྲེལ་མཉམ་མཐུད་ཡོང་བར་སྐུལ་འདེད་གཏོང་བ་དང་། དྲ་རྒྱའི་ལག་རྩལ་གསར་གཏོད་དང་བཀོལ་སྤྱོད་བྱེད་རྒྱུར་སྐུལ་མ་གཏོང་བ། དྲ་རྒྱའི་བདེ་འཇགས་ཐད་ཀྱི་ཤེས་ལྡན་མི་སྣ་གསོ་སྦྱོང་བྱེད་རྒྱུར་རྒྱབ་སྐྱོར་བྱེད་པ། དྲ་རྒྱའི་བདེ་འཇགས་འགན་ལེན་མ་ལག་འཛུགས་པ་དང་འཐུས་སྒོ་ཚང་དུ་གཏོང་བ། དྲ་རྒྱའི་བདེ་འཇགས་སྲུང་སྐྱོབ་བྱེད་ནུས་ཆེ་རུ་གཏོང་བ་བཅས་བྱེད་རྒྱུ།

    དོན་ཚན་བཞི་པ། རྒྱལ་ཁབ་ནས་དྲ་རྒྱའི་བདེ་འཇགས་འཐབ་ཇུས་བཟོ་བ་དང་འབྲེལ་རྒྱུན་ཆད་མེད་པར་འཐུས་སྒོ་ཚང་དུ་བཏང་སྟེ་དྲ་རྒྱའི་བདེ་འཇགས་འགན་ལེན་བྱེད་པའི་གཞི་རྩའི་བླང་བྱ་དང་གཙོ་བོའི་དམིགས་ཚད་ཁ་གསལ་བཟོ་རྒྱུ་དང་། གཙོ་གནད་ཁྱབ་ཁོངས་ཀྱི་དྲ་རྒྱའི་བདེ་འཇགས་ཐད་ཀྱི་སྲིད་ཇུས་དང་། ལས་འགན། བྱ་ཐབས་བཅས་འདོན་རྒྱུ།

    དོན་ཚན་ལྔ་པ།  རྒྱལ་ཁབ་ནས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མངའ་ཁོངས་ཕྱི་ནང་གི་དྲ་རྒྱའི་བདེ་འཇགས་ཀྱི་ཉེན་ཁ་དང་འཇིགས་སྐུལ་ལ་ལྟ་ཞིབ་ཚད་ལེན་དང་། འགོག་ཟོན།   ཐག་གཅོད་བཅས་བྱེད་རྒྱུའི་བྱ་ཐབས་སྤྱད་དེ་འགག་རྩའི་ཆ་འཕྲིན་གྱི་རྨང་གཞིའི་སྒྲིག་བཀོད་སྲུང་སྐྱོབ་བྱས་ནས་ཚུར་རྒོལ་དང་། བཙན་འཛུལ། འགོག་རྐྱེན། གཏོར་བཤིག་བཅས་མི་ཐེབས་པ་བྱས་ཐོག  དྲ་རྒྱའི་ཐད་ཀྱི་ཁྲིམས་འགལ་ཉེས་གསོག་གི་བྱེད་སྤྱོད་ལ་ཁྲིམས་ལྟར་ཆད་པ་བཅད་ནས་དྲ་རྒྱའི་བར་མཐོངས་ཀྱི་བདེ་འཇགས་དང་སྒྲིག་ལམ་སྲུང་སྐྱོང་བྱེད་རྒྱུ།

    དོན་ཚན་དྲུག་པ།   རྒྱལ་ཁབ་ནས་གཞུང་དྲང་ཡིད་རྟོན་དང་སྐྱོན་བྲལ་ཡ་རབས་ཀྱིས་དྲ་རྒྱ་སྤྱོད་རྒྱུ་དར་སྤེལ་གཏོང་བ་དང་། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་བརྒྱུད་གཏོང་བྱེད་རྒྱུར་སྐུལ་འདེད་གཏོང་བ། བྱ་ཐབས་སྤྱད་དེ་སྤྱི་ཚོགས་ཡོངས་ཀྱི་དྲ་རྒྱའི་བདེ་འཇགས་ཀྱི་འདུ་ཤེས་ཟབ་ཏུ་དང་ཆུ་ཚད་མཐོ་རུ་གཏོང་བ་བཅས་བྱས་ཏེ་དྲ་རྒྱའི་བདེ་འཇགས་ལ་སྐུལ་འདེད་གཏོང་བའི་ནང་སྤྱི་ཚོགས་ཡོངས་ཞུགས་པའི་ཁོར་ཡུག་བཟང་པོ་ཞིག་ཆགས་པ་བྱེད་རྒྱུ།

    དོན་ཚན་བདུན་པ།   རྒྱལ་ཁབ་ནས་དྲ་རྒྱའི་བར་མཐོངས་བཅོས་སྐྱོང་བྱེད་རྒྱུ་དང་། དྲ་རྒྱའི་ལག་རྩལ་ཞིབ་སྤེལ་དང་ཚད་གཞི་བཟོ་རྒྱུ། དྲ་རྒྱའི་ཁྲིམས་འགལ་ཉེས་གསོག་ལ་རྡུང་རྡེག་གཏོང་རྒྱུ་སོགས་ཀྱི་ཐད་རྒྱལ་སྤྱི་དང་སྤེལ་རེས་མཉམ་ལས་ཧུར་ཐག་བྱས་ནས་ཞི་བདེ་དང་། བདེ་འཇགས། སྒོ་དབྱེ། མཉམ་ལས་བཅས་ཀྱི་དྲ་རྒྱའི་བར་མཐོངས་གཏོད་རྒྱུ་དང་། ཕྱོགས་མང་དང་། དམངས་གཙོ། ཀུན་གསལ་བཅས་ཀྱི་དྲ་རྒྱའི་བཅོས་སྐྱོང་མ་ལག་འཛུགས་པར་སྐུལ་འདེད་གཏོང་རྒྱུ།

    དོན་ཚན་བརྒྱད་པ།   རྒྱལ་ཁབ་དྲ་འཕྲིན་སྡེ་ཚན་གྱིས་དྲ་རྒྱའི་བདེ་འཇགས་ལས་དོན་དང་འབྲེལ་ཡོད་ལྟ་སྐུལ་དོ་དམ་ལས་དོན་ལ་གཅིག་གྱུར་འཆར་འགོད་དང་མཐུན་སྦྱོར་བྱེད་འགན་འཁུར་རྒྱུ། རྒྱལ་སྲིད་སྤྱི་ཁྱབ་ཁང་གི་གློག་འཕྲིན་གཙོ་འགན་སྡེ་ཚན་དང་། སྤྱི་བདེ་སྡེ་ཚན། འབྲེལ་ཡོད་ལས་ཁུངས་གཞན་དག་བཅས་ཀྱིས་བཅའ་ཁྲིམས་འདི་དང་།   དེ་བཞིན་འབྲེལ་ཡོད་བཅའ་ཁྲིམས་དང་སྲིད་འཛིན་ཁྲིམས་སྲོལ་གྱི་གཏན་འབེབས་གཞིར་བཟུང་། རང་སོ་སོའི་འགན་འཁྲིའི་ཁྱབ་ཁོངས་ཀྱི་དྲ་རྒྱའི་བདེ་འཇགས་ལ་སྲུང་སྐྱོབ་དང་ལྟ་སྐུལ་དོ་དམ་བྱེད་པའི་ལས་ཀའི་འགན་འཁུར་རྒྱུ།

    རྫོང་རིམ་པ་ཡན་གྱི་ས་གནས་མི་དམངས་སྲིད་གཞུང་འབྲེལ་ཡོད་སྡེ་ཚན་གྱི་དྲ་རྒྱའི་བདེ་འཇགས་སྲུང་སྐྱོབ་དང་ལྟ་སྐུལ་དོ་དམ་བྱེད་རྒྱུའི་འགན་འཁྲི་ནི་རྒྱལ་ཁབ་ཀྱི་འབྲེལ་ཡོད་གཏན་འབེབས་གཞིར་བཟུང་གཏན་འཁེལ་བྱེད་རྒྱུ།

    --    --

    འགན་འཁུར་རྩོམ་སྒྲིག་པ། ཚེ་རིང་ཆོས་སྒྲོན།